«Գրանցված է»

ՀՀ արդարադատության

նախարարության կողմից

29 հունիսի 2011 թ.

Պետական գրանցման թիվ 05011298

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

 Ո Ր Ո Շ ՈՒ Մ

Նպատակ ունենալով ապահովել գրագետ և պատշաճ ղեկավարների և աշխատակիցների առկայություն ներդրումային ֆոնդի կառավարիչների և ներդրումային ֆոնդի պահառուների համար, հիմք ընդունելով «Ներդրումային ֆոնդերի մասին» Հայաստանի Հանրապետության օրենքի 54-րդ հոդվածի 2-րդ մասը, 61-րդ հոդվածի 4-րդ մասը, 66-րդ հոդվածի 1-ին մասը և 88-րդ հոդվածի 3-րդ մասը և ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «ե» կետով և «Իրավական ակտերի մասին» Հայաստանի Հանրապետության օրենքի 16-րդ հոդվածի 1-ին մասով` Հայաստանի Հանրապետության կենտրոնական բանկի խորհուրդը որոշում է.

1. Հաստատել «Ներդրումային ֆոնդի կառավարիչների և պահառուների ղեկավարների ու ներդրումային ֆոնդի կառավարման գործունեություն իրականացնող և ներդրումային ֆոնդի պահառություն իրականացնող ֆիզիկական անձանց որակավորումը, նրանց մասնագիտական համապատասխանության չափանիշներն ու մասնագիտական որակավորման ստուգման թեմաների ցանկը» Կանոնակարգ 10/05-ը համաձայն Հավելվածի (կցվում է):

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

«ՆԵՐԴՐՈՒՄԱՅԻՆ ՖՈՆԴԻ ԿԱՌԱՎԱՐԻՉՆԵՐԻ ԵՎ ՊԱՀԱՌՈՒՆԵՐԻ ՂԵԿԱՎԱՐՆԵՐԻ ՈՒ ՆԵՐԴՐՈՒՄԱՅԻՆ ՖՈՆԴԻ ԿԱՌԱՎԱՐՄԱՆ ԳՈՐԾՈՒՆԵՈՒԹՅՈՒՆ ԻՐԱԿԱՆԱՑՆՈՂ ԵՎ ՆԵՐԴՐՈՒՄԱՅԻՆ ՖՈՆԴԻ ՊԱՀԱՌՈՒԹՅՈՒՆ ԻՐԱԿԱՆԱՑՆՈՂ ՖԻԶԻԿԱԿԱՆ ԱՆՁԱՆՑ ՈՐԱԿԱՎՈՐՈՒՄԸ, ՆՐԱՆՑ ՄԱՍՆԱԳԻՏԱԿԱՆ ՀԱՄԱՊԱՏԱՍԽԱՆՈՒԹՅԱՆ ՉԱՓԱՆԻՇՆԵՐՆ ՈՒ ՄԱՍՆԱԳԻՏԱԿԱՆ ՈՐԱԿԱՎՈՐՄԱՆ ՍՏՈՒԳՄԱՆ ԹԵՄԱՆԵՐԻ ՑԱՆԿԸ»

ԿԱՆՈՆԱԿԱՐԳ 10/05

Բ Ա Ժ Ի Ն  I

 ԸՆԴՀԱՆՈՒՐ ԴՐՈՒՅԹՆԵՐ

Գ Լ ՈՒ Խ  1

 ԿԱՐԳԱՎՈՐՄԱՆ ԱՌԱՐԿԱՆ ԵՎ ՀԻՄՆԱԿԱՆ ՀԱՍԿԱՑՈՒԹՅՈՒՆՆԵՐԸ

1. Սույն կանոնակարգը սահմանում է ներդրումային ֆոնդի (այսուհետ` ֆոնդ) կառավարիչների ղեկավարների և ֆոնդի կառավարչի կազմում կամ անունից ֆոնդի կառավարման գործունեություն իրականացնող ֆիզիկական անձանց, ինչպես նաև ֆոնդի պահառուի ղեկավարների և աշխատակիցների որակավորման, մասնագիտական համապատասխանության չափանիշների ստուգման և գրանցման կարգը, մասնագիտական որակավորման ստուգման թեմաների ցանկը, ինչպես նաև կարգավորում է այդ հարցերի հետ կապված Հայաստանի Հանրապետության օրենքներով Հայաստանի Հանրապետության կենտրոնական բանկի (այսուհետ` Կենտրոնական բանկ) իրավասությանը վերապահված այլ հարաբերություններ:

2. Սույն կանոնակարգը տարածվում է Հայաստանի Հանրապետության տարածքում հիմնադրվող կամ գործող ֆոնդի կառավարիչների և ֆոնդի պահառուների վրա:

3. Սույն կանոնակարգում օգտագործված հասկացություններն ունեն հետևյալ նշանակությունը.

1. «ֆոնդի կառավարչի անունից կամ կազմում ֆոնդի կառավարման գործունեություն իրականացնող ֆիզիկական անձ»` ֆոնդի կառավարչի կամ օտարերկրյա ֆոնդի կառավարչի մասնաճյուղի անունից կամ կազմում ֆոնդի կառավարման գործունեություն իրականացնող ֆիզիկական անձ (այն անձը, որն իրավունք ունի իրականացնել ֆոնդի ներդրումային քաղաքականության շրջանակներում ֆոնդի ակտիվների ներդրման վերաբերյալ որոշումների կայացում և իրականացում կամ ֆոնդի զուտ ակտիվների արժեքի հաշվարկում),

2. «ֆոնդի պահառուի ղեկավար և աշխատակից» ֆոնդի պահառուի կազմում ֆոնդի պահառության գործունեության համար պատասխանատու ստորաբաժանման ղեկավար և աշխատակից,

3. «հանձնաժողով» Կենտրոնական բանկի լիցենզավորման և վերահսկողության հանձնաժողով,

4. «թեկնածու» անձ, որը դիմում է որակավորման ստուգում անցնելու համար,

5. «որակավորվող անձ» սույն կանոնակարգի 7-րդ կետով սահմանված որևէ պաշտոնի համար որակավորում ստացած անձ:

4. Սույն կանոնակարգում օգտագործված այլ հասկացություններն ունեն «Ներդրումային ֆոնդերի մասին» Հայաստանի Հանրապետության օրենքում կիրառվող նշանակությունը:

Գ Լ ՈՒ Խ  2

ԸՆԴՀԱՆՈՒՐ ԴՐՈՒՅԹՆԵՐ ՈՐԱԿԱՎՈՐՄԱՆ ՎԵՐԱԲԵՐՅԱԼ

5. Սույն կանոնակարգով պահանջվող բոլոր փաստաթղթերը Կենտրոնական բանկ են ներկայացվում տպագիր և հայերեն` պատվիրված նամակով, կամ առձեռն կամ ներկայացվում են էլեկտրոնային տարբերակով` Սի-Բի-Էյ-նեթ համակարգի միջոցով, եթե այլ բան նախատեսված չէ սույն կանոնակարգով: Տպագիր եղանակով ներկայացվող փաստաթղթերի պատճենները պետք է ստորագրված լինեն ֆոնդի կառավարչի կամ ֆոնդի պահառուի իրավասու անձի կողմից և ներկայացվեն «իսկականի հետ ճիշտ է» մակագրությամբ:

(5-րդ կետը խմբ. 20.12.11 թիվ 363-Ն)

6. Սույն կանոնակարգով պահանջվող փաստաթղթերը կարող են Կենտրոնական բանկ ներկայացվել էլեկտրոնային տարբերակով` Սի-Բի-Էյ-նեթ համակարգի միջոցով:

6.1 Սույն կանոնակարգով սահմանված ներդրումային ընկերության գործադիր տնօրենի որակավորման պահանջները և ընթացակարգերը տարածվում են նաև ֆոնդի կառավարչի լուծարային հանձնաժողովի նախագահի և անդամների, ինպես նաև ֆոնդի կառավարչի ադմինիստրացիայի ղեկավարի և լուծարային կառավարչի վրա:

(6.1-ին կետը լրաց. 20.12.11 թիվ 363-Ն)

7. «Ներդրումային ֆոնդերի մասին» Հայաստանի Հանրապետության օրենքի 65-րդ հոդվածի 1-ին և 66-րդ հոդվածի 1-ին մասերով սահմանված հետևյալ անձինք, ինչպես նաև ֆոնդի պահառուի ղեկավարը և աշխատակիցը պետք է ունենան սույն կանոնակարգով սահմանված կարգով ստացված որակավորում.

1. ֆոնդի կառավարչի խորհրդի նախագահը և անդամները, գործադիր տնօրենը (գործադիր մարմնի ղեկավարը) և անդամները, գործադիր տնօրենի տեղակալը, գլխավոր հաշվապահը և նրա տեղակալը, ներքին աուդիտի ղեկավարը և անդամները, ֆոնդի կառավարչի` Հայաստանի Հանրապետության տարածքում ստեղծված մասնաճյուղի տնօրենը (այսուհետ` մասնաճյուղի տնօրեն),

2. օտարերկրյա ֆոնդի կառավարչի մասնաճյուղի խորհրդի նախագահը և անդամները, գործադիր տնօրենը (գործադիր մարմնի ղեկավարը) և անդամները, գործադիր տնօրենի տեղակալը, գլխավոր հաշվապահը և նրա տեղակալը, ներքին աուդիտի ղեկավարը և անդամները,

3. ֆոնդի կառավարչի անունից կամ կազմում ֆոնդի կառավարման գործունեություն իրականացնող ֆիզիկական անձը,

4. ֆոնդի պահառուի ղեկավարը և աշխատակիցը:

8. «Ներդրումային ֆոնդերի մասին» Հայաստանի Հանրապետության օրենքի 65-րդ հոդվածի 1-ին մասով սահմանված հետևյալ անձանց վրա չի տարածվում սույն կանոնակարգով սահմանված որակավորում ունենալու պահանջը.

1. ֆոնդի կառավարչի կամ օտարերկրյա ֆոնդի կառավարչի մասնաճյուղի կառուցվածքային ստորաբաժանումների (դեպարտամենտի, վարչության, բաժնի, խմբի կամ այլ միավորի) ղեկավարները,

2. ֆոնդի կառավարչի, օտարերկրյա ֆոնդի կառավարչի ներկայացուցչության ղեկավարը:

9. Սույն կանոնակարգի 7-րդ կետում սահմանված որակավորվող անձինք ղեկավար կամ ֆոնդի կառավարչի անունից կամ կազմում ֆոնդի կառավարման գործունեություն իրականացնող անձի, ֆոնդի պահառուի աշխատակցի պաշտոնում աշխատելու համար ֆոնդի կառավարչի կամ ֆոնդի պահառուի միջնորդությամբ գրանցվում են Կենտրոնական բանկում` սույն կանոնակարգի 11-րդ գլխով սահմանված կարգով:

Բ Ա Ժ Ի Ն  II

ՈՐԱԿԱՎՈՐՄԱՆ ԿԱՐԳԸ

Գ Լ ՈՒ Խ  3

 ՈՐԱԿԱՎՈՐՄԱՆ ՍՏՈՒԳՄԱՆ ՁԵՎԸ

10. Թեկնածուների որակավորման ստուգումն անցկացվում է Կենտրոնական բանկում գրավոր քննության (այսուհետ` քննություն) կամ բանավոր հարցազրույցի (այսուհետ` հարցազրույց) միջոցով:

11. Որակավորման ստուգում անցնելու նպատակով քննություն հանձնում են ստորև նշված պաշտոններում աշխատելու համար դիմող թեկնածուները.

1. ֆոնդի կառավարչի գործադիր տնօրենը (գործադիր մարմնի ղեկավարը) և անդամները, գործադիր տնօրենի տեղակալը, գլխավոր հաշվապահը և նրա տեղակալը, ներքին աուդիտի ղեկավարը և անդամները, մասնաճյուղի տնօրենը,

2. օտարերկրյա ֆոնդի կառավարչի մասնաճյուղի գործադիր տնօրենը (գործադիր մարմնի ղեկավարը) և անդամները, գործադիր տնօրենի տեղակալը, գլխավոր հաշվապահը և նրա տեղակալը, ներքին աուդիտի ղեկավարը և անդամները,

3. ֆոնդի կառավարչի անունից կամ կազմում ֆոնդի կառավարման գործունեություն իրականացնող ֆիզիկական անձը,

4. ֆոնդի ակտիվների պահառության համար պատասխանատու ստորաբաժանման ղեկավարը և պահառուի աշխատակիցը:

12. Կենտրոնական բանկի խորհրդի նիստում հարցազրույցի միջոցով որակավորման ստուգումն անցնում են ստորև նշված պաշտոններում աշխատելու համար դիմող թեկնածուները.

1. ֆոնդի կառավարչի խորհրդի նախագահը և անդամները,

2. օտարերկրյա ֆոնդի կառավարչի մասնաճյուղի խորհրդի նախագահը և անդամները:

13. Քննությունն անցկացվում է Կենտրոնական բանկի թեսթավորման ծառայության (այսուհետ` թեսթավորման ծառայություն) կամ, Կենտրոնական բանկի նախագահի որոշմամբ, այլ կազմակերպության կողմից:

14. Կենտրոնական բանկի նախագահի որոշմամբ քննություններն այլ կազմակերպությունների կողմից անցկացվելու դեպքում քննության թեսթերի կազմման, դրանցում փոփոխությունների և լրացումների կատարման, քննություններին մասնակցելու համար թեկնածուների հերթագրման, փաստաթղթերի ընդունման, քննությունների անցկացման, քննության արդյունքների ամփոփման, բողոքարկման, ինչպես նաև անհրաժեշտ փաստաթղթերը Կենտրոնական բանկ ներկայացնելու կարգը սահմանվում է տվյալ կազմակերպության կողմից` համաձայնեցնելով Կենտրոնական բանկի հետ:

Գ Լ ՈՒ Խ  4

ՈՐԱԿԱՎՈՐՄԱՆ ՍՏՈՒԳՄԱՆԸ ՄԱՍՆԱԿՑԵԼՈՒ ԿԱՐԳԸ

15. Քննությանը մասնակցելու համար թեկնածուները պետք է նախապես հերթագրվեն: Թեկնածուները կարող են հերթագրվել Կենտրոնական բանկի ինտերնետային կայքի համապատասխան էջում տվյալներ մուտքագրելով:

(15-րդ կետը փոփ. 20.12.11 թիվ 363-Ն, 07.02.12 թիվ 32-Ն)

16. Հերթագրվելու նպատակով յուրաքանչյուր եռամսյակի համար սահմանվում են քննության ստույգ օրեր, որի մասին տեղեկությունները հրապարակվում են Կենտրոնական բանկի ինտերնետային կայքում մինչև տվյալ եռամսյակի առաջին ամսվան նախորդող ամսվա 10-ը:

17. (կետն ուժը կորցրել է 07.02.12 թիվ 32-Ն)

18. Հերթագրվելու համար թեկնածուները հայտնում են հետևյալ տեղեկությունները.

ա. անուն, ազգանուն,

բ. որակավորման տեսակ,

գ. քննությանը մասնակցելու ամիս, օր, ժամ` ըստ հրապարակված ցանկի (ցանկության դեպքում),

դ. հեռախոսահամար,

ե. անձնագրի կամ անձը հաստատող այլ փաստաթղթի տվյալները,

զ. էլեկտրոնային փոստի (առկայության դեպքում) հասցեն:

(18-րդ կետը խմբ. 07.02.12 թիվ 32-Ն)

19. Թեկնածուի կողմից նշված օրը և (կամ) ժամին քննության անցկացման անհնարինության դեպքում կամ թեկնածուի կողմից քննությանը մասնակցելու օր և (կամ) ժամ չնշելու դեպքում թեսթավորման ծառայության աշխատակիցը թեկնածուի` Կենտրոնական բանկում հերթագրվելու օրվան հաջորդող երեք աշխատանքային օրվա ընթացքում ծանուցում է նրան քննության անցկացման հնարավոր առաջիկա օրվա և (կամ) ժամի մասին:

20. Կենտրոնական բանկը հարցազրույցի անցկացման օրվանից առնվազն 1 օր առաջ թեկնածուին տեղեկացնում է հարցազրույցի անցկացման օրվա վերաբերյալ:

(20-րդ կետը խմբ. 25.12.12 թիվ 376-Ն)

21. Թեկնածուները քննությանը կամ հարցազրույցին մասնակցում են` քննության կամ հարցազրույցի օրը ներկայացնելով հետևյալ փաստաթղթերը.

1) անձնագիր կամ անձը հաստատող այլ փաստաթուղթ և դրա պատճենը,

2) պետական տուրքի վճարումը հավաստող փաստաթղթի պատճենը (եթե օրենսդրությամբ նախատեսված է պետական տուրքի վճարում):

(21-րդ կետը լրաց. 20.12.11 թիվ 363-Ն)

21.1 Սույն կանոնակարգի 12-րդ կետում նշված թեկնածուների` հարցազրույցին մասնակցելու համար Կենտրոնական բանկ են ներկայացվում սույն կանոնակարգի 53-րդ կետով սահմանված փաստաթղթերը:

(21.1-ին կետը լրաց. 20.12.11 թիվ 363-Ն)

Գ Լ ՈՒ Խ  5

ՔՆՆՈՒԹՅԱՆ ԱՆՑԿԱՑՈՒՄԸ

22. Քննությունն անցկացվում է համակարգչային ծրագրով` թեսթային եղանակով:

23. Թեսթը հարցեր պարունակող փաստաթուղթ է, որը կազմվում է սույն կանոնակարգի 15-րդ գլխում սահմանված թեմաների ցանկի հիման վրա:

24. Թեսթերը, ինչպես նաև դրանցում կատարված լրացումները և փոփոխությունները հաստատվում են Կենտրոնական բանկի նախագահի որոշմամբ և ենթակա չեն հրապարակման: Թեսթերը վերանայվում են ըստ անհրաժեշտության:

25. Թեսթերը և դրանցում պարունակվող հարցերի քանակը տարբերակվում են ըստ որակավորման հետևյալ տեսակների `

(25-րդ կետը խմբ., փոփ. 20.12.11 թիվ 363-Ն)

26. Թեսթի յուրաքանչյուր հարցին պատասխանելու համար թեկնածուին հատկացվում է միջին հաշվով 1,5 րոպե:

27. Թեսթերի հարցերից յուրաքանչյուրը պարունակում է 3-ից 4 պատասխան, որոնցից մեկն է միանշանակ ճիշտ և լիարժեք:

28. Թեստի հարցի միանշանակ ճիշտ և լիարժեք պատասխանը գնահատվում է մեկ միավոր, իսկ սխալ պատասխանը, ինչպես նաև հարցին չպատասխանելը` զրո միավոր: Սխալ պատասխաններ են համարվում միանշանակ սխալ և ոչ միանշանակ ճիշտ և լիարժեք պատասխան նշելը, մեկից ավելի պատասխաններ նշելը կամ որևէ պատասխան չնշելը:

29. Հայերեն լեզվին չտիրապետող թեկնածուների քննության անցկացման ընթացքում թույլատրվում է թարգմանչի մասնակցությունը, ընդ որում, Կենտրոնական բանկի համապատասխան աշխատակցի ներկայությունը պարտադիր է: Հայերեն լեզվին չտիրապետող թեկնածուների քննության տևողությունը կարող է երկարաձգվել Կենտրոնական բանկի Իրավաբանական վարչության պետի թույլտվությամբ:

30. Քննությունն անցկացվում է առանձնացված սենյակում, որը վերահսկվում է տեսախցիկների միջոցով:

31. Քննության համար առանձնացված սենյակում թեկնածուն նստեցվում է համապատասխան համակարգչի մոտ` ըստ ցուցակի: Ուշացած թեկնածուների համար քննության տևողությունը չի երկարաձգվում:

32. Թեկնածուներին տրվում են բացատրություններ քննության անցկացման հետ կապված տեխնիկական հարցերի վերաբերյալ:

33. Քննության սկիզբը հայտարարելուց հետո թեկնածուն ծանոթանում է առաջադրանքներին և յուրաքանչյուր հարցի (խնդրի) ենթադրյալ պատասխաններից ընտրում է մեկ (իր կարծիքով` նշվածներից առավելագույնս ճիշտ) պատասխան:

34. Քննության ժամանակ թեկնածուին արգելվում է օգտվել տպագիր, մեքենագիր, ձեռագիր նյութերից, էլեկտրոնային սարքերից (բացառությամբ Կենտրոնական բանկի կողմից տրամադրված էլեկտրոնային հաշվիչների), ինչպես նաև աղմկել, հուշել, խոսել, հարցեր տալ ներկա գտնվող անձանց, դուրս գալ սենյակից: Եթե թեկնածուն ցանկանում է լքել սենյակը, նրա աշխատանքը համարվում է դադարեցված: Նշված պահանջներից յուրաքանչյուրի չկատարման դեպքում թեկնածուն զրկվում է քննության հետագա ընթացքին մասնակցելու իրավունքից և համարվում է բացասական արդյունք ապահոված:

35. Աշխատանքն ավարտելուց կամ քննության առաջադրանքները կատարելու համար սահմանված ժամանակը սպառվելուց հետո թեկնածուին տրվում է իր հանձնած թեսթի արդյունքների վերաբերյալ հաշվետվություն (երկու օրինակից), որտեղ արտացոլվում են թեկնածուի միավորները տոկոսային արտահայտությամբ: Հաշվետվությունները ստորագրվում են թեկնածուի կողմից: Ստորագրված հաշվետվության մեկ օրինակը մնում է Կենտրոնական բանկում, մյուսը տրվում է թեկնածուին:

Գ Լ ՈՒ Խ  6

 ԹԵՍԹԻ ԳՆԱՀԱՏՈՒՄԸ ԵՎ ԱՐԴՅՈՒՆՔՆԵՐԸ

36. Թեսթերի հարցերի գնահատումը կատարվում է հետևյալ կերպ.

1) թեկնածուի կողմից միավորների առավելագույն թվի մինչև 70 տոկոսը հավաքելու դեպքում թեկնածուն համարվում է բացասական արդյունք ապահոված,

2) թեկնածուի կողմից միավորների առավելագույն թվի 70 և ավելի տոկոսը հավաքելու դեպքում թեկնածուն համարվում է դրական արդյունք ապահոված, և նրան տրվում է որակավորման վկայական:

37. Բացասական արդյունք ապահոված թեկնածուները կրկին կարող են դիմել մասնակցելու քննությանը` համապատասխան որակավորման վկայական ստանալու համար:

38. Թեսթերի հարցերի պատասխանների արդյունքները (ելնելով համակարգչային տվյալներից) հաստատում է հանձնաժողովը:

Գ Լ ՈՒ Խ  7

ՀԱՐՑԱԶՐՈՒՅՑԸ

39. Հարցազրույցի ժամանակ ստուգվում են սույն կանոնակարգի 12-րդ կետում նշված պաշտոններում որպես ղեկավար աշխատելու համար դիմող թեկնածուների գիտելիքները սույն կանոնակարգի գլուխ 15-ով սահմանված` այդ թեկնածուներին վերաբերող թեմաների շրջանակներում:

40. Հարցազրույցի արդյունքներով Կենտրոնական բանկի խորհուրդն ընդունում է որոշում` սույն կանոնակարգի 39-րդ կետում նշված թեմաների շրջանակներում սույն կանոնակարգի 12-րդ կետում նշված թեկնածուների գիտելիքների համապատասխանության կամ անհամապատասխանության վերաբերյալ:

41. Սույն կանոնակարգի 39-րդ կետում նշված թեմաների շրջանակներում սույն կանոնակարգի 12-րդ կետում նշված թեկնածուների գիտելիքների համապատասխանության վերաբերյալ Կենտրոնական բանկի խորհրդի որոշման ընդունման դեպքում սույն կանոնակարգի 12-րդ կետում նշված անձինք համարվում են համապատասխան տեսակի որակավորում ստացած:

Գ Լ ՈՒ Խ  8

ՔՆՆՈՒԹՅԱՆ ԲՈՂՈՔԱՐԿՈՒՄԸ

42. Թեկնածուները կարող են բողոքարկել անցկացված քննության արդյունքները քննության անցկացման օրվանից 5 աշխատանքային օրվա ընթացքում գրավոր դիմում ներկայացնելով Կենտրոնական բանկ` համաձայն սույն կանոնակարգի Հավելված 4-ի կամ դիմումը լրացնելով Կենտրոնական բանկի ինտերնետային կայքի համապատասխան էջում: Դիմումը ստանալուց հետո 15 աշխատանքային օրվա ընթացքում Կենտրոնական բանկը տեղեկացնում է բողոքարկողին բողոքարկման արդյունքների վերաբերյալ:

Գ Լ ՈՒ Խ  9

ՈՐԱԿԱՎՈՐՄԱՆ ՎԿԱՅԱԿԱՆԻ ՏՐԱՄԱԴՐՈՒՄԸ

43. Որակավորման վկայականը տրվում է քննության դրական արդյունք ապահոված թեկնածուներին թղթային ձևով` համաձայն սույն կանոնակարգի Հավելված 3-ի, քննությունը հանձնելու օրվանից տասնհինգ աշխատանքային օրվա ընթացքում` ըստ պաշտոնների հետևյալ խմբավորման.

1. ֆոնդի կառավարչի և օտարերկրյա ֆոնդի կառավարչի մասնաճյուղի գործադիր տնօրենի (գործադիր մարմնի ղեկավարի) և անդամների, գործադիր տնօրենի տեղակալի պաշտոնների համար,

2. ֆոնդի կառավարչի և օտարերկրյա ֆոնդի կառավարչի գլխավոր հաշվապահի և գլխավոր հաշվապահի տեղակալի պաշտոնների համար,

3. ֆոնդի կառավարչի և օտարերկրյա ֆոնդի կառավարչի ներքին աուդիտի ղեկավարի և անդամների պաշտոնների համար,

4. ֆոնդի կառավարչի մասնաճյուղի տնօրենի համար,

5. ֆոնդի կառավարչի անունից կամ կազմում ֆոնդի կառավարման գործունեություն իրականացնող ֆիզիկական անձի պաշտոնի համար,

6. ֆոնդի պահառուի ղեկավարի և աշխատակցի պաշտոնների համար:

44. Որակավորվող անձանց վերաբերյալ տեղեկատվությունը հրապարակվում է Կենտրոնական բանկի ինտերնետային կայքում` «Որակավորման վկայական ունեցող անձինք» ցուցակում, քննությունը հանձնելու օրվանից տասնհինգ աշխատանքային օրվա ընթացքում: Որակավորվող անձանց ցուցակը թարմացվում է որակավորվող անձանց որակավորման ժամկետը լրանալու կամ որակավորումից զրկվելու օրվանից հետո երկու աշխատանքային օրվա ընթացքում:

45. Յուրաքանչյուր թեկնածու կարող է դիմել Կենտրոնական բանկ` մեկից ավելի ղեկավար պաշտոնների համար նախատեսված քննություններին մասնակցելու և համապատասխան որակավորման վկայականներ ստանալու համար:

46. Որակավորման վկայականները տրվում են ըստ հերթական համարների:

47. Որակավորման վկայականները տրվում են դրանց ստորագրման պահից հաշված 3 տարի ժամկետով, բացառությամբ սույն կանոնակարգի 48-րդ կետով նախատեսված դեպքերի:

48. Ֆոնդի կառավարչի (օտարերկրյա ֆոնդի կառավարչի մասնաճյուղի) խորհրդի նախագահի և անդամների որակավորումը տրվում է մինչև նրանց պաշտոնավարման ժամկետի ավարտը` սույն կանոնակարգի 41-րդ կետով սահմանված կարգով: Որակավորում ստացած ֆոնդի կառավարչի (օտարերկրյա ֆոնդի կառավարչի մասնաճյուղի) խորհրդի նախագահը և խորհրդի անդամներն իրենց պաշտոնավարման ընթացքում Կենտրոնական բանկի նախագահի որոշմամբ կարող են հրավիրվել լրացուցիչ հարցազրույցի Կենտրոնական բանկի խորհրդի նիստում` որակավորման նպատակով: Ընդ որում, լրացուցիչ հարցազրույցը կարող է իրականացվել ոչ հաճախ, քան երեք տարին մեկ անգամ, որի մասին ֆոնդի կառավարիչը (օտարերկրյա ֆոնդի կառավարչի մասնաճյուղը) տեղեկացվում է առնվազն 30 օր առաջ: Լրացուցիչ հարցազրույցի արդյունքներով Կենտրոնական բանկի խորհուրդն ընդունում է որոշում` սույն կանոնակարգի գլուխ 15-ով սահմանված` ֆոնդի կառավարչի (օտարերկրյա ֆոնդի կառավարչի մասնաճյուղի) խորհրդի նախագահին կամ խորհրդի անդամին վերաբերող թեմաների շրջանակներում այս անձանց գիտելիքների համապատասխանության կամ անհամապատասխանության վերաբերյալ: Սույն կանոնակարգի 15-րդ գլխով սահմանված` Ֆոնդի կառավարչի (օտարերկրյա ֆոնդի կառավարչի մասնաճյուղի) խորհրդի նախագահի կամ խորհրդի անդամի գիտելիքների անհամապատասխանության վերաբերյալ Կենտրոնական բանկի խորհրդի որոշման ընդունման դեպքում, ինչպես նաև սույն ենթակետով սահմանված կարգով լրացուցիչ հարցազրույցին անհարգելի պատճառներով չներկայանալու դեպքում այդ անձինք համարվում են որակավորում չունեցող:

(48-րդ կետը փոփ. 20.12.11 թիվ 363-Ն)

49. Որակավորվող անձինք որակավորման վկայականը կորցնելու դեպքում կարող են այդ մասին գրավոր հայտնել Կենտրոնական բանկ` ներկայացնելով գրավոր դիմում Կենտրոնական բանկի նախագահի անունով: Դիմումը ստանալուց հետո տասն աշխատանքային օրվա ընթացքում որակավորվող անձին տրվում է որակավորման նոր վկայական` «Կրկնօրինակ» նշագրումով, իսկ կորցրած վկայականը համարվում է անվավեր:

Գ Լ ՈՒ Խ  10

ՈՐԱԿԱՎՈՐՄԱՆ ՎԿԱՅԱԿԱՆՈՎ ՏՐՎՈՂ ԼԻԱԶՈՐՈՒԹՅՈՒՆՆԵՐԻ ՇՐՋԱՆԱԿԸ

50. Սույն կանոնակարգի 43-րդ կետի 1-ին ենթակետով նշված պաշտոնների համար որակավորման վկայական ստացած անձը կարող է աշխատել նաև ֆոնդի կառավարչի մասնաճյուղի տնօրեն, ֆոնդի կառավարչի անունից կամ կազմում ֆոնդի կառավարման գործունեություն իրականացնող ֆիզիկական անձ, ֆոնդի պահառուի ղեկավար կամ աշխատակից:

51. Ֆոնդի կառավարչի կամ օտարերկրյա ֆոնդի կառավարչի մասնաճյուղի գլխավոր հաշվապահը ի պաշտոնե կարող է լինել տվյալ ֆոնդի կառավարչի կամ օտարերկրյա ֆոնդի կառավարչի մասնաճյուղի գործադիր մարմնի (տնօրինության, վարչության) անդամ` առանց գործադիր մարմնի (տնօրինության, վարչության) անդամի որակավորման վկայական ստանալու:

52. Սույն կանոնակարգի 43-րդ կետի 3-րդ ենթակետով նշված ֆոնդի կառավարչի կամ օտարերկրյա ֆոնդի կառավարչի մասնաճյուղի ներքին աուդիտի ղեկավարի և ներքին աուդիտի անդամի պաշտոնների համար որակավորման վկայական ստացած անձը կարող է աշխատել ֆոնդի կառավարչի կամ օտարերկրյա ֆոնդի կառավարչի մասնաճյուղի գլխավոր հաշվապահ, գլխավոր հաշվապահի տեղակալ:

Բ Ա Ժ Ի Ն  III

ԳՐԱՆՑՄԱՆ ԿԱՐԳԸ ԵՎ ՄԱՍՆԱԳԻՏԱԿԱՆ ՀԱՄԱՊԱՏԱՍԽԱՆՈՒԹՅԱՆ ՉԱՓԱՆԻՇՆԵՐԸ

Գ Լ ՈՒ Խ  11
(գլուխը խմբ. 25.12.12 թիվ 376-Ն)

ՂԵԿԱՎԱՐԻ ԵՎ ՊԱՏԱՍԽԱՆԱՏՈՒ ԱՆՁԻ (ՈՐԱԿԱՎՈՐՎՈՂ ԱՆՁԻ ԳՐԱՆՑՈՒՄԸ) ԳՐԱՆՑՈՒՄԸ

(վերնագիրը խմբ. 25.12.12 թիվ 376-Ն)

53. Ղեկավարների և պատասխանատու անձանց (որակավորվող անձանց) գրանցումը իրականացվում է 2 ընթացակարգով՝ պարզ և բարդ: Գրանցվող ղեկավարների և պատասխանատու անձանց գրանցման ընթացակարգերը, ըստ զբաղեցրած պաշտոնների, սահմանված է կանոնակարգի Հավելված 2ա-ով:

54. Բարդ ընթացակարգով գրանցումը ներառում է.

1) թեկնածուների որակավորման առկայություն՝ Կենտրոնական բանկում գրավոր քննության կամ բանավոր հարցազրույցի միջոցով սույն Կանոնակարգով սահմանված կարգով, բացառությամբ 63-րդ և 63.1 կետերով սահմանված դեպքերի,

2) թեկնածուի անձի՝ որպես ղեկավարի կամ պատասխանատու աշխատակցի, գնահատում՝ կանոնակարգով պահանջվող փաստաթղթերով ներկայացվող տեղեկատվության, ինչպես նաև օրենքով սահմանված մերժման հիմքերի ուսումնասիրության միջոցով,

3) թեկնածուների հետ բանավոր հարցազրույցի անցկացում՝ վերջինիս կողմից համապատասխան պարտականությունները կատարելու ունակության, կոլեգիալ կառավարման մարմնում արդյունավետ գործունեություն իրականացնելու հնարավորության և այլ հմտությունների ստուգման նպատակով, բացառությամբ 63.2 կետի:

55. Պարզ ընթացակարգով գրանցումը ներառում է.

1) թեկնածուների որակավորման առկայություն՝ Կենտրոնական բանկում գրավոր քննության կամ բանավոր հարցազրույցի միջոցով, բացառությամբ 63-րդ և 63.1 կետերով սահմանված դեպքերի,

2) թեկնածուի վերաբերյալ տեղեկատվության ստացում` կանոնակարգով պահանջվող փաստաթղթերի ներկայացման միջոցով:

56. Անձին որպես ղեկավար (պատասխանատու անձ) գրանցելու կամ ղեկավարների (պատասխանատու անձանց) կազմում փոփոխությունները գրանցելու համար ֆոնդի կառավարիչը, օտարերկրյա ֆոնդի մասնաճյուղը կամ ֆոնդի պահառուն Կենտրոնական բանկ են ներկայացնում հետևյալ փաստաթղթերը.

1) Բարդ ընթացակարգով գրանցվող ղեկավարների գրանցման համար՝

ա. անձին որպես ղեկավար գրանցելու կամ ղեկավարների կազմում փոփոխություն կատարելու մասին միջնորդագիրը` համաձայն կանոնակարգի Հավելված 2-ի,

բ. իրավասու մարմնի որոշումը ղեկավարի նշանակման կամ ղեկավարների կազմում փոփոխություն կատարելու մասին,

2) Պարզ ընթացակարգով գրանցվող ղեկավարների և պատասխանատու անձանց գրանցման համար Կենտրոնական բանկ է ներկայացվում անձին որպես ղեկավար կամ պատասխանատու անձ գրանցելու կամ փոփոխություն կատարելու մասին միջնորդագիրը` համաձայն Հավելված 2-ի:

57. Սույն կանոնակարգի Հավելված 2-ով սահմանված միջնորդագրի 2.6, 2.8-2.10, 3.3 ենթակետերով, ինչպես նաև 5-9-րդ կետերով սահմանված տեղեկությունների փոփոխությունները նույնպես ներկայացվում են Կենտրոնական բանկ` փոփոխությունները ֆոնդի կառավարչին կամ ֆոնդի պահառուին հայտնի դառնալուց հետո ոչ ուշ, քան եռօրյա ժամկետում: Սույն կանոնակարգի Հավելված 2-ով սահմանված միջնորդագիրը (տեղեկանքը) և սույն կետով սահմանված իրավասու մարմնի որոշման սքան արված տարբերակը ֆոնդի կառավարչի կամ ֆոնդի պահառուի կողմից ներկայացվում են էլեկտրոնային տարբերակով` Սի-Բի-Էյ-Նեթ համակարգի միջոցով, իսկ անհնարինության դեպքում` էլեկտրոնային կրիչով: Սույն կանոնակարգի Հավելված 2-ով սահմանված միջնորդագիրը ներկայացվում է էքսել (excel) ֆորմատով՝ հաստատված գործադիր մարմնի ղեկավարի ստորագրությամբ: Ընդ որում, նշված միջնորդագրով (տեղեկանքով) ներկայացված տեղեկատվության իսկությունը ստուգելու համար Կենտրոնական բանկը կարող է դիմել համապատասխան իրավասու մարմիններին` պահպանելով ձեռքբերված տեղեկատվության գաղտնիությունը:

58. Ֆոնդի կառավարիչը, օտարերկրյա ֆոնդի մասնաճյուղը և ֆոնդի պահառուն պետք է ունենան և Կենտրոնական բանկ ներկայացնեն համապատասխան իրավասու մարմնի կողմից հաստատված ներքին կանոնակարգ, որտեղ առնվազն պետք է նկարագրվեն «Ներդրումային ֆոնդերի մասին» Հայաստանի Հանրապետության օրենքով և սույն կանոնակարգով սահմանված` ղեկավարների գրանցման մերժման հիմքերը ստուգելու գործընթացները, վերջիններիս նկատմամբ սահմանված պահանջների պահպանման մեխանիզմները:

59. Կենտրոնական բանկը պարտավոր է ղեկավարների (պատասխանատու անձանց) կազմում կատարված փոփոխությունների գրանցման համար սույն կանոնակարգի համապատասխան գլուխներով սահմանված փաստաթղթերը ստանալու պահից հետո՝ օրենքով սահմանված ժամկետում գրանցել փոփոխությունները կամ մերժել գրանցումը: Բարդ ընթացակարգով գրանցվող ղեկավարների կազմում կատարված փոփոխությունները գրանցվում են Կենտրոնական բանկի նախագահի որոշմամբ: Պարզ ընթացակարգով գրանցվող ղեկավարները գրանցված են համարվում Կենտրոնական բանկ փաստաթղթերը մուտքագրելու պահից հետո՝ օրենքով սահմանված ժամկետի վերջին օրվան հաջորդող օրվանից՝ Կենտրոնական բանկի նախագահի որոշմամբ, եթե Կենտրոնական բանկը սույն կանոնակարգի 60-60.1 կետերի ուսումնասիրության արդյունքում, Կենտրոնական բանկի հիմնավոր կարծիքով՝ բանավոր կամ գրավոր ծանուցման միջոցով, չի պահանջում անձին գրանցել բարդ ընթացակարգով: Կենտրոնական բանկի կողմից պահանջվող որոշակի փաստեր պարզաբանելու նպատակով մեկամսյա ժամկետը կարող է կասեցվել առավելագույնը երեք ամիս ժամկետով: Ընդ որում, օրենքով սահմանված ժամկետի կասեցման դեպքում կասեցվում է նաև կանոնակարգի 75-րդ կետով սահմանված 90-օրյա ժամկետը: Կասեցումը դադարեցնելուց հետո ղեկավարի ժամանակավոր պաշտոնակատարի պաշտոնավարման ժամկետը չի կարող գերազանցել եռամսյա ժամկետի և ժամանակավոր պաշտոնավարման` մինչև կասեցումն ընկած օրերի տարբերությամբ առաջացող օրերի քանակը: Եթե Կենտրոնական բանկը պահանջում է պարզ ընթացակարգով գրանցվող ղեկավարի թեկնածուին գրանցել բարդ ընթացակարգով, ապա Կենտրոնական բանկը այդ մասին ծանուցում է, համապատասխանաբար, ֆոնդի կառավարչին, օտարերկրյա ֆոնդի կառավարչի մասնաճյուղին կամ ֆոնդի պահառուին, իսկ ֆոնդի կառավարիչը, օտարերկրյա ֆոնդի կառավարիչը կամ ֆոնդի պահառուն պարտավոր է ծանուցման օրվան հաջորդող 5-օրյա ժամկետում ղեկավարի թեկնածուին ներկայացնել բարդ ընթացակարգով գրանցման: Նշված դեպքում պահպանվում են բարդ ընթացակարգով գրանցման ընթացակարգերը:

59.1. Սույն կանոնակարգի 59-րդ կետում նշված ծանուցումը ստանալուց հետո ֆոնդի կառավարիչը, օտարերկրյա ֆոնդի կառավարչի մասնաճյուղը կամ ֆոնդի պահառուն ղեկավարին (ղեկավարներին) ներկայացնում է բարդ ընթացակարգով գրանցման այնքան ժամանակ, քանի դեռ Կենտրոնական բանկը գրավոր կամ բանավոր ծանուցման միջոցով չի տեղեկացրել ֆոնդի կառավարչին, օտարերկրյա ֆոնդի կառավարչի մասնաճյուղին կամ ֆոնդի պահառուին՝ ղեկավարին (ղեկավարներին) պարզ ընթացակարգով գրանցման ներկայացնելու հնարավորության մասին:

59.2. Եթե անձին որպես ղեկավար գրանցելու համար նախկինում Կենտրոնական բանկ է ներկայացվել սույն Կանոնակարգի Հավելված 2-ով պահանջվող ողջ տեղեկատվությունը և հետագայում, համապատասխանաբար, ֆոնդի կառավարիչը կամ ֆոնդի պահառուն դիմում է Կենտրոնական բանկ նույն անձին ղեկավար գրանցելու միջնորդությամբ, ապա Հավելված 2-ով սահմանված միջնորդագիրը սույն գլխով սահմանված կարգով Կենտրոնական բանկ ներկայացնելիս կարող է լրացվել միայն միջնորդագրի 1-ին կետի բոլոր դաշտերը, 2.1 (Անուն, ազգանուն, հայրանուն), 2.3 (Ծննդյան ամսաթիվ) դաշտերը և բոլոր այն դաշտերը, որոնցում նախկինում ներկայացված տեղեկատվությունը փոփոխվել է: Ֆոնդի կառավարիչը կամ ֆոնդի պահառուն նախկինում ղեկավարների գրանցման համար օրենքով սահմանված կարգով Կենտրոնական բանկ ներկայացրած բոլոր փաստաթղթերը և/կամ տեղեկությունները կարող է չներկայացնել` հղում տալով նախկինում ներկայացված միջնորդագրի ամսաթվին, եթե նախկինում ներկայացված տեղեկատվությունը չի փոփոխվել:

59.3. Ֆոնդի կառավարչի, օտարերկրյա ֆոնդի կառավարչի խորհրդի նախագահի և խորհրդի անդամների գրանցման ժամանակ հիմք է ընդունվում սույն կանոնակարգի 40-րդ կետում նշված Կենտրոնական բանկի խորհրդի որոշումը, բացառությամբ այն դեպքերի, երբ Կենտրոնական բանկն անհրաժեշտ չի համարում հարցազրույցի անցկացումը, որի դեպքում սույն կետում նշված ղեկավարները գրանցվում են առանց հարցազրույցի հրավիրվելու:

60. Եթե ֆոնդի կառավարչի կամ օտարերկրյա կառավարչի մասնաճյուղի կամ ֆոնդի պահառուի մոտ առկա է կամ հնարավոր է ֆինանսական վիճակի վատթարացում, կամ Կենտրոնական բանկի կարծիքով, բավարար մակարդակով պահպանված չեն կորպորատիվ կառավարման սկզբունքները կամ սույն կանոնակարգի 58-րդ կետով սահմանված ներքին կանոնակարգը չի պարունակում պահանջվող բոլոր մեխանիզմները և/կամ դրանք իրականում չեն կիրառվում, ապա այդպիսի դեպքերում բոլոր ղեկավարները կարող են հրավիրվել գրանցման բարդ ընթացակարգով:

60.1. Եթե ղեկավարի թեկնածուի վերաբերյալ տվյալների ուսումնասիրության արդյունքում Կենտրոնական բանկի ֆինանսական վերահսկողության համար պատասխանատու ստորաբաժանման և (կամ) այլ պատասխանատու ստորաբաժանման կարծիքով, առկա են ռիսկեր ֆոնդի կառավարչի, օտարերկրյա ֆոնդի կառավարչի մասնաճուղի, ֆոնդի պահառուի և (կամ) ֆինանսական համակարգի կայունության, ինչպես նաև ղեկավարի թեկնածուի համբավի վերաբերյալ, ապա տվյալ թեկնածուն կարող է հրավիրվել գրանցման բարդ ընթացակարգով:

61. Որակավորվող անձի գրանցումը մերժվում է Կենտրոնական բանկի նախագահի անհատական որոշմամբ, եթե

1) առկա են «Ներդրումային ֆոնդերի մասին» Հայաստանի Հանրապետության օրենքի 65-րդ հոդվածի 2-րդ մասով սահմանված պայմանները,

2) որակավորվող անձը չի համապատասխանում սույն կանոնակարգի 12-րդ գլխով սահմանված չափանիշներից առնվազն մեկին,

3) ներկայացված փաստաթղթերը թերի են, անարժանահավատ կամ չեն համապատասխանում օրենքի, այլ իրավական ակտերի, այդ թվում` Կենտրոնական բանկի կողմից սահմանված պահանջներին:

62. Եթե ֆոնդի կառավարչի կամ ֆոնդի պահառուի որակավորվող անձը զրկվել է որակավորման վկայականից, ապա որակավորվող անձին որակավորման վկայականից զրկելու մասին Կենտրոնական բանկի որոշման ընդունման պահից երեք տարվա ընթացքում նա չի կարող գրանցվել որպես ֆոնդի կառավարչի կամ ֆոնդի պահառուի որակավորվող անձ: 

(գլուխը լրաց. 20.12.11 թիվ 363-Ն, խմբ. 25.12.12 թիվ 376-Ն)

Գ Լ ՈՒ Խ  12

ՄԱՍՆԱԳԻՏԱԿԱՆ ՀԱՄԱՊԱՏԱՍԽԱՆՈՒԹՅԱՆ ՉԱՓԱՆԻՇՆԵՐԸ

63. Որակավորվող անձը ստորև նշված որևէ պաշտոնում աշխատելու նպատակով գրանցվելու համար պետք է բավարարի նաև հետևյալ չափանիշներին, ընդ որում, որակավորվող անձինք համարվում են Կենտրոնական բանկի մասնագիտական որակավորման վկայական ունեցող, եթե բավարարում են սույն կետով սահմանված միջազգային որակավորում ունենալու պահանջը:

(63-րդ կետը խմբ. 25.12.12 թիվ 376-Ն)

63.1 Սույն կանոնակարգով սահմանված ղեկավարների այն թեկնածուները, որոնք աշխատել են Կանոնակարգի Հավելված 2բ-ով սահմանված միջազգային հեղինակավոր կազմակերպություններում և իրականացրել են համանման պարտականություններ և/կամ զբաղեցրել են նմանատիպ պաշտոններ, համարվում են Կենտրոնական բանկի մասնագիտական որակավորման վկայական ունեցող:

(63.1-ին կետը լրաց. 25.12.12 թիվ 376-Ն)

63.2 Սույն կանոնակարգով սահմանված ղեկավարներին 54-րդ կետով սահմանված բարդ ընթացակարգով գրանցելիս ղեկավարների թեկնածուները բանավոր հարցազրույցի կարող են չհրավիրվել Կենտրոնական բանկի կարծիքով հիմնավորված դեպքերում:

(63.2-րդ կետը լրաց. 25.12.12 թիվ 376-Ն)

64. Եթե որակավորվող անձը դիմում է գրանցման սույն կանոնակարգի 63-րդ կետով նախատեսված աղյուսակի միաժամանակ 2.2-րդ և 2.3-րդ (3.2-րդ և 3.3-րդ) ենթակետերով նախատեսված պաշտոններում գրանցման համար, ապա տվյալ անձը պետք է բավարարի 2.2-րդ (3.2-րդ) ենթակետերով սահմանված մասնագիտական համապատասխանության չափանիշներին:

65. Սույն կանոնակարգի 63-րդ կետով նախատեսված ակտիվների կառավարման փորձը ներառում է նաև այնպիսի գործունեության իրականացում, որը ներառում է արժեթղթերում ներդրումների կապակցությամբ որոշումների կայացում կամ խորհրդատվության տրամադրում, ակտիվների գնահատում, արժեթղթերի շուկայում վերլուծությունների և(կամ) արժեթղթերով գործարքների իրականացում:

66. Եթե որակավորվող անձը չունի սույն կանոնակարգի 63-րդ կետով նախատեսված աշխատանքային փորձ և (կամ) բարձրագույն կրթություն, ապա նա իրավունք ունի Կենտրոնական բանկ ներկայացնել համապատասխան պաշտոններում աշխատելու համար իր մոտ բավարար գիտելիքների ու հմտությունների առկայության վերաբերյալ համապատասխան փաստաթղթեր, տեղեկություններ և (կամ) այլ հիմնավորումներ: Ներկայացված փաստաթղթերի, տեղեկությունների և (կամ) այլ հիմնավորումների հիման վրա հանձնաժողովի դրական եզրակացությամբ Կենտրոնական բանկի նախագահն իրավունք ունի որոշել գրանցել անձին համապատասխան պաշտոնում, եթե գտնում է, որ անձի մոտ առկա է այդ պաշտոնում աշխատելու համար բավարար գիտելիքներ ու հմտություններ:

67. Սույն կանոնակարգի 63-րդ կետում նշված աշխատանքային փորձը վերաբերում է գրանցման պահին նախորդող 10 տարիներին, բացառությամբ տնօրենների (դիտորդ) խորհրդի նախագահի, խորհրդի անդամի համար նախատեսված աշխատանքային փորձի:

68. Սույն կանոնակարգի իմաստով անձը համարվում է բարձրագույն կրթություն ունեցող, եթե նա ավարտել է Հայաստանի Հանրապետության և(կամ) օտարերկրյա պետության բարձրագույն ուսումնական հաստատություն և(կամ) ստացել է Հայաստանի Հանրապետության և(կամ) միջազգային ճանաչում ունեցող ֆինանսական ոլորտի մասնագիտական որակավորման վկայական:

Գ Լ ՈՒ Խ  13

ԳՐԱՆՑՎԱԾ ՈՐԱԿԱՎՈՐՎՈՂ ԱՆՁԻՆ ԳՐԱՆՑՈՒՄԻՑ ՀԱՆԵԼԸ ԵՎ ԴՐԱ ՀԱՄԱՐ ՆԵՐԿԱՅԱՑՎՈՂ ՓԱՍՏԱԹՂԹԵՐԸ

69. Կենտրոնական բանկի նախագահի որոշմամբ գրանցված որակավորվող անձը հանվում է գրանցումից, եթե

1) որակավորման վկայականի գործողության ժամկետը լրացել է, և գրանցված որակավորվող անձը չի ստացել որակավորման նոր վկայական,

2) գրանցված որակավորվող անձը զրկվել է որակավորման վկայականից,

3) ֆոնդի կառավարիչը կամ ֆոնդի պահառուն դիմել է համապատասխան միջնորդությամբ,

4) գրանցված որակավորվող անձը խախտել է օրենքներով և այլ իրավական ակտերով որակավորվող անձանց նկատմամբ սահմանված պահանջները:

70. Ֆոնդի կառավարչի կամ ֆոնդի պահառուի միջնորդությամբ գրանցված որակավորվող անձին Կենտրոնական բանկում գրանցումից հանելու համար ֆոնդի կառավարիչը կամ ֆոնդի պահառուն փոփոխություններ կատարելու վերաբերյալ ֆոնդի կառավարչի կամ ֆոնդի պահառուի իրավասու մարմնի կողմից որոշում ընդունելու պահից 10 աշխատանքային օրվա ընթացքում Կենտրոնական բանկ են ներկայացնում հետևյալ փաստաթղթերը.

1) գրանցված որակավորվող անձին գրանցումից հանելու վերաբերյալ միջնորդագիր (գրանցումից հանելու պատճառների հիմնավորումներով)` ֆոնդի կառավարչի կամ ֆոնդի պահառուի կառավարման մարմնի կողմից լիազորված անձի ստորագրությամբ` վավերացված ֆոնդի կառավարչի կամ ֆոնդի պահառուի կնիքով (առկայության դեպքում),

2) ֆոնդի կառավարչի կամ ֆոնդի պահառուի իրավասու մարմնի որոշումը կամ արձանագրությունից քաղվածք` փոփոխություններ կատարելու վերաբերյալ, առկայության դեպքում` ժամանակավոր պաշտոնակատարի նշանակման վերաբերյալ:

Գ Լ ՈՒ Խ  14

ՈՐԱԿԱՎՈՐՎՈՂ ԱՆՁԻ ԺԱՄԱՆԱԿԱՎՈՐ ՊԱՇՏՈՆԱԿԱՏԱՐԸ

71. Սույն կանոնակարգի իմաստով` որակավորվող անձի ժամանակավոր պաշտոնակատար են համարվում այն անձինք, որոնք առանց համապատասխան պաշտոնում Հայաստանի Հանրապետության կենտրոնական բանկում գրանցման սույն կանոնակարգով սահմանված կարգով իրականացնում են ֆոնդի կառավարչի կամ ֆոնդի պահառուի որակավորվող անձի պարտականություններ:

72. Ֆոնդի կառավարչի գործադիր մարմնի ղեկավարի (գործադիր տնօրենի) ժամանակավոր պաշտոնակատար կարող են նշանակվել (նշված պարտականությունները կարող են կատարել) միայն համապատասխանաբար տվյալ ֆոնդի կառավարչի գործադիր տնօրենի տեղակալը կամ գործադիր մարմնի անդամը կամ գործադիր տնօրենի որակավորման վկայական ունեցող տվյալ ֆոնդի կառավարչի այլ աշխատակիցը (բացառությամբ ներքին աուդիտի ղեկավարի և անդամի):

73. Ֆոնդի պահառուի ղեկավարի ժամանակավոր պաշտոնակատար կարող է նշանակվել միայն տվյալ ֆոնդի պահառուի այն աշխատակիցը, որն ունի սույն կանոնակարգի 43-րդ կետի 6-րդ ենթակետով սահմանված որակավորման վկայական:

74. Ֆոնդի կառավարչի գլխավոր հաշվապահի ժամանակավոր պաշտոնակատար կարող է նշանակվել (նշված պարտականությունը կարող է կատարել) տվյալ ֆոնդի կառավարչի գլխավոր հաշվապահի տեղակալը կամ գլխավոր հաշվապահի որակավորման վկայական ունեցող ֆոնդի կառավարչի այլ աշխատակիցը:

75. Որակավորվող անձի պաշտոններում առանց որակավորման վկայականի որակավորվող անձի ժամանակավոր պաշտոնակատարի պաշտոնավարման ժամկետ կարող է սահմանվել ոչ ավելի, քան 90 օր: Բացառություն են կազմում գործադիր տնօրենի, գլխավոր հաշվապահի և ֆոնդի կառավարչի անունից կամ կազմում ֆոնդի կառավարման գործունեություն իրականացնող ֆիզիկական անձի ժամանակավոր պաշտոնակատարները, որոնք առանց որակավորման վկայականի չեն կարող պաշտոնավարել: Որակավորման վկայական ունեցող, սակայն Կենտրոնական բանկի կողմից չգրանցված անձինք կարող են աշխատել որպես որակավորվող անձի ժամանակավոր պաշտոնակատար ոչ ավելի, քան 90 օր: Նշված 90-օրյա ժամկետը սահմանվում է տվյալ որակավորվող անձի պաշտոնին նշանակվող բոլոր ժամանակավոր պաշտոնակատարների համար, այսինքն` միևնույն պաշտոնի նոր ժամանակավոր պաշտոնակատարի նշանակումը չի ընդհատում կամ վերսկսում 90-օրյա ժամկետը:

(75-րդ կետը խմբ. 20.12.11 թիվ 363-Ն)

76. Ֆոնդի կառավարչի խորհրդի նախագահը և անդամներն իրավունք ունեն իրականացնել համապատասխանաբար խորհրդի նախագահի և խորհրդի անդամի պարտականությունները միայն Կենտրոնական բանկում համապատասխան պաշտոնում գրանցման պահից: Ֆոնդի կառավարչի խորհրդի նախագահի և անդամների ժամանակավոր պաշտոնակատար չի նախատեսվում:

Բ Ա Ժ Ի Ն  IV

ԹԵԿՆԱԾՈՒՆԵՐԻ ՄԱՍՆԱԳԻՏԱԿԱՆ ՈՐԱԿԱՎՈՐՄԱՆ ՍՏՈՒԳՄԱՆ ԹԵՄԱՆԵՐԻ ՑԱՆԿ

Գ Լ ՈՒ Խ  15

ԹԵԿՆԱԾՈՒՆԵՐԻ ՄԱՍՆԱԳԻՏԱԿԱՆ ՈՐԱԿԱՎՈՐՄԱՆ ՍՏՈՒԳՄԱՆ ԹԵՄԱՆԵՐԻ ՑԱՆԿ

77. Կենտրոնական բանկում թեկնածուների որակավորման ստուգումը անցնում են ստորև աղյուսակում նշված թեմաներով, ընդ որում` «V» նշանը նշանակում է տվյալ թեման վերաբերում է, «-» նշանը նշանակում է չի վերաբերում:

Գ Լ ՈՒ Խ  16

ԱՆՑՈՒՄԱՅԻՆ ԴՐՈՒՅԹՆԵՐ

78. Սույն որոշումն ուժի մեջ մտնելուն հաջորդող 6 ամսվա ընթացքում Հայաստանի Հանրապետության կենտրոնական բանկի խորհրդի 2008 թվականի հունվարի 15-ի թիվ 15-Ն որոշմամբ հաստատված «Ներդրումային ծառայություններ մատուցող անձանց, օպերատորի, Կենտրոնական դեպոզիտարիայի ղեկավարների ու ներդրումային ծառայություններ մատուցող ֆիզիկական անձանց որակավորումը, նրանց մասնագիտական համապատասխանության չափանիշներն ու մասնագիտական որակավորման ստուգման թեմաների ցանկը» կանոնակարգ 4/05-ով սահմանված ներդրումային ծառայություններ մատուցող անձի ղեկավարի կամ ներդրումային ծառայություններ մատուցող անձի կազմում կամ անունից արժեթղթերի փաթեթի կառավարման ծառայություն մատուցող ֆիզիկական անձի որակավորում ունեցող անձինք առանց սույն կանոնակարգով նախատեսված կարգով որակավորվելու կարող են աշխատել ֆոնդի կառավարչի համապատասխան ղեկավարի կամ ֆոնդի անունից կամ կազմում ֆոնդի կառավարման գործունեություն իրականացնող ֆիզիկական անձի պաշտոններում` սույն կանոնակարգով սահմանված համապատասխան պաշտոնում գրանցում ստանալուց հետո: Սույն կետում նշված անձինք սույն որոշումն ուժի մեջ մտնելուն հաջորդող 6-րդ ամսվա վերջին օրվա դրությամբ պետք է ունենան համապատասխան պաշտոնի համար սույն կանոնակարգով նախատեսված որակավորում, հակառակ դեպքում նրանք համարվում են համապատասխան որակավորում չունեցող անձինք և չեն կարող շարունակել իրենց պարտականությունների կատարումը համապատասխան պաշտոնում` բացառությամբ սույն կանոնակարգի 79-րդ կետով նախատեսված դեպքերի:

79. Սույն որոշումն ուժի մեջ մտնելու պահին Հայաստանի Հանրապետության կենտրոնական բանկի խորհրդի 2008 թվականի հունվարի 15-ի թիվ 15-Ն որոշմամբ հաստատված «Ներդրումային ծառայություններ մատուցող անձանց, օպերատորի, Կենտրոնական դեպոզիտարիայի ղեկավարների ու ներդրումային ծառայություններ մատուցող ֆիզիկական անձանց որակավորումը, նրանց մասնագիտական համապատասխանության չափանիշներն ու մասնագիտական որակավորման ստուգման թեմաների ցանկը» կանոնակարգ 4/05-ով սահմանված ներդրումային ընկերության կամ օտարերկրյա ներդրումային ընկերության մասնաճյուղի գլխավոր հաշվապահի և գլխավոր հաշվապահի տեղակալի որակավորում ունեցող անձինք կարող են աշխատել նաև որպես ֆոնդի կառավարչի կամ օտարերկրյա ֆոնդի կառավարչի` համապատասխանաբար գլխավոր հաշվապահ կամ գլխավոր հաշվապահի տեղակալ մինչև այդ որակավորման վկայականներով սահմանված գործունեության ժամկետի ավարտը` սույն կանոնակարգով սահմանված համապատասխան պաշտոնում գրանցում ստանալուց հետո:

80. Սույն որոշման ուժի մեջ մտնելուն հաջորդող 3 ամսվա ընթացքում Հայաստանի Հանրապետության կենտրոնական բանկի խորհրդի 2008 թվականի հունվարի 15-ի թիվ 15-Ն որոշմամբ հաստատված «Ներդրումային ծառայություններ մատուցող անձանց, օպերատորի, Կենտրոնական դեպոզիտարիայի ղեկավարների ու ներդրումային ծառայություններ մատուցող ֆիզիկական անձանց որակավորումը, նրանց մասնագիտական համապատասխանության չափանիշներն ու մասնագիտական որակավորման ստուգման թեմաների ցանկը» կանոնակարգ 4/05-ով սահմանված պահառուի աշխատակցի որակավորում ունեցող անձինք առանց սույն կանոնակարգով նախատեսված կարգով որակավորվելու կարող են աշխատել ֆոնդի պահառուի ղեկավարի և աշխատակցի պաշտոններում` սույն կանոնակարգով սահմանված համապատասխան պաշտոնում գրանցում ստանալուց հետո: Սույն կետում նշված անձինք սույն որոշումն ուժի մեջ մտնելուն հաջորդող 3-րդ ամսվա վերջին օրվա դրությամբ պետք է ունենան համապատասխան պաշտոնի համար սույն կանոնակարգով նախատեսված որակավորում, հակառակ դեպքում նրանք համարվում են համապատասխան որակավորում չունեցող անձինք և չեն կարող շարունակել իրենց պարտականությունների կատարումը համապատասխան պաշտոնում:

ՀԱՎԵԼՎԱԾ 1

«Ներդրումային ֆոնդի կառավարիչների և պահառուների ղեկավարների ու ներդրումային ֆոնդի կառավարման գործունեություն իրականացնող և ներդրումային ֆոնդի պահառություն իրականացնող ֆիզիկական անձանց որակավորումը, նրանց մասնագիտական համապատասխանության չափանիշներն ու մասնագիտական որակավորման ստուգման թեմաների ցանկը» Կանոնակարգ 10/05-ը Հավելվածի

ՈՐԱԿԱՎՈՐՄԱՆ ՍՏՈՒԳՄԱՆԸ ՄԱՍՆԱԿՑԵԼՈՒ ՀԱՄԱՐ ՆԵՐԿԱՅԱՑՎՈՂ ԴԻՄՈՒՄ

ՀԱՎԵԼՎԱԾ 2

«Ներդրումային ֆոնդի կառավարիչների և պահառուների ղեկավարների ու ներդրումային ֆոնդի կառավարման գործունեություն իրականացնող և ներդրումային ֆոնդի պահառություն իրականացնող ֆիզիկական անձանց որակավորումը, նրանց մասնագիտական համապատասխանության չափանիշներն ու մասնագիտական որակավորման ստուգման թեմաների ցանկը» Կանոնակարգ 10/05-ը Հավելվածի

Միջնորդագիր

Ղեկավարների (որակավորվող անձի) վերաբերյալ տեղեկություններ

Խնդրում ենք սույն միջնորդագրում նշված անձին գրանցել որպես ղեկավար և կից ներկայացնում ենք նրա վերաբերյալ տեղեկությունները:

ՀԱՎԵԼՎԱԾ 2ա

«Ներդրումային ֆոնդի կառավարիչների և պահառուների ղեկավարների ու ներդրումային ֆոնդի կառավարման

գործունեություն իրականացնող և ներդրումային ֆոնդի պահառություն իրականացնող ֆիզիկական անձանց

որակավորումը, նրանց մասնագիտական համապատասխանության չափանիշներն ու մասնագիտական

որակավորման ստուգման թեմաների ցանկը» Կանոնակարգ 10/05-ը Հավելվածի

ՆԵՐԴՐՈՒՄԱՅԻՆ ՖՈՆԴԻ ԿԱՌԱՎԱՐԻՉՆԵՐԻ ԵՎ ՊԱՀԱՌՈՒՆԵՐԻ ՂԵԿԱՎԱՐՆԵՐԻ ԳՐԱՆՑՄԱՆ ԸՆԹԱՑԱԿԱՐԳԸ

(հավելվածը լրաց. 25.12.12 թիվ 376-Ն)

ՀԱՎԵԼՎԱԾ 2բ

«Ներդրումային ֆոնդի կառավարիչների և պահառուների ղեկավարների ու ներդրումային ֆոնդի կառավարման

գործունեություն իրականացնող և ներդրումային ֆոնդի պահառություն իրականացնող ֆիզիկական անձանց

որակավորումը, նրանց մասնագիտական համապատասխանության չափանիշներն ու մասնագիտական

որակավորման ստուգման թեմաների ցանկը» Կանոնակարգ 10/05-ը Հավելվածի

Միջազգային ֆինանսական կազմակերպությունների ցանկ

1. Ասիական զարգացման բանկ (Asian Development Bank)

2. Միջազգային հաշվարկների բանկ (Bank of International Settlements)

3. Սևծովյան առևտրի և զարգացման բանկ (Black Sea Trade and Development Bank)

4. Կարիբյան զարգացման բանկ (Caribbean Development Bank)

5. Կենտրոնական Ամերիկայի տնտեսական ինտեգրման բանկ (Central American Bank of Economic Integration)

6. Լատինական Ամերիկայի զարգացման բանկ (Corporation Andina de Fomento)

7. Վերակառուցման և զարգացման եվրոպական բանկ (European Bank for Reconstruction and Development)

8. Եվրոպական հանձնաժողով (European Commission)

9. Եվրոպական ներդրումային բանկ (European Investment Bank)

10. Ներամերիկյան զարգացման բանկ (Inter-American Development Bank)

11. Միջազգային արժութային հիմնադրամ (International Monetary Fund)

12. Իսլամական զարգացման բանկ (Islamic Development Bank)

13. Սկանդինավյան զարգացման հիմնադրամ (Nordic Development Fund)

14. Սկանդինավյան ներդրումային բանկ (Nordic Investment Bank)

15. Նավթ արտահանող երկրների կազմակերպության միջազգային զարգացման հիմնադրամ (OPEC Fund for International Development)

16. Տնտեսական համագործակցության և զարգացման կազմակերպություն (Organization for Economic Co-operation and Development)

17. Նավթանյութեր արտահանող երկրների կազմակերպություն (Organization of Petroleum-Exporting Countries)

18. Համաշխարհային բանկի խումբ (World Bank Group)

1) Վերակառուցման և զարգացման միջազգային բանկ (International Bank for Reconstruction and Development)

2) Միջազգային զարգացման ասոցիացիա (International Development Association)

3) Միջազգային ֆինանսական կորպորացիա (International Finance Corporation)

4) Բազմազգ ներդրումների երաշխավորման գործակալություն (Multinational Investment Guarantee Agency)

5) Ներդրումային վեճերի կարգավորման միջազգային կենտրոն (International Centre for Settlement of Investment Disputes)

19. Վերակառուցման բանկ (Kreditanstalt für Wiederaufbau (KfW))

20. Տնտեսական համագործակցության և զարգացման կազմակերպության անդամ երկրների ֆինանսական կազմակերպություններ:

(հավելվածը լրաց. 25.12.12 թիվ 376-Ն)

ՀԱՎԵԼՎԱԾ 3

«Ներդրումային ֆոնդի կառավարիչների և պահառուների ղեկավարների ու ներդրումային ֆոնդի կառավարման գործունեություն իրականացնող և ներդրումային ֆոնդի պահառություն իրականացնող ֆիզիկական անձանց որակավորումը, նրանց մասնագիտական համապատասխանության չափանիշներն ու մասնագիտական որակավորման ստուգման թեմաների ցանկը» Կանոնակարգ 10/05-ը Հավելվածի

ՖՈՆԴԻ ԿԱՌԱՎԱՐՉԻ, ՖՈՆԴԻ ՊԱՀԱՌՈՒԻ ՈՐԱԿԱՎՈՐՎՈՂ ԱՆՁԻ

ՈՐԱԿԱՎՈՐՄԱՆ ՎԿԱՅԱԿԱՆԻ ՁԵՎ

ՀԱՎԵԼՎԱԾ 4

«Ներդրումային ֆոնդի կառավարիչների և պահառուների ղեկավարների ու ներդրումային ֆոնդի կառավարման գործունեություն իրականացնող և ներդրումային ֆոնդի պահառություն իրականացնող ֆիզիկական անձանց որակավորումը, նրանց մասնագիտական համապատասխանության չափանիշներն ու մասնագիտական որակավորման ստուգման թեմաների ցանկը» Կանոնակարգ 10/05-ը Հավելվածի