«Գրանցված է»
ՀՀ արդարադատության
նախարարության կողմից
28 հունիսի 2007 թ.
Պետական գրանցման թիվ 11807248 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՖԻՆԱՆՍՆԵՐԻ ԵՎ ԷԿՈՆՈՄԻԿԱՅԻ ՆԱԽԱՐԱՐ

Հ Ր Ա Մ Ա Ն

ԳԱՆՁԱՊԵՏԱՐԱՆԻ ՏԵՂԵԿԱՏՎԱԿԱՆ ՀԱՄԱԿԱՐԳԵՐՈՒՄ ԷԼԵԿՏՐՈՆԱՅԻՆ ՓԱՍՏԱԹՂԹԵՐԻ ԵՎ ԷԼԵԿՏՐՈՆԱՅԻՆ ԹՎԱՅԻՆ ՍՏՈՐԱԳՐՈՒԹՅՈՒՆՆԵՐԻ ԿԻՐԱՌՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ 

Համաձայն «Էլեկտրոնային փաստաթղթի և էլեկտրոնային թվային ստորագրության մասին» Հայաստանի Հանրապետության օրենքի 11-րդ հոդվածի` հրամայում եմ.

1. Հաստատել Գանձապետարանի տեղեկատվական համակարգերում էլեկտրոնային փաստաթղթերի և էլեկտրոնային թվային ստորագրությունների կիրառման կարգը` համաձայն հավելվածի:

2. Սույն հրամանը ուժի մեջ է մտնում պաշտոնական հրապարակման օրվան հաջորդող 10-րդ օրվանից:

1. Սույն կարգով կարգավորվում է գանձապետարանի տեղեկատվական համակարգերում էլեկտրոնային փաստաթղթերի և էլեկտրոնային թվային ստորագրությունների կիրառումը, ինչպես նաև դրանցից ծագող հարաբերությունները:

2. Սույն կարգում օգտագործվող հիմնական հասկացություններն են`

1) Էլեկտրոնային վճարային փաստաթուղթ (վճարման ժամանակացույց, միջգանձապետական փոխանցագիր, նախահաշիվ, վճարման հանձնարագիր և այլ նմանատիպ փաստաթղթեր)` վճարումն իրականացնելու համար հիմք հանդիսացող էլեկտրոնային փաստաթուղթ, որը պաշտպանված է էլեկտրոնային թվային ստորագրությամբ:

2) Էլեկտրոնային տեղեկատվական փաստաթուղթ` էլեկտրոնային թվային ստորագրությամբ պաշտպանված հաշվարկների իրականացման, թղթակցային հաշիվների սպասարկման և վարման համար անհրաժեշտ տեղեկատվություն պարունակող էլեկտրոնային փաստաթուղթ (հարցումներ, քաղվածք հաշվից, հաշվետվություններ և այլ նմանատիպ փաստաթղթեր):

3) Հաճախորդ` Կենտրոնական գանձապետարանի և տեղական գանձապետական բաժիններ (այսուհետև` գանձապետարան) էլեկտրոնային վճարային փաստաթուղթ և էլեկտրոնային տեղեկատվական փաստաթուղթ տրամադրող, կամ ստացող բյուջետային հատկացումների գլխավոր կարգադրիչ, բյուջետային հատկացումների ստորադաս կարգադրիչ, Հայաստանի Հանրապետության Կենտրոնական բանկ և առևտրային բանկեր:

II. ԳԱՆՁԱՊԵՏԱՐԱՆԻ ՏԵՂԵԿԱՏՎԱԿԱՆ ՀԱՄԱԿԱՐԳԵՐՈՒՄ ԷԼԵԿՏՐՈՆԱՅԻՆ ՓԱՍՏԱԹՂԹԵՐԻ ԵՎ ԷԼԵԿՏՐՈՆԱՅԻՆ ԹՎԱՅԻՆ ՍՏՈՐԱԳՐՈՒԹՅՈՒՆՆԵՐԻ ԿԻՐԱՌՄԱՆ ԸՆԹԱՑԱԿԱՐԳԸ

3. Գանձապետարանը իր տեղեկատվական համակարգում էլեկտրոնային փաստաթղթերը և էլեկտրոնային թվային ստորագրությունները կիրառում է Հայաստանի Հանրապետության կառավարության 2005 թվականի օգոստոսի 4-ի N 1595-Ն որոշմամբ հաստատված կարգի 5-րդ կետով սահմանված պահանջներին համապատասխան:

4. Գանձապետարանի կամ հաճախորդի կողմից էլեկտրոնային փաստաթղթեր կիրառելիս անհրաժեշտության դեպքում պետք է հնարավոր լինի դրանց վերարտադրումը թղթային եղանակի:

5. Հաճախորդները էլեկտրոնային փաստաթղթերի և էլեկտրոնային թվային ստորագրությունների կիրառման համար, նախքան գործառույթներ իրականացնելը սույն կարգի 3-րդ կետի համաձայն գանձապետարան են ներկայացնում` հավատարմագրված հավաստագրման կենտրոնի կողմից տրամադրված էլեկտրոնային թվային ստորագրության հավաստագիրը, էլեկտրոնային վճարային փաստաթղթում և էլեկտրոնային տեղեկատվական փաստաթղթում` Հայաստանի Հանրապետության կառավարության 2002 թվականի հունվարի 18-ի N 48 որոշմամբ հաստատված Հայաստանի Հանրապետության պետական և համայնքների բյուջեների կատարման կարգի 9-րդ և 10-րդ կետերի պահանջներին համապատասխան առաջին և երկրորդ կարգի ստորագրության իրավասություն ունեցող անձանց տվյալները (անուն, հայրանուն, ազգանուն և զբաղեցրած պաշտոնը):

6. Գանձապետարանը սույն կարգի 5-րդ կետով սահմանված փաստաթղթերը և տվյալները ստանալուց հետո մեկ աշխատանքային օրվա ընթացքում գրանցում է իր տեղեկատվական համակարգում:

7. Գանձապետարանը հաճախորդի տվյալները իր տեղեկատվական համակարգում գրանցելուց հետո, 2 աշխատանքային օրվա ընթացքում հաճախորդին է տրամադրում գանձապետարանի կողմից օգտագործվող հավատարմագրված հավաստագրման կենտրոնի կողմից տրամադրված էլեկտրոնային թվային ստորագրության հավաստագիրը, ինչպես նաև գանձապետարանի կողմից էլեկտրոնային փաստաթղթերում էլեկտրոնային թվային ստորագրության իրավասություն ունեցող անձանց տվյալները (անուն, հայրանուն, ազգանուն և զբաղեցրած պաշտոնը):

8. Գանձապետարանը և հաճախորդը էլեկտրոնային վճարային փաստաթուղթ և
էլեկտրոնային տեղեկատվական փաստաթուղթ միմյանց տրամադրում, կամ ստանում են սույն կարգին, ինչպես նաև «Գանձապետական համակարգի մասին» Հայաստանի Հանրապետության օրենքին և «Էլեկտրոնային փաստաթղթի և Էլեկտրոնային թվային ստորագրության մասին» Հայաստանի Հանրապետության օրենքին, Հայաստանի Հանրապետության կառավարության 2002 թվականի հունվարի 18-ի N 48 որոշմանը և ֆինանսական բնագավառում պետական կարգավորումն իրականացնող պետական մարմնի կողմից սահմանված իրավական ակտերին համապատասխան:

9. Հաճախորդը` էլեկտրոնային վճարային փաստաթղթի կամ էլեկտրոնային տեղեկատվական փաստաթղթի տրամադրման անհնարինության դեպքում (երրորդ անձանց հետ կապված գործառույթներ), գանձապետարան է ներկայացնում թղթային տարբերակով: