ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

23 ապրիլի 2009 թվականի N 324-Ա

ՄՇԱԿՈՒՅԹԻ ՀԱՆՐԱՀՌՉԱԿՄԱՆ ԾՐԱԳՐԻ ԻՐԱԿԱՆԱՑՄԱՆ ԱՇԽԱՏԱՆՔՆԵՐԸ ՀԱՄԱԿԱՐԳՈՂ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎ ՍՏԵՂԾԵԼՈՒ, ՀԱՆՁՆԱԺՈՂՈՎԻ ԿԱԶՄԸ ԵՎ ԱՇԽԱՏԱԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության Նախագահի 2007 թվականի հուլիսի 18-ի ՆՀ-174-Ն հրամանագրով սահմանված կարգի 121-րդ կետի 2-րդ ենթակետը, ինչպես նաև հաշվի առնելով Հայաuտանի Հանրապետության կառավարության 2009 թվականի հունվարի 29-ի նիստի N 22 արձանագրային որոշումը`

1. Ստեղծել մշակույթի հանրահռչակման ծրագրի իրականացման աշխատանքները համակարգող միջգերատեսչական հանձնաժողով:

2. Հաստատել`

1) մշակույթի հանրահռչակման ծրագրի իրականացման աշխատանքները համակարգող միջգերատեսչական հանձնաժողովի կազմը` համաձայն N 1 հավելվածի.

2) մշակույթի հանրահռչակման ծրագրի իրականացման աշխատանքները համակարգող միջգերատեսչական հանձնաժողովի աշխատակարգը` համաձայն N 2 հավելվածի:

Կ Ա Զ Մ

ՄՇԱԿՈՒՅԹԻ ՀԱՆՐԱՀՌՉԱԿՄԱՆ ԾՐԱԳՐԻ ԻՐԱԿԱՆԱՑՄԱՆ ԱՇԽԱՏԱՆՔՆԵՐԸ ՀԱՄԱԿԱՐԳՈՂ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ

Ա Շ Խ Ա Տ Ա Կ Ա Ր Գ

ՄՇԱԿՈՒՅԹԻ ՀԱՆՐԱՀՌՉԱԿՄԱՆ ԾՐԱԳՐԻ ԱՇԽԱՏԱՆՔՆԵՐԸ ՀԱՄԱԿԱՐԳՈՂ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ

I. ԸՆԴՀԱՆՈՒՐ ԴՐՈՒՅԹՆԵՐ

1. Մշակույթի հանրահռչակման ծրագրի աշխատանքները համակարգող միջգերատեսչական հանձնաժողովը (այսուհետ` հանձնաժողով) ստեղծվում է մշակույթի հանրահռչակման խնդիրների քննարկման, դրան առնչվող հարցերի լուծման, ծրագրով նախատեսված աշխատանքների համակարգման նպատակով:

II. ՀԱՆՁՆԱԺՈՂՈՎԻ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ

2. Հանձնաժողովի նախագահը Հայաստանի Հանրապետության վարչապետն է, որը հաստատում է հանձնաժողովի անհատական կազմը:

3. Հանձնաժողովի կազմում կարող են ընդգրկվել Հայաստանի Հանրապետության կառավարման մարմինների, ինչպես նաև, իրենց համաձայնությամբ, մշակույթի ոլորտում գործող քաղաքացիական հասարակության ինստիտուտների ներկայացուցիչներ, հեղինակություն վայելող` ճանաչված գործիչներ, հասարակական կազմակերպությունների ներկայացուցիչներ և այլ անձինք:

4. Հանձնաժողովն իր աշխատանքները կազմակերպում է նիստերի միջոցով, որոնք գումարվում են առնվազն յուրաքանչյուր վեց ամիսը մեկ անգամ: Անհրաժեշտության դեպքում, հանձնաժողովի նախագահի նախաձեռնությամբ, կարող է գումարվել արտահերթ նիստ:

5. Հանձնաժողովի նիuտն իրավազոր է, եթե դրան մաuնակցում է հանձնաժողովի անդամների կեuից ավելին:

6. Հանձնաժողովի նիստերը վարում է հանձնաժողովի նախագահը:

7. Հանձնաժողովի նիստերին կարող են հրավիրվել պետական մարմինների` հանձնաժողովի օրակարգում ընդգրկված հարցերին առնչվող աշխատողները, ինչպես նաև հասարակական կազմակերպությունների և զանգվածային լրատվության միջոցների ներկայացուցիչներ` իրենց համաձայնությամբ:

III. ՀԱՆՁՆԱԺՈՂՈՎԻ ՆԻՍՏԵՐԻ ԱՆՑԿԱՑՈՒՄԸ

8. Հանձնաժողովի նիստերն անցկացվում են հանձնաժողովի նախագահի կողմից հաստատված օրակարգով: Հանձնաժողովի նախագահը որոշում է հանձնաժողովի նիստի անցկացման վայրը և ժամը: Հանձնաժողովի յուրաքանչյուր անդամ հանձնաժողովի նիստի օրակարգում ընդգրկելու համար կարող է նիստից առնվազն 15 օր առաջ հարց ներկայացնել:

9. Հանձնաժողովի օրակարգում նշվում են`

1) հանձնաժողովի նիստի անցկացման վայրը, օրը և ժամը.

2) քննարկման ենթակա հարցերը.

3) քննարկվող յուրաքանչյուր հարցը զեկուցողի անունը, ազգանունը:

10. Հանձնաժողովի նիստերի օրակարգը և քննարկվելիք հարցերին վերաբերող մյուս անհրաժեշտ փաստաթղթերը հանձնաժողովի անդամներին են փոխանցվում նիստից առնվազն 5 աշխատանքային օր առաջ:

11. Հանձնաժողովի գործունեության կազմակերպչական-տեխնիկական աշխատանքներն ապահովում է Հայաստանի Հանրապետության կառավարության աշխատակազմը:

IV. ՀԱՆՁՆԱԺՈՂՈՎԻ ՆՊԱՏԱԿԸ, ՔՆՆԱՐԿՎՈՂ ՀԱՐՑԵՐԻ ԵՎ ԸՆԴՈՒՆՎՈՂ ՈՐՈՇՈՒՄՆԵՐԻ ՇՐՋԱՆԱԿԸ

12. Հանձնաժողովի նպատակն է`

1) մշակույթի հանրահռչակման ծրագրի իրականացման ռազմավարական պլանավորման, միջոցառումների ծրագրերի մշակման գործընթացներին օժանդակելը.

2) մշակույթի հանրահռչակման ծրագրի իրականացմանը, գնահատմանը և այդ գործընթացներում քաղաքացիական հասարակության մասնակցությանը նպաստելը.

3) մշակույթի հանրահռչակման ծրագրի արդյունավետության բարձրացման վերաբերյալ առաջարկություններ մշակելը:

13. Հանձնաժողովի կողմից քննարկվող հարցերի շրջանակն ընդգրկում է`

1) մշակույթի հանրահռչակման ընդհանուր քաղաքականության ուղղությունների, ինչպես նաև առաջնահերթությունների վերաբերյալ առաջարկություններ ներկայացնելը.

2) Հայաստանի Հանրապետության կառավարության գործունեության ծրագրի, ազգային ռազմավարական ծրագրերի (Կայուն զարգացման ծրագիր, հակակոռուպցիոն, միջնաժամկետ ծախսերի ծրագրեր և այլն) հիման վրա մշակույթի հանրահռչակման գործունեության տարեկան ծրագրի ձևավորումը և գերակա ուղղությունների վերաբերյալ առաջարկություններ ներկայացնելը.

3) մշակույթի հանրահռչակման ծրագրի միջոցառումների տարեկան բյուջետային ծրագրերի պլանավորումը.

4) մշակույթի հանրահռչակման և մշակութային քաղաքականության ծրագրերի, ոլորտում իրականացվող բարեփոխումների ու դրանց գործնական ազդեցության գնահատման և մոնիթորինգի ցուցանիշների վերաբերյալ առաջարկություններ ներկայացնելը.

5) մշակույթի ոլորտում և ոլորտից դուրս տեղեկույթի տարածման (հաղորդակցային) ռազմավարության քննարկումը.

6) հանձնաժողովի նախագահի նախաձեռնությամբ` մշակույթի հանրահռչակմանը, ռազմավարությանն ու քաղաքականությանն առնչվող այլ հարցեր:

14. Հանձնաժողովը բաց քվեարկությամբ, ձայների պարզ մեծամասնությամբ կարող է ընդունել խորհրդատվական բնույթի որոշումներ:

V. ՀԱՆՁՆԱԺՈՂՈՎԻ ՆԻՍՏԻ ԱՐՁԱՆԱԳՐՄԱՆ ԵՎ ՀԱՆՁՆԱԺՈՂՈՎԻ ԳՈՐԾԱՎԱՐՈՒԹՅԱՆ ԿԱՐԳԸ

15. Հանձնաժողովի նիստերի արձանագրումն ապահովում է Հայաստանի Հանրապետության կառավարության աշխատակազմը:

16. Հանձնաժողովի նիստը կարող է տեսագրվել կամ ձայնագրվել, որի վերաբերյալ համապատասխան նշում է կատարվում հանձնաժողովի նիստի արձանագրության մեջ:

17. Նիստի արձանագրության մեջ նշվում են`

1) նիստի անցկացման ամիսը, ամսաթիվը, տարեթիվը և վայրը, նիստն սկսելու և ավարտելու ժամերը.

2) նիստի օրակարգը.

3) նիստին մասնակցող, հրավիրված անձանց և զանգվածային լրատվության միջոցների ներկայացուցիչների անունները.

4) քննարկվող հարցերի, զեկուցումների և ելույթների հիմնական դրույթները.

5) ընդունված որոշումները, դրանց տարածման և (կամ) հրապարակման ձևերը:

18. Նիստի արձանագրությանն անհրաժեշտության դեպքում կցվում են քննարկված հարցերին վերաբերող նյութեր, այդ թվում` իրավական և այլ փաստաթղթերի (հայեցակարգեր, ռազմավարություններ, հաշվետվություններ և այլն) նախագծեր, գրավոր զեկույցների և ելույթների տեքստեր:

19. Հանձնաժողովի նիստի արձանագրությունն ստորագրվում է հանձնաժողովի նախագահի կողմից` 3 աշխատանքային օրվա ընթացքում:

20. Հանձնաժողովի նիստերի արձանագրությունները պահվում են Հայաստանի Հանրապետության կառավարության աշխատակազմում:

VI. ՀԱՆՁՆԱԺՈՂՈՎԻ ԼԻԱԶՈՐՈՒԹՅՈՒՆՆԵՐԸ

21. Հանձնաժողովի նախագահը`

1) նախագահում է հանձնաժողովի նիստերը.

2) հաստատում է հանձնաժողովի օրակարգը և ստորագրում հանձնաժողովի նիստերի արձանագրությունները.

3) լսում է հանձնաժողովի կողմից ընդունված որոշումների կատարման ընթացքի մասին հաշվետվությունները և տալիս ցուցումներ ու հանձնարարականներ.

4) ընդունում է որոշումներ քննարկված ծրագրերի իրականացման համար ֆինանսական, նյութական, տեղեկատվական, մարդկային և այլ ռեսուրսների բաշխման մասին.

5) որոշում է հանձնաժողովի նիստերին հրավիրվող անձանց կազմը.

6) իրականացնում է սույն աշխատակարգով սահմանված այլ լիազորություններ:

22. Հանձնաժողովի անդամն իրավունք ունի`

1) ներկայացնելու հարցեր` հանձնաժողովի օրակարգում ընդգրկելու համար.

2) հանձնաժողովի նիստերի ընթացքում քննարկվող հարցերի վերաբերյալ ներկայացնելու բանավոր կամ գրավոր կարծիք.

3) մասնակցելու որոշումների ընդունման համար քվեարկությանը:

VII. ՀԱՆՁՆԱԺՈՂՈՎԻ ԿՈՂՄԻՑ ՔՆՆԱՐԿՎԱԾ ՀԱՐՑԵՐԻ ՄԱՍԻՆ ՏԵՂԵԿՈՒՅԹԻ ՏԱՐԱԾՈՒՄԸ ԵՎ ՀՐԱՊԱՐԱԿՈՒՄԸ

23. Հանձնաժողովի նիստերի արձանագրությունները կամ արձանագրության քաղվածքները տրամադրվում են հանձնաժողովի բոլոր անդամներին, իսկ ընդունված որոշումները տեղադրվում են Հայաստանի Հանրապետության կառավարության և համապատասխան նախարարության ինտերնետային կայքում:

24. Հայաստանի Հանրապետության կառավարության աշխատակազմը հանձնաժողովի նիստերի արձանագրությունները կամ արձանագրության քաղվածքները հանձնաժողովի անդամներին է տրամադրում սահմանված կարգով: