ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

19 մարտի 2015 թվականի N 285-Ն

ՑԱԾՐ ԼԱՐՄԱՆ ԷԼԵԿՏՐԱՍԱՐՔԱՎՈՐՈՒՄՆԵՐԻ ԱՆՎՏԱՆԳՈՒԹՅԱՆ ՏԵԽՆԻԿԱԿԱՆ ԿԱՆՈՆԱԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2005 ԹՎԱԿԱՆԻ ՓԵՏՐՎԱՐԻ 3-Ի N 150-Ն ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

Հիմք ընդունելով «Տեխնիկական կանոնակարգման մասին» Հայաստանի Հանրապետության օրենքի 8-րդ հոդվածի 1-ին մասի 3-րդ կետի «ա» ենթակետը` Հայաստանի Հանրապետության կառավարությունը որոշում է.

1. Հաստատել ցածր լարման էլեկտրասարքավորումների անվտանգության տեխնիկական կանոնակարգը՝ համաձայն հավելվածի:

2. Ուժը կորցրած ճանաչել Հայաստանի Հանրապետության կառավարության 2005 թվականի փետրվարի 3-ի «Ցածր լարման էլեկտրասարքավորումներին ներկայացվող պահանջների տեխնիկական կանոնակարգը հաստատելու մասին» N 150-Ն որոշումը:

3. Հայաստանի Հանրապետության էկոնոմիկայի նախարարին` ապահովել սույն որոշման պաշտոնական հրապարակմանը հաջորդող երկամսյա ժամկետում՝ սույն որոշման 1-ին կետով հաստատված տեխնիկական կանոնակարգի պահանջների կատարումն ապահովող և կամավոր սկզբունքով կիրառվող ազգային ստանդարտների ցանկի հրապարակումը:

4. Սույն որոշումն ուժի մեջ է մտնում 2016 թվականի հուլիսի 1-ից:

Հայաստանի Հանրապետության վարչապետ	Հ. Աբրահամյան
2015 թ. մարտի 27 Երևան

Հավելված ՀՀ կառավարության 2015 թվականի մարտի 19-ի N 285-Ն որոշման

Տ Ե Խ Ն Ի Կ Ա Կ Ա Ն  Կ Ա Ն Ո Ն Ա Կ Ա Ր Գ

ՑԱԾՐ ԼԱՐՄԱՆ ԷԼԵԿՏՐԱՍԱՐՔԱՎՈՐՈՒՄՆԵՐԻ ԱՆՎՏԱՆԳՈՒԹՅԱՆ

I. ԿԻՐԱՌՄԱՆ ՈԼՈՐՏԸ

1. Ցածր լարման էլեկտրասարքավորումների անվտանգության տեխնիկական կանոնակարգի (այսուհետ` տեխնիկական կանոնակարգ) գործողությունը տարածվում է շրջանառության դուրս բերված փոփոխական հոսանքի՝ 50-1000 Վ և հաստատուն հոսանքի՝ 75-1500 Վ էլեկտրական լարմամբ կիրառման նոր էլեկտրասարքավորումների (էլեկտրատեխնիկական կամ էլեկտրոնային սարքավորումներ, ինչպես նաև տարբեր նշանակության դրանց համակցություններ) վրա, բացառությամբ սույն տեխնիկական կանոնակարգի 3-րդ կետով սահմանված արտադրատեսակների:

2. Սույն տեխնիկական կանոնակարգով սահմանվում են ներկայացված ցածր լարման սարքավորումների անվտանգության ընդհանուր պահանջները, դրանց մակնշման և շահագործման փաստաթղթերին ներկայացվող պահանջները, անվտանգության ապահովման պայմանները, ինչպես նաև համապատասխանության գնահատման ընթացակարգերը։

3. Սույն տեխնիկական կանոնակարգը չի տարածվում հետևյալ արտադրատեսակների վրա՝

1) պայթյունավտանգ միջավայրում օգտագործման համար նախատեսված էլեկտրասարքավորումներ.

2) ռադիոլոգիական և բժշկական նշանակության սարքավորումներ.

3) վերելակների և բեռամբարձիչների համար նախատեսված էլեկտրասարքավորումներ (բացառությամբ էլեկտրական մեքենաների).

4) էլեկտրական հաշվիչներ (չափման միջոցներ).

5) կենցաղային նշանակության խրոցակային անջատիչներ և ելքային վարդակներ.

6) էլեկտրական ցանկապատերի կարգավորման սարքեր.

7) ռադիոէլեկտրական խանգարումների սարքեր.

8) նավերի, օդանավերի կամ երկաթուղու համար նախատեսված` անվտանգության դրույթներին համապատասխանող հատուկ սարքավորումներ:

4. Սույն տեխնիկական կանոնակարգով ռադիոկապի և հեռահաղորդակցության սարքավորումներին ներկայացվող պահանջները չեն ընդգրկում Հայաստանի Հանրապետության կապի միասնական համակարգի գործառնության ապահովման և ռադիոհաճախականությունների սպեկտրի օգտագործման հետ կապված պահանջները: Այդ պահանջները սահմանվում են այլ իրավական ակտերով:

5. Սույն տեխնիկական կանոնակարգի արտաքին տնտեսական գործունեության ապրանքային անվանացանկի (ԱՏԳ ԱԱ) ծածկագրերին համապատասխան էլեկտրասարքավորումները, ներկայացված սույն տեխնիկական կանոնակարգի աղյուսակում, ենթակա են համապատասխանության գնահատման:

II. ՀԱՍԿԱՑՈՒԹՅՈՒՆՆԵՐԸ

6. Սույն տեխնիկական կանոնակարգում կիրառվում են հետևյալ հասկացությունները`

1) էլեկտրասարքավորում՝ էլեկտրաէներգիայի արտադրման, կերպափոխման, հաղորդման, բաշխման, հսկման և սպառման, ինչպես նաև այլ տեսակի էներգիայի փոխակերպման համար նախատեսված մեքենաների, ապարատների, կայանքների, գծերի, սարքերի և օժանդակ սարքավորումների համախումբ, որը նախատեսված է փոփոխական հոսանքի՝ 50-1000 Վ և հաստատուն հոսանքի՝ 75-1500 Վ էլեկտրական լարման կիրառման համար.

2) բաղկացուցիչ մաս՝ էլեկտրասարքավորման անվտանգ գործառույթն ապահովելու համար նախատեսված ցանկացած անհրաժեշտ արտադրատեսակ՝ առանց ինքնագործառույթի.

3) կիրառում ըստ նշանակության՝ էլեկտրասարքավորման կիրառում՝ արտադրողի կողմից տրամադրված տեղեկատվությանը համապատասխան, որն անհրաժեշտ է դրա անվտանգ գործառույթն ապահովելու համար:

III. ՇՈՒԿԱ ՄՈՒՏՔ ԳՈՐԾԵԼՈՒ ԿԱՆՈՆՆԵՐԸ

7. Հայաստանի Հանրապետության տարածքում սույն տեխնիկական կանոնակարգի աղյուսակում տրված էլեկտրասարքավորումների շրջանառության դուրս բերումը, այդ թվում՝ իրացումն առանց համապատասխանության գնահատման` արգելվում է։

8. Արտադրողը կամ Հայաստանի Հանրապետությունում նրա լիազոր ներկայացուցիչը պետք է կիրառի անհրաժեշտ միջոցներ, որպեսզի երաշխավորի, որ շրջանառության մեջ դրվող էլեկտրասարքավորումներն անվտանգության ապահովման հարցերով արտադրված են սույն տեխնիկական կանոնակարգով սահմանված պահանջներին համապատասխան և դրանք մարդկանց ու կենդանիների կյանքի և առողջության, պետական գույքի, շրջակա միջավայրի համար վտանգի աղբյուր չեն, ինչպես նաև չեն պարունակում էլեկտրասարքավորումների նշանակության ու անվտանգության վերաբերյալ սպառողներին թյուրիմացության մեջ գցող գործոններ:

9. Սույն տեխնիկական կանոնակարգի աղյուսակում նշված էլեկտրասարքավորումները Հայաստանի Հանրապետության տարածքում` մինչև դրանց շրջանառության դուրս բերումը, այդ թվում՝ իրացումը, պետք է դրոշմված լինեն Հայաստանի Հանրապետության կառավարության 2013 թվականի մարտի 14-ի N 337-Ն որոշմամբ հաստատված համապատասխանության ազգային «ՀՏԿ» նշանով, որը հավաստում է էլեկտրասարքավորման համապատասխանությունը սույն տեխնիկական կանոնակարգի պահանջներին՝ ներառյալ սույն տեխնիկական կանոնակարգի VII գլխում նկարագրված համապատասխանության գնահատման ընթացակարգին:

10. Էլեկտրասարքավորումները պետք է ուղեկցվեն համապատասխանության հայտարարագրով և համապատասխանության գնահատման ազգային նշանով:

IV. ԷԼԵԿՏՐԱՍԱՐՔԱՎՈՐՈՒՄՆԵՐԻ ԱՆՎՏԱՆԳՈՒԹՅԱՆ ՊԱՀԱՆՋՆԵՐԻ ՀԻՄՆԱԿԱՆ ՏԱՐՐԵՐԸ

11. Սույն տեխնիկական կանոնակարգի 1-ին կետով նախատեսված էլեկտրասարքավորումներն ըստ նշանակության արտադրելու, կիրառելու, մոնտաժելու, շահագործելու, պահելու, փոխադրելու և տեխնիկական սպասարկման ժամանակ պետք է ապահովեն՝

1) էլեկտրական հոսանքի ուղղակի կամ անուղղակի ազդեցությունից պաշտպանության անհրաժեշտ մակարդակ.

2) ջերմաստիճանի բարձրացման, աղեղային պարպման կամ ճառագայթման ազդեցությունից, որոնք կարող են բերել վտանգի առաջացման, անթույլատրելի ռիսկի բացառում.

3) էլեկտրասարքավորումների պտտվող և անշարժ մասերի վնասվածքներից պաշտպանության անհրաժեշտ մակարդակ.

4) էլեկտրասարքավորումների օգտագործման ժամանակ առաջացած վտանգներից, այդ թվում՝ ոչ էլեկտրական, ֆիզիկական, քիմիական կամ կենսաբանական գործոններից, պաշտպանության անհրաժեշտ մակարդակ.

5) մեկուսացման պաշտպանության անհրաժեշտ մակարդակ.

6) մեխանիկական և փոխարկման մաշվածքակայունության անհրաժեշտ մակարդակ.

7) արտաքին գործոնների ներգործությունների նկատմամբ, այդ թվում՝ ոչ մեխանիկական բնույթի, արտաքին միջավայրին համապատասխան կլիմայական պայմանների դեպքում կայունության անհրաժեշտ մակարդակ.

8) գերբեռնվածության, վթարային ռեժիմների և խափանման ժամանակ առաջացած արտաքին և ներքին գործոնների ներգործության ազդեցության անթույլատրելի ռիսկի բացառում.

9) անջատման և (կամ) մոնտաժման ժամանակ անթույլատրելի ռիսկի բացառում:

12. Սույն տեխնիկական կանոնակարգի 1-ին կետով նախատեսված էլեկտրասարքավորումների հիմնական բնութագրերը, որոնց ճանաչումը և պահպանումն ապահովում են էլեկտրական սարքավորումների անվտանգ և նպատակային օգտագործումը, պետք է մակնշված լինեն համապատասխան սարքավորման վրա կամ, եթե դա հնարավոր չէ, ապա սարքավորումն ուղեկցող փաստաթղթերում:

13. Էլեկտրասարքավորման ֆիրմային անվանումը կամ ապրանքային նշանը պետք է հստակ արտատպված լինի էլեկտրասարքավորման վրա, իսկ եթե դա հնարավոր չէ, ապա` փաթեթավորման վրա:

14. Էլեկտրասարքավորումն իր բաղկացուցիչ մասերի հետ պետք է պատրաստվի այնպես, որ հնարավոր լինի ապահովել դրանց անվտանգ և պատշաճ մոնտաժումն ու միացումը:

15. Էլեկտրասարքավորումը պետք է նախագծվի և արտադրվի այնպես, որ ապահովվի պաշտպանությունը սույն տեխնիկական կանոնակարգի 11-րդ և 17-րդ կետերում նկարագրված վտանգներից՝ ապահովելով սարքավորման նպատակային օգտագործումը և համապատասխան պահպանումը:

16. Էլեկտրասարքավորումները պետք է նախագծված և արտադրված լինեն այնպես, որ դրանք աշխատանքային նորմալ և վթարային պայմաններում հրդեհի առաջացման աղբյուր չհանդիսանան:

17. Էլեկտրասարքավորումը պետք է նախագծված և արտադրված լինի այնպես, որպեսզի՝

1) հնարավոր լինի ապահովել մարդկանց և տնային կենդանիների պատշաճ պաշտպանությունը ֆիզիկական կամ այլ վնասվածքներից, որոնք կարող են ի հայտ գալ այդ սարքավորումների հետ ուղղակի և անուղղակի շփումից.

2) չառաջանան վտանգ ներկայացնող ջերմաստիճաններ, աղեղներ և ճառագայթներ.

3) հնարավոր լինի ապահովել մարդկանց, տնային կենդանիների և գույքի պաշտպանությունն էլեկտրական սարքավորումներից առաջացող ոչ էլեկտրական բնույթի վտանգից, որը բացահայտվում է սարքի շահագործման ժամանակ.

4) հնարավոր լինի կանխատեսելի պայմաններում պատշաճ կերպով ապահովել մեկուսացումը:

V. ԷԼԵԿՏՐԱՍԱՐՔԱՎՈՐՈՒՄՆԵՐԻ ՄԱԿՆՇՄԱՆԸ ԵՎ ՇԱՀԱԳՈՐԾՄԱՆ ՓԱՍՏԱԹՂԹԵՐԻՆ ՆԵՐԿԱՅԱՑՎՈՂ ՊԱՀԱՆՋՆԵՐԸ

18. Էլեկտրասարքավորման անվանումը և (կամ) նշագիրը (տիպը, մակնիշը, մոդելը), անվտանգության վրա ազդող դրա հիմնական պարամետրերը և բնութագրերը, արտադրողի անվանումը և (կամ) նրա ապրանքային նշանը, երկրի անվանումը, որտեղ արտադրվել է էլեկտրասարքավորումը պետք է նշված լինեն էլեկտրասարքավորման վրա և դրան կցվող շահագործման փաստաթղթերում: Այդ դեպքում արտադրողի անվանումը և (կամ) նրա ապրանքային նշանը, էլեկտրասարքավորման անվանումը և (կամ) նշագիրը (տիպը, մակնիշը, մոդելը) պետք է նշված լինեն նաև փաթեթավորման վրա:

19. Եթե սույն տեխնիկական կանոնակարգի 18-րդ կետի տվյալները հնարավոր չէ նշել էլեկտրասարքավորման վրա, ապա դրանք կարող են ներկայացվել միայն դրանց կցվող տվյալ սարքավորման շահագործման փաստաթղթերում: Այդ դեպքում արտադրողի անվանումը և (կամ) դրա ապրանքային նշանը, էլեկտրասարքավորման անվանումը և (կամ) նշագիրը (տիպը, մակնիշը, մոդելը) պետք է նշված լինեն նաև փաթեթավորման վրա:

20. Էլեկտրասարքավորումների վրա մակնշվածքը պետք է լինի ընթեռնելի, չջնջվող (երկարաժամկետ) և զետեղված լինի օգտագործողի համար մատչելի տեղում:

21. Էլեկտրասարքավորումների շահագործման փաստաթղթերում տրվող տեղեկատվությունը պետք է լինի միանշանակ, ստույգ և ամբողջական ու պարունակի հետևյալ տվյալները`

1) սույն տեխնիկական կանոնակարգի 18-րդ կետում թվարկված տեղեկատվությունը.

2) էլեկտրասարքավորման հիմնական (կամ գործառնական) նշանակությունը կամ կիրառման ոլորտը.

3) բնութագրերը և պարամետրերը.

4) անվտանգ և արդյունավետ տեղադրման, շահագործման, փոխադրման, պահման, նորոգման, օգտահանման (ոչնչացման) կանոնները և պայմանները (անհրաժեշտության դեպքում).

5) էլեկտրասարքավորման անսարքության հայտնաբերման դեպքում անհրաժեշտ միջոցների կիրառման մասին տեղեկատվությունը.

6) արտադրողի, մատակարարի անվանումը, գտնվելու վայրը, դրանց հետ կապի համար տեղեկատվությունը.

7) էլեկտրասարքավորման արտադրման ամիսն ու տարին և (կամ) արտադրման տարվա նշման տեղի և որոշման միջոցի մասին տեղեկատվությունը:

22. Հայաստանի Հանրապետությունում արտադրվող կամ Հայաստանի Հանրապետություն ներմուծվող էլեկտրասարքավորումների մակնշումը և կցվող փաստաթղթերը պետք է ձևակերպված լինեն հայերենով:

VI. ԱՆՎՏԱՆԳՈՒԹՅԱՆ ՊԱՀԱՆՋՆԵՐԻ ՀԱՄԱՊԱՏԱՍԽԱՆՈՒԹՅԱՆ ԱՊԱՀՈՎՈՒՄԸ

23. Սույն տեխնիկական կանոնակարգին էլեկտրասարքավորումների համապատասխանությունն ապահովվում է անվտանգության պահանջների անմիջական կատարմամբ:

24. Էլեկտրասարքավորումների փորձարկման մեթոդները և չափումները սահմանվում են ստանդարտներով, որոնք ներառված են տեխնիկական կանոնակարգի պահանջների կատարումն ապահովող` կամավոր սկզբունքով կիրառվող և օրենսդրությամբ սահմանված կարգով հրապարակված ստանդարտների անվանացանկում:

VII. ՀԱՄԱՊԱՏԱՍԽԱՆՈՒԹՅԱՆ ԳՆԱՀԱՏՈՒՄԸ

25. Սույն տեխնիկական կանոնակարգի պահանջներին էլեկտրասարքավորումների համապատասխանությունը հավաստելու համար արտադրողը կամ Հայաստանի Հանրապետությունում նրա լիազոր ներկայացուցիչը պետք է ունենա Հայաստանի Հանրապետության կառավարության 2014 թվականի հունվարի 16-ի N 56-Ն որոշմամբ սահմանված Ա ընթացակարգով հավաստված համապատասխանության հայտարարագիր:

26. Արտադրանքի ներքին հսկողությունը համապատասխանության գնահատման ընթացակարգ է, որի միջոցով արտադրողն իրականացնում է սույն տեխնիկական կանոնակարգի 27-րդ կետով սահմանված պարտականությունները և միայն իր պատասխանատվության ներքո երաշխավորում ու հայտարարում է, որ էլեկտրասարքավորումը բավարարում է դրա նկատմամբ կիրառվող սույն տեխնիկական կանոնակարգի պահանջներին:

27. Արտադրողը պետք է մշակի սույն տեխնիկական կանոնակարգի 28-րդ կետով նախատեսված տեխնիկական փաստաթղթերը և ինքը կամ Հայաստանի Հանրապետությունում իր լիազոր ներկայացուցիչը վերջին էլեկտրասարքավորման արտադրությունից հետո առնվազն 10 տարի պետք է պահպանի այդ փաստաթղթերը՝ պետական կառավարման մարմինների կողմից վերահսկողություն իրականացնելու նպատակով:

28. Տեխնիկական փաստաթղթերը՝

1) սահմանում և հնարավորության դեպքում նաև ներառում են արտադրանքի նախագծման, արտադրության և շահագործման վերաբերյալ անհրաժեշտ պահանջներ.

2) իրենց կիրառելիության սահմաններում ներառում են առնվազն հետևյալ բաղադրիչները՝

ա. արտադրանքի ընդհանուր նկարագրությունը,

բ. նախագծման և արտադրության գծագրերը, ենթահանգույցների, բաղադրիչների և շղթաների ընթացակարգերը,

գ. արտադրանքի շահագործումը (օգտագործումը), նշված գծագրերը և ընթացակարգերն ընկալելու համար անհրաժեշտ նկարագրությունները և բացատրությունները,

դ. ամբողջությամբ կամ մասնակի կիրառված փոխկապակցված ստանդարտների և (կամ) անհրաժեշտ տեխնիկական մասնագրերի ցանկը, որոնց հղումները հրապարակվել են Ստանդարտացման ազգային մարմնի կողմից: Փոխկապակցված ստանդարտների մասնակի կիրառման դեպքում տեխնիկական փաստաթղթերը պետք է ներառեն այն հատվածները, որոնք տարածվել (կիրառվել) են այդ արտադրանքի վրա (համար),

ե. եթե փոխկապակցված ստանդարտները չեն կիրառվել, ապա ներկայացվում է այն լուծումների նկարագրությունը, որոնց միջոցով ապահովվում է տեխնիկական կանոնակարգի պահանջների բավարարումը,

զ. նախագծի հաշվարկների արդյունքները, տեղեկատվություն` իրականացված փորձաքննությունների վերաբերյալ,

է. իրականացված փորձարկումների արձանագրությունը:

29. Արտադրողը կամ Հայաստանի Հանրապետությունում նրա լիազոր ներկայացուցիչը տեխնիկական փաստաթղթերի հետ համատեղ պետք է պահպանի նաև համապատասխանության հայտարարագրի օրինակը:

30. Արտադրողը պետք է ձեռնարկի այն բոլոր անհրաժեշտ միջոցները, որպեսզի ապահովի արտադրվող էլեկտրասարքավորման համապատասխանությունը սույն տեխնիկական կանոնակարգով նախատեսված տեխնիկական փաստաթղթերին և սահմանված պահանջներին:

31. Արտադրողը կամ Հայաստանի Հանրապետությունում նրա լիազոր ներկայացուցիչը յուրաքանչյուր էլեկտրասարքավորում մակնշում է համապատասխանության ազգային նշանով և կազմում է համապատասխանության գրավոր հայտարարագիր:

32. Համապատասխանության ազգային նշանի մակնշումը պետք է իրականացվի Հայաստանի Հանրապետության կառավարության 2013 թվականի մարտի 14-ի N 337-Ն որոշմամբ սահմանված կարգով:

33. Համապատասխանության հայտարարագիրը պետք է ընդգրկի հետևյալ տվյալները՝

1) էլեկտրասարքավորման նկարագրությունը (անվանումը, մոդելի տեսակը կամ համարը, ցանկացած հավելյալ տեղեկություն, օրինակ՝ խմբաքանակը կամ սերիական համարը, բաղադրիչ մասերի անվանումները).

2) տեխնիկական կանոնակարգերի պահանջներին համապատասխանության վերաբերյալ հայտարարություն, որին պետք է համապատասխանի արտադրանքը՝ ներառյալ հղումներ փոխկապակցված ազգային ստանդարտներին.

3) անհրաժեշտության դեպքում հղում այն մասնագրերին, որոնց պահանջներին հայտարարվում է համապատասխանությունը.

4) լրացուցիչ տեղեկատվություն (արտադրանքի տեսակը կամ դասը)՝ համաձայն տեխնիկական կանոնակարգի.

5) հայտարարագրի ձևակերպման ամսաթիվը, արտադրողի կամ լիազորված ներկայացուցչի անվանումը, հասցեն և ստորագրությունը.

6) համապատասխանության գնահատման ընթացակարգ իրականացրած համապատասխանության գնահատման նշանակված մարմնի անվանումը, գտնվելու վայրը և (անհրաժեշտության դեպքում) նշանակված մարմինների գրանցամատյանում արձանագրված նույնականացման կոդը, վստահված անձի անունը, ազգանունը և զբաղեցրած պաշտոնը, ով ունի արտադրողի կամ նրա լիազոր ներկայացուցչի պարտավորություններն ստանձնելու իրավասություն:

VIII. ՉԱՓՈՒՄՆԵՐԻ ՄԻԱՍՆԱԿԱՆՈՒԹՅԱՆ ԱՊԱՀՈՎՈՒՄԸ

34. Էլեկտրասարքավորումների չափումների միասնականության ապահովումը պետք է իրականացվի «Չափումների միասնականության ապահովման մասին» Հայաստանի Հանրապետության օրենքով սահմանված կարգով:

IX. ՊԵՏԱԿԱՆ ՎԵՐԱՀՍԿՈՂՈՒԹՅՈՒՆԸ

35. Սույն տեխնիկական կանոնակարգի պահանջներին էլեկտրասարքավորումների համապատասխանության նկատմամբ պետական վերահսկողությունն իրականացվում է «Համապատասխանության գնահատման մասին» Հայաստանի Հանրապետության օրենքով սահմանված կարգով:

Հայաստանի Հանրապետության կառավարության աշխատակազմի ղեկավար-նախարար

Դ. Հարությունյան

Ա Ղ Յ Ո Ւ Ս Ա Կ

ԱՐՏԱՔԻՆ ՏՆՏԵՍԱԿԱՆ ԳՈՐԾՈՒՆԵՈՒԹՅԱՆ ԱՊՐԱՆՔԱՅԻՆ ԱՆՎԱՆԱՑԱՆԿԻ (ԱՏԳ ԱԱ) ԾԱԾԿԱԳՐԵՐԻՆ ՀԱՄԱՊԱՏԱՍԽԱՆ ԷԼԵԿՏՐԱՍԱՐՔԱՎՈՐՈՒՄՆԵՐԻ ԱՆՎԱՆԱՑԱՆԿԻ