ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ՎԱՐՉՈՒԹՅՈՒՆ

Ո Ր Ո Շ ՈՒ Մ

26 ապրիլի 1996 թվականի թիվ 84

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴՐԱՄԱՆԻՇԵՐԻ ՊԱՏՐԱՍՏՄԱՆ ՀԱՄԱՐ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԿՈՂՄԻՑ ՄՐՑՈՒՅԹ ՀԱՅՏԱՐԱՐԵԼՈՒ ՄԱՍԻՆ

Հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 17-րդ հոդվածը և Հայաստանի Հանրապետության կենտրոնական բանկի վարչության 1996 թվականի փետրվարի 2-ի թիվ 6 արձանագրային որոշումը` Հայաստանի Հանրապետության կենտրոնական բանկի վարչությունը որոշում է.

1. Հավանություն տալ «Շրջանառության մեջ և Հայաստանի Հանրապետության կենտրոնական բանկի դրամական պահուստներում դրամանիշերի տեսակային կազմի և կառուցվածքի օպտիմալացման ու դրամանիշերի պատրաստման 1996-1999 թվականների ծրագրի» 2-րդ տարբերակի «ա» ենթատարբերակին (լրամշակված կցվում է):

2. Հայաստանի Հանրապետության դրամանիշերի տպագրումը կազմակերպել մրցութային հիմունքներով:

3. Հավանություն տալ դրամանիշերի տպագրման մրցույթի անցկացման ժամանակացույցին և մրցույթի հայտարարության տեքստին (կցվում են):

4. Հաստատել դրամանիշերի պատրաստման համար հայտարարվելիք մրցույթի պայմանները (կցվում են):

5. Մինչև 1996 թվականի մայիսի 15-ը ստեղծել դրամանիշերի պատրաստման մրցութային հանձնաժողով` Հայաստանի Հանրապետության կենտրոնական բանկի նախագահի գլխավորությամբ` բաղկացած 9 անդամից, ընդգրկելով ինչպես Հայաստանի Հանրապետության կենտրոնական բանկի, այնպես էլ այլ նախարարությունների և գերատեսչությունների համապատասխան մասնագետների:

6. Հայաստանի Հանրապետության կենտրոնական բանկի էմիսիոն գործառնությունների և դրամական պահուստների վարչությանը` մեկամսյա ժամկետում Հայաստանի Հանրապետության կենտրոնական բանկի նախագահի հաստատմանը ներկայացնել մրցութային հանձնաժողովի աշխատակարգը և մրցութային հանձնաժողովի աշխատանքային խմբի կազմը:

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԴՐԱՄԱՆԻՇԵՐԻ ՏՊԱԳՐՄԱՆ ՄՐՑՈՒՅԹԻ ԱՆՑԿԱՑՄԱՆ ԺԱՄԱՆԱԿԱՑՈՒՅՑ

Հ Ա Յ Տ Ա Ր Ա Ր ՈՒ Թ Յ ՈՒ Ն

Հայաստանի Հանրապետության կենտրոնական բանկը հայտարարում է դրամանիշերի նոր նմուշների տպագրման և մատակարարման մրցույթ

1. ՀՀ կենտրոնական բանկը հայտարարում է 1996-1997 թվականների ընթացքում դրամանիշերի նոր նմուշների տպագրման և մատակարարման մրցույթ` 5 նոմինալով, ընդհանուր քանակը` 70-95 մլն հատ և հրավիրում է բոլոր իրավասու ֆիրմաներին` մասնակցելու անցկացվող մրցույթին:

2. Պայմանագիրը նախատեսվում է կնքել նոր շարքի ընդհանուր քանակի հիման վրա, պայմանագրի կնքումից անմիջապես հետո նշված ողջ ժամկետում` 2 նոմինալով, 45 մլն հատ քանակով` դրամանիշերի պատրաստման համար: Դրամանիշերի մնացած քանակի պատրաստման պայմանագրային ժամկետները կճշտվեն բանկի կողմից` պայմանագիրն ուժի մեջ լինելու ժամկետի ընթացքում:

3. Մրցույթի մասնակիցը կատարում է մրցութային իր առաջարկությունների նախապատրաստման և ներկայացման հետ կապված բոլոր ծախսերը:

4. Մրցույթի մասնակցի պատրաստած մրցութային առաջարկությունները պետք է կազմված լինեն անգլերեն և ռուսերեն լեզուներով ու փոստային կապով ներկայացվեն բանկ:

5. Մրցույթի մասնակիցը մրցութային իր առաջարկության շրջանակներում կներկայացնի գրավ` 30 հազար ԱՄՆ-ի դոլարի չափով (բանկի հաշիվը` ԱՄՆ, Նյու Յորք, Սիթիբանկ 36017162, Գերմանիա, Դոյչբանկ 9499120, Ցյուրիխ, Սվիսբանկ ընկերություն 101 WA-147001-000): Առանց գրավի մրցութային առաջարկությունները կմերժվեն բանկի կողմից: Մրցույթում չհաղթած մասնակցին կվերադարձվի գրավի գումարը: Մրցույթում հաղթած մասնակցին գրավը կվերադարձվի պայմանագրի ձևակերպումից և դրա կատարման համար երաշխիք տրամադրելուց հետո: Գրավը չի վերադարձվում, եթե մրցույթի մասնակիցը հետ է վերցնում իր առաջարկությունը` նրա ուժի մեջ լինելու ընթացքում, եթե մասնակիցը չի կարող ստորագրել պայմանագիրը կամ տրամադրել պայմանագրի կատարման երաշխիք:

6. Մրցութային առաջարկությունները բանկը պետք է ստանա ոչ ուշ, քան 1996 թվականի հուլիսի 15-ը:

7. Մրցութային առաջարկությունները պետք է պարունակեն 1000 հատ գները, դրամանիշի թղթի բնութագիրը, տպագրության եղանակները և դրամանիշի պահպանական առանձնահատկությունները, մասնակիցներին առաջարկվող լրացուցիչ ծառայությունները (խորհրդատվական օգնություն, թողարկվող դրամանիշերի մասին տպագիր արտադրանքի պատրաստում, բանկային սարքավորումների տրամադրում` հաշվիչ մեքենաներ, դրամանիշերի փաթեթավորման և ոչնչացման համար սարքավորումներ, բանկի մասնագետների ուսուցման կազմակերպում, ինչպես նաև այլ առաջարկություններ` մասնակցի հայեցողությամբ), վճարի և մատակարարման պայմաններն ու ժամկետները, պատրաստման և մատակարարման վերահսկման պայմանները:

8. Շահագրգիռ ֆիրմաները մրցույթի պայմաններին ծանոթանալու և լրացուցիչ ինֆորմացիա ստանալու համար կարող են դիմել հետևյալ հասցեով`

Հայաստանի Հանրապետություն, 375010, քաղաք Երևան, Նալբանդյան փողոց 6,

հեռախոս` (3742) 589-441, 583-533, 580-653,

ֆաքս` (3742) 560-441, 580-653, AT&T 151-07