ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

17 փետրվարի 2022 թվականի N 181-Ն

ԵՐԵՎԱՆԻ ՇԵՆԳԱՎԻԹ ՎԱՐՉԱԿԱՆ ՇՐՋԱՆԻ ՇԻՐԱԿԻ ՓՈՂՈՑԻ ԵՎ ԱՐՇԱԿՈՒՆՅԱՑ ՊՈՂՈՏԱՅԻ ՀԱՏՄԱՆ ՎԱՅՐԻ ՀԵՏՆԱՄԱՍՈՒՄ ԳՏՆՎՈՂ ՏԱՐԱԾՔՈՒՄ ԱՌԿԱ ԳՈՒՅՔԵՐԻ ՆԱԽՆԱԿԱՆ ՈՒՍՈՒՄՆԱՍԻՐՄԱՆ ՄԱՍԻՆ

Ղեկավարվելով «Հանրության գերակա շահերի ապահովման նպատակով սեփականության օտարման մասին» Հայաստանի Հանրապետության օրենքի 7-րդ և 8-րդ հոդվածներով՝ Հայաստանի Հանրապետության կառավարությունը որոշում է.

1. Երևան քաղաքի Շենգավիթ վարչական շրջանի Շիրակի փողոցի և Արշակունյաց պողոտայի հատման վայրի հետնամասում գտնվող տարածքում հավաքակայանի կառուցման ծրագրի իրականացման շահը գերակայում է օտարվող սեփականության սեփականատերերի շահերից, և ծրագրի արդյունավետ իրագործումը չի կարող ապահովվել առանց նշված հատվածում գտնվող սեփականության օբյեկտների նկատմամբ հանրության գերակա շահ ճանաչելու և օտարման, իսկ նախքան հանրության գերակա շահ ճանաչելը, անհրաժեշտ է կատարել նախնական ուսումնասիրման աշխատանքներ՝ հետևյալ հիմնավորումներով՝

1) հաշվի առնելով, որ գոյություն ունեցող հավաքակայանների պայմանները գտնվում են խիստ վատթար վիճակում.

2) պայմաններն անբավարար են ինչպես քաղաքային ավտոբուսների հավաքակայանի շահագործման, այնպես էլ աշխատակիցների բարեկեցության համար.

3) առավել ժամանակակից և հագեցած հավաքակայանի բացակայության արդյունքում անհնար է դառնում մեծաքանակ ավտոբուսների ձեռքբերումը և դրանց կայանման խնդրի լուծումը, որի հետևանքով Երևան քաղաքում ճանապարհային ցանցի գոյություն ունեցող իրավիճակը կտրուկ նվազեցնում է քաղաքում տրանսպորտի երթևեկության անվտանգության մակարդակը, նպաստում է խցանումների առաջացմանը.

4) հաճախակի հանգեցնում է տրանսպորտի երթևեկության կաթվածահարմանն ու շրջակա միջավայրի էկոլոգիական վիճակի վատթարացմանը.

5) նախատեսված ծրագրի արդյունքը կլինի բարձրորակ, էկոլոգիապես մաքուր ավտոբուսային հավաքակայանի կառուցում՝ բնական գազով աշխատող նոր ավտոբուսների համար, որը կնպաստի Երևանում տրանսպորտային նոր միջոցների ձեռքբերմանն ու դրանց արդյունավետ շահագործմանը՝ էապես կրճատելով երթևեկության տևողությունն ու նվազեցնելով խցանումները։

2. Նախքան Երևան քաղաքի Շենգավիթ վարչական շրջանի Շիրակի փողոցի և Արշակունյաց պողոտայի հատման վայրի հետնամասում գտնվող տարածքում առկա գույքերի նկատմամբ հանրության գերակա շահ ճանաչելու մասին Հայաստանի Հանրապետության կառավարության որոշման ընդունումը՝ կատարել գույքերի նախնական ուսումնասիրում՝ սույն որոշման հավելվածում նշված հասցեներում (գտնվելու վայրը):

3. Գույքերի օտարման համար պետական լիազոր մարմնի գործառույթը պատվիրակել Երևանի քաղաքապետին և վերջինիս լիազորել սույն որոշման 2-րդ կետում նշված նախնական ուսումնասիրման աշխատանքների ընթացքում հանդես գալ Հայաստանի Հանրապետության անունից:

4. Սահմանել, որ՝

1) սույն որոշման 2-րդ կետում նշված գույքերի ձեռքբերողը Հայաստանի Հանրապետությունն է, իսկ օտարման գործառույթներ համակարգողը և պատասխանատու լիազոր մարմինը՝ Երևանի քաղաքապետը.

2) գույքերի նախնական ուսումնասիրումն իրականացվում է սույն որոշումն ուժի մեջ մտնելու պահից երկամսյա ժամկետում.

3) սեփականության օտարման գործընթացն սկսելու վերջնական ժամկետը 2022 թվականի մայիսի 15-ն է.

4) նախնական ուսումնասիրման ընթացքում կատարվելիք գործողություններն են՝

ա. գույքերի ներքին և արտաքին չափագրումը,

բ. գույքերի և հողատարածքների տեղազննությունը, ֆոտո և տեսաամրագրումը,

գ. ծառերի, մշակաբույսերի տեղազննությունը և հաշվառումը, դ. բարելավումների տեղազննությունը և հաշվառումը,

ե. մարդահամար և սոցիալ-տնտեսական հետազոտության անցկացումը,

զ. ազդեցության ենթարկված անձանց, նրանց ընտանիքի անդամների (անձնագիր, սոցիալական քարտ և այլն), գույքերի (սեփականության վկայական, վարձակալության պայմանագիր, գլխավոր հատակագիծ և այլն) վերաբերյալ անհրաժեշտ փաստաթղթերի տեսածրումը (սկան) և հավաքագրումը,

է. ուսումնասիրված գույքերի նկարագրության արձանագրությունների կազմումը,

ը. գույքերի ընդհանուր տարածքի սահմանների սխեման (մասշտաբ 1:2000):

5. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ն. ՓԱՇԻՆՅԱՆ
Երևան

17.02.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված ՀՀ կառավարության 2022 թվականի փետրվարի 17-ի N 181-Ն որոշման

ԳՈՒՅՔԵՐԻ ԳՏՆՎԵԼՈՒ ՎԱՅՐԸ ԵՎ ԾԱԾԿԱԳՐԵՐԸ

NN ը/կ	Վարչական շրջանը	Կադաստրային ծածկագիրը
1.	Շենգավիթ	01-011-0340-0001
2.	Շենգավիթ	01-011-0340-0009
3.	Շենգավիթ	01-011-0340-0030
4.	Շենգավիթ	01-011-0340-0026
5.	Շենգավիթ	01-011-1606-0001
6.	Շենգավիթ	01-011-1606-0002
7.	Շենգավիթ	01-011-0340-0007
8.	Շենգավիթ	01-011-1611-0001
9.	Շենգավիթ	01-011-0355-0001
10.	Շենգավիթ	01-011-0355-0052
11.	Շենգավիթ	01-011-1609-0001
12.	Շենգավիթ	01-011-0352-0031
13.	Շենգավիթ	01-011-0352-0032
14.	Շենգավիթ	01-011-0352-0033
15.	Շենգավիթ	01-011-0355-0061
16.	Շենգավիթ	01-011-0355-0062

Հայաստանի Հանրապետության վարչապետի աշխատակազմի ղեկավարի տեղակալ

Բ. Բադալյան

17.02.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Պաշտոնական հրապարակման օրը՝ 17 փետրվարի 2022 թվական: