ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
21 հունիսի 2007 թվականի N 717-Ն
«ԳԱՎԱՌԻ ԻՆԴՈՒՍՏՐԻԱԼ-ՄԱՆԿԱՎԱՐԺԱԿԱՆ ՊԵՏԱԿԱՆ ՔՈԼԵՋ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆԸ ՎԵՐԱԿԱԶՄԱԿԵՐՊԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2002 ԹՎԱԿԱՆԻ ՀՈՒՆԻՍԻ 20-Ի N 1009-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ
Հայաստանի Հանրապետության քաղաքացիական օրենսգրքի 63-րդ հոդվածին, 64-րդ հոդվածի 2-րդ մասին և «Պետական ոչ առևտրային կազմակերպությունների մասին» Հայաստանի Հանրապետության օրենքի 13-րդ հոդվածի 2-րդ մասի «զ» կետին համապատասխան` Հայաստանի Հանրապետության կառավարությունը որոշում է.
1. «Գավառի ինդուստրիալ-մանկավարժական պետական քոլեջ» պետական ոչ առևտրային կազմակերպությունը միացման ձևով վերակազմակերպել` միացնելով «Գավառի պետական համալսարան» պետական ոչ առևտրային կազմակերպությանը:
2. Սահմանել, որ «Գավառի ինդուստրիալ-մանկավարժական պետական քոլեջ» պետական ոչ առևտրային կազմակերպության իրավահաջորդ է հանդիսանում «Գավառի պետական համալսարան» պետական ոչ առևտրային կազմակերպությունը, որին անհատույց օգտագործման իրավունքով հանձնվում է պետական սեփականություն հանդիսացող «Գավառի ինդուստրիալ-մանկավարժական պետական քոլեջ» պետական ոչ առևտրային կազմակերպությանը նախկինում ամրացված` Գավառ քաղաքի Ազատության 25 հասցեում գտնվող ուսումնական շենքն ու ճաշարանային մասնաշենքը` 3625,6 քառ. մետր ընդհանուր մակերեսով, 28128,8 հազ. դրամ սկզբնական արժեքով, և կիսակառույցը` 20,7 քառ. մետր մակերեսով, իսկ սեփականության իրավունքով` «Գավառի ինդուստրիալ-մանկավարժական պետական քոլեջ» պետական ոչ առևտրային կազմակերպության սեփականությունը հանդիսացող` նվազագույն աշխատավարձի 10000-ապատիկը չգերազանցող և պատմամշակութային նշանակություն չունեցող` 4675,7 հազ. դրամ սկզբնական արժեքով գույքը` դրանց նպատակային նշանակությանը համապատասխան օգտագործելու պայմանով:
3. Հայաստանի Հանրապետության կառավարությանն առընթեր պետական գույքի կառավարման վարչության պետին` «Գավառի պետական համալսարան» պետական ոչ առևտրային կազմակերպության հետ կնքել փոխանցման ակտի համաձայն կազմակերպությանը հանձնվող գույքի անհատույց օգտագործման պայմանագիր:
4. Հայաստանի Հանրապետության կրթության և գիտության նախարարին`
1) ապահովել սույն որոշման 2-րդ կետով նախատեսված` սեփականության իրավունքով հանձնվող գույքի հանձնման-ընդունման աշխատանքների կատարումը, ինչպես նաև հաստատել նշված գույքի կազմը, միացման պայմանագիրը և փոխանցման ակտը.
2) ապահովել «Գավառի ինդուստրիալ մանկավարժական պետական քոլեջ» պետական ոչ առևտրային կազմակերպության գործունեության դադարման պետական գրանցումը.
3) ապահովել Գավառի պետական համալսարանի կազմում Գավառի ինդուստրիալ-մանկավարժական պետական քոլեջի միջին և նախնական մասնագիտական կրթական ծրագրերով ուսանողների ուսումնառության բնականոն գործընթացը:
5. Ուժը կորցրած ճանաչել Հայաստանի Հանրապետության կառավարության 2002 թվականի հունիսի 20-ի «Հայաստանի Հանրապետության միջին մասնագիտական պետական ուսումնական հաստատությունները վերակազմակերպելու և Հայաստանի Հանրապետության միջին մասնագիտական պետական ուսումնական հաստատության օրինակելի կանոնադրությունը հաստատելու մասին» N 1009-Ն որոշմամբ հաստատված ցանկի 27-րդ կետը:
6. Հայաստանի Հանրապետության Գեղարքունիքի մարզպետին` երկամսյա ժամկետում Գավառի քաղաքապետի և «Գավառի պետական համալսարան» պետական ոչ առևտրային կազմակերպության ղեկավարի հետ համատեղ` սահմանված կարգով ապահովել «Գավառի պետական համալսարան» պետական ոչ առևտրային կազմակերպության հողատարածքի սահմանների ճշտումը և համապատասխան փաստաթղթերի ձևակերպումը, ինչպես նաև սեփականության իրավունքի պետական գրանցման աշխատանքները` «Գավառի պետական համալսարան» պետական ոչ առևտրային կազմակերպության միջոցների հաշվին:
7. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը։
|
Հայաստանի Հանրապետության |
Ս. Սարգսյան |
|
|
|
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|