030.1080.10.04.02

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ

Հ Ր Ա Մ Ա Ն Ա Գ Ի Ր Ը

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅԱՆ ԴՐՈՇԻ ՄԱՍԻՆ

Հայաստանի Հանրապետության ներքին գործերի մարմինների ավանդույթների զարգացման, ներքին գործերի մարմինների անձնակազմի ծառայողական պարտքի կատարման հանդեպ պատասխանատվությունն ավելի բարձրացնելու նպատակով որոշում եմ.

1. Հիմնել Հայաստանի Հանրապետության ներքին գործերի նախարարության դրոշ։

2. Հաստատել Հայաստանի Հանրապետության ներքին գործերի նախարարության դրոշի մասին կանոնադրությունը և դրոշի նկարագրությունը (կցվում են)։

3. Սույն հրամանագիրն ուժի մեջ է մտնում պաշտոնական հրապարակման պահից։

Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅԱՆ ԴՐՈՇԻ ՄԱՍԻՆ

1. Հայաստանի Հանրապետության ներքին գործերի նախարարության դրոշը պատվի և արժանապատվության, արիության և նվիրումի խորհրդանիշ է։ Դրոշը նախարարության յուրաքանչյուր աշխատակցի սրբազան պարտքի հիշեցումն է՝ Հայրենիքին անձնուրաց ծառայելու, յուրաքանչյուր մարդու կյանքը, իրավունքները, ազատություններն ու օրինական շահերը պաշտպանելու, հասարակական կարգը պահպանելու և հասարակական անվտանգությունն ապահովելու մասին։

2. Դրոշը ներքին գործերի նախարարությանը հանձնում է Հայաստանի Հանրապետության Նախագահը կամ նրա կողմից լիազորված անձը։

3. Դրոշի հետ միասին հանձնվում է նաև Հայաստանի Հանրապետության Նախագահի ստորագրությամբ վկայագիր։

4. Դրոշը մշտապես պահվում է Հայաստանի Հանրապետության ներքին գործերի նախարարությունում։

5. Դրոշի պահման, պահպանման և օգտագործման կարգը սահմանում է Հայաստանի Հանրապետության ներքին գործերի նախարարը։

6. Ներքին գործերի նախարարության անձնակազմը պարտավոր է պահպանել և պաշտպանել դրոշը։

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅԱՆ ԴՐՈՇԻ ՆԿԱՐԱԳՐՈՒԹՅՈՒՆԸ

Հայաստանի Հանրապետության ներքին գործերի նախարարության դրոշը բաղկացած է երկդեմ պաստառից և ծոպափնջերով քուղերից։

Դրոշի պաստառն ուղղանկյունաձև է, երկարությունը՝ 1450մմ, լայնությունը՝ 1150մմ։

Կարված է երկտակ մետաքսե մուգ բալագույն կտորից (կտորի գույնի համակարգչային հարաբերակցությունն է՝ M=100%, Y=20%, K=50%)՝ երեք կողմից երիզված ոսկեգույն ծոպերով։ Պաստառի երեսի կողմի վերին ձախ անկյունում պատկերված է Հայաստանի Հանրապետության պետական դրոշը՝ 500մմ երկարությամբ և 400մմ բարձրությամբ։ Պաստառի կենտրոնական մասում ոսկեգույն մետաքսաթելով ասեղնագործված են «Հայաստանի Հանրապետության ներքին գործերի նախարարություն» բառերը, տառերի բարձրությունը 7մմ է, լայնությունը՝ 5մմ։

Պաստառի հակառակ կողմի կենտրոնական մասում պատկերված է Հայաստանի Հանրապետության ներքին գործերի մարմինների մետաքսակար խորհրդանիշը՝ 450մմ բարձրությամբ և 250մմ լայնությամբ։ Խորհրդանիշի կենտրոնում Հայաստանի Հանրապետության պետական զինանշանն է, որի վերին մասում մակագրված է «ՀՀ» հապավումը, իսկ ստորին մասում՝ «ՆԳՆ» հապավումը։ Խորհրդանիշի տակ, պաստառի երկայնքով, ոսկեգույն մետաքսաթելով ասեղնագործված են «Հանուն իրավակարգի և օրինականության» բառերը, տառերի բարձրությունը 4մմ է, լայնությունը՝ 3մմ։