«Գրանցված է»

ՀՀ արդարադատության

նախարարության կողմից

18 հունվարի 2012 թ.

Պետական գրանցման թիվ 10012019

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ   ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐ         22 դեկտեմբերի 2011 թ. N 250-Ն ք. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ   ԱՌՈՂՋԱՊԱՀՈՒԹՅԱՆ ՆԱԽԱՐԱՐ       15 դեկտեմբերի 2011 թ. N 28-Ն ք. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ   ԿԱՌԱՎԱՐՈՒԹՅԱՆՆ ԱՌԸՆԹԵՐ ՄԻՋՈՒԿԱՅԻՆ ԱՆՎՏԱՆԳՈՒԹՅԱՆ ԿԱՐԳԱՎՈՐՄԱՆ ՊԵՏԱԿԱՆ ԿՈՄԻՏԵԻ ՆԱԽԱԳԱՀ   27 դեկտեմբերի 2011 թ. N 325-Ն ք. Երևան

Հ Ա Մ Ա Տ Ե Ղ  Հ Ր Ա  Մ Ա Ն

ՎԱՐԱԿԻՉ ՀԻՎԱՆԴՈՒԹՅՈՒՆՆԵՐԻ, ՔԻՄԻԱԿԱՆ ԵՎ ՃԱՌԱԳԱՅԹԱՅԻՆ ՎՏԱՆԳՆԵՐԻ ԴԻՄԱԿԱՅՄԱՆ ՎԵՐԱԲԵՐՅԱԼ ՊԱՏՐԱՍՏՎԱԾՈՒԹՅԱՆ ԿՐԹԱԿԱՆ ԾՐԱԳԻՐԸ ԵՎ ԾՐԱԳՐՈՒՄ ՆԵՐԱՌՎԱԾ ԴԱՍԸՆԹԱՑԻ ԺԱՄԱՆԱԿԱՑՈՒՅՑԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2009 թվականի հոկտեմբերի 22-ի «Միջազգային առողջապահական (բժշկասանիտարական) կանոնների ներդրման ռազմավարությանը և միջազգային առողջապահական (բժշկասանիտարական) կանոնների ներդրման միջոցառումների ծրագրին հավանություն տալու մասին» N 44 արձանագրային որոշման Հավելված 2-ով հաստատված Հայաստանի Հանրապետությունում Միջազգային առողջապահական (բժշկասանիտարական) կանոնների ներդրման ռազմավարությանը և միջազգային առողջապահական (բժշկասանիտարական) ներդրման միջոցառումների ծրագրի «Ռազմավարական ուղղություն 2» բաժնի ռազմավարություն 6-ի 2-րդ կետի պահանջները`

Հրամայում եմ`

1. Հաստատել`

1) «Վարակիչ հիվանդությունների, քիմիական և ճառագայթային վտանգների դիմակայման վերաբերյալ պատրաստվածության կրթական ծրագիրը»` համաձայն Հավելված 1-ի:

2) «Վարակիչ հիվանդությունների, քիմիական և ճառագայթային վտանգների դիմակայման վերաբերյալ պատրաստվածության դասընթացի ժամանակացույցը»` համաձայն Հավելված 2-ի:

ՀՀ գյուղատնտեսության նախարար

ՀՀ առողջապահության նախարար

ՀՀ կառավարությանն առընթեր միջուկային անվտանգության կարգավորման պետական կոմիտեի նախագահ

Հավելված 1   Հաստատված է ՀՀ առողջապահության նախարարի 2011 թ. դեկտեմբերի 15-ի թիվ 28-Ն   ՀՀ գյուղատնտեսության նախարարի 2011 թ. դեկտեմբերի 22-ի թիվ 250-Ն   ՀՀ կառավարությանն առընթեր միջուկային անվտանգության կարգավորման պետական կոմիտեի նախագահի 2011 թ. դեկտեմբերի 27-ի թիվ 325-Ն   համատեղ հրամանով

ՎԱՐԱԿԻՉ ՀԻՎԱՆԴՈՒԹՅՈՒՆՆԵՐԻ, ՔԻՄԻԱԿԱՆ ԵՎ ՃԱՌԱԳԱՅԹԱՅԻՆ ՎՏԱՆԳՆԵՐԻ ԴԻՄԱԿԱՅՄԱՆ ՎԵՐԱԲԵՐՅԱԼ ՊԱՏՐԱՍՏՎԱԾՈՒԹՅԱՆ ԿՐԹԱԿԱՆ ԾՐԱԳԻՐ

I. ԴԱՍԸՆԹԱՑԻ ԱՆՑԿԱՑՄԱՆ ՏԵՍԼԱԿԱՆԸ

1. Նախատեսվում է իրականացնել շարունակական դասընթացներ բոլոր այն կառույցների` գերատեսչությունների և կազմակերպությունների աշխատակիցների համար, որոնք իրենց լիազորություններն իրականացնելիս ուղղակիորեն կամ անուղղակիորեն (գործնական, գիտական կամ մասնագիտական գործունեություն իրականացնելիս) առնչվում են կենսաբանական, քիմիական, ճառագայթային գործոններին (համաձայն Հայաստանի Հանրապետության կառավարության 2010թ. օգոստոսի 26-ի «Միջազգային առողջապահական կանոնների հարցերով ազգային համակարգող մարմնի և շահագրգիռ մարմինների համագործակցության մեխանիզմները և համակարգման ընթացակարգերը հաստատելու մասին» N 1138-Ն որոշման):

2. Դասընթացները լինելու են կարճաժամկետ` հաջորդաբար դասավանդվող մոդուլների տեսքով, որոնցից յուրաքանչյուրը կպարունակի կենսաբանական, քիմիական և ճառագայթային վտանգների դիմակայմանը վերաբերող դասախոսություններ և կոնկրետ դեպքի վերլուծության հիման վրա կառուցված իրավիճակային խնդիրներ:

3. Դասավանդող թիմը ձևավորվելու է Միջազգային առողջապահական կանոնների ազգային համակարգողի կողմից և ներառելու է հանրային առողջության, գյուղատնտեսության (անասնաբուժության, բուսասանիտարիայի, սննդամթերքի անվտանգության) և ճառագայթային անվտանգության ոլորտների մասնագետներ:

4. Թիրախային լսարանը կազմված է լինելու ՀՀ կառավարության 2010 թվականի օգոստոսի 26-ի «Միջազգային առողջապահական (բժշկասանիտարական) կանոնների հարցերով ազգային համակարգող մարմնի և շահագրգիռ մարմինների համագործակցության մեխանիզմները և համակարգման ընթացակարգերը հաստատելու մասին» N 1138-Ն որոշման Հավելված 1-ի 2-րդ կետի 5-րդ ենթակետի համաձայն Միջազգային առողջապահական կանոնների հարցերով շահագրգիռ մարմին համարվող կառույցների աշխատակիցներից:

5. Դասավանդողների թիմը կիրառելու է ուսուցման մի շարք մեթոդներ թիրախային լսարանին ներգրավելու համար:

6. Դասընթացի արդյունավետության գնահատումը իրականացվելու է երեք փուլով:

II. ԴԱՍԸՆԹԱՑԻ ՆՊԱՏԱԿԸ

7. Միջազգային առողջապահական կանոնների հարցերով շահագրգիռ կառույցների աշխատակիցների կրթում` Միջազգային առողջապահական կաննոների պահանջների կատարման վերաբերյալ` կենսաբանական, քիմիական, ճառագայթային վտանգների դիմակայման նպատակով:

8. Միջազգային առողջապահական կանոնների հարցերով շահագրգիռ կառույցների աշխատակիցների իրազեկում Հայաստանի Հանրապետությունում Միջազգային առողջապահական կաննոների ներդրմամբ պայմանավորված և շահագրգիռ կառույցի լիազորություններին և գործառույթներին վերաբերող նոր իրավական ակտերին և գործող իրավական ակտերում իրականացված փոփոխություններին:

9. Միջազգային առողջապահական կանոնների հարցերով շահագրգիռ կառույցների աշխատակիցների կենսաբանական, քիմիական, ճառագայթային վտանգների դիմակայման գործողությունների իմացության ապահովում:

III. ԴԱՍԸՆԹԱՑԻ ԸՆԴՀԱՆՈՒՐ ՆԿԱՐԱԳԻՐԸ

10. Դասընթացը բաղկացած է լինելու մի քանի բաժնից` առաջին բաժինը ընթանալու է դասախոսությունների տեսքով և իրենից ներկայացնելու է ծանոթացում Միջազգային առողջապահական կանոններին և դրա պահանջների կիրառմանը, հաջորդ բաժինները ունենալու են նաև գործնական մաս և նման են լինելու ուսումնավարժանքի կամ լսարանային վարժանքի, որտեղ կոնկրետ դեպքերի վերլուծության հիման վրա ուսուցանվողները սովորելու են իրականացնել կոնկրետ գործողություններ կոնկրետ իրավիճակներում:

VI. ՈՒՍՈՒՑՄԱՆ ՀԻՄՆԱԿԱՆ ՄԵԹՈԴՆԵՐԸ

11. Դասընթացի ընթացքում, մասնակիցների ուսուցման գործընթացի ժամանակ կիրառվելու են հետևյալ մեթոդները`

1) ուսուցման խոսքային մեթոդ

2) ուսուցման առարկայական (տեսողական) մեթոդ

3) ուսուցման գործնական մեթոդ

4) կոնկրետ դեպքի վերլուծության հիման վրա հիմնված մեթոդ:

VII. ԴԱՍԸՆԹԱՑԻ ԱՌԱՋԻՆ ՓՈՒԼԸ

12. Դասընթացից առաջ իրականացվելու է մասնակիցների գիտելիքների գնահատում` թեստավորման միջոցով` նախօրոք կազմված հարցաշարերի օգտագործմամբ:

Այնուհետև մասնագետներին տրամադրվում է դասախոսության տպագիր նյութը: Կիրառելով ուսուցման խոսքային և տեսողական մեթոդները` դասախոսությունների ընթացքում անդրադարձ է կատարվում կենսաբանական, քիմիական և ճառագայթային վտագների դիմակայման հարցերին, մասնավորապես`

1) կենսաբանական, քիմիական և ճառագայթային վտանգների տեսակները

2) Միջազգային առողջապահական կանոնների պահանջները

3) Միջազգային (բժշկասանիտարական) առողջապահական կանոնների հիմնական կարողությունների կիրառումը կենսաբանական, քիմիական և ճառագայթային վտանգներին դիմակայելու նպատակով

4) Հայաստանի Հանրապետության օրենսդրության պահանջների համաձայն իրականացվող գործողությունները, որոնք իրականացվում են կենսաբանական, քիմիական և ճառագայթային վտանգներին դիմակայելու նպատակով:

VIII. ԴԱՍԸՆԹԱՑԻ ԵՐԿՐՈՐԴ ՓՈՒԼԸ

13. Դասընթացի 2-րդ փուլի ընթացքում կիրառվելու են ուսուցման գործնական և կոնկրետ իրավիճակի վերլուծության հիման վրա հիմնված մեթոդները` կենսաբանական, քիմիական, ճառագայթային վտանգների դիմակայման վերաբերյալ:

14. Մասնակիցներին ներկայացվելու է կենսաբանական, քիմիական կամ ճառագայթային գործոնով պայմանավորված կոնկրետ իրավիճակ, որին ի պատասխան մասնակիցները, յուրաքանչյուրն իր ոլորտում կիրառելով Միջազգային առողջապահական կանոնների պահանջները` ներկայացնելու են իրենց կողմից առաջարկվող գործողությունները` քայլ առ քայլ:

IX. ԴԱՍԸՆԹԱՑԻ ԵՐՐՈՐԴ ՓՈՒԼԸ

15. Այս փուլում իրականացվելու է դասընթացի մասնակիցների գիտելիքների գնահատում` թեստավորման միջոցով` նախօրոք կազմված հարցաշարերի օգտագործմամբ, որն էլ հետագայում, դասընթացի առաջին փուլում իրականացված թեստավորման արդյունքների հետ միասին, կիրառվելու է դասընթացի որակի գնահատման նպատակով և ներառվելու է գնահատման զեկույցում:

X. ԴԱՍԸՆԹԱՑԻ ԳՆԱՀԱՏՈՒՄ

16. Գնահատումն իրականացվելու է երեք փուլով` առաջինը անմիջապես դասընթացի ավարտից հետո թեստավորման արդյունքների հիման վրա է իրականացվելու, 2-րդ փուլում ուսումնասիրվելու է նաև դասընթացի դիտորդների կատարած գնահատումը` դասընթացի ընթացքի վերաբերյալ, և 3-րդ` վերջնական փուլում, օգտագործելով առաջին երկու փուլերի արդյունքները, կազմվելու է գնահատման զեկույց:

Հավելված 2   Հաստատված է ՀՀ առողջապահության նախարարի 2011 թ. դեկտեմբերի 15-ի թիվ 28-Ն   ՀՀ գյուղատնտեսության նախարարի 2011 թ. դեկտեմբերի 22-ի թիվ 250-Ն   ՀՀ կառավարությանն առընթեր միջուկային անվտանգության կարգավորման պետական կոմիտեի նախագահի 2011 թ. դեկտեմբերի 27-ի թիվ 325-Ն   համատեղ հրամանով

ՎԱՐԱԿԻՉ ՀԻՎԱՆԴՈՒԹՅՈՒՆՆԵՐԻ, ՔԻՄԻԱԿԱՆ ԵՎ ՃԱՌԱԳԱՅԹԱՅԻՆ ՎՏԱՆԳՆԵՐԻ ԴԻՄԱԿԱՅՄԱՆ ՎԵՐԱԲԵՐՅԱԼ ՊԱՏՐԱՍՏՎԱԾՈՒԹՅԱՆ ՀՆԳՕՐՅԱ ԴԱՍԸՆԹԱՑԻ ԺԱՄԱՆԱԿԱՑՈՒՅՑ

Ժամեր	Թեմաներ
I օր
9.30-11.00	Ներածություն Մասնակիցների գիտելիքների նախնական գնահատում
11.00-1.30	Ընդմիջում
11.30-3.00	Միջազգային առողջապահական կանոնների ներդրման նպատակներն ու խնդիրները
13.00-14.00	Ընդմիջում
14.00-15.30	Միջազգային առողջապահական (բժշկասանիտարական) կանոնների պահանջները, հիմնական կարողությունները
15.30-16.00	Ընդմիջում
16.00-17.30	Միջազգային առողջապահական կանոնների հարցերով շահագրգիռ կառույցների լիազորություններին և գործառույթներին վերաբերող և Միջազգային առողջապահական կանոնների ներդրմամբ պայմանավորված նոր իրավական ակտերի և գործող իրավական ակտերում իրականացված փոփոխությունների ներկայացում
II օր
9.30-11.00	Միջազգային առողջապահական կանոնների հարցերով շահագրգիռ կառույցների լիազորություններին և գործառույթներին վերաբերող և Միջազգային առողջապահական կանոնների ներդրմամբ պայմանավորված նոր իրավական ակտերի և գործող իրավական ակտերում իրականացված փոփոխությունների ներկայացում (շարունակություն)
11.00-11.30	Ընդմիջում
11.30-13.00	Միջազգային առողջապահական կանոնների հարցերով շահագրգիռ կառույցների և ազգային համակարգող մարմնի համագործակցությունը` կենսաբանական, քիմիական, ճառագայթային վտանգներին դիմակայելիս
13.00-14.00	Ընդմիջում
14.00-15.30	Միջազգային առողջապահական կանոնների հիմնական կարողությունների կիրառումը` կենսաբանական, քիմիական, ճառագայթային վտանգներին դիմակայելիս
15.30-16.00	Ընդմիջում
16.00-17.30	ՀՀ օրենսդրության պահանջների համաձայն իրականացվող գործողությունները, որոնք իրականացվում են կենսաբանական, քիմիական և ճառագայթային վտանգներին դիմակայելու նպատակով
III օր
9.30-11.00	Կենսաբանական, քիմիական, ճառագայթային վտանգներ, դրանց տեսակները
11.00-11.30	Ընդմիջում
11.30-13.00	Կենսաբանական, քիմիական, ճառագայթային վտանգները` միջազգային տարածման վտանգի տեսանկյունից
13.00-14.00	Ընդմիջում
14.00-15.30	Գործնական աշխատանք` իրավիճակային խնդիր ճառագայթային վտանգի վերաբերյալ
15.30-16.00	Ընդմիջում
16.00-17.30	Գործնական աշխատանքի ընթացքում առաջացած հարցեր, քննարկում
IV օր
9.30-11.00	Գործնական աշխատանք` իրավիճակային խնդիր քիմիական վտանգի վերաբերյալ
11.00-11.30	Ընդմիջում
11.30-13.00	Գործնական աշխատանք` իրավիճակային խնդիր կենսաբանական վտանգի վերաբերյալ
13.00-14.00	Ընդմիջում
14.00-15.30	Գործնական աշխատանքի ընթացքում առաջացած հարցեր, քննարկում
15.30-16.00	Ընդմիջում
16.00-17.30	Գործնական աշխատանքի ամփոփում
V օր
9.30-11.00	Դասընթացի ամփոփում
11.00-11.30	Ընդմիջում
11.30-13.00	Մասնակիցների գիտելիքների գնահատում, վկայականների հանձնում