ՀԱՅԿԱԿԱՆ ԽՍՀ-ՈՒՄ ԱՆՀԱՏԱԿԱՆ ԲՆԱԿԱՐԱՆԱՅԻՆ ՇԻՆԱՐԱՐՈՒԹՅԱՆ ԿԱՆՈՆԱԴՐՈՒԹՅԱՆ ԵՎ ԱՆՀԱՏԱԿԱՆ ԿԱՌՈՒՑՈՂՆԵՐԻ ԸՆԿԵՐՈՒԹՅՈՒՆՆԵՐԻ ՕՐԻՆԱԿԵԼԻ ԿԱՆՈՆԱԴՐՈՒԹՅԱՆ ՄԱՍԻՆ

 

Անհատական բնակարանային շինարարության հարցերը կարգավորելու և անհատական կառուցողներին իրավական փաստաթղթերով ապահովելու նպատակով Հայկական ԽՍՀ Մինիստրների խորհուրդը որոշում է.

1. Հաստատել Հայկական ԽՍՀ-ում անհատական շինարարության մասին առդիր կանոնադրությունը:

2. Հաստատել անհատական կառուցողների ընկերությունների մասին առդիր կանոնադրությունը:

3. Ուժը կորցրած ճանաչել`

ա) Հայկական ՍՍՀ Մինիստրների խորհրդի 1981 թ. օգոստոսի 10-ի «Հայկական ՍՍՀ-ում անհատական բնակարանային շինարարության կանոնադրությունը հաստատելու մասին» N 505 որոշումը.

բ) Հայկական ՍՍՀ Մինիստրների խորհրդի 1986 թ. օգոստոսի 22-ի «Հայկական ՍՍՀ-ում անհատական բնակարանային շինարարության մասին կանոնադրության մեջ փոփոխություններ մտցնելու մասին» N 591 որոշումը:

4. Հայկական ԽՍՀ արդարադատության մինիստրությանը` մեկամսյա ժամկետում հայերեն և ռուսերեն լեզուներով հրատարակել անհատական կառուցողների համար նորմատիվային այն փաստաթղթերի ժողովածուն, որոնք որոշում են անհատական կառուցողների վարկավորման, ֆինանսավորման, շինանյութերով, շինվածքներով ու կոնստրուկցիաներով ապահովման, ինչպես նաև հանրապետությունում անհատական բնակարանային շինարարության կազմակերպման և իրականացման կարգն ու պայմանները:

 

ՀԱյկական ԽՍՀ Մինիստրների խորհրդի նախագահ

Վ. Մարգարյանց

 

ՀԱյկական ԽՍՀ Մինիստրների խորհրդի գործերի կառավարիչ

Հ. ՎԱՐԴԱՆՅԱՆ

13 հունիսի 1989 թ. N 269 Քաղ. Երևան

ՀԱՍՏԱՏՎԱԾ է Հայկական ԽՍՀ Մինիստրների խորհրդի 1989 թ. հունիսի 13-ի N 269 որոշմամբ

ՀԱՅԿԱԿԱՆ ԽՍՀ-ՈՒՄ ԱՆՀԱՏԱԿԱՆ ԲՆԱԿԱՐԱՆԱՅԻՆ ՇԻՆԱՐԱՐՈՒԹՅԱՆ

 

Կ Ա Ն Ո Ն Ա Դ Ր ՈՒ Թ Յ ՈՒ Ն Ը

 

I. Ընդհանուր դրույթներ

 

1. Յուրաքանչյուր քաղաքացի իրավունք ունի իր և իր ընտանիքի համար անձնական սեփականության իրավունքով կառուցել մեկ անհատական բնակելի տուն:

2. Անհատական բնակելի տան և տնտեսական շինությունների կառուցումն իրականացվում է տիպային նախագծերով, կրկնակի կիրառման համար Հայկական ԽՍՀ պետշինի կողմից առաջարկվող անհատական նախագծերով կամ անհատապես մշակված և սահմանված կարգով հաստատված նախագծերով, հաշվի առնելով տվյալ շրջանի սեյսմիկ պայմաններին համապատասխան տան սեյսմակայունությունը, բնական պայմանները, տեղական ավանդույթները և կառուցողների առանձին ցանկությունները:

3. Քաղաքացիների անձնական սեփականություն կարող է լինել մեկ բնակելի տուն կամ տան մի մասը: Համատեղ ապրող ամուսինները և նրանց անչափահաս երեխաները կարող են ունենալ որպես անձնական սեփականություն նրանցից մեկին պատկանող կամ նրանց ընդհանուր սեփականությունը կազմող միայն մեկ բնակելի տուն (կամ տան մի մասը):

Որպես անձնական սեփականություն բնակելի տուն (կամ տան մի մասը) ունեցող քաղաքացու խնդրանքով ժողովրդական դեպուտատների քաղաքային կամ շրջանային խորհրդի գործադիր կոմիտեն կարող է թույլ տալ նրան նոր տուն կառուցել հետևյալ դեպքերում`

ա) երբ նախկին տունը բնակվելու համար պիտանի չէ.

բ) երբ բնակելի տան (տան մի մասի) սեփականատերը և նրա հետ համատեղ բնակվող նրա ընտանիքի անդամները սահմանված նորմաներին համապատասխան ապահովված չեն բնակելի մակերեսով.

գ) երբ քաղաքացին և նրա ընտանիքը փոխում են իրենց բնակավայրը, տեղափոխվելով այլ բնակավայր:

4. Որպես անձնական սեփականություն քաղաքացուն պատկանող բնակելի տանը կից կամ բնակելի տան ծավալում թույլատրվում է անձնական օժանդակ տնտեսության վարման համար չջեռուցվող տնտեսական շինությունների շինարարություն` սահմանված կարգով մշակված և հաստատված նախագծերով`

ա) շինություն գյուղատնտեսական մթերքներ պահելու համար (մառան)

բ) տնտեսական շինություն բերքի վերամշակման համար.

գ) ամառային խոհանոց

դ) լվացքատուն

ե) հնոց տան ջեռուցման համար

զ) շինություն տնտեսական գույքը և կարծր վառելիքը պահելու համար

է) մառան

ը) ավտոտնակ անձնական ավտոտրանսպորտի համար

թ) տնտեսական արհեստանոց.

ժ) բաղնիք.

ի) շինություն անասունների և թռչնի պահման համար.

լ) ջերմոց (ջեռուցվող կամ չջեռուցվող)

խ) տնտեսական ծածկարան

ծ) շինություն հաց թխելու համար (թոնրատուն)

կ) նկուղ (ամբողջ տան կամ տան մի մասի տակ)

Սույն կետի «ա-ժ» ենթակետերում նշված տնտեսական շինությունները կարող են կառուցվել տան ծավալի մեջ, ընդ որում դրանք չեն մտնում տան ընդհանուր մակերեսի մեջ` կից կառուցված կամ հողամասում առանձին կանգնեցված, իսկ «ի-ծ» ենթակետերում նշվածները` օգտագործման համար քաղաքացուն հատկացված հողամասում առանձին կանգնեցված:

Տան ընդհանուր մակերեսի մեջ մտնում են բնակելի և օժանդակ շինությունները` խոհանոց, սանհանգույցներ, նախասենյակ, միջանցքներ, նախամուտքեր, խորդանոցներ` բնակելի հարկի մակարդակով, ներքին սանդղավանդակ: Ամառային շինությունների մակերեսները` պատշգամբները, ծածկապատշգամբները, սյունասրահները, պատշգամբաձև շինվածքները բնակելի տան ընդհանուր մակերեսի մեջ չեն մտնում:

Բնակելի տան չափերը (բնակելի և օժանդակ շինությունների ընդհանուր ծավալը` խոհանոցի, սանհանգույցի, միջանցքի, նախասենյակի և այլն) որոշվում են կառուցողի կողմից և մտցվում են բնակելի տան շինարարության համար հողամասի հատկացման պայմանագրի մեջ:

5. Կառուցողը պարտավոր է, որպես անձնական սեփականություն, բնակելի տան շինարարության համար հողամասի հատկացման պայմանագիր կնքել հավելվածի համաձայն  ձևով.

ա) քաղաքում կամ քաղաքատիպ ավանում տուն կառուցելու դեպքում` համապատասխանաբար ժողովրդական դեպուտատների քաղաքային կամ ավանային խորհրդի գործադիր կոմիտեի հետ.

բ) կոլտնտեսային ավաններում տուն կառուցելու դեպքում` կոլտնտեսության վարչության հետ.

գ) խորհտնտեսությունում կամ գյուղական վայրում գտնվող ուրիշ ձեռնարկության, կազմակերպության ավանում տուն կառուցելու դեպքում` խորհտնտեսության կամ համապատասխան ձեռնարկության, կազմակերպության ղեկավարի հետ:

Կնքված պայմանագրերը վավերացվում են պետական նոտարական գրասենյակում:

6. Անհատական բնակելի տան շինարարությունը կարող է իրականացվել միայն այդ նպատակի համար հատկացված հողամասերում` բնակելի տան սահմանված կարգով հաստատված նախագծի, տան շինարարության համար հողամասի հատկացման և շինարարության թույլտվության պայմանագրի առկայության դեպքում:

Շինարարությունը սկսելու և ավարտելու ժամկետները նշվում են անձնական սեփականության իրավունքով բնակելի տան շինարարության համար հողամասի հատկացման պայմանագրում:

Անհատական բնակելի տան շինարարությունը իրականացվում է կառուցողի սեփական միջոցների հաշվին, ինչպես նաև բանկային վարկի հաշվին` ԽՍՀ Միության օրենսդրությամբ սահմանված կարգով և պայմաններով:

7. (կետն ուժը կորցրել է 28.02.96 N 65)

 

II. Անհատական բնակարանային շինարարության համար հողամասերի հատկացումը

 

8. Անհատական բնակարանային շինարարության համար հողամասերը բնակավայրերում հատկացվում են անհատական կառուցապատման համար բնակավայրերի գլխավոր հատակագծով նախատեսված թաղամասերում, տալով կառուցողին քաղվածք գլխավոր հատակագծից, նշելով հատկացված հողամասի չափերը, որի հատակագծման և կառուցապատման նախագիծը համաձայնեցված է քաղաքի գլխավոր ճարտարապետի կամ շրջանի ճարտարապետի հետ:

9. Հողամասերը անհատական բնակարանային շինարարության համար հատկացվում են քաղաքացիներին անժամկետ օգտագործման` ժողովրդական դեպուտատների համապատասխան խորհրդի գործկոմի որոշմամբ:

Հողամասերը առաջին հերթին հատկացվում են բնակարանային պայմանների բարելավման համար հաշվառման մեջ գտնվող անձանց և առաջին հերթին արտադրության առաջավորներին, Հայրենական մեծ պատերազմի հաշմանդամներին ու մասնակիցներին, զոհված զինծառայողների ընտանիքներին և նրանց հավասարեցված անձանց, ինչպես նաև աշխատանքի վետերաններին և այն քաղաքացիներին, որոնք ժողովրդական դեպուտատների տեղական խորհուրդների գործադիր կոմիտեներին հանձնում են իրենց կողմից զբաղեցրած պետական կամ հանրային ֆոնդի բնակարանները:

Անհատական բնակարանային շինարարության համար հատկացված հողամասերից օգտվելու իրավունքը կարող է դադարեցվել, եթե քաղաքացու կողմից առանց հարգելի պատճառների պայմանագրով սահմանված ժամկետում տունը չի կառուցվում, ինչպես նաև օրենքով նախատեսված այլ հիմքերով:

10. Անհատական բնակելի տան շինարարության համար հողամասերի հատկացման վերաբերյալ դիմումները քաղաքացիների կողմից տրվում են ժողովրդական դեպուտատների քաղաքային, շրջանային, ավանային, գյուղական խորհուրդների գործադիր կոմիտեներին, կոլտնտեսային վարչությանը, խորհտնտեսության և պետական գյուղատնտեսական մյուս ձեռնարկության, կազմակերպության, հիմնարկության ադմինիստրացիային, կախված այն բանից, թե ինչ հողերից է հատկացվում հողամասը:

Դիմումի մեջ նշվում է կառուցողի բնակության վայրը, նրա ընտանիքի կազմը և ընտանիքի այն անդամները, որոնք նրա հետ միասին պետք է բնակվեն նոր կառուցված տանը: Դիմումի մեջ պետք է նշվի նաև, որ կառուցողը ծանոթացել է Հայկական ԽՍՀ-ում անհատական բնակարանային շինարարության մասին կանոնադրությանը:

Դիմումին կցվում են`

ա) դիմողի ստորագրությունը այն մասին, որ ինքը և իր հետ համատեղ բնակվող ամուսինն ու նրանց անչափահաս երեխաները չունեն անձնական սեփականության իրավունքով բնակելի տուն կամ տան մի մասը: Սույն կանոնադրության 2-րդ կետով նախատեսված դեպքերում ստորագրության փոխարեն ներկայացվում են տվյալներ իրեն կամ իր ընտանիքի անդամներին պատկանող տան մասին, նրա տեխնիկական վիճակի և նրանում բնակվող անձանց մասին.

բ) ժողովրդական դեպուտատների տեղական խորհրդի, պետական, կոոպերատիվ կամ հասարակական կազմակերպության տանը բնակելի մակերես զբաղեցնող կառուցողի և կառուցողի հետ նոր կառուցված տանը բնակվելու համաձայնություն տված նրա ընտանիքի չափահաս անդամների գրավոր պարտավորությունը նախկին բնակելի մակերեսի ազատման մասին.

գ) դիմողի բնակավայրի բնակշահագործման կազմակերպության տեղեկանքը նրա ընտանիքի անդամների մասին, ինչպես նաև դիմողի հետ համատեղ բնակվող մյուս անձանց մասին և նրա կողմից զբաղեցրած բնակտարածության մասին:

11. Ժողովրդական դեպուտատների քաղաքային, շրջանային, ավանային, գյուղական խորհուրդների գործադիր կոմիտեն քննության է առնում հողամասի հատկացման մասին դիմումը` ստացման օրից մեկամսյա ժամկետում: Ընդունված որոշման մասին 5-օրյա ժամկետում տեղեկացվում է դիմողին: Հողամաս հատկացնելու մերժման դեպքում նշվում է մերժման պատճառը:

12. Անհատական բնակարանային շինարարության համար տեղական պայմաններից կախված հատկացվում է հողամաս.

ա) քաղաքներում` 300-ից 600 քառ. մ. 

բ) գյուղական բնակավայրերում` ժողովրդական դեպուտատների գյուղական և ավանային խորհուրդների, կոլտնտեսությունների ու խորհտնտեսությունների որոշմամբ, հաշվի առնելով հանրային արտադրության մեջ կոլտնտեսականների, խորհտնտեսությունների բանվորների ու ծառայողների և գյուղական մյուս բնակիչների մասնակցությունը:

13. Անհատական բնակարանային շինարարությունը տնամերձ հողամասերում իրականացվում է պահպանելով սույն կանոնադրության պահանջները:

 

III. Նախագծանախահաշվային փաստաթղթերի կազմումն ու հաստատումը, շինարարական աշխատանքների կատարման իրավունքի թույլտվություն տալը և շինարարության նկատմամբ վերահսկողության իրականացումը

 

14. Անհատական բնակելի տների շինարարության նախագծանախահաշվային փաստաթղթերի մշակումը իրականացվում է նախագծային կազմակերպությունների կողմից:

Հողամասերի հատկացման ապահովման, բնակելի տների ու բակային շինությունների կառուցման և վերակառուցման նախագծանախահաշվային փաստաթղթերի մշակման և հաստատման, տեխնիկական հսկողության կազմակերպության գործում անհատական կառուցողներին վճարովի ծառայությունների մատուցումը դրվում է ժողովրդական դեպուտատների տեղական խորհուրդների գործադիր կոմիտեների ճարտարապետության և քաղաքաշինության գլխավոր վարչություններին, վարչություններին ու բաժիններին կից նախագծաարտադրական ճարտարապետահատակագծման տնտհաշվարկային բյուրոների վրա:

Թույլատրվում է անհատական բնակելի տների շինարարության և վերակառուցման նախագծանախահաշվային փաստաթղթերի մշակումը նախագծային կոոպերատիվներին կամ անհատական աշխատանքային գործունեության կարգով աշխատանքներ կատարող առանձին որակյալ ճարտարապետներին և ինժեներներին` ժողովրդական դեպուտատների համապատասխան խորհրդի գործկոմի թույլտվության հիման վրա, պատվիրատուի միջոցների հաշվին:

Նախագծային կազմակերպությունների կողմից մշակված նախագծերը համաձայնեցվում են, իսկ արտադրական խմբերի, նախագծային կոոպերատիվների կամ անհատական աշխատանքային գործունեությամբ զբաղվող առանձին ճարտարապետների և ինժեներների կողմից մշակվածները հաստատվում են քաղաքի գլխավոր ճարտարապետի կամ շրջանի ճարտարապետի կողմից:

15. Նախագծային փաստաթղթերի մշակման համար անհատական կառուցողը ներկայացնում է

ա) փաստաթուղթ հողամասի հատկացման մասին.

բ) հողից օգտվելու իրավունքի ակտը

գ) հողամասի պլանը:

Անհատական բնակելի տան և տնտեսական շինությունների շինարարության նախագծային փաստաթղթերի մշակման համար կառուցողը 14-րդ կետում նշված կազմակերպություններին, նախագծային կոոպերատիվներին և առանձին անձանց վճարում է անհրաժեշտ գումար` օրենսդրությամբ սահմանված կարգով:

16. Անհատական բնակելի տների և տնտեսական շինությունների շինարարությունը կարող է սկսվել միայն ժողովրդական դեպուտատների քաղաքային կամ շրջանային խորհրդի գործադիր կոմիտեի կողմից տրվող շինարարական աշխատանքների կատարման իրավունքը ստանալուց հետո` սահմանված կարգով կառուցողի կողմից հաստատված նախագծային փաստաթղթերի ներկայացումից հետո, 15-օրյա ժամկետում:

17. Անհատական բնակելի տների կառուցումը բակային շինություններով, դրանց վերակառուցումը և նորոգումը իրականացվում է պետական և միջկոլտնտեսային կապալային շինարարական կազմակերպությունների կողմից տնտեսական եղանակով և իրենց` կառուցողների կողմից: Նշված աշխատանքների կատարումը կապալային և տնտեսական եղանակով կարող է իրականացվել անհատական կառուցողի կամ անհատական կառուցողների ընկերության հետ կնքված ուղղակի պայմանագրով:

Անհատական կառուցողների սեփական միջոցների հաշվին և վարկերի օգնությամբ բնակելի տների համատեղ (փոխօգնության սկզբունքով) շինարարության, շահագործման և նորոգման համար ձեռնարկություններին, հիմնարկներին, կազմակերպություններին, ժողովրդական դեպուտատների տեղական խորհուրդների գործադիր կոմիտեներին կից կարող են ստեղծվել անհատական կառուցողների ընկերությունների մասին օրինակելի կանոնադրության հիման վրա:

18. Անհատական բնակարանային շինարարության նկատմամբ պետական շինարարական վերահսկողությունը և տեխնիկական հսկողությունը իրականացվում է ժողովրդական դեպուտատների տեղական խորհուրդների գործադիր կոմիտեների, պետական ճարտարապետաշինարարական վերահսկողության տեսչությունների և քաղաքների գլխավոր ճարտարապետների կամ շրջանային ճարտարապետների կողմից:

 

IV. Շինանյութերի ձեռքբերման կարգը

 

19. Անհատական բնակելի տների և տնտեսական շինությունների շինարարության, հիմնական նորոգման և վերակառուցման համար քաղաքացիներն իրավունք ունեն օգտագործել`

ա) պետական և կոոպերատիվ առևտրի խանութներում ձեռքբերված շինանյութերն ու շինվածքները.

բ) քանդվող շինություններից ստացված շինանյութերը.

գ) գործող հանքավայրերում կամ դրա համար հատուկ առանձնացված տեղերում համապատասխան կազմակերպությունների թույլտվությամբ կառուցողների կողմից մթերված կավը, ավազը, խճաքարը, քարը և այլ շինանյութեր.

դ) առուվաճառքի կամ նվիրատվության պայմանագրի ձևակերպման պայմանով ուրիշ քաղաքացիներից ձեռքբերված շինանյութերը:

Ձեռքբերված շինանյութերի համար անհատական կառուցողները պետք է ունենան դրանց ձեռքբերման օրինականությունը հաստատող փաստաթղթեր:

20. Ձեռնարկությունները, միավորումներն ու կազմակերպությունները կանխիկ վճարով անհատական բնակելի տների շինարարությունն իրականացնող իրենց աշխատողներին վաճառում են շինանյութեր և հարդարման նյութեր, գործիքներ, ատաղձագործական և երկաթյա իրեր, առանձին դետալներ մանրածախ գներով, իսկ եթե դրանք սահմանված չեն` մեծածախ գներով կամ պայմանավորվածությանը համաձայն գներով, մտցնելով վաճառված նյութերի ու շինվածքների արժեքը բնակչությանը վճարովի ծառայությունների ծավալի մեջ:

Պետական բյուջեի հաշվին ֆինանսավորվող կազմակերպությունների աշխատողներին ժողովրդական դեպուտատների տեղական խորհուրդների գործադիր կոմիտեները ապահովում են այդ նյութերի ու շինվածքների վաճառքը նշված պայմաններով:

21. Դեֆիցիտային շինանյութերը անհատական կառուցողներին բաշխում են ժողովրդական դեպուտատների քաղաքային ու շրջանային խորհուրդների գործադիր կոմիտեները, տալով նյութերի ձեռքբերման անվանական կարգագրեր:

22. Սույն կանոնադրությամբ սահմանված շինանյութերի ձեռքբերման կարգը խախտած անձինք ենթարկվում են պատասխանատվության օրենքով սահմանված կարգով:

 

V. Շինարարությունն ավարտված անհատական բնակելի տների շահագործման ընդունումը

 

23. Կառուցված կամ վերակառուցված բնակելի տները և տնտեսական շինությունները բոլոր շինարարական- մոնտաժային աշխատանքներն ավարտելուց հետո կառուցողների կողմից պետք է ներկայացվի պետական ընդունող հանձնաժողովներին` դրանք շահագործման ընդունելու համար:

24. պետական ընդունող հանձնաժողովները նշանակվում են ժողովրդական դեպուտատների քաղաքային ու շրջանային խորհուրդների գործադիր կոմիտեների կողմից:

25. Պետական ընդունող հանձնաժողովը շինարարությունն ավարտված անհատական բնակելի տան շահագործման ընդունումը ձևակերպում է ակտով, նախապես ստուգելով կատարված աշխատանքների համապատասխանությունը նախագծի և շինարարական նորմաների ու կանոնների պահանջներին և շինանյութերի ու շինվածքների ձեռքբերման օրինականությունը:

Պետական ընդունող հանձնաժողովի աշխատանքը պետք է ավարտվի տասնօրյա ժամկետում:

26. Անհատական բնակելի տների շահագործման ընդունման ակտերը հաստատում են պետական ընդունող հանձնաժողովներ նշանակող ժողովրդական դեպուտատների քաղաքային ու շրջանային խորհուրդների գործադիր կոմիտեները` պետական ընդունող հանձնաժողովների կողմից դրանք ներկայացնելուց հետո մեկշաբաթյա ժամկետից ոչ ուշ:

Անհատական բնակելի տան շահագործման ընդունման ակտը հաստատելուց հետո կառուցողին տրվում է տնային գրքույկ:

 

VI. Անհատական բնակելի տների տեխնիկական գույքագրումը և իրավական գրանցումը

 

27. Նոր կառուցված անհատական բնակելի տների տեխնիկական գույքագրումը և իրավական գրանցումը կատարվում է սահմանված կարգով` դրանք շահագործման ընդունելուց հետո սույն կանոնադրությանը համապատասխան:

Նոր կառուցված անհատական բնակելի տների տեխնիկական գույքագրումը, իրավական գրանցումը, ինչպես նաև ընթացիկ փոփոխությունների (կցակառույց, վերակառուցում, վերաշինում և այլն) գույքագրումը կատարվում է տեխնիկական գույքագրման քաղաքային ու շրջանային բյուրոների կողմից, իսկ այնտեղ, ուր դրանք չկան` ժողովրդական դեպուտատների համապատասխան խորհրդի գործադիր կոմիտեի կոմունալ տնտեսության մարմինների կողմից:

 

VII. Պատասխանատվությունը ինքնակամ շինարարության համար

 

28. Բնակելի տների և տնտեսական շինությունների շինարարության, ինչպես նաև ամեն տեսակի կցակառույցների ինքնակամ կառուցման համար, եթե դա չի հանգեցնում քրեական պատասխանատվության, մեղավոր անձինք պատասխանատվություն են կրում քաղաքացիական-իրավական կարգով:

 

Հավելված Հայկական ԽՍՀ-ում անհատական բնակարանային շինարարության կանոնադրության

ԱՆՁՆԱԿԱՆ ՍԵՓԱԿԱՆՈՒԹՅԱՆ ԻՐԱՎՈՒՆՔՈՎ ԱՆՀԱՏԱԿԱՆ ԲՆԱԿԵԼԻ ՏԱՆ ՇԻՆԱՐԱՐՈՒԹՅԱՆ ՀԱՄԱՐ ԱՆԺԱՄԿԵՏ ՕԳՏԱԳՈՐԾԵԼՈՒ ՀՈՂԱՄԱՍ ՀԱՏԿԱՑՆԵԼՈՒ ՏԻՊԱՅԻՆ ՊԱՅՄԱՆԱԳԻՐԸ

 

19 _________թվականի ______ քաղաք (ավան) ______________________________

1. Ժողովրդական դեպուտատների _____________ խորհրդի գործադիր կոմիտեի կոմունալ տնտեսության բաժինը ի դեմս______________________________________________________________________________________________

(պաշտոնը, ազգանունը,անունը, հայրանունը)

Ժողովրդական դեպուտատների ________________________ գործադիր կոմիտեի 19 _____ թ. N  ________ որոշմանը համապատասխան անժամկետ օգտագործման իրավունքով կառուցող  _____________________________

(ազգանուն, անուն, հայրանուն)

հատկացնում է _________ քաղաքի (ավանի) ______ փող. N ______ հողամասը, որը ճակատով ունի __________ մետր, հետևի սահմանով __________________ մետր, աջ սահմանագծով_________________ քառ. մ բնակելի մակերեսով __________ մետր, ________ քառ. մ ընդհանուր մակերեսով և ցույց է տրվում պայմանագրին կցված պլանում _____ հարկանի ___________________________ քառ.մ բնակելի մակերեսով բնակելի տուն կառուցելու, այդ թվում ______

(քարե, փայտե, խառը)

 քառ. մ ընդհանուր մակերեսով  ________ քառ. մետր տնտեսական շինություններով 19   թ. ____________ N ________________ հաստատված նախագծին լրիվ համապատասխան:

 

Ծանոթություն. Հողամասի պլանը և կառուցապատման նախագիծը հանդիսանում են սույն պայմանագրի անբաժան մասը:

2. Կառուցողը շինությունների կառուցումը պարտավոր է սկսել սույն պայմանագիրը ստորագրելու օրից մեկ տարուց ոչ ուշ և շինարարական աշխատանքները կատարել այն հաշվով, որպեսզի ամբողջ շինարարությունը ավարտվի 5 տարուց ոչ պակաս ժամկետում, այսինքն` մինչև 19 --- թ.:

3. Շինարարությունն ավարտելուց հետո հողամասում կառուցված շինությունները շահագործման համար պատրաստ են ճանաչվում ժողովրդական դեպուտատների տեղական խորհրդի գործադիր կոմիտեի կողմից նշանակված պետական ընդունող հանձնաժողովի ընդունելուց հետո, համապատասխան ակտով ձևակերպված:

4. Կառուցողից անկախ պատճառներով սահմանված ժամկետում շինարարությունը չավարտելու դեպքում կոմունալ տնտեսության բաժնի կողմից շինարարության ավարտման ժամկետը կարող է երկարաձգվել, բայց մեկ շինարարական սեզոնից ոչ ավել:

Սույն պայմանագրով սահմանված շինարարության ժամկետները խախտելու համար կոմունալ տնտեսության բաժինը իրավունք ունի դատական կարգով կառուցողից գանձել տույժ ժամկետի խախտման յուրաքանչյուր օրվա համար 2 ռուբ. 50 կոպեկից ոչ ավել:

1-ին կետում նշված պայմաններից շեղվելու դեպքում կառուցողը պարտավոր է իր հաշվին կառուցման մեջ մտցնել համապատասխան փոփոխություններ և ուղղումներ` ճարտարապետաշինարարական վերահսկողության ցուցումներին համաձայն, նրա կողմից սահմանված ժամկետներում:

Կառուցողի կողմից նշված փոփոխություններն ու ուղղումները մտցնելուց հրաժարվելու կամ այդ աշխատանքները սահմանված ժամկետում չկատարելու դեպքում, ինչպես նաև հողամասում պայմանագրով չնախատեսված շինություններ կառուցելու դեպքում, ժողովրդական դեպուտատների քաղաքային (շրջանային) խորհրդի գործադիր կոմիտեի որոշմամբ կառուցողը պարտավոր է դադարեցնել շինարարությունը և մեկամսյա ժամկետում իր հաշվին քանդել իր կողմից կառուցված բոլոր շինությունները կամ շինությունների մասերը:

Կառուցողի կողմից առանց հարգելի պատճառների սույն պայմանագրով սահմանված շինարարության ժամկետները սիստեմատիկաբար (երկու անգամից ավելի) խախտելու կամ կոմունալ տնտեսության բաժնի կողմից երկարաձգված ժամկետում հողամասում շինություններ չկառուցելու դեպքում, կամ պայմանագրի 1-ին կետում նշված պայմաններից շեղվելու դեպքում, կամ փոփոխություններ և ուղղումներ կատարելուց հրաժարվելու դեպքում ժողովրդական դեպուտատների քաղաքային (շրջանային) խորհրդի գործադիր կոմիտեի որոշմամբ նշված հողամասը կարող է առգրավվել դատական կարգով, պատճառված վնասներն ու տուժավճարները գանձելով կոմունալ տնտեսության բաժնի օգտին.

Շինարարության ժամանակ անհատական բնակելի տան հաստատված նախագծից էական շեղումների կամ հիմնական շինարարական նորմաների ու կանոնների կոպիտ խախտման դեպքում ժողովրդական դեպուտատների քաղաքային (շրջանային) խորհրդի գործադիր կոմիտեի որոշմամբ տունը պետք է քանդվի կամ կառուցողի կողմից, կամ էլ հարկադիր կարգով` կառուցողի հաշվին կամ դատական կարգով անհատույց առգրվում և մտցվում է ժողովրդական դեպուտատների տեղական խորհրդի ֆոնդ:

5. Հողամասում պայմանագրով չնախատեսված բնակելի շինությունների կառուցումը առանց ժողովրդական դեպուտատների քաղաքային (շրջանային) խորհրդի գործադիր կոմիտեի թույլտվության և տնտեսական շինությունների կառուցումը առանց կոմունալ տնտեսության բաժնի թույլտվության (իսկ հանրապետական ենթակայության քաղաքներում` առանց քաղաքի գլխավոր ճարտարապետի թույլտվության) չի թույլատրվում:

6. Հրդեհի կամ տարերային աղետների հետևանքով շինությունների քանդման դեպքերում գլխավոր հատակագծով անհատական շինարարության համար թույլատրված շրջաններում կառուցողի համար պահպանվում է հողամասից անժամկետ օգտվելու իրավունքը` հաստատված նախագծով երեք տարուց ոչ ավելի ժամկետում այդ հողամասում շինությունների վերականգնման և նորերի կառուցման պայմանով:

Շինությունների վերականգնումը սկսելու և ավարտելու ժամկետները սահմանվում են կոմունալ տնտեսության բաժնի հետ հատուկ համաձայնագրով:

7. Կառուցողը պարտավոր է կատարել շինությունների ինչպես ընթացիկ, այնպես էլ հիմնական նորոգումը:

8. Կառուցողը պարտավոր է հողամասի մակերեսի ----- տոկոսի վրա տնկել կանաչ տնկարկներ (այդ թվում` մրգի ու հատապտղի) կոմունալ տնտեսության բաժնի ցուցումով նրա կողմից սահմանված ժամկետում, ինչպես նաև ապահովել դրանց հետագա խնամքը:

9. Կառուցողի վրա է դրվում հողամասի բարեկարգումը, իր հողամասի սահմաններում մայթի կարգավորումը, ինչպես հողամասի, այնպես էլ դրան հարող մայթի ու անցումների մշտական խնամքն ու պատշաճ կարգով պահպանումը` ժողովրդական դեպուտատների ----------- խորհրդի գործադիր կոմիտեի կողմից սահմանված կանոններին համապատասխան:

10. Կառուցողին թույլատրվում է շինարարության, իսկ հետագայում և տնտեսական կարիքների համար օգտվել նրան հատկացված հողամասում և նրա ընդերքում գտնվող բնական շինանյութերից, ընդ որում այդ նյութերի հանման տեղերը պետք է կարգավորել ըստ դրանց օգտագործման (փոսերի ծածկումը և այլն):

Տնկանյութերի կտրումն ու վերատնկումը թույլատրվում է միայն ժողովրդական դեպուտատների ----------- խորհրդի գործադիր կոմիտեի թույլտվությամբ:

11. Մինչև անհատական բնակելի տան լրիվ կառուցումը և պետական ընդունող հանձնաժողովի ակտով այն շահագործման համար պատրաստ ճանաչումը, կառուցողը իրավունք չունի առանց կոմունալ տնտեսության բաժնի թույլտվության տունը կամ դրա մի մասը վաճառել այլ անձանց կամ կազմակերպությունների:

12. Իրավաբանական հասցեները. ժողովրդական դեպուտատների -------------------------------------------------------------- խորհրդի գործադիր կոմիտեի կոմունալ տնտեսության բաժնի -------- և կառուցող` ------------------------------------------------

Հասցեն փոխելու մասին կառուցողը պարտավոր է մեկշաբաթյա ժամկետում գրավոր հայտնել կոմունալ տնտեսության բաժնին:

13. Սույն պայմանագրի կնքման բոլոր ծախսերը ծախսագրվում են կառուցողի հաշվին:

14. Սույն պայմանագիրը համարվում է իսկական միայն նոտարական գրասենյակում այն պարտադիր վավերացնելուց հետո

Կցվում է` հողամասի պլանը և կառուցապատման նախագիծը:

(կանոնադրությունը փոփ. 28.02.96 N 65)

ՀԱՍՏԱՏՎԱԾ է Հայկական ԽՍՀ Մինիստրների խորհրդի 1989 թ. հունիսի 13-ի N 269 որոշմամբ

ԱՆՀԱՏԱԿԱՆ ԿԱՌՈՒՑՈՂՆԵՐԻ ԸՆԿԵՐՈՒԹՅՈՒՆՆԵՐԻ ՕՐԻՆԱԿԵԼԻ

 

Կ Ա Ն Ո Ն Ա Դ Ր ՈՒ Թ Յ ՈՒ Ն Ը

 

1. Անհատական բնակարանային շինարարության առավել հաջող իրականացման նպատակով բանվորները, ծառայողները և մյուս քաղաքացիները կարող են միավորվել ձեռնարկություններին, հիմնարկներին, կազմակերպություններին, ժողովրդական դեպուտատների տեղական խորհուրդների գործադիր կոմիտեներին կից անհատական կառուցողների ընկերություններում անժամկետ օգտագործման համար հատկացված հողամասում համատեղ (փոխօգնության սկզբունքով) բազմաբնակարան բնակելի տների կառուցման համար, պահպանելով մեկ կառուցողի անձնական սեփականության իրավունքը մեկ բնակարանի համար բազմաբնակարան բնակելի տներում և անձնական սեփականության իրավունքով մեկ բնակարանանոց բնակելի տների համար:

Բնակելի տան չափերը (բնակելի և օժանդակ շենքերի ընդհանուր մակերեսը) որոշվում է կառուցողի կողմից և գրանցվում է ընկերության մասնակիցների միջև կնքված պայմանագրի մեջ հավելվածին համաձայն ձևով:

2. Անհատական բնակելի տների շինարարությունը իրականացվում է տիպային պայմանագրով, Հայկական ԽՍՀ պետշինի կողմից կրկնակի օգտագործման համար թույլատրված անհատական նախագծերով կամ սահմանված կարգով անհատապես մշակված և հաստատված նախագծերով` հաշվի առնելով տվյալ շրջանի սեյսմիկ պայմաններին համապատասխան տան սեյսմակայունությունը, բնական պայմանները, տեղական ավանդույթները և կառուցողների առանձին ցանկությունները:

Անհատական նախագծերի մշակումը իրականացվում է քաղաքի գլխավոր ճարտարապետի կամ շրջանի ճարտարապետի թույլտվությամբ:

3. Ընկերության մեջ միավորվող կառուցողների թիվը որոշվում է ձեռնարկությունների, հիմնարկների, կազմակերպությունների, ժողովրդական դեպուտատների տեղական խորհուրդների գործադիր կոմիտեների կողմից, որոնց կից դրանք ստեղծվում են յուրաքանչյուր առանձին դեպքում, կախված բնակարանային շինարարության համար հատկացվող տարածքի յուրացման պայմաններից, կառուցվող բնակելի տների տիպից (մեկ բնակարանանոց դաստակերտային տիպի կամ բազմաբնակարան տները):

4. Մեկ բնակարանի համար մեկ կառուցողի անձնական սեփականության իրավունքի պահպանումով փոխօգնության սկզբունքով անհատական կառուցողների ուժերով տիպային նախագծերով բազմաբնակարան տների շինարարության համար հողամասեր հատկացվում են ժողովրդական դեպուտատների քաղաքային ու շրջանային խորհրդի գործադիր կոմիտեների որոշումներով, նրանց կողմից սահմանվող չափերով, ելնելով տեղական պայմաններից, տվյալ բնակավայրերի համար հաստատված հատակագծման նախագծի հիման վրա, կառուցապատման բնույթից և կառուցվող տան չափերից, իսկ մեկ բնակարանանոց անհատական բնակելի տների համար`

ա) քաղաքներում` 300-ից 600 քառ. մ.

բ) գյուղական բնակավայրերում` ժողովրդական դեպուտատների գյուղական և ավանային խորհուրդների, կոլտնտեսությունների և խորհտնտեսությունների որոշմամբ` հաշվի առնելով հանրային արտադրության մեջ կոլտնտեսականների, խորհտնտեսությունների բանվորների ու ծառայողների և գյուղական մյուս բնակիչների մասնակցությունը:

5. Հողամասերը առաջին հերթին հատկացվում են բնակարանային պայմանների բարելավման համար հաշվառման մեջ գտնվող անձանց և առաջին հերթին արտադրության առաջավորներին, Հայրենական մեծ պատերազմի հաշմանդամներին ու մասնակիցներին, զոհված զինծառայողների ընտանիքներին և նրանց հավասարեցված անձանց, ինչպես նաև աշխատանքի վետերաններին և այն քաղաքացիներին, որոնք ժողովրդական դեպուտատների տեղական խորհուրդների գործադիր կոմիտեներին հանձնում են իրենց կողմից զբաղեցված պետական կամ հանրային ֆոնդի բնակարանները:

6. Անհատական բնակարանային շինարարության տարածությունները պետք է ապահովված լինեն մուտքի ճանապարհներով, ջրամատակարարումով, էլեկտրաէներգիայով, գազով (գազամատակարարմամբ ապահովված շրջաններում) և, կախված տեղական պայմաններից, կոյուղով ու ջերմամատակարարումով, ինչպես նաև սոցիալական ինֆրակառուցվածքի այլ օբյեկտներով` ձեռնարկությունների, միավորումների, կազմակերպությունների (աշխատավորական կոլեկտիվների համաձայնությամբ) միջոցների հաշվին ժողովրդական դեպուտատների տեղական խորհուրդների գործադիր կոմիտեների բյուջեների և անհատական կառուցողների հաշվին:

7. Անհատական կառուցողների միավորումը անհատական կառուցողների ընկերության մեջ ձևակերպվում է պայմանագրով` հավելվածի համաձայն ձևով, որը կնքվում է այդ ընկերությունների անդամների միջև:

Ընկերությունների անդամների միջև կնքված պայմանագիրը վավերացվում է նոտարական կարգով:

8. Բնակելի տների շինարարությունը, շահագործումն ու նորոգումը իրականացվում է անհատական կառուցողների սեփական միջոցների հաշվին և վարկերի օգնությամբ:

9. Անհատական բնակելի տների շինարարությունը, դրանց վերակառուցումն ու նորոգումը իրականացվում են պետական և միջկոլտնտեսային կապալային շինարարական կազմակերպությունների կողմից տնտեսական եղանակով և իրենց` կառուցողների կողմից: Նշված աշխատանքների կատարումը կապալային ու տնտեսական եղանակներով կարող է իրականացվել անհատական կառուցողների կամ անհատական կառուցողների ընկերությունների հետ կնքված ուղղակի պայմանագրով:

10. Անհատական կառուցողների ընկերությունների դրամական միջոցները սահմանված կարգով պահվում են ընկերության ընթացիկ հաշվում ԽՍՀՄ խնայողական բանկի հիմնարկում:

Միջոցների ծախսումը կատարվում է վարչության նախագահի և հաշվապահի (գանձապահի) կողմից ստորագրված փաստաթղթերով` համաձայն ընկերության անդամների ընդհանուր ժողովի կողմից հաստատված մուտքի-ծախսման նախահաշվի (լիազորվածների ժողովի կողմից):

11. Անհատական կառուցողների ընկերության ծախսերը, ինչպես բնակելի տների շինարարության, այնպես էլ դրանց շահագործման և նորոգման գծով, կատարվում են ընդհանուր ժողովի որոշմամբ և ծածկվում են անհատական կառուցողների կողմից` յուրաքանչյուրի բաժնին համապատասխան:

Բազմաբնակարան տան հիմքը, տանիքը, սանդղավանդակները և մյուս այն մասերը, որոնք սպասարկում են բոլոր բնակարանները, կազմում են ընկերության մասնակիցների ընդհանուր սեփականությունը, պահվում և նորոգվում են ընկերության մասնակիցների միջոցների հաշվին` յուրաքանչյուրի բաժնին համապատասխան:

12. Անհատական կառուցողների ընկերությունը իր գործունեությունը իրականացնում է այն ձեռնարկության, հիմնարկության, կազմակերպության ադմինիստրացիայի և արհմիութենական կոմիտեի ղեկավարությամբ, որոնց կից կազմակերպվել է:

Անհատական կառուցողների ընկերության գործունեության նկատմամբ վերահսկողությունը իրականացնում է ժողովրդական դեպուտատների տեղական այն խորհրդի գործադիր կոմիտեն, որի տարածքում գտնվում է ընկերությունը:

Այն դեպքում, երբ անհատական կառուցողների ընկերությունը գտնվում է ժողովրդական դեպուտատների տեղական խորհրդի գործադիր կոմիտեի տնօրինության տակ, նրա գործունեության ղեկավարությունն ու վերահսկողությունը իրականացնում է գործադիր կոմիտեն:

13. Անհատական կառուցողների ընկերության վնասները բաշխվում են նրա մասնակիցների միջև բնակելի տների շինարարության, շահագործման և նորոգման գործում նրանց բաժնին համամասնորեն:

14. Անհատական կառուցողների ընկերության մասնակիցների միջև քաղաքացիական-իրավական վեճերը լուծվում են դատական կարգով:

15. Անհատական կառուցողների ընկերությունը կարող է ունենալ կլոր կնիք` քաղաքի (ավանի), փողոցի անվանումով և տնատիրության համարի նշումով:

16. Այն ձեռնարկության, հիմնարկության, կազմակերպության վերացման դեպքում, որին կից ստեղծվել է անհատական կառուցողների ընկերությունը, վերջինս կարող է հանձնվել ժողովրդական դեպուտատների տեղական խորհրդի գործադիր կոմիտեի տնօրինությանը, եթե ընկերության անդամների 70 տոկոսից ավելին ձեռնարկության, հիմնարկության, կազմակերպության հետ աշխատանքային հարաբերությունների մեջ չեն:

 

Հավելված անհատական կառուցողների ընկերության օրինակելի կանոնադրության

 

ԱՆՁՆԱԿԱՆ ՍԵՓԱԿԱՆՈՒԹՅԱՆ ԻՐԱՎՈՒՆՔՈՎ ԲԱԶՄԱԲՆԱԿԱՐԱՆ ԵՎ ՄԻԱԲՆԱԿԱՐԱՆ ԲՆԱԿԵԼԻ ՏՆԵՐԻ ՇԻՆԱՐԱՐՈՒԹՅԱՆ

 

Տ Ի Պ Ա Յ Ի Ն  Պ Ա Յ Մ Ա Ն Ա Գ Ի Ր Ը

 

Քաղ. __________ «---» ------------------------------------------------------------------------------------ 19   թ.

1. Մենք` ներքոստորագրյալներս, _________________________________________________________

______________________________________________________________________________________

______________________________________________________________________________________

______________________________________________________________________________________

______________________________________________________________________________________

(պայմանագրի յուրաքանչյուր մասնակցի ազգանունը, անունը, հայրանունը և բնակավայրը)

 

կնքել ենք սույն պայմանագիրը բազմաբնակարան բնակելի տան շինարարության աշխատանքների համատեղ անցկացման մասին, պահպանելով մեկ բնակարանի համար մեկ կառուցողի անձնական սեփականության իրավունքը և մեկ բնակարանանոց բնակելի տների անձնական սեփականության իրավունքով (բակային կառույցներով)` ըստ հաստատված նախագծի սահմանված կարգով հատկացված հողամասի վրա ________________________

________________________________________________________________________________________________

________________________________________________________________________________________________

___________________________________________________________________________________ քաղաքում

(քաղաքատիպ ավանում, գյուղական բնակավայրում):

 

Մենք մեր ուժերով, համատեղ, փոխօգնության սկզբունքով պարտավորվում ենք կառուցել բազմաբնակարան բնակելի տներ` պահպանելով մեկ բնակարանի համար մեկ կառուցողի անձնական իրավունքը և մեկ բնակարանանոց բնակելի տներ անձնական սեփականության իրավունքով (բակային շինություններով)` ամրացնելով պայմանագրի յուրաքանչյուր մասնակցի համար անձնական սեփականության իրավունքով հետևյալ չափերով տուն`

 

NN	Պայմանագրի մասնակցի ազգանունը, անունը, հայրանունը	Բնակելի տան չափերը		Բակային շինությունների չափերը
		ընդհանուր մակերեսը	այդ թվում` օգտակար մակերեսը

 

2. Բազմաբնակարան բնակելի տների շինարարության կատարման համար, պահպանելով մեկ բնակարանի համար մեկ կառուցողի անձնական սեփականության իրավունքը և մեկ բնակարանանոց բնակելի տների շինարարության համար` անձնական սեփականության իրավունքով (կախված շինարարության եղանակից` կապալային կազմակերպության կամ սեփական ուժերով) միացնում ենք մեր միջոցները կանխիկ դրամի ձևով և վարկի հաշվին` մեզ ամրացված բնակարանի, տան չափերին համապատասխան`

 

NN	Պայմանագրի մասնակցի ազգանունը, անունը, հայրանունը	Ավանդը

 

3. Շինարարության ընդհանուր արժեքն ըստ սույն պայմանագրի կազմում է ____________ ռուբլի:

4. Բնակելի տների շինարարության ծախսերը կատարվում են պայմանագրի մասնակիցների ընդհանուր ժողովի որոշմամբ և ծածկվում են յուրաքանչյուրի բաժնին համապատասխան:

Այն դեպքում, երբ պայմանագրի մասնակիցն անձամբ մասնակցում է տան շինարարությանը` աշխատանքային ծախսումների չափը և այդ ծախսումների արժեքը ավանդի հաշվի մեջ մտցնելու կարգը սահմանվում է ընդհանուր ժողովի կողմից:

5. Մենք պարտավորվում ենք`

5.1. Սույն պայմանագրով նախատեսված աշխատանքներն սկսել 19 թ. «---» -------- «------» և ավարտել 19  թ.

«---» ---------

5.2. Կատարել շինարարության աշխատանքներն ըստ փուլերի հետևյալ ժամկետներում`

 

Աշխատանքի անվանումը	Կատարման ժամկետը

 

5.3. Անհատական կարգով կատարել հետևյալ աշխատանքները`

 

NN	Ազգանուն, անուն, հայրանուն	Աշխատանքների անվանումը	Կատարման ժամկետները

 

5.4. Շինարարական կազմակերպությանը կապալի պայմանագրով կատարելու համար հանձնել հետևյալ աշխատանքները`

_______________________________________________________________________________________

(կապալային կազմակերպության անվանումը)

 

Աշխատանքների անվանումը	Աշխատանքների արժեքը	Կատարման ժամկետները

 

6. Պայմանագրի մասնակիցները իրավունք ունեն մասնակցել ընկերության ընդհանուր ժողովում համատեղ գործունեությանը վերաբերող հարցերի լուծմանը:

բոլոր որոշումները ընդունվում են քվեարկության միջոցով` ձայների պարզ մեծամասնությամբ:

7. Նախագահի վրա է դրվում համատեղ գործերի վարումը հավատարմագրի հիման վրա, որը ստորագրվում է պայմանագրի բոլոր մասնակիցների կողմից և վավերացվում է նոտարական կարգով:

8. Պայմանագրի մասնակիցներից մեկի մահվան դեպքում նրա բաժինը շինարարության մեջ անցնում է նրա ժառանգներին` ըստ օրենքի կամ կտակի:

9. Բազմաբնակարան բնակելի տներում մեկ բնակարանի համար և միաբնակարան բնակելի տան (բակային շինություններով) համար պայմանագրի մասնակիցների անձնական սեփականության իրավունքը առաջանում է բնակելի տների շահագործման ընդունման մասին պետական հանձնաժողովի ակտը սահմանված կարգով հաստատվելուց հետո:

10. Սույն պայմանագրի գործողությունը դադարում է համատեղ կառուցված բնակելի տների շահագործման ընդունման պետական հանձնաժողովի ակտը սահմանված կարգով հաստատվելուց հետո:

 

Պայմանագրի մասնակիցների ստորագրությունները

________________________________ ________________________________ ________________________________ ________________________________