ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

6 նոյեմբերի 2008 թվականի N 1261-Ն

«ԵՎՐՈՊԱ-ԿՈՎԿԱՍ-ԱՍԻԱ ՏՐԱՆՍՊՈՐՏԱՅԻՆ ՄԻՋԱՆՑՔԻ ԶԱՐԳԱՑՄԱՆՆ ՈՒՂՂՎԱԾ ՄԻՋԱԶԳԱՅԻՆ ՏՐԱՆՍՊՈՐՏԻ ՄԱՍԻՆ» ՀԻՄՆԱԿԱՆ ԲԱԶՄԱԿՈՂՄ ՀԱՄԱՁԱՅՆԱԳՐԻ ՀԻՄԱՆ ՎՐԱ ՍՏԵՂԾՎԱԾ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ՀԱՆՁՆԱԺՈՂՈՎԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Հաստատել «Եվրոպա-Կովկաս-Ասիա տրանսպորտային միջանցքի զարգացմանն ուղղված միջազգային տրանսպորտի մասին» հիմնական բազմակողմ համաձայնագրի հիման վրա ստեղծված Հայաստանի Հանրապետության ազգային հանձնաժողովի կանոնադրությունը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Հայաստանի Հանրապետության վարչապետ	Տ. Սարգսյան
2008 թ. նոյեմբերի 10 Երևան

 

Հավելված ՀՀ կառավարության 2008 թվականի նոյեմբերի 6-ի N 1261-Ն որոշման

Կ Ա Ն Ո Ն Ա Դ Ր ՈՒ Թ Յ ՈՒ Ն

«ԵՎՐՈՊԱ-ԿՈՎԿԱՍ-ԱՍԻԱ ՏՐԱՆՍՊՈՐՏԱՅԻՆ ՄԻՋԱՆՑՔԻ ԶԱՐԳԱՑՄԱՆՆ ՈՒՂՂՎԱԾ ՄԻՋԱԶԳԱՅԻՆ ՏՐԱՆՍՊՈՐՏԻ ՄԱՍԻՆ» ՀԻՄՆԱԿԱՆ ԲԱԶՄԱԿՈՂՄ ՀԱՄԱՁԱՅՆԱԳՐԻ ՀԻՄԱՆ ՎՐԱ ՍՏԵՂԾՎԱԾ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ՀԱՆՁՆԱԺՈՂՈՎԻ

I. ԸՆԴՀԱՆՈՒՐ ԴՐՈՒՅԹՆԵՐ

1. «Եվրոպա-Կովկաս-Ասիա տրանսպորտային միջանցքի զարգացմանն ուղղված միջազգային տրանսպորտի մասին» հիմնական բազմակողմ համաձայնագրի հիման վրա ստեղծված Հայաստանի Հանրապետության ազգային հանձնաժողովը (այսուհետ` հանձնաժողով) ստեղծվել է 1998 թվականի սեպտեմբերի 8-ին Բաքվում ստորագրված «Եվրոպա-Կովկաս-Ասիա տրանսպորտային միջանցքի զարգացմանն ուղղված միջազգային տրանսպորտի մասին» հիմնական բազմակողմ համաձայնագրի (այսուհետ` հիմնական համաձայնագիր) վավերացումից հետո` նպատակ ունենալով աջակցելու համաձայնագրի մասնակից պետությունների միջև Եվրոպայի, Սև ծովի, Կովկասի, Կասպից ծովի և Ասիայի տարածաշրջանում տնտեսական հարաբերությունների, առևտրի և տրանսպորտային հաղորդակցության բնագավառների զարգացմանը: Համաձայնագրի դրույթներով կարգավորվում են մասնակից պետությունների միջև, ինչպես նաև վերջիններիս տարածքով տարանցմամբ միջազգային բեռնատար և ուղևորատար փոխադրումները:

2. Հանձնաժողովի կանոնադրությամբ սահմանվում են հանձնաժողովի նպատակները, գործառույթները, իրավունքները, ձևավորման կարգը և գործունեության կազմակերպումը:

3. Հանձնաժողովը հասարակական հիմունքներով գործող մարմին է, որն իր իրավասության սահմաններում իրականացնում է աշխատանքներ` Հայաստանի Հանրապետության Սահմանադրությանը, Հայաստանի Հանրապետության միջազգային պայմանագրերին, Հայաստանի Հանրապետության օրենքներին, այլ իրավական ակտերին և սույն կանոնադրությանը համապատասխան:

II. ՀԱՆՁՆԱԺՈՂՈՎԻ ԳՈՐԾԱՌՈՒՅԹՆԵՐԸ

4. Հանձնաժողովն իրականացնում է հիմնական համաձայնագրի իրագործմանն ուղղված հետևյալ գործառույթները`

1) Եվրոպա-Կովկաս-Ասիա տրանսպորտային միջանցքի ազգային և տարածաշրջանային նախագծերի քննարկում և հաստատում.

2) հիմնական համաձայնագրի դրույթների պահպանման ապահովում.

3) հանձնաժողովի գործունեության վերաբերյալ առաջարկությունների և որոշումների նախագծերի մշակում.

4) փոխադրումների ներդաշնակ զարգացման հետ կապված նախաձեռնությունների վերաբերյալ առաջարկություններ ներկայացնելը.

5) Եվրոպա-Կովկաս-Ասիա տրանսպորտային միջանցքի տրանսպորտային քաղաքականության իրականացման աշխատանքների համակարգում.

6) համապատասխան տեղեկատվության հավաքագրման և ազատ փոխանակման ապահովում.

7) սահմանված անցման կետերում կիրառման ենթակա մաքսային ընթացակարգերի կիրառման և փաստաթղթաշրջանառության ներդաշնակեցման ապահովում.

8) Եվրոպա-Կովկաս-Ասիա տրանսպորտային միջանցքով փոխադրումներ իրականացնող տրանսպորտային կազմակերպությունների և հաստատությունների միջև համագործակցությանն աջակցություն:

III. ՀԱՆՁՆԱԺՈՂՈՎԻ ԻՐԱՎՈՒՆՔՆԵՐԸ

5. Հանձնաժողովն իր գործառույթների իրականացման համար իրավունք ունի`

1) ընդունելու որոշումներ իր աշխատանքին առնչվող կազմակերպական և ընթացակարգային հարցերի մասին.

2) Հայաստանի Հանրապետության օրենսդրությամբ սահմանված կարգով իրավասու մարմինների քննարկմանը ներկայացնելու իր գործառույթների իրականացման վերաբերյալ առաջարկություններ.

3) համաձայն հանձնաժողովի հետ պայմանավորվածության` ստեղծելու համատեղ` մշտական և ժամանակավոր հիմունքներով գործող աշխատանքային մարմիններ կամ հրավիրելու փորձագետների (կարճաժամկետ և երկարաժամկետ).

4) կազմակերպելու խորհրդակցություններ` Հայաստանի Հանրապետության օրենսդրությամբ սահմանված կարգով գործադիր իշխանության մարմինների, իսկ անհրաժեշտության դեպքում` նաև կազմակերպությունների ղեկավարների և փորձագետների, ինչպես նաև գործարար շրջանակների ներկայացուցիչների (կամավորության սկզբունքով) մասնակցությամբ:

IV. ՀԱՆՁՆԱԺՈՂՈՎԻ ԿԱԶՄԸ

6. Հանձնաժողովը բաղկացած է նախագահից, անդամներից և քարտուղարից:

7. Հանձնաժողովի անհատական կազմը հաստատում է Հայաստանի Հանրապետության վարչապետը` նշանակելով hանձնաժողովի նախագահին և քարտուղարին:

8. Հայաստանի Հանրապետության վարչապետը հանձնաժողովի նախագահին նշանակում է Հայաստանի Հանրապետության Նախագահի համաձայնությամբ:

9. Հայաստանի Հանրապետության վարչապետը հանձնաժողովի քարտուղարին նշանակում է hանձնաժողովի նախագահի առաջարկությամբ:

10. Հանձնաժողովի նախագահը`

1) համակարգում է հանձնաժողովի գործողությունների ծրագրում ներառված միջոցառումների իրականացման աշխատանքները.

2) վարում է հանձնաժողովի նիստերը.

3) հանձնաժողովի անդամների միջև բաշխում է պարտականությունները և նշանակում պատասխանատուներ` hանձնաժողովի գործառույթներից ու խնդիրներից բխող հարցերի պատրաստման համար.

4) իրականացնում է հսկողություն հանձնաժողովի ընդունած որոշումների կատարման նկատմամբ.

5) Հայաստանի Հանրապետության օրենսդրությամբ սահմանված կարգով Հայաստանի Հանրապետության վարչապետին ներկայացնում է առաջարկություններ hանձնաժողովի կազմի փոփոխությունների, ինչպես նաև hանձնաժողովի գործունեության դադարեցման վերաբերյալ.

6) իրականացնում է այլ գործառույթներ` Հայաստանի Հանրապետության կառավարության և hանձնաժողովի որոշումներին համապատասխան:

11. Հանձնաժողովի նախագահը և hանձնաժողովի անդամներն իրավունք ունեն, առանց հատուկ լիազորությունների, բանակցություններ վարելու Հայաստանի Հանրապետության միջազգային պայմանագրի կնքման և այդ պայմանագրի տեքստի փոխհամաձայնեցման շուրջ:

12. Հանձնաժողովի քարտուղարը պատասխանատու է hանձնաժողովի գործունեության կազմակերպման, hանձնաժողովի հանդիպումների համար փաստաթղթերի նախապատրաստման, hանձնաժողովի նախագահի` hանձնաժողովի գործունեության հետ կապված հանձնարարությունների և hանձնաժողովի ընդունած որոշումների կատարման ընթացքին հետևելու, ինչպես նաև hանձնաժողովի գործունեության հետ կապված այլ կազմակերպչական և վարչական հարցեր լուծելու համար:

V. ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԿԱԶՄԱԿԵՐՊՈՒՄԸ

13. Հանձնաժողովը նիստեր է գումարում նախապես համաձայնեցված պարբերականությամբ և ժամկետներում` ըստ գործողությունների ծրագրի:

14. Գործողությունների ծրագիրը մշակվում է յուրաքանչյուր տարվա համար` հանձնաժողովի կազմում ընդգրկված անդամների առաջարկությունների հիման վրա: Գործողությունների ծրագիրը ներառում է միջոցառումների իրականացման հստակ ժամանակացույց և սահմանում միջոցառումների կատարման պատասխանատուներին: Գործողությունների ծրագիրը հաստատում է հանձնաժողովի նախագահը:

15. Գործողությունների ծրագրում ներառվում են այն հարցերը, որոնք պետք է քննարկվեն հանձնաժողովի և իր աշխատանքային մարմինների կողմից` նշելով դրանց նախապատրաստման կարգը, քննարկման ժամկետները, ծավալը և նյութերը Հայաստանի Հանրապետության կառավարություն կամ հանձնաժողովի քննարկմանը ներկայացնելու ժամկետները:

16. Հանձնաժողովը նախապատրաստում է հանձնաժողովի պատվիրակության մասնակցությունը «ՏՐԱՍԵԿԱ» միջկառավարական հանձնաժողովի տարեկան համաժողովին, ինչպես նաև հանձնաժողովի քարտուղարի մասնակցությունն աշխատանքային խմբերի նիստերին: Հանձնաժողովը քննարկում է «ՏՐԱՍԵԿԱ» ծրագրի նախագծերի տեխնիկական առաջադրանքները, ներկայացնում դիտողություններ և լրացումներ առաջադրված տեխնիկական առաջադրանքների վերաբերյալ:

17. Հանձնաժողովի նիստը համարվում է իրավազոր` հանձնաժողովի անդամների երկու երրորդի մասնակցության դեպքում:

18. Նիստի օրակարգի յուրաքանչյուր հարցի մասին որոշումն ընդունվում է հանձնաժողովի նիստին մասնակցող անդամների ձայների մեծամասնությամբ:

19. Ընդունված որոշումներն ստորագրում է հանձնաժողովի նախագահը:

20. Լրացուցիչ հաստատում կամ իրագործման համար ներպետական իրավական ակտի ընդունում պահանջող որոշումներն ուժի մեջ են մտնում համապատասխանաբար` լրացուցիչ հաստատվելուց կամ համապատասխան իրավական ակտ ընդունվելուց հետո:

21. Հանձնաժողովի նախագահը տարեկան մեկ անգամ Հայաստանի Հանրապետության Նախագահին և Հայաստանի Հանրապետության վարչապետին է ներկայացնում հաշվետվություն հանձնաժողովի գործունեության վերաբերյալ և յուրաքանչյուր վեց ամիսը մեկ անգամ Հայաստանի Հանրապետության արտաքին գործերի նախարարություն է ներկայացնում տեղեկատվություն իրենց ընթացիկ գործունեության մասին:

22. Ընդունված որոշումներն իրագործելու նպատակով հանձնաժողովն իրավունք ունի ստեղծելու ժամանակավոր և մշտական մարմիններ` ենթահանձնաժողովներ, հանձնախմբեր կամ աշխատանքային խմբեր:

23. Հանձնաժողովը որոշում է մշտական և ժամանակավոր մարմինների նպատակները, լիազորությունները և կազմը: Այդ մարմինները միայն հանձնաժողովի կազմից ձևավորվելու դեպքում դրանց ստեղծման և անհատական կազմի հաստատման համար լրացուցիչ ներպետական իրավական ակտի ընդունում չի պահանջվում:

24. Ճանապարհածախսը և հանձնաժողովի հանդիպման ընթացքում մասնակիցների, ինչպես նաև մշտական և ժամանակավոր մարմինների անդամների՝ ընդունող երկրում գտնվելու հետ կապված ծախսերը հոգում է հանդիպմանը մասնակցելու համար իր ներկայացուցիչներին գործուղող պետության կառավարությունը:

Հայաստանի Հանրապետության կառավարության աշխատակազմի ղեկավար

Դ. Սարգսյան