ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ

Հ Ր Ա Մ Ա Ն Ա Գ Ի Ր Ը

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻՆ ԱՌԸՆԹԵՐ ՔԱՂԱՔԱԿԱՆ ԽՈՐՀՐԴԻ ՄԱՍԻՆ

Ելնելով տնտեսական և քաղաքական բարեփոխումներին հասարակայնության մասնակցության, այդ գործընթացում պետական կառավարման մարմինների և հասարակական, հասարակական-քաղաքական կազմակերպությունների արդյունավետ փոխհամագործակցության անհրաժեշտությունից, ղեկավարվելով Հայաստանի Հանրապետության Սահմանադրության 56 հոդվածի 6-րդ կետով, որոշում եմ.

1. Ստեղծել Հայաստանի Հանրապետության Նախագահին առընթեր քաղաքական խորհուրդ:

2. Հաստատել Հայաստանի Հանրապետության Նախագահին առընթեր քաղաքական խորհրդի կանոնադրությունը (կցվում է):

3. Առաջարկել հասարակական, հասարակական-քաղաքական կազմակերպություններին (ցանկը կցվում է)` մինչև սույն թվականի հուլիսի 17-ը Հայաստանի Հանրապետության Նախագահին ներկայացնել իրենց ներկայացուցչի թեկնածությունը Հայաստանի Հանրապետության Նախագահին առընթեր քաղաքական խորհրդի սկզբնական կազմում ընդգրկելու վերաբերյալ:

4. Հայաստանի Հանրապետության Նախագահին առընթեր քաղաքական խորհրդի սկզբնական կազմը հաստատվելուց հետո այլ հասարակական, հասարակական-քաղաքական կազմակերպություններ կարող են դիմել Հայաստանի Հանրապետության Նախագահին` իրենց ներկայացուցչին խորհրդի կազմում ընդգրկելու համար:

5. Հրամանագիրն ուժի մեջ է մտնում պաշտոնական հրապարակման պահից:

Ց Ա Ն Կ

ԱՅՆ ՀԱՍԱՐԱԿԱԿԱՆ, ՀԱՍԱՐԱԿԱԿԱՆ-ՔԱՂԱՔԱԿԱՆ ԿԱԶՄԱԿԵՐՊՈՒԹՅՈՒՆՆԵՐԻ, ՈՐՈՆՑ ՆԵՐԿԱՅԱՑՈՒՑԻՉԸ ԿԱՐՈՂ Է ԸՆԴԳՐԿՎԵԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻՆ ԱՌԸՆԹԵՐ ՔԱՂԱՔԱԿԱՆ ԽՈՐՀՐԴԻ ՍԿԶԲՆԱԿԱՆ ԿԱԶՄՈՒՄ

«Ազգային ժողովրդավարական միություն» հասարակական-քաղաքական կազմակերպություն

«Ազգային ինքնորոշում միավորում» հասարակական-քաղաքական կազմակերպություն

«Երկրապահ կամավորականների միություն» հասարակական կազմակերպություն

«Հայաստանի գիտաարդյունաբերական և քաղաքացիական միություն» հասարակական-քաղաքական կազմակերպություն

«Հայաստանի դեմոկրատական կուսակցություն» հասարակական-քաղաքական կազմակերպություն

«Հայաստանի երիտասարդության ազգային խորհուրդ» հասարակական կազմակերպություն

«Հայաստանի կոմունիստական կուսակցություն» հասարակական-քաղաքական կազմակերպություն

«Հայաստանի հանրապետական կուսակցություն» հասարակական-քաղաքական կազմակերպություն

«Հայաստանի ռամկավար ազատական կուսակցություն» հասարակական-քաղաքական կազմակերպություն

Հայաստանի սոցիալական ուժերի միություն

«Հայ Յեղափոխական Դաշնակցություն» հասարակական-քաղաքական կազմակերպություն

«Հայոց համազգային շարժում» հասարակական-քաղաքական կազմակերպություն 

«Շամիրամ» հասարակական-քաղաքական կազմակերպություն

«Սահմանադրական իրավունք» միություն» հասարակական-քաղաքական կազմակերպություն

Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻՆ ԱՌԸՆԹԵՐ ՔԱՂԱՔԱԿԱՆ ԽՈՐՀՐԴԻ

1. Հայաստանի Հանրապետության Նախագահին առընթեր քաղաքական խորհուրդը (այսուհետև` Խորհուրդ) խորհրդակցական մարմին է:

2. Խորհրդի գործունեությունը կանոնակարգվում է սույն կանոնադրությամբ և իրականացվում է Հայաստանի Հանրապետության օրենսդրությանը համապատասխան:

3. Խորհրդի հիմնական խնդիրներն են`

- անցկացնել խորհրդատվություն և մշակել առաջարկություններ հանրապետության ներքին քաղաքականությանը, արտաքին քաղաքականությանը, տնտեսական և քաղաքական բարեփոխումներին առնչվող հարցերի վերաբերյալ.

- իրականացնել տնտեսական և քաղաքական բարեփոխումների վերաբերյալ պետական և տեղական ինքնակառավարման մարմինների, հասարակական, հասարակական-քաղաքական կազմակերպությունների, այլ մարմինների, քաղաքացիների և այլ անձանց կողմից առաջարկությունների ուսումնասիրությունը և ամփոփումը.

- հասարակական նշանակություն ունեցող հարցերի վերաբերյալ քաղաքական խորհրդատվության անցկացումը.

- հասարակական և քաղաքական գործընթացների վերաբերյալ Հայաստանի Հանրապետության Նախագահին իրազեկելը և համապատասխան առաջարկություններ ներկայացնելը:

4. Խորհուրդն իր առջև դրված խնդիրների լուծման համար`

- նշանակում և (կամ) իրականացնում է հետազոտություններ և ստացած առաջարկությունների փորձաքննություն.

- իր աշխատանքներում ներգրավում է գիտնականների և մասնագետների` հասարակական կարգով.

- իր աշխատանքներին օժանդակելու նպատակով կարող է ստեղծել փորձագիտական աշխատանքային խմբեր.

- Հայաստանի Հանրապետության Նախագահին կարող է ներկայացնել առաջարկություն Խորհրդի կազմը փոփոխելու վերաբերյալ:

5. Խորհրդի կազմը, կանոնադրությունը հաստատում և փոփոխում է Հայաստանի Հանրապետության Նախագահը:

6. Խորհուրդը կազմված է հասարակական, հասարակական-քաղաքական կազմակերպությունների ներկայացուցիչներին:

7. Խորհուրդն ունի գործադիր քարտուղար, որը ընտրվում է Խորհրդի կողմից, բաց քվեարկությամբ, ձայների մեծամասնությամբ:

8. Խորհրդի գործադիր քարտուղարը և անդամները Խորհրդի աշխատանքներին մասնակցում են հասարակական կարգով:

9. Խորհրդի գործադիր քարտուղարը`

- կազմակերպում է Խորհրդի աշխատանքները.

- Հայաստանի Հանրապետության Նախագահին է ներկայացնում Խորհրդի կողմից նախապատրաստված նյութերը, Խորհրդի գործունեության վերաբերյալ տեղեկատվություն, ինչպես նաև Խորհրդի աշխատանքների տարեկան հաշվետվությունը.

- ներկայացնում է Խորհուրդն այլ մարմինների, կազմակերպությունների հետ փոխհարաբերություններում:

10. Խորհրդի գործունեությունն իրականացվում է Խորհրդի նիստերի միջոցով: Ընթացիկ նիստերը գումարվում են ըստ անհրաժեշտության, բայց ոչ պակաս, քան ամիսը մեկ անգամ: Արտահերթ նիստերը գումարվում են Հայաստանի Հանրապետության Նախագահի կամ Խորհրդի անդամների մեկ երրորդի նախաձեռնությամբ:

11. Խորհրդի հրավերով Խորհրդի նիստին կարող են մասնակցել այլ անձինք:

12. Խորհրդի երաշխավորությունները և աշխատակարգային որոշումներն ընդունվում են բաց քվեարկությամբ` Խորհրդի նիստին մասնակցող անդամների ձայների մեծամասնությամբ:

Խորհրդի երաշխավորություններն ունեն խորհրդատվական բնույթ: Դրանք ստորագրվում են Խորհրդի գործադիր քարտուղարի կողմից և ներկայացվում Հայաստանի Հանրապետության Նախագահին: Եթե Խորհրդի որևէ անդամ Խորհրդի ընդունած որոշման վերաբերյալ ունի հատուկ կարծիք, ապա նրա ցանկությամբ այն գրավոր կցվում է Խորհրդի երաշխավորությանը:

13. Խորհուրդն իր աշխատանքները կազմակերպում և անցկացնում է իր կողմից ընդունված կանոնակարգին համապատասխան:

14. Հայաստանի Հանրապետության Նախագահը անձամբ կամ իր կողմից լիազորված անձանց միջոցով Խորհրդին հայտնում է իր կարծիքը Խորհրդի երաշխավորությունների վերաբերյալ:

15. Խորհուրդն ապահովում է իր աշխատանքների լուսաբանումը և հրապարակայնությունը: