«Գրանցված է»

ՀՀ արդարադատության

նախարարության կողմից

9 հուլիսի 2010 թ.

Պետական գրանցման թիվ 11010252

ՀԱՆՐԱԿՐԹԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅԱՆ ՂԵԿԱՎԱՐՄԱՆ ԻՐԱՎՈՒՆՔԻ ՀԱՎԱՍՏԱԳՐՄԱՆ ԼԻԱԶՈՐ ՄԱՐՄՆԻ ԿԱԶՄԱՎՈՐՄԱՆ ԵՎ ԳՈՐԾՈՒՆԵՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Հանրակրթության մասին» Հայաստանի Հանրապետության օրենքի 12-րդ հոդվածի 4-րդ մասով`

Հրամայում եմ.

1. Հաստատել «Հանրակրթական ուսումնական հաստատության ղեկավարման իրավունքի հավաստագրման լիազոր մարմնի կազմավորման և գործունեության կարգը»` համաձայն հավելվածի:

2. Հայաստանի Հանրապետության կրթության և գիտության նախարարության աշխատակազմի հանրակրթության վարչության պետ Ն. Հովհաննիսյանին և իրավաբանական վարչության պետ Մ. Գրիգորյանին` փաստաթուղթը սահմանված կարգով ներկայացնել Հայաստանի Հանրապետության արդարադատության նախարարություն` պետական գրանցման:

3. Սույն հրամանի կատարման հսկողությունը վերապահել Հայաստանի Հանրապետության կրթության և գիտության նախարարի տեղակալ Մ. Մկրտչյանին:

Կ Ա Ր Գ

ՀԱՆՐԱԿՐԹԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅԱՆ ՂԵԿԱՎԱՐՄԱՆ ԻՐԱՎՈՒՆՔԻ ՀԱՎԱՍՏԱԳՐՄԱՆ ԼԻԱԶՈՐ ՄԱՐՄՆԻ ԿԱԶՄԱՎՈՐՄԱՆ ԵՎ ԳՈՐԾՈՒՆԵՈՒԹՅԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են հանրակրթական ուսումնական հաստատության ղեկավարման իրավունքի քննության անցկացման և հավաստագրման գործընթացը իրականացնող Հանրակրթական ուսումնական հասատության ղեկավարման իրավունքի հավաստագրման լիազոր մարմնի` հանձնաժողովի (այսուհետ` Հավաստագրման հանձնաժողով) կազմավորման և գործունեության հետ կապված հարաբերությունները:

2. Հավաստագրման հանձնաժողովն իր գործունեության ընթացքում ղեկավարվում է «Հանրակրթության մասին» Հայաստանի Հանրապետության օրենքով (այսուհետ՝ Օրենք), սույն կարգով և իրավական նորմատիվ այլ ակտերով:

3. Հավաստագրման հանձնաժողովի գործունեության նպատակն է հանրակրթական ուսումնական հաստատության տնօրենի թափուր տեղի համար սահմանված կարգով վերապատրաստում անցած անձանց (այսուհետ` Հավակնորդ) քննությունների կազմակերպումը, անցկացումը և հավաստագրի տրամադրումը:

4. Հավաստագրման հանձնաժողովը բաղկացած է 7 անդամից:

5. Հավաստագրման հանձնաժողովի կազմը հաստատում է Հայաստանի Հանրապետության կրթության և գիտության նախարարը (այսուհետ` Նախարար)` յուրաքանչյուր տարին երկու անգամ` հիմք ընդունելով հավաստագրման հանձնաժողովի անդամի թեկնածուների ամբողջական անվանացանկից համակարգչային ընրության արդյունքները:

6. Հավակնորդների քանակից ելնելով, յուրաքանչյուր խմբի (20-25 անդամ) համար, Նախարարի հրամանով ձևավորվում են միաժամանակ գործող հանձնաժողովներ:

II. ՀԱՎԱՍՏԱԳՐՄԱՆ ՀԱՆՁՆԱԺՈՂՈՎԻ ԿԱԶՄԱՎՈՐՈՒՄԸ

7. Հանձնաժողովի անդամության թեկնածուներն առաջադրվում են կրթության պետական կառավարման լիազոր մարմնի (այսուհետ` Նախարարություն), պետական կառավարման տարածքային մարմինների (այսուհետ` Մարզպետարան), Երևան քաղաքում (Երևանի քաղաքապետարանի) կրթության կառավարման ոլորտի ներկայացուցիչներից, գիտական կազմակերպությունների, ուսումնական հաստատությունների ներկայացուցիչներից, ինչպես նաև ուսումնական հաստատությունների առնվազն 5 տարվա մանկավարժական (ուսուցչական) աշխատանքի փորձ ունեցող մասնագետներից: Հավաստագրման հանձնաժողովների անդամների թեկնածուների ամբողջական անվանացանկը կարող է համալրվել և փոփոխվել` առաջադրող մարմինների կամ կազմակերպությունների հիմնավորված առաջարկությամբ:

8. Հավաստագրման հանձնաժողովի անդամի թեկնածուների ամբողջական անվանացանկում ընդգրկվում են թեկնածուների վերաբերյալ հետևյալ տվյալները.

1) յուրաքանչյուր թեկնածուի անունը, ազգանունը, հայրանունը,

2) վերջին 5 տարիների ընթացքում զբաղեցրած պաշտոնը, աշխատանքի վայրը,

3) բնակության վայրը, հասցեն,

4) հեռախոսահամարները,

5) էլեկտրոնային փոստի հասցեն,

6) այլ տվյալներ:

9. Հավաստագրման հանձնաժողովը կազմվում է համակարգչում նախօրոք զետեղված և համակարգչի կողմից պատահական ընտրված 7 թեկնածուներից, քննությունն անցկացնելուց 24 ժամ առաջ` հետևյալ համամասնությամբ.

1) Նախարարության ներկայացուցիչներ` 3 անդամ

2) Համապատասխան մարզպետարանի, կամ Երևան քաղաքում Երևանի քաղաքապետարանի ներկայացուցիչներ` 2 անդամ

3) Գիտական, ուսումնական հաստատությունների ներկայացուցիչներ` 2 անդամ:

10. Սույն կարգով հաստատված Հավաստագրման հանձնաժողովի կազմից Նախարարը նշանակում է նախագահ և քարտուղար:

11. Նախարարության աշխատակազմը, Հավաստագրման հանձնաժողովի կազմավորումից հետո, 12 ժամվա ընթացքում տեղեկացնում է ընտրված թեկնածուներին նիստը անցկացնելու օրվա, ժամի և վայրի մասին:

12. Եթե համակարգչի միջոցով ընտրված թեկնածուի (թեկնածուների) Հավաստագրման հանձնաժողովի կազմում ընդգրկվելն անհնարին է, ապա համակարգչի միջոցով ընտրվում է այլ թեկնածու:

13. Քննությունների ընթացքում Հավաստագրման հանձնաժողովի կազմի համալրում կամ փոփոխություն չի կատարվում:

14. Հավաստագրման հանձնաժողովն իր լիազորություններն իրականացնում է համապատասխան հանձնաժողովի կազմը հաստատվելու պահից և դադարեցնում լիազորությունները սույն կարգի 26-րդ կետով սահմանված կարգով:

III. ՀԱՆՁՆԱԺՈՂՈՎԻ ԳՈՐԾԱՌՈՒՅԹՆԵՐՆ ՈՒ ԼԻԱԶՈՐՈՒԹՅՈՒՆՆԵՐԸ

15. Հավաստագրման հանձնաժողովի խնդիրը ուսումնական հասատության ղեկավարման իրավունքի (հավաստագրի) ստացման համար վերապատրաստված անձի համար սահմանված քննության անցկացման կազմակերպումն է:

16. Հավաստագրման հանձնաժողովի հիմնական գործունեությունը նպատակաուղղված է Հավակնորդների.

1) 17-րդ կետով սահմանված փաստաթղթերի փաթեթի կրկնակի ուսումնասիրմանը (անհրաժեշտության դեպքում),

2) քննությունների անցկացմանը,

3) ուսումնական հաստատության ղեկավարման իրավունքի (հավաստագրի) շնորհման ներկայացնելը,

4) բողոքների քննարկմանը և դրանց հիման վրա` արդյունքների վերանայման իրականացումը:

17. Հավաստագրման հանձնաժողովը`

1) Նախարարության աշխատակազմից ստանում է հավաստագրման ենթակա հավակնորդ անձանց ցանկը և Նախարարության 2010 թվականի մայիսի 18-ի «Հանրակրթական ուսումնական հաստատության ղեկավարման իրավունքի (հավաստագրման) համար քննությունների կազմակերպման և անցկացման կարգը» հաստատելու մասին N 395 հրամանով սահմանված փաստաթղթերի փաթեթը, ինչպես նաև Հավաստագրման հանձնաժողովի կնիքը և հավակնորդների վերաբերյալ ամփոփ տեղեկանքը.

2) փաստաթղթերի ուսումնասիրության արդյունքում որոշում է կայացնում հավակնորդին քննությանը մասնակցելու կամ ներկայացրած փաստաթղթերի թերի, ակնհայտ կեղծ, խեղաթյուրված կամ Օրենքի 12-րդ հոդվածի 2-րդ մասի պահանջին չհամապատասխանելու դեպքում, մերժելու մասին.

3) անցկացնում է քննություն` հավակնորդի անմիջական մասնակցությամբ.

4) ստուգում և գնահատում է հավակնորդների կողմից կատարված թեստային առաջադրանքները.

5) ամփոփում և հրապարակում է թեստավորման արդյունքները, հարցազրույցի փուլ անցած անձանց ցանկը.

6) հավակնորդի ղեկավարման գործնական հմտությունները ստուգելու նպատակով անցկացնում է հարցազրույց.

7) քննության արդյունքների ամփոփումից անմիջապես հետո անցկացնում է քվեարկություն.

8) հաստատում է Հավաստագրման քննությունները հանձնած հավակնորդների ամփոփիչ արձանագրությունը.

9) տալիս է Նախարարի կողմից ստորագրված Հավաստագիր.

10) իրականացնում է Օրենքով, սույն կարգով և այլ իրավական ակտերով իր իրավասությանը վերապահված այլ լիազորություններ:

IV. ՀԱՎԱՍՏԱԳՐՄԱՆ ՀԱՆՁՆԱԺՈՂՈՎԻ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ

18. Հավաստագրման հանձնաժողովն իր աշխատանքները կազմակերպում է նիստերի միջոցով:

19. Հավաստագրման հանձնաժողովի նիստերը իրավազոր են Հավաստագրման հանձնաժողովի անդամների առնվազն 5-ի մասնակցության դեպքում:

20. Հանձնաժողովի որոշումներն ընդունվում են առնվազն 4 ձայներով:

21. Հանձնաժողովի անդամի կողմից սույն կարգի 25-րդ կետի 2-րդ, 3-րդ, 4-րդ, 5-րդ ենթակետերի, ինչպես նաև ՀՀ կրթության և գիտության նախարարի 2010 թվականի մայիսի 18-ի թիվ 395-Ն հրամանով հաստատված «Հայաստանի Հանրապետության հանրակրթական ուսումնական հաստատության ղեկավարման իրավունք (հավաստագիր) ստանալու քննությունների կազմակերպման և անցկացման» կարգի պահանջները խախտելու, անհարգելի բացակայության դեպքում, Հավաստագրման հանձնաժողովը կազմում է արձանագրություն և դիմում է Նախարարին` միջնորդելով կասեցնել խախտումներ կատարած հանձնաժողովի անդամի լիազորությունները:

22. Նախարարը միջնորդությունը բավարարելու դեպքում իր ընդունած որոշման մասին տեղեկացնում է տվյալ անդամին ներկայացնող կազմակերպությանը կամ մարմնին` միաժամանակ տեղեկացնելով տվյալ անդամին Հավաստագրման հանձնաժողովի անդամների թեկնածուների ամբողջական անվանացանկից հանելու մասին:

V. ՀԱՎԱՍՏԱԳՐՄԱՆ ՀԱՆՁՆԱԺՈՂՈՎԻ ՆԱԽԱԳԱՀԸ

23. Հավաստագրման հանձնաժողովի նախագահը`

1) ղեկավարում է Հավաստագրման հանձնաժողովի աշխատանքները.

2) վարում է Հավաստագրման հանձնաժողովի նիստերը.

3) կազմակերպում է քննությունների և հավաստագրման գործընթացների հսկողությունը.

4) որոշում է հավաստագրման հետ կապված հարցերի, դիմումների և բողոքների քննարկման հերթականությունը` այն համաձայնեցնելով Հավաստագրման հանձնաժողովի անդամների հետ.

5) ստորագրում և կնքում է ուսումնական հաստատության ղեկավարման իրավունքի հավակնորդի հավաստագրման թերթը և հավաստագրման քննության ամփոփիչ արձանագրությունը.

6) հավաստագրման քննությունների արդյունքների դատական կարգով բողոքարկման դեպքում դատարանում Նախարարության որոշմամբ կարող է հանդես գալ որպես պատասխանող.

7) իրականացնում է սույն կարգով և այլ իրավական ակտերով իրեն վերապահված այլ լիազորություններ:

VI. ՀԱՎԱՍՏԱԳՐՄԱՆ ՀԱՆՁՆԱԺՈՂՈՎԻ ՔԱՐՏՈՒՂԱՐԸ

24. Հավաստագրման հանձնաժողովի քարտուղարը (կամ հանձնաժողովի նախագահի որոշմամբ նրան փոխարինող անձը).

1) արձանագրում է Հավաստագրման հանձնաժողովի նիստերը.

2) բացատրում է քննության անցկացման հետ կապված տեխնիկական հարցերը.

3) իրականացնում է սույն կարգով և այլ իրավական ակտերով իր իրավասությանը վերապահված այլ լիազորություններ:

VII. ՀԱՎԱՍՏԱԳՐՄԱՆ ՀԱՆՁՆԱԺՈՂՈՎԻ ԱՆԴԱՄԸ

25. Հավաստագրման հանձնաժողովի անդամը.

1) Հանձնաժողովի որոշմամբ, Հանձնաժողովի նախագահի բացակայության դեպքում վարում է նիստերը.

2) մասնակցում է քննությանը և հսկում դրա ընթացքը, կասեցնում հավակնորդների կողմից կատարված և հանձնաժողովի կողմից նկատված խախտումները.

3) մասնակցում է հավակնորդների հարցազրույցի անցկացմանը.

4) մասնակցում է քննության արդյունքում Հավաստագրման հանձնաժողովի կողմից անցկացվող քվեարկություններին.

5) ստորագրում է ուսումնական հաստատության ղեկավարման իրավունքի հավաստագրման թերթը, իսկ հատուկ կարծիք ներկայացնելու դեպքում գրառում է «հատուկ կարծիքը կցվում է» բառերը.

6) ծանոթանում է նիստերի արձանագրություններին.

7) իրականացնում է սույն կարգով և այլ իրավական ակտերով իր իրավասությանը վերապահված այլ լիազորություններ:

VIII. ՀԱՎԱՍՏԱԳՐՄԱՆ ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԴԱԴԱՐՈՒՄԸ

26. Հավաստագրման հանձնաժողովի անդամների լիազորությունները դադարում են Նախարարի հրամանի հիման վրա:

27. Հավաստագրման հանձնաժողովը կնիքը, քննության և հավաստագրման արդյունքների արձանագրությունները, ինչպես նաև հավաստագրված անձանց ցուցակը հանձնում է նախարարության աշխատակազմին:

28. Հավաստագրման հանձնաժողովի ընդունած որոշումները կարող են բողոքարկվել դատական կարգով: