«Գրանցված է»

ՀՀ արդարադատության

նախարարության կողմից

24 մարտի 2011 թ.

Պետական գրանցման թիվ 05011154

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

1 մարտի 2011 թ.

թիվ 44-Ն

Ո Ր Ո Շ ՈՒ Մ

«ԱՆՎԱՆԱՏԻՐՈՋ ՀԱՇԻՎՆԵՐԻ ՎԱՐՄԱՆ ՆԿԱՏՄԱՄԲ ԼՐԱՑՈՒՑԻՉ ՊԱՀԱՆՋՆԵՐԸ» ԿԱՆՈՆԱԿԱՐԳ 5/07-Ը ՀԱՍՏԱՏԵԼՈՒ ՄԱՍԻՆ

Հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «ե» կետը, «Իրավական ակտերի մասին» Հայաստանի Հանրապետության օրենքի 16-րդ հոդվածի 1-ին մասը, «Արժեթղթերի շուկայի մասին» Հայաստանի Հանրապետության օրենքի 194-րդ հոդվածի 4-րդ մասը` Հայաստանի Հանրապետության կենտրոնական բանկի խորհուրդը որոշում է.

1. Հաստատել «Անվանատիրոջ հաշիվների վարման նկատմամբ լրացուցիչ պահանջները» կանոնակարգ 5/07-ը` համաձայն Հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

3. Սույն որոշման ուժի մեջ մտնելուց հետո 30 աշխատանքային օրվա ընթացքում պահառուները պարտավոր են պահառության գործունեությունը կարգավորող իրենց ներքին իրավական ակտերը, ինչպես նաև արժեթղթերի անվանատիրոջ հաշվի բացման և վարման արդեն կնքված պայմանագրերը համապատասխանեցնել սույն որոշմանը:

ՀՀ կենտրոնական բանկի նախագահ	Ա. Ջավադյան
2011 թ. մարտի 4 ք. Երևան

Հավելված Հաստատված է Հայաստանի Հանրապետության կենտրոնական բանկի խորհրդի 2011 թվականի մարտի 1-ի թիվ 44-Ն որոշմամբ

ԿԱՆՈՆԱԿԱՐԳ 5/07

ԱՆՎԱՆԱՏԻՐՈՋ ՀԱՇԻՎՆԵՐԻ ՎԱՐՄԱՆ ՆԿԱՏՄԱՄԲ ԼՐԱՑՈՒՑԻՉ ՊԱՀԱՆՋՆԵՐԸ

Գ Լ ՈՒ Խ  1

 ԿԱՐԳԱՎՈՐՄԱՆ ԱՌԱՐԿԱՆ

1. Սույն կանոնակարգը սահմանում է լրացուցիչ պահանջներ պահառուների մոտ անվանատիրոջ հաշիվների վարման նկատմամբ:

Գ Լ ՈՒ Խ  2

 ՀԱՍԿԱՑՈՒԹՅՈՒՆՆԵՐ

 2. Սույն կանոնակարգում օգտագործված հասկացություններն ունեն հետևյալ նշանակությունները.

1) արժեթուղթ` ոչ ռեզիդենտներին պատկանող արժեթղթեր, որոնց սեփականատերերի (անվանատերերի) ռեեստրի վարումն իրականացվում է Հայաստանի Հանրապետության տարածքում գործող անձի կողմից,

2) պահառու` Հայաստանի Հանրապետության օրենսդրության համապատասխան արժեթղթերի պահառության ծառայություն մատուցելու թույլտվություն ունեցող անձ կամ Կենտրոնական դեպոզիտարիա,

3) անվանատեր` Հայաստանի Հանրապետության օրենսդրության համապատասխան արժեթղթերի պահառության ծառայություն մատուցելու թույլտվություն ունեցող անձ (բացառությամբ` Հայաստանի կենտրոնական դեպոզիտարիայի), որի անունով, առանց սեփականության իրավունքի փոխանցման, հաշվառվում են այլ անձանց պատկանող անվանական արժեթղթերը, կամ օտարերկրյա անվանատեր,

4) օտարերկրյա անվանատեր` օտարերկրյա անձ, որն իր երկրի օրենքների համաձայն իրավասու է իր անունով այլ անձանց պատկանող արժեթղթերի հաշիվներ ունենալ,

5) օտարերկրյա անձ` անձ, որն ըստ «Արժութային կարգավորման և արժութային վերահսկողության մասին» Հայաստանի Հանրապետության օրենքի հանդիսանում է ոչ ռեզիդենտ,

6) ռեզիդենտ և ոչ ռեզիդենտ` ըստ «Արժութային կարգավորման և արժութային վերահսկողության մասին» Հայաստանի Հանրապետության օրենքում սահմանված նշանակության:

3. Սույն կանոնակարգում օգտագործված այլ հասկացություններն ունեն «Արժեթղթերի շուկայի մասին» Հայաստանի Հանրապետության օրենքում սահմանված նշանակությունը:

Գ Լ ՈՒ Խ  3

 ԱՆՎԱՆԱՏԵՐԵՐԻ ՀԱՇԻՎՆԵՐՈՎ ԱՐԺԵԹՂԹԵՐԻ ՆԿԱՏՄԱՄԲ ԻՐԱՎՈՒՆՔՆԵՐԻ ԾԱԳՄԱՆ ԵՎ ՓՈԽԱՆՑՄԱՆ ԿԱՐԳԸ

4. Օտարերկրյա անվանատիրոջ արժեթղթերի հաշիվներով հաշվառվող արժեթղթերի սեփականատերերի մասին տեղեկություններն արտացոլվում են պահառուի մոտ:

5. Օտարերկրյա անվանատիրոջ արժեթղթերի հաշիվներով հաշվառվող արժեթղթերի նկատմամբ գնորդի սեփականության իրավունքը ծագում է այն պահից, երբ պահառուի մոտ արժեթղթերը գրանցվում են գնորդի (կամ նրա անվանատիրոջ) անունով: Օտարերկրյա անվանատիրոջ արժեթղթերի հաշիվներով հաշվառվող արժեթղթերի գրավի իրավունքը ծագում է պահառուի մոտ համապատասխան գրառում կատարելու պահից:

6. Արժեթղթերի նկատմամբ սեփականության իրավունքը կարող է փոխանցվել, եթե`

1) գնորդ (ստացող) և վաճառող (փոխանցող) կողմերի օտարերկրյա անվանատերերը տարբեր անձինք են, կամ

2) գնորդ (ստացող) և վաճառող (փոխանցող) կողմերի օտարերկրյա անվանատերը նույն անձն է, սակայն գնորդի (ստացողի) և վաճառողի (փոխանցողի) արժեթղթերի նկատմամբ սեփականության իրավունքն ամրագրվում է պահառուի մոտ անվանատիրոջ համար բացված առանձին անվանատիրոջ հաշիվներում:

Գ Լ ՈՒ Խ  4

 ՕՏԱՐԵՐԿՐՅԱ ԱՆՎԱՆԱՏԻՐՈՋ ԵՎ ՊԱՀԱՌՈՒԻ ՄԻՋԵՎ ՀԱՐԱԲԵՐՈՒԹՅՈՒՆՆԵՐԻ ՆԿԱՏՄԱՄԲ ՊԱՀԱՆՋՆԵՐԸ

7. Պահառուն օտարերկրյա անվանատիրոջ արժեթղթերի հաշիվներով հաշվառվող արժեթղթերի յուրաքանչյուր սեփականատիրոջ գծով տվյալ օտարերկրյա անվանատիրոջ համար բացում է անվանատիրոջ առանձին հաշիվ:

8. Օտարերկրյա անվանատիրոջ և պահառուի միջև հարաբերությունները կարգավորվում են անվանատիրոջ հաշվի բացման և վարման պայմանագրով (այսուհետ նաև` Պայմանագիր), պահառուի ներքին կանոններով, սույն կանոնակարգով, «Արժեթղթերի շուկայի մասին» Հայաստանի Հանրապետության օրենքով, ինչպես նաև դրա հիման վրա ընդունված այլ նորմատիվ իրավական ակտերով:

9. Պայմանագիրը, օրենսդրությամբ, այլ նորմատիվ իրավական ակտերով ներկայացված պահանջներից բացի, պետք է բավարարի նաև բոլոր հետևյալ լրացուցիչ պահանջներին.

1) Պայմանագրում պետք է նշվի, որ օտարերկրյա անվանատերը պարտավորվում է պահառուին ներկայացնել արժեթղթերի սեփականատերերի վերաբերյալ` սույն կանոնակարգի 10-րդ կետով սահմանված տեղեկատվությունը,

2) Պայմանագրում պետք է նկարագրվի օտարերկրյա անվանատիրոջ հաշվով արժեթղթերի սեփականության իրավունքի փոխանցման կարգը և պահը,

3) Պայմանագրում պետք է նշվի, որ օտարերկրյա անվանատերը պարտավորվում է արժեթղթերի սեփականատերերին տեղյակ պահել արժեթղթերի նկատմամբ սեփականության իրավունքի փոխանցման կարգի վերաբերյալ,

4) Պայմանագրում պետք է նշվի, որ արժեթղթերի սեփականատերերի փոփոխության, ինչպես նաև արժեթղթերի նկատմամբ սեփականության իրավունքի սահմանափակումների (այդ թվում` գրավադրում, կալանք) վերաբերյալ տեղեկատվությունն իրեն հայտնի դառնալու պահից մեկ աշխատանքային օրվա ընթացքում օտարերկրյա անվանատերը պահառուին է ներկայացնում այդ տեղեկատվությունը: Նշված ժամանակահատվածում տեղեկատվության ներկայացման անհնարինության դեպքում տեղեկատվությունը ներկայացվում է ողջամիտ կարճ ժամկետում:

10. Օտարերկրյա անվանատերերը պահառուին են ներկայացնում առնվազն հետևյալ տեղեկատվությունը`

1) արժեթղթերի` ֆիզիկական անձ սեփականատիրոջ անունը և ազգանունը, իսկ իրավաբանական անձ սեփականատիրոջ` լրիվ անվանումը և կազմակերպական-իրավական տեսակը,

2) արժեթղթերի` ֆիզիկական անձ սեփականատիրոջ անձը (ինքնությունը) հաստատող փաստաթղթի սերիան, համարը, իսկ իրավաբանական անձ սեփականատիրոջ` հարկ վճարողի հաշվառման համարը, իսկ դրա բացակայության դեպքում համապատասխան պետական մարմնի կողմից տրված նույնականացման այլ համարը,

3) արժեթղթերի` ֆիզիկական անձ սեփականատիրոջ բնակության վայրը, իսկ իրավաբանական անձ սեփականատիրոջ` գտնվելու վայրը և փաստացի գործունեության վայրը,

4) արժեթղթերի նկատմամբ սեփականության իրավունքի սահմանափակումների (այդ թվում` գրավադրում, կալանք) փաստերը (առկայության դեպքում):

11. Օտարերկրյա անվանատիրոջ կողմից սույն կանոնակարգով նշված տեղեկատվության չտրամադրման դեպքում պահառուն պարտավոր է հրաժարվել անվանատիրոջ հետ Պայմանագրի կնքումից, իսկ արդեն կնքված Պայմանագրի առկայության դեպքում` ողջամիտ ժամկետում լուծել Պայմանագիրը:

Գ Լ ՈՒ Խ  5

 ՏԵՂԵԿԱՑՄԱՆ ՊԱՐՏԱԿԱՆՈՒԹՅՈՒՆԸ

12. Սույն կանոնակարգի 10-րդ կետով սահմանված տեղեկատվությունը ստանալուց հետո պահառուն մեկ աշխատանքային օրվա ընթացքում ստացված տեղեկատվությունը փոխանցում է արժեթղթերի սեփականատերերի (անվանատերերի) ռեեստրը վարող անձին, եթե ռեեստրը վարող անձը պահառուից տարբեր անձ է:

13. Եթե արժեթղթերի անվանատերը պահառուն է, ապա պահառուն արժեթղթերը դրա սեփականատիրոջ հաշվին մուտքագրելուց հետո մեկ աշխատանքային օրվա ընթացքում արժեթղթի սեփականատիրոջ վերաբերյալ սույն կանոնակարգի 10-րդ կետով սահմանված տեղեկատվությունը փոխանցում է արժեթղթերի սեփականատերերի (անվանատերերի) ռեեստրը վարող անձին, եթե ռեեստրը վարող անձը պահառուից տարբեր անձ է: