«Վավերացնում եմ»
Հայաստանի Հանրապետության
Նախագահ Ռ. Քոչարյան
 24 նոյեմբերի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

3 նոյեմբերի 2005 թվականի N 1929-Ն

ՄԻՆՉԵՎ 180 ՕՐՎԱ ԸՆԹԱՑՔՈՒՄ «ՆԵՐՄՈՒԾՈՒՄ` ԱԶԱՏ ՇՐՋԱՆԱՌՈՒԹՅԱՆ ՀԱՄԱՐ» ՄԱՔՍԱՅԻՆ ՌԵԺԻՄՈՎ ՆԵՐՄՈՒԾՎԱԾ ԱՊՐԱՆՔՆԵՐԻ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԻՑ ԱՐՏԱՀԱՆՄԱՆ ԴԵՊՔՈՒՄ ՆԱԽԿԻՆՈՒՄ ԴՐԱՆՑ ՆԵՐՄՈՒԾՄԱՆ ՀԱՄԱՐ ԳԱՆՁՎԱԾ ՄԱՔՍԱՅԻՆ ՎՃԱՐՆԵՐԻ ՎԵՐԱԴԱՐՁՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն Հայաստանի Հանրապետության մաքսային օրենսգրքի 52-րդ հոդվածի 2-րդ կետի «բ» ենթակետի` Հայաստանի Հանրապետության կառավարությունը  որոշում է.

1. Հաստատել մինչև 180 օրվա ընթացքում «Ներմուծում` ազատ շրջանառության համար» մաքսային ռեժիմով ներմուծված ապրանքների` Հայաստանի Հանրապետության տարածքից արտահանման դեպքում նախկինում դրանց ներմուծման համար գանձված մաքսային վճարների վերադարձման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Կ Ա Ր Գ

ՄԻՆՉԵՎ 180 ՕՐՎԱ ԸՆԹԱՑՔՈՒՄ «ՆԵՐՄՈՒԾՈՒՄ` ԱԶԱՏ ՇՐՋԱՆԱՌՈՒԹՅԱՆ ՀԱՄԱՐ» ՄԱՔՍԱՅԻՆ ՌԵԺԻՄՈՎ ՆԵՐՄՈՒԾՎԱԾ ԱՊՐԱՆՔՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԻՑ ԱՐՏԱՀԱՆՄԱՆ ԴԵՊՔՈՒՄ ՆԱԽԿԻՆՈՒՄ ԴՐԱՆՑ ՆԵՐՄՈՒԾՄԱՆ ՀԱՄԱՐ ԳԱՆՁՎԱԾ ՄԱՔՍԱՅԻՆ ՎՃԱՐՆԵՐԻ ՎԵՐԱԴԱՐՁՄԱՆ

1. Սույն կարգով սահմանվում են մինչև 180 օրվա ընթացքում «Ներմուծում` ազատ շրջանառության համար» մաքսային ռեժիմով ներմուծված ապրանքների` Հայաստանի Հանրապետության տարածքից «Վերաարտահանում» մաքսային ռեժիմով արտահանման դեպքում նախկինում դրանց ներմուծման համար գանձված մաքսային վճարների (բացառությամբ մաքսավճարի, բնապահպանական և ճանապարհային վճարների) վերադարձման կարգն ու ժամկետները:

2. Սույն կարգի իմաստով «վերադարձ» է համարվում վերադարձման ենթակա գումարները կազմակերպություն, անհատ ձեռնարկատեր կամ ֆիզիկական անձ հանդիսացող մաքսային վճար վճարողի մաքսային կամ հարկային վճարների գծով առկա պարտավորությունների հաշվին հաշվանցելը և (կամ) մաքսային վճար վճարողի բանկային հաշվին փոխանցելը և (կամ) բանկային համակարգի միջոցով կանխիկ տրամադրելը:

3. Սույն կարգով սահմանված վերադարձման ենթակա գումարները վերադարձվում են մաքսային վճարների վերադարձման մասին «Վերաարտահանում» մաքսային ռեժիմով լրացված մաքսային հայտարարագիրն ընդունած մաքսային մարմին (մաքսատուն, մաքսային կետ) ներկայացված դիմումի` համաձայն N 1 ձևի, հիման վրա` դիմումն ստանալուց հետո 30 օրվա ընթացքում:

4. Դիմումին կից ներկայացվում են`

ա) «Վերաարտահանում» մաքսային ռեժիմով լրացված «Բացթողումը թույլատրված է» և «Բեռն ստացված է» նշումներով մաքսային հայտարարագրի պատճենը,

բ) «Ներմուծում` ազատ շրջանառության համար» մաքսային ռեժիմով լրացված «Բացթողումը թույլատրված է» նշմամբ մաքսային հայտարարագրի պատճենը,

գ) Հայաստանի Հանրապետության պետական բյուջե վճարման ենթակա հարկային պարտավորությունների և մաքսային մարմիններում վճարված ավելացված արժեքի հարկի գումարների հաշվին գոյացած դեբետային մնացորդի մասին հարկային մարմինների տրամադրած տեղեկանքը` համաձայն N 6 ձևի, բացառությամբ այն դեպքի, երբ վերադարձման ենթակա գումարն ավելացված արժեքի հարկի գումարներ չի պարունակում և ամբողջությամբ ենթակա է հաշվանցման մաքսային վճարների գծով առկա պարտավորությունների հաշվին: Անհատ ձեռնարկատեր չհանդիսացող ֆիզիկական անձինք սույն ենթակետում նշված տեղեկանքը չեն ներկայացնում:

5. Սույն կարգի համաձայն ավելացված արժեքի հարկի գծով վերադարձվող գումարները չեն կարող գերազանցել տեղեկանքում (N 6 ձև) նշված` մաքսային մարմիններում վճարված ավելացված արժեքի հարկի գումարների հաշվին գոյացած դեբետային մնացորդի չափը:

6. «Վերաարտահանում» մաքսային ռեժիմով մաքսային հայտարարագիրն ընդունած մաքսային մարմինը, դիմումի հիման վրա, դիմումն ստանալու օրվան հաջորդող 5 աշխատանքային օրվա ընթացքում ուսումնասիրում է ներկայացված փաստաթղթերը, կազմում դրանք և վերադաս մաքսային մարմին է ներկայացնում նախկինում վճարված մաքսային վճարների գումարները Հայաստանի Հանրապետության պետական բյուջեից վերադարձնելու մասին եզրակացությունները` համաձայն NN 2,  3  և 4 ձևերի, և Հայաստանի Հանրապետություն ներմուծված ապրանքների գծով Հայաստանի Հանրապետության պետական բյուջե վճարման ենթակա մաքսային վճարների պարտավորությունների մասին տեղեկանքը` համաձայն N 5 ձևի, ինչպես նաև սույն կարգի 3-րդ և 4-րդ կետերում նշված փաստաթղթերը: Ընդ որում, «Վերաարտահանում» մաքսային ռեժիմով մաքսային հայտարարագիրն ընդունած մաքսային մարմինը կազմում և վերադաս մաքսային մարմին է ներկայացնում`

ա) մաքսային վճարների գծով պարտավորությունների առկայության դեպքում` եզրակացություն (N 2 ձև).

բ) մաքսային վճարների գծով պարտավորությունների մարման արդյունքում առաջացած դրական տարբերության, մաքսային վճարների գծով պարտավորությունների բացակայության և տեղեկանքի (N 6 ձև) համաձայն հարկային պարտավորությունների առկայության դեպքում` եզրակացություն (N 3 ձև).

գ) մաքսային ու հարկային վճարների գծով պարտավորությունների բացակայության և մաքսային ու հարկային վճարների գծով պարտավորությունների մարման արդյունքում առաջացած դրական տարբերության դեպքում` եզրակացություն (N 4 ձև):

(6-րդ կետը փոփ. 22.01.09 N 78-Ն)

7. վերադաս մաքսային մարմինը «Վերաարտահանում» մաքսային ռեժիմով մաքսային հայտարարագիրն ընդունած մաքսային մարմնից սույն կարգի 6-րդ կետում նշված փաստաթղթերն ստանալուց հետո 5-օրյա ժամկետում ուսումնասիրում և հաշվառում է փաստաթղթերը, որից հետո մաքսային վճարների վերադարձը մերժելու հիմքերի բացակայության դեպքում`

ա) «Վերաարտահանում» մաքսային ռեժիմով մաքսային հայտարարագիրն ընդունած մաքսային մարմնի կողմից եզրակացություն (N 2 ձև) ներկայացնելու դեպքում` համապատասխան մաքսային մարմնին թույլատրում է կատարել հաշվանցումներ.

բ) «Վերաարտահանում» մաքսային ռեժիմով մաքսային հայտարարագիրն ընդունած մաքսային մարմնի կողմից եզրակացություններ (NN 3 և (կամ) 4 ձևեր) ներկայացվելու դեպքում` եզրակացություններն ուղարկում է Հայաստանի Հանրապետության ֆինանսների և էկոնոմիկայի նախարարություն:

(7-րդ կետը փոփ. 22.01.09 N 78-Ն)

8. վերադաս մաքսային մարմինը մաքսային վճարների վերադարձը մերժելու հիմքերի առկայության դեպքում` 3-օրյա ժամկետում սույն կարգի 6-րդ կետում նշված փաստաթղթերը վերադարձնում է մաքսատուն կամ մաքսային կետ` անհրաժեշտ հիմնավորումներ ներկայացնելու համար:

(8-րդ կետը փոփ. 22.01.09 N 78-Ն)

9. Մաքսային վճարների վերադարձը մերժվում է, եթե չեն ներկայացվել դիմումին ընթացք տալու համար անհրաժեշտ` սույն կարգով նախատեսված փաստաթղթերը, իսկ ավելացված արժեքի հարկի վերադարձը մերժվում է նաև այն դեպքում, երբ տեղեկանքի (N 6 ձև) համաձայն մաքսային մարմիններում վճարված ավելացված արժեքի հարկի գումարների հաշվին գոյացած դեբետային մնացորդն սպառված է:

10. Հայաստանի Հանրապետության ֆինանսների և էկոնոմիկայի նախարարությունը, ստանալով եզրակացությունները (NN 3 և (կամ) 4 ձևեր), սույն կարգի 3-րդ կետով սահմանված ժամկետում գումարների վերադարձն իրականացնելու համար`

ա) կատարում է հաշվանցումներ եզրակացության (N 3 ձև) համաձայն,

բ) և (կամ) կատարում է փոխանցում` եզրակացության (N 4 ձև) համաձայն:

11. Հայաստանի Հանրապետության ֆինանսների և էկոնոմիկայի նախարարությունը սույն կարգի 10-րդ կետով սահմանված կարգով հաշվանցումներ և (կամ) փոխանցում կատարելուց հետո 5-օրյա ժամկետում դրա մասին գրավոր տեղեկացնում է վերադաս մաքսային մարմնին և հարկային մարմնին:

(11-րդ կետը փոփ. 22.01.09 N 78-Ն)

12. վերադաս մաքսային մարմինը և հարկային մարմինը Հայաստանի Հանրապետության ֆինանսների և էկոնոմիկայի նախարարության կողմից գրավոր տեղեկացվելուց հետո համապատասխան բյուջետային հաշվի քաղվածքների հիման վրա հարկ վճարողների անձնական հաշվի քարտերում (վճարումների հաշվառման քարտում) ոչ ուշ, քան քաղվածքը կամ դրանք փոխարինող այլ փաստաթուղթ ստանալուն հաջորդող աշխատանքային օրը կատարում են համապատասխան վերջնական ձևակերպումներ և կատարված հաշվանցման մասին գրավոր տեղեկացնում են դիմողին:

(12-րդ կետը փոփ. 22.01.09 N 78-Ն)

13. Սույն կարգի 7-րդ կետի «ա» ենթակետով սահմանված դեպքում «Վերաարտահանում» մաքսային ռեժիմով մաքսային հայտարարագիրն ընդունած մաքսային մարմինը համապատասխան հաշվանցումներ կատարելուց հետո կատարված հաշվանցման մասին գրավոր տեղեկացնում է դիմողին և վերադաս մաքսային մարմնին:

(13-րդ կետը փոփ. 22.01.09 N 78-Ն)

14. N 2 ձևի եզրակացության հիման վրա կազմակերպություններին և անհատ ձեռնարկատերերին ավելացված արժեքի հարկի գումարներ վերադարձնելու դեպքում վերադաս մաքսային մարմինը դրա մասին գրավոր տեղեկացնում է հարկային մարմնին:

(14-րդ կետը փոփ. 22.01.09 N 78-Ն)

(5-րդ ձևը փոփ. 22.01.09 N 78-Ն)

(6-րդ ձևը փոփ. 22.01.09 N 78-Ն)