ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԷՆԵՐԳԵՏԻԿԱՅԻ ՆԱԽԱՐԱՐՈՒԹՅՈՒՆ

Հ Ր Ա Մ Ա Ն

17.04.2000 թ. ք. Երևան

N 57-ԴԶ

Ղեկավարվելով «Էներգետիկայի մասին» Հայաստանի Հանրապետության օրենքի 9-րդ հոդվածով և հիմք ընդունելով ՀՀ կառավարության 23 սեպտեմբերի 1999 թվականի «Էներգետիկայի մասին» Հայաստանի Հանրապետության օրենքի կիրարկումն ապահովող միջոցառումների մասին» N 592 որոշման 1-ին կետը`

ՀՐԱՄԱՅՈՒՄ ԵՄ.

1. Հաստատել «Հայաստանի Հանրապետությունում էլեկտրաէներգիայի սպառման սահմանափակումների կիրառման հրահանգը» (կցվում է):

2. Հրահանգը ներկայացնել ՀՀ արդարադատության նախարարություն` պետական գրանցման:

Նախարար`

Դ. Զադոյան

Հաստատված է ՀՀ էներգետիկայի նախարարության 17.04.2000 թ. N 57-ԴԶ հրամանով

 

Հ Ր Ա Հ Ա Ն Գ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԷԼԵԿՏՐԱԷՆԵՐԳԻԱՅԻ ՍՊԱՌՄԱՆ ՍԱՀՄԱՆԱՓԱԿՈՒՄՆԵՐԻ ԿԻՐԱՌՄԱՆ

1. Սույն Հրահանգը «Էներգետիկայի մասին» ՀՀ օրենքի 9-րդ հոդվածի հիման վրա սահմանում է կազմակերպությունների կողմից էլեկտրաէներգիայի սպառման սահմանափակումների կիրառման կարգը` պայմանավորված էլեկտրական էներգիայի մատակարարման անբավարարությամբ` էլեկտրաէներգիայի սպառման սահմանափակումների գրաֆիկների հերթերով ամրագրված սահմաններում:

2. Հրահանգի գործողության ժամկետը մեկ օրացուցային տարի է և կիրառման մասին որոշումը ընդունում է ՀՀ էներգետիկայի նախարարը` նշելով սահմանափակման հերթը` ելնելով էներգակիրների առկա հաշվեկշռից, և տևողությունը` կախված էլեկտրական էներգիայի մատակարարման անբավարարության պատճառների վերացման հնարավոր ժամանակահատվածից:

Սպառման սահմանափակման մասին տեղեկատվությունը հրապարակվում է ՀՀ էներգահամակարգի կենտրոնական կարգավարական ծառայության կամ էլեկտրաէներգիայի մատակարարի կողմից` Հանրապետական ռադիոյի, հեռուստատեսության և (կամ) մամուլի միջոցով, ոչ ուշ քան սահմանափակման կիրառման պահից 24 ժամ առաջ:

3. Էլեկտրաէներգիայի սպառման սահմանափակումների գրաֆիկները մշակվում են ըստ էլեկտրաէներգիայի մատակարարների կողմից սպասարկվող տարածքների և ներառում են` կազմակերպությունների անվանումները, էլեկտրաէներգիայի մատակարարման պայմանագրերում ամրագրված նրանց տեխնոլոգիական և (կամ) վթարային ամրագրված հզորությունները կամ էլեկտրաէներգիայի ծախսը և սահմանափակման չափը` ըստ հերթերի:

Գրաֆիկների կազմումն իրականացվում է հետևյալ ընթացակարգով.

ա) կազմակերպությունները դիմում են «Էներգապետհսկողություն» գլխավոր վարչության տարածքային ստորաբաժանումներ` տեխնոլոգիական և (կամ) վթարային հզորությունների ամրագրում կատարելու նպատակով,

բ) «Էներգապետհսկողություն» գլխավոր վարչության տարածքային ստորաբաժանումները, կազմակերպությունների հետ համատեղ, դիմումը ստանալու օրվանից 15 օրվա ընթացքում կազմում են Տեխնոլոգիական և (կամ) վթարային հզորությունների ամրագրման ակտ (Հավելված), երկու օրինակից, մեկական օրինակ կողմերի համար,

գ) Էլեկտրաէներգիա սպառող կազմակերպությունը Տեխնոլոգիական և (կամ) վթարային հզորությունների ամրագրման ակտի պատճենը ներկայացնում է էլեկտրաէներգիայի մատակարարին` էլեկտրաէներգիայի մատակարարման պայմանագրում համապատասխան գրանցում կատարելու համար,

դ) յուրաքանչյուր տարվա համար Տեխնոլոգիական և (կամ) վթարային հզորությունների ամրագրման ակտերի կազմման գործընթացը սկսվում է նախորդող տարվա սեպտեմբերի 1-ից և ավարտվում է հոկտեմբերի 15-ին: Նշված ժամկետում դիմում չներկայացրած և անհրաժեշտ ձևակերպում չկատարած կազմակերպությունները զրկվում են տեխնոլոգիական և (կամ) վթարային հզորությունների ամրագրման իրավունքից,

ե) էլեկտրաէներգիայի մատակարարները, կազմակերպությունների հետ համատեղ, մինչև նախորդող տարվա նոյեմբերի 15-ը, յուրաքանչյուր կազմակերպության համար որոշում են էլեկտրաէներգիայի մատակարարման պայմանագրում կամ էլեկտրական ցանցին միանալու Տեխնիկական պայմաններում ամրագրված էլեկտրաէներգիայի քանակի (հզորության) սահմանափակումների չափերը` 3 հերթից բաղկացած: Տեխնոլոգիական և (կամ) վթարային ամրագրված հզորությունների առկայության դեպքում սահմանափակումն իրականացվում է մինչև դրանց գումարային մեծությունը,

զ) ընթացիկ տարում տեխնոլոգիական և (կամ) վթարային ամրագրված հզորությունների փոփոխություններ կարող են կատարվել սույն ընթացակարգի «ա» «բ» և «գ» ենթակետերի համաձայն:

4. Ամրագրված տեխնոլոգիական է համարվում այն հզորությունը կամ էլեկտրաէներգիայի ծախսը, որն ապահովում է կազմակերպությունում իրականացվող տեխնոլոգիական պրոցեսի ընթացքի կամ հերթական ցիկլի ավարտը:

5. Ամրագրված վթարային է համարվում այն հզորությունը կամ էլեկտրաէներգիայի ծախսը, որն ապահովում է կազմակերպությունում մարդկանց անվտանգությունը, սարքավորումների պահպանությունը, ջեռուցման, ջրամատակարարման, օդափոխության համակարգերի, ինչպես նաև հրդեհային անվտանգության միջոցների անխափան աշխատանքը:

6. Էլեկտրաէներգիայի սպառման սահմանափակումների չափն ամրագրող փաստաթղթի մասին նշում է կատարվում էլեկտրաէներգիայի մատակարարման պայմանագրում և այն համարվում է պայմանագրի անբաժանելի մաս` մեկ օրացուցային տարի ժամկետով:

7. Էլեկտրաէներգիայի մատակարարների կողմից ներկայացված ամփոփ տվյալների հիման վրա, «Էներգապետհսկողություն» գլխավոր վարչության կողմից, մինչև նոյեմբերի 30-ը, հաջորդ տարվա համար կազմվում են 3 հերթից բաղկացած էլեկտրաէներգիայի սպառման սահմանափակումների գրաֆիկներ` ամբողջ հանրապետության տարածքով:

8. Սույն հրահանգի կիրառման մասին որոշման ընդունման պահից առաջադրված սպառման սահմանափակումները չկատարող կամ խախտումներ թույլ տվող կազմակերպությունների էլեկտրաէներգիայի մատակարարումը կարող է լրիվ դադարեցվել` ՀՀ օրենսդրությամբ սահմանված կարգով:

9. Կազմակերպությունների կողմից սպառման սահմանափակումների գրաֆիկների կատարման հսկողությունը իրականացնում են էլեկտրաէներգիայի մատակարարի ներկայացուցիչները և «Էներգապետհսկողություն» գլխավոր վարչության տեսչական անձնակազմը: Նման իրավունքով օժտված էլեկտրաէներգիայի մատակարարի ներկայացուցիչների պաշտոնացանկը նախապես հայտնվում է կազմակերպություններին:

Հավելված Հայաստանի Հանրապետությունում էլեկտրաէներգիայի սպառման սահմանափակումների կիրառման հրահանգի

Համաձայնեցված է Կազմակերպության ղեկավար _________________ ____ _______ 2000թ.

Համաձայնեցված է Էներգապետհսկողության տարածքային վարչության պետ _________________ ____ _______ 2000թ.

Ա Կ Տ   ԷԼԵԿՏՐԱՄԱՏԱԿԱՐԱՐՄԱՆ ՎԹԱՐԱՅԻՆ ԵՎ ՏԵԽՆՈԼՈԳԻԱԿԱՆ ՀԶՈՐՈՒԹՅԱՆ ԱՄՐԱԳՐՄԱՆ ______________________________________________________ ______________________________________________________ Ընկերության լրիվ անվանումը Հասցեն _________________________________________________ Ղեկավար________________________________________________ Ա.Ա.Հ. Հեռախոս   Մենք, ներքոստորագրյալներս, էներգապետհսկողության տեսուչ_______________   _________________________________ և ընկերության ներկայացուցիչ                  Ա.Ա.Հ. ___________________________ կազմեցինք սույն ակտը հետևյալի մասին`   1. Ձեռնարկության պայմանագրային հզորությունը ___________________(կՎտ) 2. Վթարային ամրագրված հզորությունը _________________________ (կՎտ) 3. Տեխնոլոգիական ամրագրված հզորությունը _____________________ (կՎտ) 4. Տեխնոլոգիական պրոցեսի ավարտման տևողությունը _______________ (Ժամ) 5. Անջատվող հզորությունը սահմանափակման ժամանակ _______________(կՎտ) 6. Օրվա աշխատաժամերի քանակը ____________________________ (Ժամ) 7. Ամսվա աշխատանքային օրերի քանակը _________________________(օր): Կից ներկայացվում է ձեռնարկության էլեկտրամատակարարման միագծանի սխեման:

Հեռ. համարը ____________ Տեսուչ ________________             (Ստորագրություն) Ա.Ա.Հ.   Հեռ. համարը ___________ Սպառողի ներկայացուցիչ____________           (Ստորագրություն) Ա.Ա.Հ.

ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
10 մայիսի 2000 Թ.

ՊԵՏԱԿԱՆ ԳՐԱՆՑՄԱՆ ԹԻՎ 10800033