«Գրանցված է»

ՀՀ արդարադատության

նախարարության կողմից

26 հուլիսի 2004 թ.

Պետական գրանցման թիվ 30504190

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՍՈՑԻԱԼԱԿԱՆ ԱՊԱՀՈՎԱԳՐՈՒԹՅԱՆ ՊԵՏԱԿԱՆ ՀԻՄՆԱԴՐԱՄԻ ՆԱԽԱԳԱՀ

Հ Ր Ա Մ Ա Ն

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՈՑԻԱԼԱԿԱՆ ԱՊԱՀՈՎԱԳՐՈՒԹՅԱՆ ՊԵՏԱԿԱՆ ՀԻՄՆԱԴՐԱՄԻ ԳՈՐԾԱՎԱՐՈՒԹՅԱՆ ՀՐԱՀԱՆԳԸ» ԵՎ «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՈՑԻԱԼԱԿԱՆ ԱՊԱՀՈՎԱԳՐՈՒԹՅԱՆ ՊԵՏԱԿԱՆ ՀԻՄՆԱԴՐԱՄԻ ՄԱՐԶԱՅԻՆ ՎԱՐՉՈՒԹՅՈՒՆՆԵՐԻ ԵՎ ՏԱՐԱԾՔԱՅԻՆ ԿԵՆՏՐՈՆՆԵՐԻ ԳՈՐԾԱՎԱՐՈՒԹՅԱՆ ՀՐԱՀԱՆԳԸ» ՀԱՍՏԱՏԵԼՈՒ ՄԱՍԻՆ

Հայաստանի Հանրապետության սոցիալական ապահովագրության պետական հիմնադրամի գործավարության միասնական կարգի ապահովման նպատակով.

ՀՐԱՄԱՅՈՒՄ ԵՄ

1. Հաստատել`

ա) «Հայաստանի Հանրապետության սոցիալական ապահովագրության պետական հիմնադրամի գործավարության հրահանգը» (հավելված 1).

բ) «Հայաստանի Հանրապետության սոցիալական ապահովագրության պետական հիմնադրամի մարզային վարչությունների և տարածքային կենտրոնների գործավարության հրահանգը» (հավելված 2):

2. Ուժը կորցրած ճանաչել հիմնադրամի նախագահի 2000 թ. ապրիլի 13-ի «Հայաստանի Հանրապետության սոցիալական ապահովագրության պետական հիմնադրամի գործավարության հրահանգը հաստատելու մասին» թիվ 186 հրամանը:

3. Հիմնադրամի ընդհանուր բաժնի պետ Ս. Համբարձումյանին և գործերի կառավարիչ Վ. Ղազարյանին` ապահովել հրահանգերի տպագրումը և առաքումը հիմնադրամի տարածքային ստորաբաժանումներ:

Հ Ր Ա Հ Ա Ն Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՈՑԻԱԼԱԿԱՆ ԱՊԱՀՈՎԱԳՐՈՒԹՅԱՆ ՊԵՏԱԿԱՆ ՀԻՄՆԱԴՐԱՄԻ ԳՈՐԾԱՎԱՐՈՒԹՅԱՆ

I. Ընդհանուր դրույթներ

1. Սույն հրահանգով սահմանվում են ՀՀ սոցիալական ապահովագրության պետական հիմնադրամի (այսուհետև՝ հիմնադրամ) գործավարության կանոնները:

2. Սույն հրահանգով սահմանված գործավարության կանոնների կատարումը պարտադիր է հիմնադրամի ստորաբաժանումների (այսուհետև՝ ստորաբաժանում) բոլոր աշխատակիցների համար:

3. Հիմնադրամում գործավարության միասնական կանոնների ապահովման վերահսկողությունն իրականացնում է հիմնադրամի նախագահի աշխատակազմի ղեկավարը՝ ընդհանուր բաժնի միջոցով:

4. Հիմնադրամի ստորաբաժանումներում սույն հրահանգով սահմանված գործավարության կանոնների պահպանման պատասխանատվությունը դրվում է ստորաբաժանումների ղեկավարների վրա:

5. Սույն հրահանգով սահմանված գործավարության կանոնները խախտողները ենթարկվում են կարգապահական տույժի:

6. Գաղտնի փաստաթղթերի վարման կարգը սահմանվում է հատուկ հրահանգով:

II. Ստացված փաստաթղթերի ընդունումը, գրանցումն ու շարժը

7. Հիմնադրամ հասցեագրված պաշտոնական գրությունները, քաղաքացիների դիմումները, առաջարկությունները (այսուհետև՝ փաստաթուղթ) ընդունվում են ընդհանուր բաժնի կողմից և գրանցվում մտից մատյամում:

Ստացված փաստաթղթի առաջին էջի ներքևի աջ անկյունում դրվում է դրոշմակնիք, որի վրա նշվում են մտից գրանցման համարը, տարեթիվը և ամսաթիվը:

Ստացված փաստաթղթերի գրանցման տվյալները և համառոտ բովանդակությունը մուտքագրվում են մատյանում, որտեղ արտացոլվում են նաև փաստաթղթերի շարժն ու հանձնարարականների կատարման ընթացքը:

Արգելվում է փաստաթղթերի նշագրումը՝ առանց մտից մատյանում գրանցման:

8. Ընդհանուր բաժնում բացվում են ստացված բոլոր ծրարները, բացի «անձնական» մակագրությամբ ծրարների և ստուգվում են դրանցում փաստաթղթերի առկայությունը: Փաստաթղթերի վնասված լինելու դեպքում կազմվում է ակտ՝ 3 օրինակից, որոնցից մեկը մնում է ընդհանուր բաժնում, երկրորդը կարվում է ստացված փաստաթղթին, իսկ երրորդն ուղարկվում է (անհրաժեշտության դեպքում տեղյակ է պահվում) առաքողին: Ծրարները ոչնչացվում են, բացառությամբ այն դեպքերի, երբ ծրարների միջոցով կարելի է վերականգնել առաքողի հասցեն կամ փաստաթղթի առաքման և ստացման ժամանակը:

«Անձնական» մակագրությամբ ծրարները չեն գրանցվում և փակ վիճակում հանձնվում են հասցեատիրոջը:

Եթե ծրարում հայտնաբերվում են սխալմամբ դրված փաստաթղթեր, դրանք նոր ծրարներով առաքվում են ըստ պատկանելության՝ փաստաթղթերին կցելով այն ծրարները, որոնցով դրանք ստացվել են:

9. Ընդհանուր բաժինը տեսակավորում է ստացված փաստաթղթերը ըստ բովանդակության ու կարևորության և ներկայացնում աշխատակազմի ղեկավարին:

10. Հայաստանի Հանրապետության Նախագահի աշխատակազմից, Ազգային ժողովից, վարչապետից, կառավարությունից ստացված շտապ փաստաթղթերը գրանցվում ու հանձնվում են զեկուցման արտահերթ:

Մնացած փաստաթղթերը հասցեատերերին են տրվում աշխատանքային օրվա ընթացքում:

11. Արգելվում է ստացված փաստաթղթերի բնագրային տեքստում որևէ ուղղում կատարելը:

12. Փաստաթղթերում բարձրացված հարցերին ընթացք տալու նպատակով հիմնադրամի նախագահը, նախագահի տեղակալները կամ նախագահի հանձնարարությամբ աշխատակազմի ղեկավարը կատարում է համապատասխան մակագրություն:

Մակագրությունները պետք է պարզ ու սպառիչ ցուցումներ պարունակեն փաստաթղթերի կատարման ժամկետների և կատարողի մասին:

13. Մակագրությունից հետո փաստաթղթերը հանձնվում են հասցեատերերին, նրանց բացակայության դեպքում՝ պատասխանատու աշխատողին:

Մի քանի կատարողների մակագրված փաստաթղթերը պատճենահանվում են ընդհանուր բաժնի կողմից և հանձնվում կատարողներին նույն օրը:

III. Ելից ԵՎ ներքին փաստաթղթերի շարժը

14. Հիմնադրամի յուրաքանչյուր կառուցվածքային ստորաբաժանում պետք է վարի առանձին գործավարություն:

15. Գործավարությունն իրականացնելու համար ստորաբաժանման ղեկավարն այդ պատասխանատվությունը դնում է համապատասխան աշխատակցի վրա:

16. Ստորաբաժանումում ստացված փաստաթղթերը գրանցվում են համապատասխան մատյանում, որտեղ նշվում են դրանց համառոտ բովանդակությունը և ղեկավարի հանձնարարությունը՝ կատարողին:

17. Ստորաբաժանումից փաստաթղթերը ելքագրվում են երեք օրինակից.

ա) առաջին օրինակը ձևաթղթով ներկայացվում է ընդհանուր բաժին՝ հասցեատիրոջը ուղարկելու համար,

բ) երկրորդ օրինակը ստորաբաժանման ղեկավարի ստորագրությամբ հիմքի հետ միասին պահպանվում է ընդհանուր բաժնում,

գ) երրորդ օրինակի վրա բաժնում ելքի համարը և ամսաթիվը դրվելուց հետո, պահպանվում է համապատասխան ստորաբաժանման ելից փաստաթղթերի թղթապանակում:

19. Ելից փաստաթղթերը ստորագրվում են հիմնադրամի նախագահի, նրա տեղակալների, նախագահի հանձնարարությամբ աշխատակազմի ղեկավարի կամ համապատասխան ստորաբաժանման ղեկավարի կողմից:

20. Ստորագրության ներկայացված փաստաթղթին կցվում է երկրորդ օրինակը՝ նշելով կատարողի ազգանունը, նշագիրը, համակարգչում փաստաթղթի անվանումը (հասցեն) և եթե կան կից հավելվածներ, ապա նաև հավելվածները:

21. Ելից փաստաթղթերը (պատճենների հետ) բաց վիճակում հանձնվում են ընդհանուր բաժին, գրանցվում ելից մատյանում և սահմանված կարգով առաքվում հասցեատերերին:

22. Փաստաթղթերի ելից համարը կազմված է պայմանանիշից, հերթական համարից, տարեթվից և ամսաթվից:

23. Ընդհանուր բաժնում ստուգվում է փաստաթղթի ձևակերպման ճշտությունը, հիմնական փաստաթղթերի հավելվածների առկայությունը: Սխալ ձևակերպված փաստաթղթերը վերադարձվում են կատարողներին:

24. Փաստաթղթերի տեքստում նշվում են կցվող լրացուցիչ նյութերի անվանումը, ամսաթիվը, համարը և թերթերի քանակը:

25. Այն դեպքում, երբ փաստաթղթերը առաքվում են, որպես գրությունների պատասխաններ, տեքստի վերևի ձախ անկյունում նշվում է այդ գրությունների ամսաթիվը և համարը:

26. Ֆաքսեր տրվում են միայն բնույթով շտապ հարցերի վերաբերյալ:

27. Ֆաքսերը ընդհանուր բաժնի միջոցով ուղարկվում են միայն հիմնադրամի նախագահի, նրա տեղակալների կամ նախագահի հանձնարարությամբ աշխատակազմի ղեկավարի կողմից ստորագրվելուց հետո: Ստորագրման ներկայացված ֆաքսերի առաջին էջի ձախից ներքևի անկյունում դրվում է կատարողի նշագիրը:

28. Ընդհանուր բաժինը ֆաքսերը ուղարկելուց հետո, բնագրերը (ստորագրված օրինակի նշագրերով), պահում է ֆաքսերի գործում՝ նշելով հաղորդման օրը, ժամը և ընդունողի անունը, ազգանունը:

29. Հիմնադրամում փաստաթղթերը հասցեատերերին հանձնելը իրականացնում է ընդհանուր բաժնի համապատասխան մասնագետը:

30. Ընդհանուր բաժինը պատասխանատու է փաստաթղթերի ժամանակին առաքման համար:

31. Հիմնադրամում փաստաթղթերի պատրաստման համար սահմանված են հետևյալ ժամկետները՝

ա) ստացված գրություններին պատասխանելու համար՝ մինչև 15 օր (եթե այլ ժամկետներ չեն նախատեսված), լրացուցիչ ուսումնասիրություններ, հիմնավորումներ և քննարկումներ պահանջվելու դեպքում՝ մինչև 1 ամիս.

բ) նախագահի մոտ հրավիրված խորհրդակցությունների արձանագրությունների ձևակերպման համար՝ 1 օր, լրացումների դեպքում՝ մինչև 3 օր.

գ) հանձնարարականներում նշված ժամկետները:

32. Հիմնադրամի նախագահի կողմից ստորագրվող փաստաթղթերը նախապատրաստում են կառուցվածքային ստորաբաժանումների ղեկավարները, նրանց բացակայության դեպքում՝ պատասխանատու աշխատողները:

33. Փաստաթղթի հաստատումը կատարվում է երկու եղանակով՝ հաստատման գրիֆով կամ համապատասխան կարգադրական փաստաթղթի հրապարակմամբ (հրաման):

34. Հաստատման ենթակա կամ պատասխան պահանջող փաստաթղթերին պետք է կցվեն հղումներ պարունակող նյութերը, (քաղվածքները) կից գրությունները և հետագա ընթացքն ապահովող հրամանների, հանձնարարականների կամ պատասխանների նախագծերը:

35. Հիմնադրամի նախագահի մոտ հրավիրվող խորհրդակցությունների օրակարգի կազմումը և անհրաժեշտ նյութերի նախապատրաստումը կատարում են աշխատակազմի ղեկավարը և տվյալ հարցը նախապատրաստող կառուցվածքային ստորաբաժանման ղեկավարը: Ընդհանուր բաժինը նշված նյութերը օրակարգի հետ միասին բազմացնում և առաքում է մասնակիցներին՝ խորհրդակցությունից 2 օր առաջ:

36. Խորհրդակցությունների հրավիրված անձանց մասնակցությունը ապահովում է տվյալ հարցը ներկայացնող կառուցվածքային ստորաբաժանումը ընդհանուր բաժնի հետ:

37. Խորհրդակցությունների արձանագրությունները կազմում է նախագահի կողմից նշանակված աշխատակիցը՝ համաձայնեցնելով հարցը ներկայացնող կառուցվածքային ստորաբաժանման հետ:

Խորհրդակցությունների արձանագրությունները նախագահի հաստատմանն է ներկայացնում աշխատակազմի ղեկավարը:

Հիմնադրամի նախագահի տեղակալների մոտ հրավիրված խորհրդակցությունների արձանագրությունները գրանցվում և համակարգվում են ընդհանուր բաժնում:

38. Արձանագրությունները կամ դրանց քաղվածքները ընդհանուր բաժնի կողմից ուղարկվում են հասցեատերերին՝ համաձայն հասցեաթերթիկի:

IV. Հիմնադրամի նախագահի հրամանների, հանձնարարականների նախապատրաստումը

39. Հիմնադրամի նախագահին ներկայացվող հրամանի, հանձնարարականի վրա պարտադիր են նախագահի տեղակալի և (կամ) դրանցում արծարծվող հարցերը համակարգող ստորաբաժանման ղեկավարի ստորագրությունները: Աշխատակազմի ղեկավարը հրամանը և (կամ) հանձնարարականը ներկայացնում է հիմնադրամի նախագահի ստորագրությանը, որից հետո կնքվում է:

Կադրերին և գործուղումներին վերաբերող հրամանները պատրաստում և սահմանված կարգով հիմնադրամի նախագահի ստորագրությանն է ներկայացնում կադրերի բաժնի պետը:

Գործուղումներին վերաբերող հրամանները պատրաստվում են գործուղվող աշխատակցի ստորաբաժանման պետի զեկուցագրի հիման վրա:

40. Հիմնադրամի նախագահին ներկայացվող հրամանում, հանձնարարականում պարտադիր նշվում են հրամանի, հանձնարարականի կատարման համար պատասխանատու աշխատակցի պաշտոնը, ազգանունը, անունը, կատարման ժամկետը և հրամանի, հանձնարարականի կատարման նկատմամբ հսկողությունն իրականացնող անձի պաշտոնը, ազգանունը, անունը:

41. Հիմնադրամի նախագահի հրամաններն ընդհանուր բաժնում գրանցվում են հատուկ մատյանում (հրամանագիրք):

Կադրերին և գործուղումներին վերաբերող հրամանները գրանցվում, համալրվում և պահպանվում են կադրերի բաժնում:

42. Կենսագործման համար կոնկրետ ժամկետ սահմանող հրամաններն ու հանձնարարականները հարց ներկայացնող կառուցվածքային ստորաբաժանման կողմից վերցվում են հսկողության:

43. Հրամանների և հանձնարարականների հերթական համարակալումը տարվում է տարեսկզբից մինչև տարեվերջ:

44. Ընդհանուր բաժինը ապահովում է նախագահի կողմից ստորագրված հրամանների պատճենահանումը համապատասխան քանակով և պատասխանատու է հրամանների, հանձնարարականների, ինչպես նաև դրանց կցվող փաստաթղթերի առաքման համար:

45. Հիմնադրամի նախագահի հրամանների, հանձնարարականների առաքումից հետո, դրանց բնօրինակները կից փաստաթղթերով (առկայության դեպքում) պահպանվում են ընդհանուր բաժնում:

V. Փաստաթղթերի հսկողության կանոնները

46. Հրամաններ և հանձնարարականներ պարունակող փաստաթղթերը ընդհանուր բաժնի կողմից վերցվում են հսկողության:

47. Հրամանների և հանձնարարականների կատարման համար պատասխանատու են կառուցվածքային ստորաբաժանումների ղեկավարները և նրանց կողմից լիազորված աշխատակիցը:

48. Հսկողության վերցրած փաստաթղթերի համար ընդհանուր բաժնում լրացվում է «Հանձնարարական» ձևի քարտ, որը գրանցվում է համակարգչում և հսկողության ժամկետը լրանալուց 1 օր առաջ համակարգիչը տալիս է հիշեցման ազդանշան, իսկ կատարման ժամկետը լրանալիս՝ ահազանգման ազդանշան, որոնք ընդհանուր բաժնի կողմից հաղորդվում են կատարողին:

Ընդհանուր բաժնի համապատասխան աշխատողը պարբերաբար աշխատակազմի ղեկավարին է ներկայացնում ամփոփ տեղեկանք՝ հրամանների և հանձնարարականների կատարման ընթացքի (չկատարումների) մասին:

Աշխատակազմի ղեկավարը հրավիրում է աշխատանքային խորհրդակցություն՝ կառուցվածքային ստորաբաժանումների ղեկավարների մասնակցությամբ և քննարկում հրամանների և հանձնարարականների չկատարումների պատճառները: Արդյունքների մասին զեկուցում է հիմնադրամի նախագահին:

49. Հրամանի կամ հանձնարարականի կատարումից հետո փաստաթուղթը հանվում է հսկողությունից: Փաստաթղթի կատարման և հսկողությունից հանելու մասին տվյալները մուտքագրվում են համակարգիչ:

50. Հսկողության վերցված փաստաթղթի ժամկետը ենթակա է փոփոխման միայն հանձնարարողի կողմից, եթե նախքան ժամկետը լրանալը կատարողը գրավոր տեղեկացրել է սահմանված ժամկետում կատարման անհնարինության մասին:

VI. Նյութերի մեքենագրումը ԵՎ բազմացումը

51. Նյութերը մեքենագրվում են հիմնադրամի համապատասխան կառուցվածքային ստորաբաժանումում օպերատորների կողմից և բազմացվում են ընդհանուր բաժնի միջոցով՝ գործերի կառավարչությունում:

52. Համակարգչով մուտքագրողը պատասխանատու է իր կողմից տպագրված նյութերի տպագրական որակի համար:

53. Գործերի կառավարչությունում պատճենահանվում են միայն ծառայողական բնույթի նյութեր:

54. Հիմնադրամում օգտագործվող բոլոր ձևաթղթերը գործողության մեջ են դրվում հիմնադրամի նախագահի հանձնարարությամբ:

VII. Քաղաքացիների առաջարկություններին, դիմումներին ԵՎ գանգատներին ընթացք տալու մասին

55. Քաղաքացիների առաջարկությունները, դիմումները և գանգատները գրանցվում են դրանց ստացման օրը և հաշվառվում են առանձին մատյանով՝ ընդհանուր բաժնում:

56. Քաղաքացիների առաջարկությունները, դիմումները և գանգատները հիմնադրամում քննության են առնվում 15-օրյա ժամկետում, իսկ լրացուցիչ ուսումնասիրություն և ստուգում պահանջող դիմումներն ու գանգատները՝ մինչև մեկ ամիս:

57. Անհատական ընդունելության ժամանակ քաղաքացիների կողմից գրավոր առաջարկությունները, նրանց դիմումները և գանգատները ենթակա են գրանցման սահմանված կարգով:

58. Անստորագիր նամակները գրանցման ենթակա չեն և ոչնչացվում են սահմանված կարգով:

59. Կրկնակի առաջարկությունների, դիմումների և գանգատների վերին աջ անկյունում դրվում է «կրկնակի» նշում և կցվում է նախորդ ամբողջ գրագրությունը:

Կրկնակի են համարվում միևնույն անձից, նույն բովանդակությամբ ստացված առաջարկությունները, դիմումները և գանգատները:

60. Առաջարկությունները, դիմումները և գանգատները հիմնադրամի նախագահի, նախագահի տեղակալի կամ աշխատակազմի ղեկավարի մակագրություններով վերադարձվում են ընդհանուր բաժին՝ ցուցումների համաձայն կատարումն ապահովելու համար:

61. Ստորաբաժանման համապատասխան աշխատողները պարտավոր են ապահովել բարձրացված հարցերի բազմակողմանի ու խոր ուսումնասիրությունը՝ մակագրության համաձայն ու սահմանված ժամկետներում տալ դրանց լուծումը: Եթե նամակի քննարկումը հանձնարարվում է մեկից ավելի աշխատակիցների, հանձնարարությունը ժամանակին և որակով կատարելու համար պատասխանատու է այն անձը, ում ազգանունը մակագրության մեջ նշված է առաջինը:

Նամակների քննարկման արդյունքների մասին գրավոր կամ դիմողի համաձայնությամբ՝ բանավոր հայտնվում են նրանց հեղինակներին: Այս նպատակով պատասխանը նախապատրաստում են երկու օրինակով, որոնցից առաջին օրինակն ուղղվում է դիմողին, երկրորդ օրինակը հիմքի հետ կարվում է ելից մատյանում:

VII. Փաստաթղթերի նախապատրաստումը հետագա պահպանման համար

62. Պահպանության ենթակա փաստաթղթերն ընդհանուր բաժնում պահպանվում են օրենսդրությամբ սահմանված ժամկետներում, որից հետո արխիվացվում են սահմանված կարգով:

63. Փաստաթղթերի պահպանման կարգը և պայմանները սահմանվում են պետական արխիվի հրահանգներով և սույն հրահանգով:

64. Արխիվի աշխատակիցը պահպանության համար ընդունում է ընդհանուր բաժնի գործավարության բոլոր փաստաթղթերը, իսկ մյուս ստորաբաժանումներից պահպանման ենթակա փաստաթղթերը (բացառությամբ ֆինանսական և հաշվապահական փաստաթղթերի)՝ ըստ ցուցակների և պայմանանիշերի, այդ մասին կազմելով համապատասխան ակտ:

Արխիվի աշխատակիցը գործերի ընդունման համար ստորագրում է ցուցակների բոլոր օրինակներում, նշում գործերի ընդունման ամսաթիվը և քանակը:

Ցուցակի մեկ օրինակը տրվում է գործեր հանձնողին, մեկ օրինակը ընդհանուր բաժնի պետին, մյուսները մնում են արխիվում:

65. Պետական պահպանության ենթակա փաստաթղթերը արխիվացվում են ըստ սահմանված կարգի:

66. Սույն հրահանգին ծանոթանում են հիմնադրամի բոլոր աշխատողները և իրենց գործունեության ընթացքում ղեկավարվում են վերոհիշյալ դրույթներով:

Հ Ր Ա Հ Ա Ն Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՈՑԻԱԼԱԿԱՆ ԱՊԱՀՈՎԱԳՐՈՒԹՅԱՆ ՊԵՏԱԿԱՆ

ՀԻՄՆԱԴՐԱՄԻ ՄԱՐԶԱՅԻՆ ՎԱՐՉՈՒԹՅՈՒՆՆԵՐԻ ԵՎ ՏԱՐԱԾՔԱՅԻՆ

ԿԵՆՏՐՈՆՆԵՐԻ ԳՈՐԾԱՎԱՐՈՒԹՅԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1.1. Սույն հրահանգով սահմանվում են ՀՀ սոցիալական ապահովագրության պետական հիմնադրամի մարզային վարչությունների և տարածքային կենտրոնների (այսուհետև՝ վարչություն, կենտրոն) գործավարության կանոնները:

1.2. Սույն հրահանգով նախատեսված գործավարության կանոնները պարտադիր են վարչության և կենտրոնի բոլոր աշխատակիցների համար:

1.3. Գործավարության միասնական համակարգի պահպանման նկատմամբ վերահսկողությունը դրվում է վարչության պետի և կենտրոնի տնօրենի վրա:

II. ՍՏԱՑՎԱԾ ԹՂԹԱԿՑՈՒԹՅԱՆ ԸՆԴՈՒՆՈՒՄԸ, ԳՐԱՆՑՈՒՄԸ ԵՎ ՇԱՐԺԸ

2.1. Վարչություն և կենտրոն հասցեագրված պաշտոնական գրությունները, քաղաքացիների դիմումները, առաջարկությունները (այսուհետև՝ փաստաթուղթ) ընդունվում են գործավարի կողմից և գրանցվում մուտքի մատյանում (ձևը կցվում է): Արգելվում է փաստաթղթերի նշագրումը՝ առանց մուտքի մատյանում գրանցման:

2.2. Մուտքի մատյանում նշվում է փաստաթղթի համառոտ բովանդակությունը, շարժը և կատարման ընթացքը: Գրանցված փաստաթղթի առաջին էջի ներքևի աջ անկյունում դրվում է դրոշմակնիք, որի վրա նշվում են մտից գրանցման համարը և ամսաթիվը:

2.3. Գործավարը բացում է ստացված բոլոր ծրարները, բացի «անձնական» մակագրությամբ ծրարներից և ստուգում է դրանցում փաստաթղթերի առկայությունը: Փաստաթղթերի վնասված լինելու դեպքում կազմվում է ակտ՝ 3 օրինակից, որոնցից մեկը մնում է գործավարի մոտ, երկրորդը կարվում է ստացված փաստաթղթին, իսկ երրորդը ուղարկվում է (անհրաժեշտության դեպքում տեղյակ է պահվում) առաքողին: Ծրարները ոչնչացվում են, բացառությամբ այն դեպքերի, երբ ծրարների միջոցով կարելի է վերականգնել առաքողի հասցեն կամ փաստաթղթի առաքման և ստացման ժամանակը:

«Անձնական» մակագրությամբ ծրարները չեն գրանցվում և փակ վիճակում հանձնվում են հասցեատիրոջը:

Եթե ծրարում հայտնաբերվում են սխալմամբ դրված փաստաթղթեր, դրանք նոր ծրարներով առաքվում են ըստ պատկանելության՝ փաստաթղթերին կցելով այն ծրարները, որոնցով դրանք ստացվել են:

2.4. Անստորագիր նամակները գրանցման ենթակա չեն և ոչնչացվում են սահմանված կարգով:

2.5. Կրկնակի առաջարկությունների, դիմումների և գանգատների վերին աջ անկյունում դրվում է «կրկնակի» նշում և կցվում է նախորդ ամբողջ գրագրությունը:

Կրկնակի են համարվում միևնույն անձից, նույն բովանդակությամբ ստացված առաջարկությունները, դիմումները և գանգատները:

2.6. Հիմնադրամի նախագահի, նախագահի տեղակալների հրամանները, հանձնարարականները և այլ շտապ փաստաթղթերը գրանցվում են գործավարի մոտ և արտահերթ զեկուցվում վարչության պետին (տարածքային կենտրոնի տնօրենին):

Մյուս փաստաթղթերը գրանցվում են օրվա ընթացքում և մակագրելուց հետո՝ օրվա վերջում, հանձնվում են հասցեատերերին (կատարողին):

Շտապ բովանդակությամբ կարևոր ֆաքսերի մասին անհապաղ զեկուցվում է վարչության պետին (կենտրոնի տնօրենին կամ տեղակալին):

2.7. Մուտքագրված պաշտոնական գրությունները գրանցվելուց հետո ներկայացվում են վարչության պետին (կենտրոնի տնօրենին):

Վարչության պետը (կենտրոնի տնօրենը կամ նրա տեղակալը) փաստաթղթերն ուսումնասիրելուց հետո կատարում է համապատասխան մակագրություն և գործավարի միջոցով դրանք օրվա առաջին կեսին ուղարկում է կատարման համապատասխան պաշտոնատար անձանց, որոնք ստացվող գրությունների համար ստորագրում են մատյանում:

Մեկից ավելի կատարողների մակագրված փաստաթղթերը պատճենահանվում են գործավարի կողմից և հանձնվում կատարողին նույն օրը:

2.8. Ստացված հրամանների և հանձնարարականների օրինակները պահպանվում են համապատասխան թղթապանակներում:

2.9. Վարչության և կենտրոնի աշխատակիցները պատասխանատու են իրենց մոտ գտնվող փաստաթղթերի խնամքի և պահպանության համար:

Արգելվում է ստացված փաստաթղթերի բնագրային տեքստում որևէ ուղղում կամ նշում կատարելը:

2.9.1. Արձակուրդ կամ երկարատև գործուղում գնալիս, ինչպես նաև այլ պատճառներով բացակայելիս՝ աշխատողը պարտավոր է իր մոտ եղած փաստաթղթերը հանձնել իրեն փոխարինողին:

III. ՓԱՍՏԱԹՂԹԵՐԻ ԿԱՏԱՐՄԱՆ ԺԱՄԿԵՏՆԵՐԸ

3.1. Վարչությունում և կենտրոնում փաստաթղթերի պահանջների կատարման համար սահմանվում են հետևյալ ժամկետները.

- հիմնադրամից, ապահովադիրներից և այլ մարմիններից ստացված գրություններին պատասխանելու համար՝ մինչև 15 օր (եթե այլ ժամկետներ չեն նախատեսված),

- լրացուցիչ ուսումնասիրություններ, հիմնավորումներ և քննարկումներ պահանջվելու դեպքում՝ մինչև 1 ամիս:

- հանձնարարականներում նշված ժամկետները:

3.2. Քաղաքացիների առաջարկությունները, դիմումները և գանգատները քննության են առնվում 15-օրյա ժամկետում, իսկ լրացուցիչ ուսումնասիրություն և ստուգում պահանջող դիմումներն ու գանգատները՝ մինչև 1 ամիս:

3.3. Հրավիրվող խորհրդակցությունների արձանագրությունների ձևակերպման համար սահմանվում են հետևյալ ժամկետները ՝

- առանց դիտողությունների ընդունված արձանագրությունների համար՝ 1 օր,

- լրամշակման ենթակա արձանագրությունների համար՝ 3 օր:

3.4. Հսկողության տակ վերցվող փաստաթղթերի մակագրությունների նախագծում նշվում է կատարման ժամկետը, որը կարող է երկարաձգվել միայն հանձնարարությունը տվող ղեկավարի կողմից:

IV. ՓԱՍՏԱԹՂԹԵՐԻ ՆԱԽԱՊԱՏՐԱՍՏՈՒՄԸ ԵՎ ԱՌԱՔՈՒՄԸ

4.1. Կատարողը ելից փաստաթղթերը ներկայացնում է ստորագրության վարչության պետին (կենտրոնի տնօրենին կամ նրա տեղակալին):

4.2. Ելից փաստաթղթերը ստորագրվելուց հետո (պատճենների հետ) բաց վիճակում հանձնվում են գործավարին:

Գործավարը փաստաթղթերը գրանցում է ելից մատյանում (ձևը կցվում է) և սահմանված կարգով առաքում հասցեատերերին:

Երկրորդ օրինակը առանց ձևաթղթի՝ կատարողի ստորագրությամբ, հիմքի հետ միասին պահպանվում է գործավարի մոտ:

Երրորդ օրինակը՝ ելից համարով և ամսաթվով, պահպանվում է կատարողի մոտ:

4.3. Փաստաթղթերի ելից համարը կազմված է պայմանանիշից, հերթական համարից, տարեթվից և ամսաթվից:

4.4. Գործավարի մոտ ստուգվում է փաստաթղթի ձևակերպման ճշտությունը, հիմնական փաստաթղթերի հավելվածների առկայությունը: Սխալ ձևակերպված փաստաթղթերը վերադարձվում են կատարողներին:

4.5. Փաստաթղթերի տեքստում նշվում են կցվող լրացուցիչ նյութերի անվանումը, ամսաթիվը, համարը և թերթերի քանակը:

4.6. Այն դեպքում, երբ փաստաթղթերը առաքվում են, որպես գրությունների պատասխաններ, վերևի ձախ անկյունում նշվում է այդ գրությունների ամսաթիվը և համարը:

4.7. Գործավարը պատասխանատու է փաստաթղթերի ժամանակին առաքման համար:

V. ՎԱՐՉՈՒԹՅԱՆ ՊԵՏԻ ԵՎ ՏԱՐԱԾՔԱՅԻՆ ԿԵՆՏՐՈՆԻ ՏՆՕՐԵՆԻ ՀՐԱՄԱՆՆԵՐԻ ՆՅՈՒԹԵՐԻ ՆԱԽԱՊԱՏՐԱՍՏՈՒՄԸ ԵՎ ՍՊԱՍԱՐԿՈՒՄԸ

5.1. Վարչության պետի (կենտրոնի տնօրենի) կողմից հրաման արձակելուց հետո, այն գործավարի կողմից գրանցվում է հատուկ մատյանում (հրամանագիրք) և պահվում ըստ կարգի:

5.2. Կենսագործման համար կոնկրետ ժամկետ սահմանող հրամանները համապատասխան աշխատողի կողմից վերցվում են հսկողության տակ:

5.3. Արձակված հրամանների հերթական համարակալումը տարվում է տարեսկզբից մինչև տարեվերջ:

5.4. Կադրերին և գործուղումներին վերաբերող հրամանները պատրաստում և սահմանված կարգով վարչության պետի (տարածքային կենտրոնի) ստորագրմանն են ներկայացնում մարզային վարչությունում գլխավոր մասնագետ-իրավաբանը, կենտրոնում՝ գործավարը:

Գործուղման հրամանները ստորագրվում են կենտրոնի տնօրենի կողմից՝ նախապես համաձայնեցնելով մարզային վարչության պետի հետ:

Ստորագրվելուց հետո հրամանները համարակալվում, գրանցվում և պահպանվում են վերոնշված աշխատակիցների կողմից:

5.5. Համապատասխան աշխատողը ապահովում է վարչության պետի (կենտրոնի տնօրենի) կողմից ստորագրված հրամանների պատճենահանումը անհրաժեշտ քանակով և պատասխանատու է հրամանների, ինչպես նաև դրանց կից փաստաթղթերի առաքման համար:

5.6. Վարչության պետի (կենտրոնի տնօրենի) հրամանների առաքումից հետո, սահմանված կարգով դրանց բնօրինակները կից փաստաթղթերով (առկայության դեպքում) մեկ տարի պահվելուց հետո հանձնվում են պահպանության:

5.7. Վարչության պետի (կենտրոնի տնօրենի) կողմից հրավիրվող խորհրդակցությունների համար բազմացման ենթակա նյութերի ընտրությունը կատարվում է համապատասխան պաշտոնատար անձանց կողմից: Նշված նյութերը օրակարգի հետ միասին բազմացվում և առաքվում են ըստ հաստատված ցուցակի խորհրդակցությունից 2 օր առաջ:

5.8. Խորհրդակցությունների արձանագրությունները համարակալվում են առանձին՝ հերթական համարներով:

Արձանագրություններից քաղվածքները ուղարկվում են հասցեատերերին՝ համաձայն հասցեաթերթիկի:

VI. ՓԱՍՏԱԹՂԹԵՐԻ ՀՍԿՈՂՈՒԹՅԱՆ ԿԱՆՈՆՆԵՐԸ

6.1. Հրամաններ և հանձնարարականներ պարունակող փաստաթղթերը գործավարի կողմից վերցվում են հսկողության:

6.2. Հրամանների և հանձնարարականների կատարման համար պատասխանատու են կառուցվածքային ստորաբաժանումների ղեկավարները և նրանց կողմից լիազորված աշխատակիցը:

6.3. Հրամանի կամ հանձնարարականի կատարումից հետո փաստաթուղթը հանվում է հսկողությունից:

VII. ՀԵՌԱՖԱՔՍԵՐԻ ՁԵՎԱԿԵՐՊՈՒՄԸ

7.1. Հեռաֆաքսերը տարվում են միայն բնույթով շտապ հարցերի վերաբերյալ: Հեռաֆաքսի վրա դրվում է ստորաբաժանման ղեկավարի նշագիրը, որից հետո բնագիրը պահպանվում է գործավարի մոտ, իսկ երկրորդ օրինակը տրվում է համապատասխան աշխատողին՝ հաղորդելու համար:

VIII. ՓԱՍՏԱԹՂԹԵՐԻ ՆԱԽԱՊԱՏՐԱՍՏՈՒՄԸ ՀԵՏԱԳԱ ՊԱՀՊԱՆՄԱՆ ՀԱՄԱՐ

8.1. Պահպանության ենթակա փաստաթղթերը գործավարի մոտ պահպանվում են օրենսդրությամբ սահմանված ժամկետներում, որից հետո արխիվացվում են սահմանված կարգով:

8.2. Փաստաթղթերի պահպանման կարգը և պայմանները սահմանվում են պետական արխիվի հրահանգներով և սույն հրահանգով: