ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Հայաստանի Հանրապետության վճռաբեկ դատարանի քաղաքացիական և վարչական պալատը (այսուհետ՝ Վճռաբեկ դատարան)

2010 թվականի հոկտեմբերի 1-ին

դռնբաց դատական նիստում, քննելով «Հայաստանի գրողների միություն» հասարակական կազմակերպության (այսուհետ` Կազմակերպություն) վճռաբեկ բողոքը ՀՀ վարչական դատարանի 31.05.2010 թվականի վճռի դեմ՝ ըստ Երևան համայնքի հայցի ընդդեմ Կազմակերպության` գույքահարկը բռնագանձելու պահանջի մասին,

ՊԱՐԶԵՑ

1.Գործի դատավարական նախապատմությունը

Դիմելով դատարան՝ Երևանի Կենտրոն վարչական շրջանը պահանջել է բռնագանձել Կազմակերպությունից 4.933.078 ՀՀ դրամ, այդ թվում` 2.382.800 ՀՀ դրամ գույքահարկը, 2.472.398 ՀՀ դրամ հաշվարկված տույժը, 77.880 ՀՀ դրամ տուգանքը և 98.662 ՀՀ դրամ վճարված պետական տուրքը։

ՀՀ վարչական դատարանի 31.05.2010 թվականի (այսուհետ` Դատարան) վճռով հայցը բավարարվել է։

Սույն գործով վճռաբեկ բողոք է ներկայացրել Կազմակերպությունը։

Կողմերը Վճռաբեկ դատարան են ներկայացրել 09.09.2010 թվականի հաշտության համաձայնությունը:

2. Վճռաբեկ դատարանի պատճառաբանությունները և եզրահանգումը

ՀՀ վարչական դատավարության օրենսգրքի 118-րդ հոդվածի համաձայն` վարչական դատարանի դատական ակտերի վճռաբեկ դատարան բողոքարկման կարգի և գործերի վարույթի վրա տարածվում են ՀՀ քաղաքացիական դատավարության օրենսգրքով սահմանված նորմերը։

ՀՀ քաղաքացիական դատավարության օրենսգրքի 33-րդ հոդվածի համաձայն՝ կողմերը դատավարության ցանկացած փուլում կարող են գործն ավարտել հաշտության համաձայնությամբ:

Կողմերի միջև կայացված հաշտության համաձայնությունը ձևակերպվում է գրավոր:

ՀՀ քաղաքացիական դատավարության օրենսգրքի 109-րդ հոդվածի 7-րդ կետի համաձայն՝ դատարանը կարճում է գործի վարույթը, եթե դատարանը հաստատել է կնքված հաշտության համաձայնությունը:

Ուսումնասիրելով կողմերի 09.09.2010 թվականին ներկայացված հաշտության համաձայնությունը` Վճռաբեկ դատարանը գտնում է, որ այն չի հակասում օրենքին և չի խախտում այլ անձանց իրավունքները և օրինական շահերը:

Այսպիսով, Վճռաբեկ դատարանը գտնում է, որ կողմերի ներկայացրած հաշտության համաձայնությունը պետք է հաստատել:

Ելնելով վերոգրյալից և ղեկավարվելով ՀՀ քաղաքացիական դատավարության օրենսգրքի 33-րդ, 240-241²-րդ հոդվածներով` Վճռաբեկ դատարանը

 ՈՐՈՇԵՑ

1. Հաստատել կողմերի միջև կնքված 09.09.2010 թվականի հաշտության համաձայնությունը հետևյալ բովանդակությամբ.

«ՀԱՇՏՈՒԹՅԱՆ ՀԱՄԱՁԱՅՆՈՒԹՅՈՒՆ

ք.Երևան

09.09.2010 թվական

Երևանի Կենտրոն վարչական շրջանի ղեկավարի աշխատակազմի իրավաբանական բաժնի գլխավոր մասնագետ Անահիտ Նավոյանը, որը գործում է Երևանի քաղաքապետի 08.09.2010 թվականի հ. 01/7-5669 լիազորագրի հիման վրա /այսուհետ՝ Կողմ 1/ և «Հայաստանի գրողների միություն» հասարակական կազմակերպությունն՝ ի դեմս տնօրեն Լևոն Անանյանի /այսուհետ՝ Կողմ 2/ ղեկավարվելով Հայաստանի Հանրապետության քաղաքացիական դատավարության օրենսգրքի 33-րդ հոդվածի 1-ին կետով, կնքեցին սույն հաշտության համաձայնությունը հետևյալի մասին.

• Կողմ 1-ն ընդունում է, որ Հայաստանի Հանրապետության վարչական դատարանի 31.05.2010 թվականի թիվ ՎԴ/4811/05/09 վճռով, պատասխանող «Հայաստանի գրողների միություն» հասարակական կազմակերպությունից հօգուտ Երևան համայնքի բյուջե բռնագանձման ենթակա գույքահարկի 2006–2008 թթ. պարտքը ոչ թե կազմում է վերոնշյալ վճռով բռնագանձման ենթակա 4,933.078 /չորս միլիոն ինն հարյուր երեսուներեք հազար յոթանասունութ/ ՀՀ դրամ, այլ 3,170.500 /երեք միլիոն հարյուր յոթանասուն հազար հինգ հարյուր/ ՀՀ դրամ.

• Կողմ 2-ն ընդունում է այն փաստը, որ Երևան քաղաքի Բաղրամյան պողոտայի 3 հասցեում գտնվող հասարակական նշանակության շինության և նույն հասցեում հաշվառված փոխադրամիջոցների 2006–2008թթ. գույքահարկի պարտքի գումարր կազմում է 3,170.500 /երեք միլիոն հարյուր յոթանասուն հազար հինգ հարյուր/ ՀՀ դրամ, որը պարտավորվում է վճարել Երևան համայնքի բյուջե։

• Կողմ 2-ը իրազեկված է, որ 3,170.500 /երեք միլիոն հարյուր յոթանասուն հազար հինգ հարյուր/ ՀՀ դրամը չվճարելու դեպքում այն ենթակա է բռնագանձման ՀՀ արդարադատության նախարարության դատական ակտերի հարկադիր կատարման ծառայության միջոցով, Կողմ 2-ի հաշվին։

• Սույն հաշտության համաձայնությունը կնքված է համարվում այն հաստատելու մասին ՀՀ վճռաբեկ դատարանի քաղաքացիական և վարչական պալատի որոշումը ուժի մեջ մտնելու պահից։

• Սույն հաշտության համաձայնությունը կնքված է հավասարազոր իրավաբանական ուժ ունեցող երեք օրինակից։

Կողմ 1

Կողմ 2

Կենտրոն վարչական շրջանի ղեկավարի աշխատակազմի իրավաբանական բաժնի գլխավոր մասնագետ Անահիտ Նավոյան (ստորագրություն)

«Հայաստանի գրողների միություն» հասարակական կազմակերպության տնօրեն Լևոն Անանյան  (ստորագրություն)

2. ՀՀ վարչական դատարանի 31.05.2010 թվականի վճիռը բեկանել և վարչական գործի վարույթը կարճել:

3. Որոշումն օրինական ուժի մեջ է մտնում հրապարակման պահից, վերջնական է և ենթակա չէ բողոքարկման։

Նախագահող`		Ե. ԽՈՒՆԴԿԱՐՅԱՆ
Դատավորներ`		Ս. Անտոնյան
		Վ. Աբելյան
		Վ. Ավանեսյան
		Ա. Բարսեղյան
		Մ. ԴՐՄԵՅԱՆ
		Տ. Պետրոսյան
		Ե. ՍՈՂՈՄՈՆՅԱՆ