ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

9 փետրվարի 2012 թվականի N 176-Ն

ՄՇԱԿՈՒԹԱՅԻՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻՆ «ԱԶԳԱՅԻՆ» ԿԱՐԳԱՎԻՃԱԿ ՇՆՈՐՀԵԼՈՒ ԿԱՐԳԸ ԵՎ ՊԱՅՄԱՆՆԵՐԸ ՍԱՀՄԱՆԵԼՈՒ ՄԱՍԻՆ

«Մշակութային օրենսդրության հիմունքների մասին» Հայաստանի Հանրապետության օրենքի 21-րդ հոդվածի 5-րդ կետին համապատասխան` Հայաստանի Հանրապետության կառավարությունը որոշում է.

1. Սահմանել մշակութային ոչ առևտրային կազմակերպություններին «ազգային» կարգավիճակ շնորհելու կարգը և պայմանները` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Տ. Սարգսյան
2012 թ. փետրվարի 27 Երևան

Կ Ա Ր Գ  ԵՎ  Պ Ա Յ Մ Ա Ն Ն Ե Ր

ՄՇԱԿՈՒԹԱՅԻՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻՆ «ԱԶԳԱՅԻՆ» ԿԱՐԳԱՎԻՃԱԿ ՇՆՈՐՀԵԼՈՒ

1. Սույն կարգով սահմանվում են մշակույթի ոլորտում գործունեություն իրականացնող ոչ առևտրային կազմակերպություններին «ազգային» կարգավիճակ շնորհելու հետ կապված հարաբերություններն ու պայմանները:

2. Մշակութային ոչ առևտրային կազմակերպություններին «ազգային» կարգավիճակ շնորհում է Հայաստանի Հանրապետության կառավարությունը` Հայաստանի Հանրապետության մշակույթի նախարարության (այսուհետ` նախարարություն) միջնորդությամբ:

3. Մշակութային ոչ առևտրային կազմակերպություններին «ազգային» կարգավիճակ շնորհելու նպատակով Հայաստանի Հանրապետության մշակույթի նախարարի (այսուհետ` նախարար) հրամանով ստեղծվում է առնվազն 7 անդամից կազմված հանձնաժողով (այսուհետ` հանձնաժողով): Հանձնաժողովի գործունեությունն իրականացվում է հանձնաժողովի նիստերի միջոցով: Նիստերը հրավիրվում են նախարարի կողմից` ըստ անհրաժեշտության: Հանձնաժողովի անհատական կազմը և աշխատակարգը հաստատվում է նախարարի հրամանով: Հանձնաժողովի կազմում կարող են ընդգրկվել շահագրգիռ պետական մարմինների և այլ կազմակերպությունների ներկայացուցիչներ, մտավորականներ, մշակույթի բնագավառի գործիչներ, փորձագետներ: Հանձնաժողովի նիստին մասնակցելու համար անհրաժեշտության դեպքում կարող են հրավիրվել նաև համապատասխան ոլորտների մասնագետներ:

4. «Ազգային» կարգավիճակ շնորհվում է համապետական և համազգային նշանակության` բացառիկ գործունեություն իրականացնող թատերական, երաժշտական, պարարվեստի, ֆիլմարվեստի, թանգարանային, գրադարանային ու արխիվային գործող և նոր ստեղծվող մշակութային ոչ առևտրային առանձին կազմակերպություններին:

5. «Ազգային» կարգավիճակ կարող է շնորհվել մշակութային գործունեության տվյալ ոլորտը և տեսակը ներկայացնող միայն մեկ կազմակերպության:

6. «Ազգային» կարգավիճակ կարող է շնորհվել միայն հետևյալ պահանջները և պայմանները բավարարող`

1) գործող այն մշակութային ոչ առևտրային կազմակերպություններին, որոնք առանձնանում են ինքնատիպությամբ, կատարողական բարձր վարպետությամբ, մնայուն ձեռքբերումներով հարստացնում և զարգացնում են հայկական մշակութային ժառանգությունը, նպաստում նրա պահպանմանն ու հանրահռչակմանը, խթանում են ազգային և համամարդկային արժեքների տարածմանը, նպաստում հասարակության բարոյական ու գեղագիտական դաստիարակությանը.

2) նոր ստեղծվող այն մշակութային ոչ առևտրային կազմակերպություններին, որոնք մշակութային գործունեության տվյալ ոլորտում առանձնանում են իրենց բացառիկ բնույթով, և այդ կազմակերպությունների կանոնադրական գործառույթներում նախատեսված են սույն կետի 1-ին ենթակետով սահմանված պահանջներն ու պայմանները:

7. Սույն կարգի 4-րդ և 6-րդ կետերի պահանջներն ու պայմանները բավարարող մշակութային ոչ առևտրային կազմակերպությունն «ազգային» կարգավիճակ ստանալու նպատակով կարող է նախարարություն ներկայացնել հայտ: Հայտատուն հայտը ներկայացնում է նախարարի անունով` նշելով մշակութային ոչ առևտրային կազմակերպության անվանումը, կազմակերպական-իրավական ձևը, գտնվելու վայրը, հեռախոսահամարը և մշակութային ոչ առևտրային կազմակերպության գործունեության ոլորտը (ոլորտները): Հայտը կարող է ներկայացվել նաև էլեկտրոնային եղանակով:

8. Հայտն ընդունում է նախարարության աշխատակազմի համապատասխան կառուցվածքային ստորաբաժանումը (այսուհետ` կառուցվածքային ստորաբաժանում) և այն ուսումնասիրում է տասն աշխատանքային օրվա ընթացքում:

9. Սույն կարգի 8-րդ կետով սահմանված ժամկետում հայտատուի ներկայացրած հայտի ուսումնասիրության արդյունքում կառուցվածքային ստորաբաժանումը պարզում է մշակութային ոչ առևտրային կազմակերպության համապատասխանությունը կամ անհամապատասխանությունը սույն կարգի 4-րդ և 6-րդ կետերի պահանջներին ու պայմաններին, ինչպես նաև` տվյալ ոլորտում «ազգային» կարգավիճակ ունեցող մշակութային ոչ առևտրային կազմակերպության առկայությունը: Հայտի ուսումնասիրության արդյունքներն ամփոփվում են, և տրվում է գրավոր տեղեկանք:

10. Ներկայացված հայտը նախարարի կողմից մերժվում է, եթե տվյալ ոլորտը և տեսակը ներկայացնող որևէ մշակութային ոչ առևտրային կազմակերպության արդեն իսկ շնորհվել է «ազգային» կարգավիճակ:

11. Եթե կառուցվածքային ստորաբաժանումը սույն կարգի 8-րդ կետով սահմանված ժամկետում հայտի ուսումնասիրության արդյունքներն ամփոփելուց հետո, պարզում է, որ`

1) տվյալ ոլորտը և տեսակը ներկայացնող որևէ մշակութային ոչ առևտրային կազմակերպության արդեն իսկ շնորհվել է «ազգային» կարգավիճակ, ապա մեկ աշխատանքային օրվա ընթացքում նախապատրաստում է հայտը մերժելու վերաբերյալ գրություն` կցելով հայտի ուսումնասիրության արդյունքի մասին գրավոր տեղեկանքը, և ներկայացնում է նախարարին` ստորագրման.

2) տվյալ հայտը բավարարում է սույն կարգի 4-րդ, 6-րդ կետերի պահանջները և պայմանները, ապա մեկ աշխատանքային օրվա ընթացքում հայտն ու դրա ուսումնասիրության արդյունքի մասին գրավոր տեղեկանքը ներկայացնում է նախարարին:

12. Նախարարը հրավիրում է հանձնաժողովի նիստ, որը հայտի քննարկման արդյունքում տալիս է մշակութային ոչ առևտրային կազմակերպությանն «ազգային» կարգավիճակ շնորհելու կամ մերժելու վերաբերյալ եզրակացություն: Հանձնաժողովի նիստ հրավիրելու դեպքում, նախարարի հանձնարարությամբ, կառուցվածքային ստորաբաժանումը նիստի հրավիրման օրվանից առնվազն հինգ աշխատանքային օր առաջ հանձնաժողովի անդամներին իրազեկում է հանձնաժողովի նիստի հրավիրման, տեղի, ժամանակի մասին` նրանց առաքելով նիստի օրակարգը և համապատասխան նյութերը, որոնք հասցեատիրոջն են տրամադրվում առձեռն կամ էլեկտրոնային փոստի կամ ֆաքսիմիլային կապի միջոցով:

13. Ներկայացված հայտը հանձնաժողովի կողմից մերժվում է, եթե մշակութային ոչ առևտրային կազմակերպությունը չի բավարարում սույն կարգի 4-րդ և 6-րդ կետերի պահանջներն ու պայմանները:

14. Մշակութային ոչ առևտրային կազմակերպությանն «ազգային» կարգավիճակ շնորհելու կամ մերժելու վերաբերյալ հանձնաժողովի եզրակացությունն ստանալուց հետո կառուցվածքային ստորաբաժանումը երկու աշխատանքային օրվա ընթացքում նախապատրաստում է հայտատուին ծանուցելու վերաբերյալ գրություն` դրան կցելով հանձնաժողովի եզրակացության պատճենը, և ներկայացնում է նախարարին` ստորագրման:

15. Հանձնաժողովի կողմից հայտը բավարարվելու դեպքում կառուցվածքային ստորաբաժանումը նախապատրաստում է ոչ առևտրային կազմակերպությանն «ազգային» կարգավիճակ շնորհելու մասին միջնորդությունը Հայաստանի Հանրապետության կառավարություն ներկայացնելու վերաբերյալ գրություն` կցելով մշակութային ոչ առևտրային կազմակերպությանն «ազգային» կարգավիճակ շնորհելու մասին Հայաստանի Հանրապետության կառավարության որոշման նախագիծը, Հայաստանի Հանրապետության օրենսդրությամբ նախատեսված համապատասխան փաստաթղթերը, և ներկայացնում է նախարարին` ստորագրման:

16. Հայաստանի Հանրապետության կառավարության որոշումն ուժի մեջ մտնելուց հետո վեց ամսվա ընթացքում մշակութային ոչ առևտրային կազմակերպության կանոնադրության մեջ համապատասխան փոփոխության չկատարման դեպքում` նախարարությունը Հայաստանի Հանրապետության կառավարություն է ներկայացնում կազմակերպությանն «ազգային» կարգավիճակ շնորհելու մասին որոշումը չեղյալ ճանաչելու վերաբերյալ Հայաստանի Հանրապետության կառավարության որոշման նախագիծ:

17. Նախարարի որոշումը կարող է բողոքարկվել դատական կարգով:

Հայաստանի Հանրապետության կառավարության աշխատակազմի ղեկավար

Դ. Սարգսյան