Հ Ա Մ Ա Ձ Ա Յ Ն Ա Գ Ի Ր

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՇԽԱՏԱՆՔԻ ԵՎ ՍՈՑԻԱԼԱԿԱՆ ՀԱՐՑԵՐԻ ՆԱԽԱՐԱՐՈՒԹՅԱՆ ԵՎ ԼԻՏՎԱՅԻ ՀԱՆՐԱՊԵՏՈՒԹՅԱՆ ՍՈՑԻԱԼԱԿԱՆ ԱՊԱՀՈՎՈՒԹՅԱՆ ԵՎ ԱՇԽԱՏԱՆՔԻ ՆԱԽԱՐԱՐՈՒԹՅԱՆ ՄԻՋԵՎ՝ ԱՇԽԱՏԱՆՔԻ ԵՎ ՍՈՑԻԱԼԱԿԱՆ ՊԱՇՏՊԱՆՈՒԹՅԱՆ ԲՆԱԳԱՎԱՌՆԵՐՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության աշխատանքի և սոցիալական հարցերի նախարարությունը և Լիտվայի Հանրապետության սոցիալական ապահովության և աշխատանքի նախարարությունը, այսուհետև` Կողմեր,

հաշվի առնելով աշխատանքի և սոցիալական պաշտպանության բնագավառներում Կողմերի միջև ձևավորված երկկողմ արդյունավետ համագործակցությունը,

ցանկանալով պահպանել և ընդլայնել Կողմերի միջև գոյություն ունեցող կապերը,

համաձայնեցին հետևյալի մասին.

Հոդված 1

Կողմերը, գործելով իրենց իրավասությունների շրջանակներում, պայմանավորվում են զարգացնել համագործակցությունն աշխատանքի և սոցիալական պաշտպանության բնագավառներում՝ սույն Համաձայնագրին և իրենց պետությունների ազգային օրենսդրությանը համապատասխան: Սույն Համաձայնագիրը չի ազդի Կողմերի կամ նրանց պետությունների կողմից կնքված միջազգային պայմանագրերից և իրավական ակտերից բխող իրավունքների և պարտավորությունների վրա:

Հոդված 2

Կողմերը պայմանավորվում են համագործակցել աշխատանքի և սոցիալական պաշտպանության հետևյալ ոլորտներում.

ա) զբաղվածության խթանում, գործազրկության դեմ պայքար և գործազրկության հետևանքների մեղմացում, աշխատանքային ծառայությունների որակի բարձրացում և աշխատանքային պայմանների բարելավում,

բ) կենսաթոշակային համակարգի համապատասխանեցում, կայունացում և արդիականացում,

գ) սոցիալական աջակցության և ընտանեկան նպաստների համակարգերի զարգացում,

դ) սոցիալապես տարբեր խոցելի խմբերի խնդիրների լուծում,

ե) մարդու սոցիալական իրավունքներ,

զ) սոցիալական հանրային գործընկերության ուղղվածությամբ ոչ կառավարական կազմակերպություններ,

է) կանանց և տղամարդկանց հավասարություն և խտրականության դեմ պայքար:

Հոդված 3

1. Սույն Համաձայնագրի նպատակների և խնդիրների իրականացման համար ձեռնարկվող հնարավոր միջոցները կարող են ներառել.

ա) ազգային աշխատաշուկայի և սոցիալական քաղաքականության զարգացման համար ձեռնարկված տարբեր միջոցներին առնչվող փորձի փոխանակում, փոխադարձ խորհրդատվություններ,

 բ) երկու Կողմերի, ինչպես նաև նրանց ենթակայության տակ գտնվող համապատասխան հաստատությունների փորձագետների համագործակցության խթանում և ընդլայնում,

 գ) տարբեր միջազգային կառույցների շրջանակներում համագործակցության խթանում և ընդլայնում,

 դ) փոխադարձ հետաքրքրություն ներկայացնող թեմաների շուրջ աշխատաժողովների կամ համաժողովների կազմակերպում երկու երկրների ներկայացուցիչների մասնակցությամբ:

2. Կողմերը փոխադարձ համաձայնությամբ կարող են պայմանավորվել այլ միջոցների շուրջ:

Հոդված 4

Կողմերը համաձայնում են հետևյալ ֆինանսական և կազմակերպչական կարգավորումների շուրջ.

1. Լիտվական Կողմը Հայաստանի Հանրապետություն պատվիրակություններ, խմբեր կամ անհատներ գործուղելիս հոգում է ուղևորության, կեցության և սննդի հետ կապված ծախսերը:

2. Լիտվական Կողմը Հայաստանի Հանրապետությունից պատվիրակություններ, խմբեր կամ անհատներ ընդունելու դեպքում հոգում է ուղևորության, կեցության և սննդի հետ կապված ծախսերը (առավելագույնը 5 անձ 4 օրվա համար մեկ այցի շրջանակներում), ինչպես նաև երկրի տարածքում տեխնիկական բնույթի կարգավորումների հետ կապված ծախսերը (առավելագույնը երկու միջոցառում տարվա ընթացքում):

3. Հայկական Կողմը Լիտվայի Հանրապետությունից պատվիրակություններ, խմբեր կամ անհատներ ընդունելու դեպքում հոգում է երկրի տարածքում նրանց տեխնիկական բնույթի կարգավորումների հետ կապված ծախսերը:

4. Յուրաքանչյուր առանձին դեպքում ծախսերի կատարման համար ձեռք կբերվեն առանձին ֆինանսական պայմանավորվածություններ:

Հոդված 5

1. Սույն Համաձայնագիրն ուժի մեջ է մտնում Կողմերի ազգային օրենսդրությամբ սահմանված ներքին ընթացակարգերի ավարտի մասին վերջին ծանուցումը դիվանագիտական ուղիներով ստանալու օրվանից:

2. Կողմերի փոխադարձ համաձայնությամբ սույն Համաձայնագրում առանձին արձանագրություններով կարող են կատարվել փոփոխություններ և լրացումներ: Այդ արձանագրություններն ուժի մեջ կմտնեն սույն Համաձայնագրի համաձայն և կկազմեն դրա անբաժանելի մասը:

3. Համաձայնագրի դրույթների մեկնաբանման և կիրառման հետ կապված ցանկացած տարաձայնություն լուծվում է Կողմերի միջև՝ խորհրդակցությունների միջոցով:

4. Սույն Համաձայնագիրը կնքվում է անժամկետ: Կողմերը կարող են դրա գործողությունը դադարեցնել ցանկացած ժամանակ՝ գրավոր տեղեկացնելով: Այդ դեպքում սույն Համաձայնագրի գործողությունը կդադարի գործողության դադարեցման մասին ծանուցումը մյուս Կողմի ստանալու օրվանից երեք ամիս հետո՝ առանց սույն Համաձայնագրի շրջանակներում իրականացվող ընթացիկ միջոցառումների վրա անդրադառնալու:

Ստորագրված է Երևանում 2017թ. հոկտեմբերի 4-ին, երկու բնօրինակով, յուրաքանչյուրը՝ հայերեն, լիտվերեն և անգլերեն. երեք տեքստերն էլ ունեն հավասար ուժ: Տեքստերի միջև տարբերության դեպքում նախապատվությունը տրվում է անգլերեն տեքստին: