Ո Ր Ո Շ ՈՒ Մ

21 մայիսի 2015 թվականի N 540-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2007 ԹՎԱԿԱՆԻ ՓԵՏՐՎԱՐԻ 15-Ի N 344-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 2007 թվականի փետրվարի 15-ի «Հայաստանի Հանրապետությունում ընդհանուր օգտագործման տրանսպորտային միջոցների պարտադիր տեխնիկական զննության անցկացման և դեղին հիմնագույնի համարանիշերի հատկացման կարգը հաստատելու մասին» N 344-Ն որոշման մեջ կատարել հետևյալ փոփոխությունները և լրացումը՝

1) որոշման և հավելվածի վերնագրերից ու 1-ին կետերից հանել «և դեղին հիմնագույնի համարանիշերի հատկացման» բառերը.

2) որոշման հավելվածի՝

ա. 7-րդ կետը շարադրել հետևյալ խմբագրությամբ.

«7. Տրանսպորտային միջոցները ենթակա են տեխնիկական զննության՝ օրենքով սահմանված պարբերականությամբ՝ մեկ մարդատար տաքսի-ավտոմոբիլով ուղևորափոխադրումներ իրականացնող ֆիզիկական անձանց և անհատ ձեռնարկատերերին պատկանող մարդատար-տաքսի ավտոմոբիլները պարտադիր տեխնիկական զննություն են անցնում, մինչև դրանց թողարկման տարվան հաջորդող չորրորդ տարին լրանալը` յուրաքանչյուր 2 տարին մեկ անգամ, իսկ թողարկման տարվան հաջորդող հինգերորդ տարվանից սկսած՝ տարեկան մեկ անգամ:»,

բ. 9-րդ կետի 6-րդ ենթակետը լրացնել հետևյալ բովանդակությամբ նոր նախադասությամբ.

 «Տրանսպորտային միջոցը մեկ տարվա ընթացքում երկրորդ անգամ տեխնիկական զննության ներկայացնելիս՝ պետական տուրքի վճարման անդորրագիր չի պահանջվում:»,

գ. «VII. Դեղին հիմնագույնի համարանիշերի հատկացման կարգը» գլուխն ուժը կորցրած ճանաչել:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը: