ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

13 փետրվարի 2008 թվականի N 106-Ն

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՏՈՒԿ ՔՆՆՉԱԿԱՆ ԾԱՌԱՅՈՒԹՅԱՆ ԱՇԽԱՏԱԿԱԶՄ» ՊԵՏԱԿԱՆ ԿԱՌԱՎԱՐՉԱԿԱՆ ՀԻՄՆԱՐԿ ՍՏԵՂԾԵԼՈՒ ՄԱՍԻՆ

Հիմք ընդունելով «Պետական կառավարչական հիմնարկների մասին» Հայաստանի Հանրապետության oրենքի 7-րդ հոդվածի 1-ին և 2-րդ մասերը` Հայաստանի Հանրապետության կառավարությունը որոշում է.

1. Ստեղծել «Հայաստանի Հանրապետության հատուկ քննչական ծառայության աշխատակազմ» պետական կառավարչական հիմնարկ, որի գործունեության նպատակներն ու խնդիրներն են`

1) հատուկ քննչական ծառայությանը վերապահված լիազորությունների լիարժեք և արդյունավետ իրականացման, քաղաքացիական իրավահարաբերություններին նրա մասնակցության ապահովումը.

2) հատուկ քննչական ծառայության և աշխատակազմի ֆինանսաբյուջետային, նյութատեխնիկական ու տնտեսական ապահովման, կազմակերպական, տեխնիկական սպասարկման, ներքին աուդիտի, պետական գույքի կառավարման, անհրաժեշտ ապրանքների, աշխատանքների և ծառայությունների ձեռքբերման պետական գնումների, աշխատակազմում պետական ծառայողների և տեխնիկական սպասարկում իրականացնող անձանց կադրային քաղաքականության և այլ բնույթի գործառույթների իրականացումը` ուղղված հատուկ քննչական ծառայության արդյունավետ գործունեության ու աշխատողների համար անհրաժեշտ աշխատանքային պայմանների ստեղծմանը.

3) հատուկ քննչական ծառայության պետի խորհրդակցությունների, հանդիպումների, այցերի և ուղևորությունների նախապատրաստումը, ինչպես նաև մրցութային հանձնաժողովների նիստերի կազմակերպատեխնիկական բնույթի նախապատրաստական գործառույթների իրականացումը.

4) օտարերկրյա կազմակերպությունների և դրանց պաշտոնատար անձանց, միջազգային կազմակերպությունների ու դրանց ներկայացուցիչների հետ հատուկ քննչական ծառայության համագործակցությունը, հատուկ քննչական ծառայության և աշխատակազմի արտաքին կապերին վերաբերող այլ գործընթացների ապահովումը.

5) զանգվածային տեղեկատվության միջոցների և հասարակայնության հետ հատուկ քննչական ծառայության կապի ապահովումը, մամուլի ասուլիսների, հարցազրույցների նախապատրաստումը.

6) հատուկ քննչական ծառայության միասնական արխիվային գործի կազմակերպումը.

7) հատուկ քննչական ծառայության պետի և աշխատակազմի ղեկավարի կողմից ընդունվող իրավական ակտերի հաշվառումը.

8) աշխատակազմում կառավարման ժամանակակից տեխնիկական միջոցների, համակարգչային ծրագրերի, հաղորդակցության էլեկտրոնային միջոցների, տեղային ցանցի, տեղեկատվական միջազգային համակարգերի, հասանելիության միջոցների ներդրման և շահագործման ապահովումը.

9) գործավարության միասնականության, էլեկտրոնային փաստաթղթաշրջանառության, էլեկտրոնային գործավարության և դրա գործունեության ընթացքում առաջացած էլեկտրոնային փաստաթղթերի արխիվացման ու պահպանման ապահովումը:

2. (կետն ուժը կորցրել է 16.10.08 N 1163-Ն)

3. Սույն որոշումն ուժի մեջ է մտնում պաշտոնական հրապարակմանը հաջորդող oրվանից: