ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

6 սեպտեմբերի 2012 թվականի N 1147-Ն

ԸՆԴԵՐՔՕԳՏԱԳՈՐԾՄԱՆ ԻՐԱՎՈՒՆՔՆԵՐԻ ՀԱՇՎԱՌՄԱՆ ԿԵՆՏՐՈՆԱՑՎԱԾ ՄԱՏՅԱՆԻՑ ՏԵՂԵԿԱՏՎՈՒԹՅԱՆ ՏՐԱՄԱԴՐՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Հիմք ընդունելով Ընդերքի մասին Հայաստանի Հանրապետության օրենսգրքի 15-րդ հոդվածի 2-րդ մասի 4-րդ կետը և 31-րդ հոդվածը` Հայաստանի Հանրապետության կառավարությունը որոշում է.

1. Հաստատել ընդերքօգտագործման իրավունքների հաշվառման կենտրոնացված մատյանից տեղեկատվության տրամադրման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Տ. Սարգսյան
2012 թ. սեպտեմբերի 14 Երևան

Հավելված ՀՀ կառավարության 2012 թվականի սեպտեմբերի 6-ի N 1147-Ն որոշման

Կ Ա Ր Գ

ԸՆԴԵՐՔՕԳՏԱԳՈՐԾՄԱՆ ԻՐԱՎՈՒՆՔՆԵՐԻ ՀԱՇՎԱՌՄԱՆ ԿԵՆՏՐՈՆԱՑՎԱԾ ՄԱՏՅԱՆԻՑ ՏԵՂԵԿԱՏՎՈՒԹՅԱՆ ՏՐԱՄԱԴՐՄԱՆ

1. Սույն կարգով կարգավորվում են ընդերքօգտագործման իրավունքների հաշվառման կենտրոնացված մատյանից (այսուհետ` գրանցամատյան) տեղեկատվության տրամադրման գործընթացի հետ կապված հարաբերությունները:

2. Գրանցամատյանի օրինակելի ձևերը հաստատվում են Հայաստանի Հանրապետության էներգետիկայի և բնական պաշարների նախարարի հրամանով:

3. Գրանցամատյանը կազմված է երկու միասնական մատյանից`

1) երկրաբանական ուսումնասիրությունների իրավունքի հաշվառման գրանցամատյան.

2) հանքարդյունահանման իրավունքի հաշվառման գրանցամատյան:

4. Գրանցամատյանից տեղեկատվությունը տրամադրում է Հայաստանի Հանրապետության էներգետիկայի և բնական պաշարների նախարարությունը (այսուհետ` լիազոր մարմին):

5. Գրանցամատյանում առկա տեղեկատվությունից կարող է օգտվել յուրաքանչյուր անձ` գրավոր դիմելով լիազոր մարմին:

6. Դիմումում պետք է նշվի մատյանում հաշվառված ընդերքօգտագործման իրավունքին առնչվող, ինչպես նաև իրավունքի փոփոխության, փոխանցման, գրավի, զգուշացման և դադարեցման մասին պահանջվող տեղեկատվությունը:

7. Լիազոր մարմնի անունից համապատասխան գործակալությունը գրանցամատյանից տեղեկատվությունը տրամադրում է մեկօրյա ժամկետում:

Հայաստանի Հանրապետության կառավարության աշխատակազմի ղեկավար

Դ. Սարգսյան