ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

Ո Ր Ո Շ ՈՒ Մ

 ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՐԴԻ 1998 ԹՎԱԿԱՆԻ ՍԵՊՏԵՄԲԵՐԻ 30-Ի ԹԻՎ 198 ՈՐՈՇՄԱՄԲ ՀԱՍՏԱՏՎԱԾ «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԿԱՆՈՆԱԴՐՈՒԹՅԱՆ» ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 29-րդ հոդվածը, ղեկավարվելով նույն օրենքի 20-րդ հոդվածի «ա» կետով` Հայաստանի Հանրապետության կենտրոնական բանկի խորհուրդը

Որոշում է.

1. Հայաստանի Հանրապետության կենտրոնական բանկի խորհրդի 1998 թվականի սեպտեմբերի 30-ի թիվ 198 որոշմամբ հաստատված «Հայաստանի Հանրապետության կենտրոնական բանկի կանոնադրության» մեջ (այսուհետև` կանոնադրություն) կատարել հետևյալ փոփոխությունները.

1.1. կանոնադրության 44-րդ հոդվածը վերաշարադրել հետևյալ բովանդակությամբ`

«ՀՈԴՎԱԾ 44. ԿԵՆՏՐՈՆԱԿԱՆ ԲԱՆԿԻ ՆՈՐՄԱՏԻՎ ԻՐԱՎԱԿԱՆ ԱԿՏԵՐԻ ՊԱՇՏՈՆԱԿԱՆ ՀՐԱՊԱՐԱԿՈՒՄԸ

1. Հայաստանի Հանրապետության կենտրոնական բանկի նորմատիվ իրավական ակտերը հրապարակվում են «Հայաստանի Հանրապետության կենտրոնական բանկի տեղեկագիր» պաշտոնական պարբերականում:

2. Հայաստանի Հանրապետության կենտրոնական բանկի նորմատիվ իրավական ակտերը հրապարակելիս նշվում է դրանց կոդը, անվանումը, ընդունման ամսաթիվը, ամիսը, տարին, այն ստորագրող անձի պաշտոնը, անվան սկզբնատառն ու ազգանունը:

Կոդը ներառում է նաև այն իրավական ակտերի տեսակը բնորոշող կոդերը, որոնց մեջ փոփոխություն է կատարում տվյալ իրավական ակտը, կամ այն իրավական ակտերի տեսակը բնորոշող կոդերը, որոնք ուժը կորցրած է ճանաչում տվյալ իրավական ակտը».

1.2. կանոնադրության 45-րդ հոդվածը վերաշարադրել հետևյալ բովանդակությամբ`

 «ՀՈԴՎԱԾ 45. ԿԵՆՏՐՈՆԱԿԱՆ ԲԱՆԿԻ ՆՈՐՄԱՏԻՎ ԻՐԱՎԱԿԱՆ ԱԿՏԵՐԸ ՀՐԱՊԱՐԱԿՈՂ ՊԱՇՏՈՆԱԿԱՆ ՊԱՐԲԵՐԱԿԱՆԸ

1. Կենտրոնական բանկի նորմատիվ իրավական ակտերը հրապարակող պաշտոնական պարբերականը «Հայաստանի Հանրապետության կենտրոնական բանկի տեղեկագիր» պարբերականն է, որը հրատարակվում է յուրաքանչյուր ամիս: Անհապաղ ուժի մեջ մտնելու անհրաժեշտության դեպքում նորմատիվ ակտը հրապարակվում է «Հայաստանի Հանրապետության կենտրոնական բանկի տեղեկագիր - հատուկ թողարկում» պարբերականում` խորհրդի կողմից ընդունվելուց հետո` անմիջապես:

2. «Հայաստանի Հանրապետության կենտրոնական բանկի տեղեկագրում» հրապարակվում են հրապարակմանը նախորդող ժամանակահատվածում ընդունված Կենտրոնական բանկի նորմատիվ բնույթի որոշումները:

3. «Հայաստանի Հանրապետության կենտրոնական բանկի տեղեկագրում» հրապարակվում են նաև խորհրդի կողմից սահմանված այլ տեղեկություններ, փաստաթղթեր կամ նյութեր».

1.3. կանոնադրության 46-րդ հոդվածը վերաշարադրել հետևյալ բովանդակությամբ`

 «ՀՈԴՎԱԾ 46. ԿԵՆՏՐՈՆԱԿԱՆ ԲԱՆԿԻ ՆՈՐՄԱՏԻՎ ԻՐԱՎԱԿԱՆ ԱԿՏԵՐԻ ՈՒԺԻ ՄԵՋ ՄՏՆԵԼԸ

Կենտրոնական բանկի նորմատիվ իրավական ակտերն ուժի մեջ են մտնում հրապարակման պահից, եթե ավելի ուշ ժամկետ նախատեսված չէ տվյալ նորմատիվ իրավական ակտով:

Կենտրոնական բանկի նորմատիվ իրավական ակտերի պաշտոնական հրապարակման օր է համարվում դրանք «Հայաստանի Հանրապետության կենտրոնական բանկի տեղեկագրում» հրատարակելու օրը»:

2. Սույն որոշումն ուժի մեջ է ընդունման պահից: