ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

5 ապրիլի 2012 թվականի N 439-Ա

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2012 ԹՎԱԿԱՆԻ ՄԱՐՏԻ 1-Ի N 223-Ա ՈՐՈՇՄԱՄԲ ԲԱՑՎԱԾ ԱՐՏԱԲՅՈՒՋԵՏԱՅԻՆ ԲԱՆԿԱՅԻՆ ՀԱՇՎԻՑ ԳՈՒՄԱՐ ՓՈԽԱՆՑԵԼՈՒ ՄԱՍԻՆ

Հայաստանի Հանրապետության կառավարության 1999 թվականի հունիսի 10-ի N 404 որոշմանը համապատասխան, ինչպես նաև հիմք ընդունելով Հայաստանի Հանրապետության կառավարության 2012 թվականի մարտի 1-ի N 223-Ա որոշման 3-րդ կետը` Հայաստանի Հանրապետության կառավարությունը որոշում է.

1. Երևան քաղաքում կառուցապատման ծրագրերի իրականացման համար 2004 և 2005 թվականներին կնքված պայմանագրերի հիման վրա առանձին կառուցապատողների շենքերի կառուցման համար վերգետնյա վճարի գծով Հայաստանի Հանրապետության անունից ֆինանսների նախարարության կողմից արտաբյուջետային բանկային հաշվին հավաքվող գումարների հաշվին կատարել հետևյալ վճարումները`

1) Մարդու իրավունքների եվրոպական դատարանի կողմից 2011 թվականի նոյեմբերի 15-ին «Հովհաննիսյանը և Շիրոյանն ընդդեմ Հայաստանի» N 5065/06 գանգատով կայացված վճռի, ինչպես նաև «Երանոսյանն ընդդեմ Հայաստանի» N 3309/06, «Պողոսյանը և այլոք ընդդեմ Հայաստանի» N 3310/06 և «Եդիգարյանն ընդդեմ Հայաստանի» N 10446/05 գանգատներով կայացված որոշումների պահանջները կատարելու նպատակով` համաձայն հավելվածի.

2) 2012 թվականի երկրորդ եռամսյակում Հայաստանի Հանրապետության կառավարությանն առընթեր Հայաստանի Հանրապետության ոստիկանության պետական պահպանության գլխավոր վարչության N 3 ռազմականացված ջոկատին վճարել 3,536,820 դրամ (ամսական 1,178,940 դրամ)` Արամի 72-80 հասցեներում գտնվող անավարտ շենքի պահպանության համար:

Հայաստանի Հանրապետության վարչապետ	Տ. Սարգսյան
2012 թ. ապրիլի 14 Երևան

Հավելված ՀՀ կառավարության 2012 թվականի ապրիլի 5-ի N 439-Ա որոշման

Հայաստանի Հանրապետության ԿԱՌԱՎԱՐՈՒԹՅԱՆ 2012 թվականի մարտի 1-ի N 223-Ա որոշմամբ բացված արտաբՅուջետային հաշվից կատարվող վճարումներԸ

Մարդու իրավունքների եվրոպական դատարանի որոշում (վճիռ)	Նպատակը	Գումարը (համարժեք դրամ)
1. «Պողոսյանը և ուրիշներն ընդդեմ Հայաստանի» որոշում	որպես նյութական և ոչ նյութական վնասի, ինչպես նաև դատական ծախսերի փոխհատուցում	45000 եվրո
2. «Երանոսյանն ընդդեմ Հայաստանի» որոշում	որպես նյութական և ոչ նյութական վնասի, ինչպես նաև դատական ծախսերի փոխհատուցում	120000 ԱՄՆ-ի դոլար (հանած 10,327,606 դրամ)
3. «Եդիգարյանն ընդդեմ Հայաստանի» որոշում	որպես նյութական և ոչ նյութական վնասի, ինչպես նաև դատական ծախսերի փոխհատուցում	29520000 դրամ (հանած 12870 ԱՄՆ-ի դոլարին համարժեք դրամ)
4. «Հովհաննիսյանը և Շիրոյանն ընդդեմ Հայաստանի» վճիռ	որպես նյութական և ոչ նյութական վնասի, ինչպես նաև դատական ծախսերի փոխհատուցում	18545 եվրո, որից՝ 12500 եվրո` որպես նյութական վնասի փոխհատուցում, 6000 եվրո` որպես ոչ նյութական վնասի փոխհատուցում, 45 եվրո` որպես դատական ծախսերի փոխհատուցում

  

Հայաստանի Հանրապետության կառավարության աշխատակազմի ղեկավար

Դ. Սարգսյան