ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ

Հ Ր Ա Մ Ա Ն Ա Գ Ի Ր Ը

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՇԽԱՏԱՆՔԻ ՎԱՐՁԱՏՐՈՒԹՅԱՆ ՆՎԱԶԱԳՈՒՅՆ ՉԱՓԻ, ԲՅՈՒՋԵՏԱՅԻՆ ՀԻՄՆԱՐԿՆԵՐԻ ԱՇԽԱՏՈՂՆԵՐԻ ԱՇԽԱՏԱՎԱՐՁԻ, ԿԵՆՍԱԹՈՇԱԿՆԵՐԻ, ՆՊԱՍՏՆԵՐԻ ԵՎ ԿՐԹԱԹՈՇԱԿՆԵՐԻ ՉԱՓԵՐԻ ԲԱՐՁՐԱՑՄԱՆ ՄԱՍԻՆ

Հաշվի առնելով հացի գնի և բնակչությանը իրացվող էլեկտրաէներգիայի սակագնի աճի հետևանքով բնակչության սոցիալական պաշտպանվածության լրացուցիչ միջոցառումների իրականացման անհրաժեշտությունը, որոշում եմ.

1.1994 թվականի դեկտեմբերի 1-ից Հայաստանի Հանրապետությունում աշխատավարձի նվազագույն չափը սահմանել 375 դրամ:

Նվազագույն աշխատավարձի նկատմամբ բազմապատիկ գործակցով չվարձատրվող բյուջետային հիմնարկների աշխատողների փաստացի վճարվող աշխատավարձերի չափերին (ներառյալ Հայաստանի Հանրապետության կառավարության կողմից սահմանված բոլոր տեսակի լրացուցիչ վարձատրությունները) սահմանել փոխհատուցում 930 դրամի չափով` այն ավելացնելով փաստացի աշխատավարձին:

Ժամային տարիֆային դրույքի նվազագույն չափերը սահմանել`

աշխատաժամանակի նորմալ տևողության դեպքում` 2,22 դրամ,

աշխատաժամանակի կրճատ տևողության դեպքում`

36-ժամյա աշխատանքային շաբաթ` 2,44 դրամ,

30-ժամյա աշխատանքային շաբաթ` 2,92 դրամ:

2. Նվազագույն աշխատավարձի նկատմամբ 1,0-ից մինչև 6,4 բազմապատիկ գործակցով վարձատրվող բյուջետային հիմնարկների աշխատողների աշխատավարձերին, հացի գնի և էլեկտրաէներգիայի սակագնի բարձրացման կապակցությամբ տրվող փոխհատուցման ապահովման համար սահմանել լրացուցիչ հավելումներ` համաձայն սույն հրամանագրին կից հավելվածի:

Հայաստանի Հանրապետության լուսավորության նախարարության հանրակրթական դպրոցներում, հատուկ և օժանդակ գիշերօթիկ դպրոցներում և մանկատներում աշխատող մանկավարժների բարձրացված աշխատավարձերին, ներառյալ կից հավելվածով տրվող հավելումները, սահմանել հավելում 120 դրամի չափով` այն ավելացնելով աշխատավարձին:

3. Չաշխատող և կենսաթոշակ չստացող անձանց աշխատանքային խեղման կամ մասնագիտական հիվանդության հետևանքով պատճառված վնասի փոխհատուցման գումարներին, ինչպես նաև աշխատողի մահվան դեպքում նրա ընտանիքի անդամներին տրվող փոխհատուցման գումարներին սահմանել հավելում 630 դրամի չափով:

4. «Հայաստանի Հանրապետության քաղաքացիների պետական կենսաթոշակային ապահովության մասին» Հայաստանի Հանրապետության օրենքով սահմանված բոլոր տեսակի փաստացի վճարվող կենսաթոշակների չափերին (ծնողազուրկ յուրաքանչյուր երեխային տրվող կենսաթոշակին)` հացի 350 գրամի օրական չափաբաժնի դեպքում սահմանել 930 դրամի չափով և հացի 250 գրամ օրական չափաբաժնի դեպքում` 750 դրամի չափով հավելում` ավելացնելով այն կենսաթոշակին:

«Զինծառայողների և նրանց ընտանիքների անդամների սոցիալական ապահովության մասին» Հայաստանի Հանրապետության օրենքով սահմանված բոլոր տեսակի փաստացի վճարվող կենսաթոշակների չափերին սահմանել հավելում 930 դրամի չափով` ավելացնելով այն կենսաթոշակին:

Այն անձանց, ովքեր միաժամանակ կենսաթոշակ են ստանում սոցիալական ապահովության և այլ մարմիններից, կենսաթոշակին սահմանված հավելումը տրվում է այն մարմնի կողմից, որտեղից կենսաթոշակառուն ստանում է աշխատանքային տարիքային, աշխատանքային հաշմանդամության կամ երկարամյա ծառայության կենսաթոշակ:

5. Պետական բարձրագույն ուսումնական հաստատությունների ուսանողների կրթաթոշակի չափը սահմանել 1185 դրամ, իսկ ավարտական կուրսերի ուսանողների համար` 1233 դրամ, միջնակարգ մասնագիտական ուսումնական հաստատությունների (այդ թվում` քոլեջների) սովորողների կրթաթոշակի չափը` 1090 դրամ, 10 ամսից պակաս ուսուցման տևողությամբ պրոֆեսիոնալ-տեխնիկական ուսումնարանների սովորողների կրթաթոշակի չափը` 1040 դրամ:

Պետական բարձրագույն ուսումնական հաստատությունների` քննաշրջանի արդյունքով միայն «գերազանց» գնահատականներ ունեցող ուսանողների կրթաթոշակը սահմանել 1280 դրամ: Անկախ գերատեսչական համակարգից ասպիրանտների կրթաթոշակը սահմանել 1700 դրամ, իսկ դոկտորանտներինը` 2300 դրամ:

6. Պետական բարձրագույն և միջնակարգ մասնագիտական հաստատությունների (այդ թվում` քոլեջների) բժշկական ցուցումով ակադեմիական արձակուրդում գտնվող ուսանողներին և սովորողներին վճարել նպաստ ամսական 375 դրամի չափով ուսումնական հաստատությունների հաշվին:

7. Մինչև 17 տարեկան (պետական պատվերով սովորող և կրթաթոշակ չստացող մինչև 18 տարեկան երեխաների համար, բացի 10 ամսից ավել ուսուցման տևողությամբ պրոֆեսիոնալ-տեխնիկական ուսումնարանների սովորողներից) երեխաների համար տրվող ամենամսյա նպաստների չափը սահմանել`

նպաստի իրավունք ունեցող

առաջին երեխայի համար - 450 դրամ

երկրորդ երեխայի համար - 500 դրամ

երրորդ երեխայի համար - 550 դրամ

չորրորդ երեխայի համար - 600 դրամ

հինգերորդ և յուրաքանչյուր հաջորդ երեխայի համար - 650 դրամ:

Հայաստանի Հանրապետության կառավարության կողմից հաստատված հեռավոր և սահմանամերձ բնակավայրերում նշված նպաստի չափը սահմանել`

նպաստի իրավունք ունեցող

առաջին երեխայի համար - 495 դրամ

երկրորդ երեխայի համար - 550 դրամ

երրորդ երեխայի համար - 605 դրամ

չորրորդ երեխայի համար - 660 դրամ

հինգերորդ և յուրաքանչյուր հաջորդ երեխայի համար - 715 դրամ:

8. Մինչև երեխայի 2 տարին լրանալը նրան խնամելու համար մասնակի վճարովի արձակուրդում գտնվող ծնողին տրվող ամսական նպաստի չափը սահմանել 700 դրամ:

9. Մինչև 17 տարեկան (պետական պատվերով սովորող և կրթաթոշակ չստացող մինչև 18 տարեկան երեխաների համար, բացի 10 ամսից ավել ուսուցման տևողությամբ պրոֆեսիոնալ- տեխնիկական ուսումնարանների սովորողներից) երեխաներ ունեցող միայնակ մայրերի ամենամսյա նպաստի չափը սահմանել 700 դրամ:

10. Գործազուրկի կարգավիճակ ստացած և մինչև 2 տարեկան երեխա ունեցող մայրերին երեխայի խնամքի համար վճարել նպաստ ամսական 700 դրամի չափով:

11. Երեխայի ծննդյան կապակցությամբ տրվող միանվագ նպաստի չափը սահմանել 2000 դրամ:

12. Նպաստ ստացող գործազուրկների նպաստների չափերին սահմանել հավելում 700 դրամի չափով:

13. Հայաստանի Հանրապետության կառավարությանը` մինչև 1994 թվականի դեկտեմբերի 1-ը ապահովել սույն հրամանագրով նախատեսվող բոլոր տեսակի հավելումների գումարների առաջանցիկ վճարումը:

14. 1994 թվականի դեկտեմբերի 1-ից ուժը կորցրած ճանաչել Հայաստանի Հանրապետության Նախագահի 1994 թվականի մարտի 31-ի «Հայաստանի Հանրապետությունում աշխատանքի վարձատրության նվազագույն չափի, բյուջետային հիմնարկների աշխատողների աշխատավարձի, կենսաթոշակների, նպաստների և կրթաթոշակների չափերի բարձրացման մասին» հրամանագրի 8-րդ, 9-րդ և 15-րդ կետերը, 1994 թվականի սեպտեմբերի 5-ի «Հայաստանի Հանրապետության բյուջետային հիմնարկների աշխատողների աշխատավարձի, կրթաթոշակների և որոշ նպաստների չափերի բարձրացման մասին» հրամանագրի 2-րդ և 3-րդ կետերը, սեպտեմբերի 30-ի «Հայաստանի Հանրապետությունում աշխատանքի վարձատրության նվազագույն չափի, երեխաներին տրվող նպաստների չափերի բարձրացման մասին» հրամանագրի 1-ին, 5-րդ, 6-րդ, 7-րդ, 8-րդ և 9-րդ կետերը:

15. Սույն հրամանագիրն ուժի մեջ է մտնում հրապարակման պահից:

Հայաստանի Հանրապետության Նախագահ	Լ. Տեր-Պետրոսյան
Երևան 24 նոյեմբերի 1994 թ. ՆՀ-401

Հավելված

Հայաստանի Հանրապետության նվազագույն աշխատավարձի նկատմամբ 1,0-6,4 բազմապատիկ գործակցով վարձատրվող աշխատողների պաշտոնային դրույքաչափերին սահմանվող լրացուցիչ հավելումների մասին