ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ԵՐԵՎԱՆ ՔԱՂԱՔ

ՇԵՆԳԱՎԻԹ ՀԱՄԱՅՆՔԻ ԱՎԱԳԱՆԻ

Ո Ր Ո Շ ՈՒ Մ

11 դեկտեմբերի 2002 թվականի թիվ 2

քաղ. Երևան 

ՇԵՆԳԱՎԻԹ ՀԱՄԱՅՆՔԻ ԱՎԱԳԱՆՈՒ ԵՐԿՈՒ ՀԱԶԱՐ ՄԵԿ ԹՎԱԿԱՆԻ ԱՊՐԻԼԻ 3-Ի ԹԻՎ 19 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Շենգավիթ համայնքի ավագանու 2001թ. ապրիլի 3-ի «Շենգավիթ համայնքի սեփականությունը հանդիսացող ոչ բնակելի տարածքներն օտարելու համաձայնություն տալու մասին» թիվ 19 որոշմամբ սահմանվել է համայնքի սեփականություն հանդիսացող ոչ բնակելի տարածքների օտարման կարգը: Հայաստանի Հանրապետության արդարադատության նախարարության պետական փորձագիտական եզրակացությամբ առաջարկվել է նշված որոշման «Հավելված 1»-ի 6-րդ և 7-րդ կետերում կատարել համապատասխան փոփոխություններ:

Ղեկավարվելով «Տեղական ինքնակառավարման մասին» Հայաստանի Հանրապետության օրենքի 11-րդ հոդվածի 5-րդ մասի պահանջներով,

Շենգավիթ համայնքի ավագանին որոշում է`

1. Շենգավիթ համայնքի ավագանու 2001թ. ապրիլի 3-ի «Շենգավիթ համայնքի սեփականությունը հանդիսացող ոչ բնակելի տարածքներն օտարելու համաձայնություն տալու մասին» թիվ 19 որոշման «Հավելված 1»-ի մեջ կատարել հետևյալ փոփոխությունները`

ա) որոշման «Հավելված 1»-ի 6-րդ կետում «10 օր» բառերը փոխարինել «30 օր» բառերով,

բ) որոշման «Հավելված 1»-ի 7-րդ կետում ավելացնել «թ» ենթակետը` հետևյալ բովանդակությամբ.

«տեղեկություններ սակարկություններում հաղթած անձանց որոշման, պայմանագիր կնքելու համար տրամադրվող ժամկետի մասին»:

2. Սույն որոշման կատարման պատասխանատվությունը դնել թաղապետի տեղակալ Ի. Նազարեթյանի վրա:

3. Սույն որոշման կատարման հսկողությունը դնել թաղապետ` Մ. Սարգսյանի և ավագանու վրա: