ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

27 հոկտեմբերի 2011 թվականի N 1697-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2002 ԹՎԱԿԱՆԻ ՍԵՊՏԵՄԲԵՐԻ 5-Ի N 1516-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄ ԿԱՏԱՐԵԼՈՒ ՄԱՍԻՆ

«Պետական կառավարչական հիմնարկների մասին» Հայաստանի Հանրապետության օրենքի 9-րդ և 11-րդ հոդվածներին համապատասխան` Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 2002 թվականի սեպտեմբերի 5-ի «Հայաստանի Հանրապետության գյուղատնտեսության նախարարության աշխատակազմ» պետական կառավարչական հիմնարկ ստեղծելու, Հայաստանի Հանրապետության գյուղատնտեսության նախարարության կանոնադրությունը և աշխատակազմի կառուցվածքը հաստատելու մասին» N 1516-Ն որոշման մեջ կատարել հետևյալ փոփոխությունները և լրացումը`

1) որոշման N 1 հավելվածի 6-րդ կետը շարադրել հետևյալ խմբագրությամբ.

«6. Նախարարության համակարգը կազմված է նախարարից, նախարարության աշխատակազմից, նախարարության կառավարման ոլորտում գործող սննդամթերքի անվտանգության պետական ծառայությունից, ինչպես նաև նախարարության ենթակայությանը հանձնված պետական ոչ առևտրային կազմակերպություններից:».

2) որոշման N 1 հավելվածի 8-րդ կետում`

ա. «ե», «ը», «ժբ», «ժգ» և «ժդ» ենթակետերը շարադրել հետևյալ խմբագրությամբ.

«ե. անտառների պահպանության, պաշտպանության, վերարտադրության և օգտագործման բնագավառում զարգացման, ինչպես նաև անտառային պաշարների արդյունավետ օգտագործման ծրագրերի մշակում և իրականացման մոնիթորինգ.».

«ը. անտառային հողերում հրդեհային անվտանգության, ինչպես նաև վնասատուների և հիվանդությունների դեմ պայքարի միջոցառումների ծրագրերի մշակում և իրականացման մոնիթորինգ.».

«ժբ. գյուղատնտեսական մշակաբույսերի սերմնաբուծության աջակցության, բույսերի, բուսական արտադրանքի ու կարգավորող առարկաների կարանտին հիվանդությունների ու առավել վնասակար օրգանիզմների դեմ պայքարի միջոցառումների ծրագրերի մշակում և իրականացման մոնիթորինգ (բացառությամբ տեսչական գործառույթների).

ժգ. կենդանիների տոհմային գործի զարգացման, անասնաբուժության ու հակաանասնահամաճարակային միջոցառումների ծրագրերի մշակում և իրականացման մոնիթորինգ (բացառությամբ տեսչական գործառույթների).

ժդ. Հայաստանի Հանրապետության օրենսդրությանը համապատասխան` Հայաստանի Հանրապետության գյուղատնտեսական հողերի օգտագործման արդյունավետության բարձրացման ու մելիորացիայի (բարելավման) ծրագրերի մշակում և իրականացման մոնիթորինգ»,

բ. ուժը կորցրած ճանաչել «զ» և «է» ենթակետերը,

գ. «ժզ» ենթակետից հետո լրացնել հետևյալ բովանդակությամբ նոր` «ժզ 1» ենթակետով.

«ժզ 1. Հայաստանի Հանրապետության ջրային օրենսգրքով նախատեսված գետերի ջրերի վնասակար ներգործության կանխման և վերացման միջոցառումների մշակում և իրականացման մոնիթորինգ».

3) Հայաստանի Հանրապետության գյուղատնտեսության նախարարության աշխատակազմի`

ա. քարտուղարությունն առանձնացման ձևով վերակազմակերպել քարտուղարության և առաջին բաժնի,

բ. անտառաբուծության վարչությունը վերակազմավորման ձևով վերակազմակերպել անտառաբուծության բաժնի,

գ. գիտության և կրթության վարչությունը և ագրովերամշակման զարգացման և սննդամթերքի անվտանգության վարչությունը միաձուլման ձևով վերակազմակերպել ագրովերամշակման զարգացման վարչության և սննդամթերքի անվտանգության վարչության.

4) որոշման N 2 հավելվածի 1-ին և 3-րդ կետերը շարադրել հետևյալ խմբագրությամբ.

«1. Վարչություններ

Գյուղատնտեսության զարգացման ծրագրերի վարչություն

Բուսաբուծության և բույսերի պաշտպանության վարչություն

Հողերի օգտագործման և մելիորացիայի վարչություն

Ագրովերամշակման զարգացման վարչություն

Անասնաբուծության և անասնաբուժության վարչություն

Սննդամթերքի անվտանգության վարչություն

Իրավաբանական վարչություն

Ֆինանսատնտեսագիտական և հաշվապահական հաշվառման վարչություն

Արտաքին կապերի վարչություն».

«3. Բաժիններ

Անտառաբուծության բաժին

Անձնակազմի կառավարման բաժին

Առաջին բաժին

Հասարակայնության հետ կապերի բաժին

Տնտեսական բաժին

Համակարգչային սպասարկումների և տեղեկատվական հոսքերի կառավարման բաժին»:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից: