ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Հայաստանի Հանրապետության վճռաբեկ դատարանի քաղաքացիական և վարչական պալատը (այսուհետ՝ Վճռաբեկ դատարան)

2011 թվականի հոկտեմբերի 14-ին

դռնբաց դատական նիստում, քննելով Արտակ Սարգսյանի խնամակալ Էմմա Այունցի վճռաբեկ բողոքը ՀՀ վերաքննիչ քաղաքացիական դատարանի 02.02.2011 թվականի որոշման դեմ՝ ըստ հայցի Հերմինե Սարգսյանի ընդդեմ Արտակ Սարգսյանի` ընդհանուր սեփականության ներքո գտնվող գույքից բաժինն առանձնացնելու կամ փոխհատուցում տրամադրելու միջոցով Արտակ Սարգսյանի սեփականության իրավունքը դադարեցնելու, իսկ դրանց ակնհայտ աննպատակահարմարության դեպքում գույքը հրապարակային սակարկություններով վաճառելու և ստացված գումարը համասեփականատերերի միջև բաժիններին համաչափ բաշխելու պահանջների մասին, ինչպես նաև Արտակ Սարգսյանի խնամակալ Էմմա Այունցի հակընդդեմ հայցի` փոխհատուցում տրամադրելու միջոցով Հերմինե Սարգսյանի սեփականության իրավունքը դադարեցնելու պահանջի մասին,

ՊԱՐԶԵՑ

1. Գործի դատավարական նախապատմությունը

Դիմելով դատարան՝ Հերմինե Սարգսյանը պահանջել է Երևանի Մալաթիա փողոցի թիվ 94/5 հասցեում գտնվող տանից առանձնացնել իր 1/2-րդ բաժինը կամ 5.064.000 ՀՀ դրամ փոխհատուցում տրամադրելու միջոցով դադարեցնել Արտակ Սարգսյանի սեփականության իրավունքը, իսկ դրանց ակնհայտ աննպատակահարմարության դեպքում վաճառել գույքը հրապարակային սակարկություններով և ստացված գումարը բաշխել համասեփականատերերի միջև` բաժիններին համաչափ:

Հակընդդեմ հայցով դիմելով դատարան՝ Արտակ Սարգսյանի խնամակալ Էմմա Այունցը պահանջել է 5.064.000 ՀՀ դրամ փոխհատուցում տրամադրելու միջոցով դադարեցնել Հերմինե Սարգսյանի սեփականության իրավունքը Երևանի Մալաթիա փողոցի թիվ 94/5 հասցեում գտնվող տան 1/2-րդ բաժնի նկատմամբ:

Երևանի Մալաթիա-Սեբաստիա վարչական շրջանի ընդհանուր իրավասության դատարանի (դատավոր` Կ. Ֆարխոյան) (այսուհետ` Դատարան) 08.11.2010 թվականի վճռով հայցը բավարարվել է մասնակիորեն, իսկ հակընդդեմ հայցը` մերժվել: Վճռվել է Երևանի Մալաթիա փողոցի թիվ 94/5 հասցեում գտնվող անշարժ գույքը վաճառել հրապարակային սակարկություններով և ստացված գումարը հետագայում բաշխել սեփականության մասնակիցների միջև` նրանց բաժիններին համաչափ:

ՀՀ վերաքննիչ քաղաքացիական դատարանի (այսուհետ` Վերաքննիչ դատարան) 02.02.2011 թվականի որոշմամբ Արտակ Սարգսյանի խնամակալ Էմմա Այունցի վերաքննիչ բողոքը մերժվել է, և Դատարանի 08.11.2010 թվականի վճիռը թողնվել է օրինական ուժի մեջ:

Սույն գործով վճռաբեկ բողոք է ներկայացրել Արտակ Սարգսյանի խնամակալ Էմմա Այունցը:

Վճռաբեկ բողոքի պատասխան չի ներկայացվել:

 Կողմերը Վճռաբեկ դատարան են ներկայացրել 18.08.2011 թվականի հաշտության համաձայնությունը:

2. Վճռաբեկ դատարանի պատճառաբանությունները և եզրահանգումը

 ՀՀ քաղաքացիական դատավարության օրենսգրքի 33-րդ հոդվածի համաձայն՝ կողմերը դատավարության ցանկացած փուլում կարող են գործն ավարտել հաշտության համաձայնությամբ:

 Կողմերի միջև կայացված հաշտության համաձայնությունը ձևակերպվում է գրավոր:

 ՀՀ քաղաքացիական դատավարության օրենսգրքի 109-րդ հոդվածի 7-րդ կետի համաձայն՝ դատարանը կարճում է գործի վարույթը, եթե դատարանը հաստատել է կնքված հաշտության համաձայնությունը:

 Ուսումնասիրելով կողմերի 18.08.2011 թվականի հաշտության համաձայնությունը` Վճռաբեկ դատարանը գտնում է, որ այն չի հակասում օրենքին և այլ իրավական ակտերին, չի խախտում այլ անձանց իրավունքներն ու օրինական շահերը:

 Այսպիսով, Վճռաբեկ դատարանը գտնում է, որ կողմերի ներկայացրած հաշտության համաձայնությունը պետք է հաստատել:

 Ելնելով վերոգրյալից և ղեկավարվելով ՀՀ քաղաքացիական դատավարության օրենսգրքի 33-րդ, 240-241²-րդ հոդվածներով` Վճռաբեկ դատարանը

 ՈՐՈՇԵՑ

 1. Հաստատել կողմերի միջև կնքված 18.08.2011 թվականի հաշտության համաձայնությունը հետևյալ բովանդակությամբ.

 «Հաշտության համաձայնություն

18.08.2011թ.

ք. Երևան

 Մենք` Երևան քաղաքի Մալաթիա-Սեբաստիա վարչական շրջանների ընդհանուր իրավասության դատարանի վարույթում քննված թիվ ԵՄԴ/0251/02/10 քաղաքացիական գործով կողմերս, հայցվոր և հակընդդեմ հայցով պատասխանող Հերմինե Սարգսյանը և պատասխանող և հակընդդեմ հայցով հայցվոր Արտակ Սարգսյանի օրինական ներկայացուցիչ Էմմա Այունցը եկել ենք հետևյալ հաշտության համաձայնության.

1. Ես` Հերմինե Սարգսյանս, հրաժարվում եմ իմ հայցապահանջից, այն է` իմ և պատասխանող Արտակ Սարգսյանի համատեղ սեփականությունը հանդիսացող, Երևան քաղաքի Մալաթիա 94/5 տունը հրապարակային սակարկություններով վաճառելու վերաբերյալ: Եվ համաձայն եմ, որպեսզի կողմերս ապրենք մեր համասեփականությունը հանդիսացող բնակարանում:

 2. Ես` պատասխանող և հակընդդեմ հայցով հայցվոր Արտակ Սարգսյանի օրինական ներկայացուցիչ Էմմա Այունցս, հրաժարվում եմ հակընդդեմ հայցից և համաձայն ենք շարունակել մեկ հարկի տակ բնակվել Հերմինե Սարգսյանի և երեխաների հետ:

Կողմերս վերը նշված հաշտության համաձայնությունը կնքել ենք կամավոր, մեզ պարզաբանվել են դրա հետևանքները: Այն չի հակասում օրենքին և այլ իրավական ակտերին կամ խախտում այլ անձանց իրավունքները և օրինական շահերը:

Խնդրում ենք ՀՀ վճռաբեկ դատարանին ՀՀ քաղաքացիական դատավարության օրենսգրքի 33 և 133 հհ համաձայն հաստատել կողմերիս միջև կնքված հաշտության համաձայնությունը:

Հայցվոր-պատասխանող`	( ստորագրություն)	Հերմինե Սարգսյան
Պատասխանող-հայցվոր`	(ստորագրություն)	Արտակ Սարգսյանի
		օ/ն Էմմա Այունց»:

 

2. ՀՀ վերաքննիչ քաղաքացիական դատարանի 02.02.2011 թվականի որոշումը բեկանել և քաղաքացիական գործի վարույթը կարճել:

 3. Որոշումն օրինական ուժի մեջ է մտնում հրապարակման պահից, վերջնական է և ենթակա չէ բողոքարկման:

Նախագահող`		Ե. Խունդկարյան
Դատավորներ`		Է. Հայրիյան
		Վ. Աբելյան
		Ս. Անտոնյան
		Վ. ԱՎԱՆԵՍՅԱՆ
		Ա. Բարսեղյան
		Մ. Դրմեյան
		Գ. Հակոբյան
		Տ. Պետրոսյան
		Ե. Սողոմոնյան