ՀԱՄԱՁԱՅՆԱԳԻՐ

ԵՎՐԱՍԻԱԿԱՆ ՏՆՏԵՍԱԿԱՆ ՄԻՈՒԹՅԱՆ ԱՆԴԱՄ ՊԵՏՈՒԹՅՈՒՆՆԵՐԻ ԿՈՂՄԻՑ ԱՐԴՅՈՒՆԱԲԵՐԱԿԱՆ ԱՊՐԱՆՔՆԵՐԻ ՆԿԱՏՄԱՄԲ ՀԱՏՈՒԿ ՍՈՒԲՍԻԴԻԱՆԵՐԸ ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ՀԵՏ ԿԱՄԱՎՈՐ ՀԱՄԱՁԱՅՆԵՑՆԵԼՈՒ ԵՎ ԵՎՐԱՍԻԱԿԱՆ ՏՆՏԵՍԱԿԱՆ ՄԻՈՒԹՅԱՆ ԱՆԴԱՄ ՊԵՏՈՒԹՅՈՒՆՆԵՐԻ ԿՈՂՄԻՑ ՀԱՏՈՒԿ ՍՈՒԲՍԻԴԻԱՆԵՐԻ ՏՐԱՄԱԴՐՄԱՆ ՀԵՏ ԿԱՊՎԱԾ՝ ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԿՈՂՄԻՑ ՔՆՆՈՒԹՅՈՒՆՆԵՐ ԱՆՑԿԱՑՆԵԼՈՒ ԿԱՐԳԻ ՄԱՍԻՆ

Եվրասիական տնտեսական միության անդամ պետությունները, այսուհետ՝ անդամ պետություններ,

ղեկավարվելով «Եվրասիական տնտեսական միության մասին» 2014 թվականի մայիսի 29-ի պայմանագրի (այսուհետ՝ Պայմանագիր) դրույթներով,

Պայմանագրի 93-րդ հոդվածի և «Արդյունաբերական սուբսիդիաներ տրամադրելու միասնական կանոնների մասին» արձանագրության (Պայմանագրի թիվ 28 հավելված) (այսուհետ՝ Արձանագրություն) դրույթների իրագործման նպատակով,

գիտակցելով Եվրասիական տնտեսական միության (այսուհետ՝ Միություն) գործունեության և զարգացման, ինչպես նաև արդյունաբերական արտադրության զարգացման համար պայմաններ ստեղծելու կարևորությունը,

անդամ պետությունների կողմից տնտեսության արդյունաբերական հատվածներին պետական աջակցություն ցուցաբերելու թափանցիկությունն ու կանխատեսելիությունը բարձրացնելու նպատակով,

ձգտելով պայմաններ ապահովել անդամ պետությունների կողմից արդյունաբերական ապրանքների նկատմամբ հատուկ սուբսիդիաներ տրամադրելու բնագավառում անդամ պետությունների կողմից իրացվող սուբսիդիաների գնահատմանը վերաբերող մասով թափանցիկ և կանխատեսելի միջավայր ստեղծելու համար,

հաշվի առնելով միջազգային իրավունքի՝ համընդհանուր ճանաչում ունեցող սկզբունքներն ու նորմերը,

հետևելով Առևտրի համաշխարհային կազմակերպության սկզբունքներին, նորմերին և կանոններին,

համաձայնեցին ներքոնշյալի մասին.

I. Ընդհանուր դրույթներ

Հոդված 1

Կարգավորման առարկան

Սույն համաձայնագրով կարգավորվում են անդամ պետությունների և Եվրասիական տնտեսական հանձնաժողովի (այսուհետ՝ Հանձնաժողով) միջև անդամ պետությունների կողմից արդյունաբերական ապրանքների նկատմամբ հատուկ սուբսիդիաներ տրամադրելու հետ կապված փոխգործակցության հարցերը, սահմանվում է անդամ պետությունների կողմից հատուկ սուբսիդիաների տրամադրումը Հանձնաժողովի հետ կամավոր համաձայնեցնելու (այսուհետ՝ հատուկ սուբսիդիաների համաձայնեցում), ինչպես նաև անդամ պետությունների կողմից հատուկ սուբսիդիաներ տրամադրելու հետ կապված՝ Հանձնաժողովի կողմից քննություններ (այսուհետ՝ քննություններ) անցկացնելու կարգը։

Հոդված 2

Պատասխանատու դեպարտամենտը

Հատուկ սուբսիդիաների համաձայնեցման ընթացակարգի և քննություն անցկացնելու հետ կապված գործառույթներն իրականացվում են Հանձնաժողովի այն կառուցվածքային ստորաբաժանման կողմից, որի իրավասությանն են վերապահված արդյունաբերական քաղաքականության իրականացման և արդյունաբերական սուբսիդիաների իրացման ապահովման հարցերը (այսուհետ՝ պատասխանատու դեպարտամենտ):

Հոդված 3

Սահմանումները

Սույն համաձայնագրի նպատակներով օգտագործվում են հասկացություններ, որոնք ունեն հետևյալ իմաստը՝

«սակավանշանակ սուբսիդիա»՝ սուբսիդիա, որն իր փոքր չափերով չի կարող էական ազդեցություն ունենալ Միության շուկայի վրա.

«համատեղ նախագիծ»՝ անդամ պետությունների մասնակցությամբ նախագիծ, որն ուղղված է արդյունաբերական համագործակցության և կոոպերացիայի խորացմանն ու նախատեսում է հետևյալ պայմաններից մեկի կատարումը՝

համատեղ փորձակոնստրուկտորական աշխատանքների իրականացում,

ձեռնարկությունների (արտադրական հոսքագծերի) ստեղծում,

տեխնոլոգիաների նոր տեսակների զարգացում և տեխնոլոգիաների այդ տեսակներին վերաբերող տեղեկատվության տրամադրում,

նորարարական համատեղ ենթակառուցվածքի ձևավորում.

«լիազորված մարմին»՝ անդամ պետության գործադիր իշխանության մարմին (մարմիններ), որի (որոնց) լիազորությունների մեջ են մտնում սույն համաձայնագրի իրականացման հետ կապված հարցերը։

Սույն համաձայնագրում օգտագործվող մյուս հասկացությունները կիրառվում են Պայմանագրով և Միության շրջանակներում միջազգային պայմանագրերով սահմանված իմաստներով։

II. Հատուկ սուբսիդիաների համաձայնեցման ընթացակարգը և Հանձնաժողովի կողմից հատուկ սուբսիդիաների թույլատրելիության կամ անթույլատրելիության մասին որոշում ընդունելը

Հոդված 4

Հատուկ սուբսիդիաների համաձայնեցման ընթացակարգը

1. Անդամ պետությունն իրավունք ունի դիմելու Հանձնաժողովին հատուկ սուբսիդիան համաձայնեցնելու նպատակներով՝ համապատասխան դիմումը սույն համաձայնագրի 5-րդ հոդվածով նախատեսված կարգով ուղարկելու միջոցով:

2. Հատուկ սուբսիդիաների համաձայնեցումն իրականացվում է կամավոր հիմունքով:

3. Արձանագրության 6-րդ կետին համապատասխան՝ անդամ պետությունները չեն կիրառում փոխհատուցման միջոցներ այն սուբսիդիաների նկատմամբ, որոնց տրամադրման ժամկետները, ծավալներն ու պայմանները համաձայնեցված են Հանձնաժողովի հետ:

4. Հատուկ սուբսիդիաների համաձայնեցման ընթացակարգը ներառում է՝

1) սույն համաձայնագրի 7-րդ հոդվածին համապատասխան՝ պատասխանատու դեպարտամենտի կողմից հատուկ սուբսիդիայի վերլուծության անցկացում՝ սույն համաձայնագրի 10-րդ և 11-րդ հոդվածներով նախատեսված չափանիշներին հատուկ սուբսիդիայի համապատասխանությունը կամ անհամապատասխանությունը սահմանելու նպատակով (այսուհետ՝ վերլուծություն).

2) խորհրդակցությունների անցկացում՝ սույն համաձայնագրի 8-րդ հոդվածին համապատասխան.

3) սույն համաձայնագրի 10-րդ և 11-րդ հոդվածներով նախատեսված չափանիշներին հատուկ սուբսիդիայի համապատասխանության կամ անհամապատասխանության վերաբերյալ եզրակացության նախապատրաստում՝ հատուկ սուբսիդիաների համաձայնեցման արդյունքներով (այսուհետ՝ համաձայնեցման արդյունքներով եզրակացություն):

5. Հատուկ սուբսիդիաների համաձայնեցման ընթացակարգի շրջանակներում պատասխանատու դեպարտամենտի կողմից չի անցկացվում վերլուծություն՝ անդամ պետություններից որևէ մեկի կողմից հատուկ սուբսիդիայի տրամադրման հետևանքով անդամ պետությունների ազգային տնտեսության ճյուղին հասցված նյութական վնասի, ազգային տնտեսության ճյուղին նյութական վնաս հասցնելու վտանգի կամ շահերի կոպիտ ոտնահարման առկայության մասով:

6. Հատուկ սուբսիդիայի համաձայնեցման արդյունքներով Հանձնաժողովի կողմից ընդունվում է հատուկ սուբսիդիայի թույլատրելիության կամ անթույլատրելիության մասին որոշում՝ սույն համաձայնագրի 9-րդ հոդվածին համապատասխան՝ բացառությամբ սույն համաձայնագրի 9-րդ հոդվածի 4-րդ կետով նախատեսված դեպքի:

Հոդված 5

Հատուկ սուբսիդիաների համաձայնեցման մասին անդամ պետությունների դիմումների ուսումնասիրումը Հանձնաժողովի կողմից

1. Տրամադրման համար նախատեսված կամ տրամադրված հատուկ սուբսիդիայի համաձայնեցումն իրականացվում է Հանձնաժողով ուղարկվող՝ լիազորված մարմնի հատուկ սուբսիդիայի համաձայնեցման մասին դիմումի (այսուհետ՝ համաձայնեցման մասին դիմում) հիման վրա: Պատասխանատու դեպարտամենտը մյուս անդամ պետությունների լիազորված մարմիններին տեղեկացնում է Հանձնաժողովում համաձայնեցման մասին դիմումն ստանալու մասին՝ Հանձնաժողովում դրա գրանցման օրվանից 5 աշխատանքային օրվա ընթացքում:

2. Համաձայնեցման մասին դիմումի մեջ նշվում է հետևյալ տեղեկատվությունը՝

1) համաձայնեցման մասին դիմումն ուղարկած լիազորված մարմնի մասին տեղեկություններ.

2) սուբսիդիայի իրացման համար պատասխանատու լիազորված մարմնի (անդամ պետության կողմից լիազորված կառույցի) մասին տեղեկություններ.

3) հատուկ սուբսիդիայի տրամադրումը նախատեսող նորմատիվ իրավական ակտի (նորմատիվ իրավական ակտի նախագծի) մասին տեղեկություններ (վավերապայմանները և անվանումը).

4) սուբսիդիայի հատուկ լինելը հաստատող տեղեկություններ.

5) հատուկ սուբսիդիայի, դրա տրամադրման ձևի և նպատակների նկարագրությունը.

6) ֆինանսավորման աղբյուրի և հնարավոր ստացողի մասին տեղեկություններ.

7) արդյունաբերության ճյուղի և ապրանքի մասին տեղեկություններ (նշելով Եվրասիական տնտեսական միության արտաքին տնտեսական գործունեության միասնական ապրանքային անվանացանկի ծածկագիրը (այսուհետ՝ ԵԱՏՄ ԱՏԳ ԱԱ)).

8) ժամկետը, որով տրամադրվում է հատուկ սուբսիդիան.

9) հատուկ սուբսիդիայի չափը.

10) Միության ներքին շուկայի վրա հատուկ սուբսիդիայի ազդեցության մասին տեղեկություններ:

3. Համաձայնեցման մասին դիմումի ձևը և դրա լրացման կարգը հաստատվում են Հանձնաժողովի խորհրդի կողմից։

4. Համաձայնեցման մասին դիմումն ուղարկած լիազորված մարմնի կողմից սույն հոդվածի 2-րդ կետով նախատեսված փաստաթղթերն ու տեղեկություններն ամբողջ ծավալով ներկայացնելու դեպքում պատասխանատու դեպարտամենտը՝ Հանձնաժողովում համաձայնեցման մասին դիմումի գրանցման օրվանից 10 աշխատանքային օրը չգերազանցող ժամկետում ընդունում է համաձայնեցման ընթացակարգն սկսելու մասին որոշում և համապատասխան ծանուցում է ուղարկում լիազորված մարմիններին։

5. Հատուկ սուբսիդիայի համաձայնեցման ընթացակարգն սկսելու մասին ծանուցումը պետք է պարունակի՝

1) համաձայնեցման մասին դիմում ներկայացրած անդամ պետության անվանումը.

2) տեղեկություններ անդամ պետության այն վարչատարածքային միավորի մասին, որտեղ պլանավորվում է հատուկ սուբսիդիայի տրամադրումը կամ այն արդեն տրամադրվել է.

3) համաձայնեցման մասին դիմումն ուղարկած լիազորված մարմնի անվանումը.

4) հատուկ սուբսիդիայի հակիրճ նկարագրությունը, դրա տրամադրման նպատակների և հնարավոր ստացողի մասին տեղեկություններ.

5) հատուկ սուբսիդիայի տրամադրումը նախատեսող նորմատիվ իրավական ակտի (նորմատիվ իրավական ակտի նախագծի) մասին տեղեկություններ (վավերապայմանները և անվանումը).

6) տեղեկություններ արդյունաբերության ճյուղի և ապրանքի մասին (նշելով ԵԱՏՄ ԱՏԳ ԱԱ ծածկագիրը).

7) ժամկետը, որով տրամադրվում է հատուկ սուբսիդիան.

8) հատուկ սուբսիդիայի չափը։

6. Համաձայնեցման մասին դիմումն ուղարկած լիազորված մարմնի կողմից սույն հոդվածի 2-րդ կետով նախատեսված փաստաթղթերն ու տեղեկություններն ամբողջ ծավալով չներկայացվելու դեպքում պատասխանատու դեպարտամենտը՝ Հանձնաժողովում համաձայնեցման մասին դիմումի գրանցման օրվանից 10 աշխատանքային օրը չգերազանցող ժամկետում այդ լիազորված մարմնից պահանջում է բացակայող փաստաթղթերը և (կամ) տեղեկությունները։ Հարցումը համարվում է լիազորված մարմնի կողմից ստացված` հարցումը փոստային կապի միջոցով ուղարկելու օրվանից 7 օրացուցային օրը լրանալուց հետո:

Համաձայնեցման մասին դիմումն ուղարկած լիազորված մարմինը՝ նշված հարցումն ստանալու օրվանից 30 օրացուցային օրը չգերազանցող ժամկետում ներկայացնում է բացակայող փաստաթղթերը և (կամ) տեղեկությունները։

Այն դեպքում, երբ համաձայնեցման մասին դիմումն ուղարկած լիազորված մարմինը չի կարող սահմանված ժամկետում ներկայացնել պատասխանատու դեպարտամենտի կողմից պահանջվող փաստաթղթերը և (կամ) տեղեկությունները, նշված ժամկետը կարող է պատասխանատու դեպարտամենտի կողմից երկարաձգվել 30 օրացուցային օրով՝ այդ լիազորված մարմնի հիմնավորված և գրավոր շարադրված խնդրանքով:

Պատասխանատու դեպարտամենտը Հանձնաժողովում բացակայող փաստաթղթերի և (կամ) տեղեկությունների գրանցման օրվանից 5 աշխատանքային օրվա ընթացքում ընդունում է համաձայնեցման ընթացակարգն սկսելու մասին որոշում և այդ մասին ծանուցում է լիազորված մարմիններին։

Բացակայող փաստաթղթերը և (կամ) տեղեկությունները սույն կետի երկրորդ պարբերությամբ սահմանված ժամկետում կամ սույն կետի երրորդ պարբերությանը համապատասխան պատասխանատու դեպարտամենտի կողմից սահմանված ժամկետում լիազորված մարմնի կողմից չներկայացնելը հիմք է դիմումը մերժելու համար։ Այդ դեպքում պատասխանատու դեպարտամենտն այդ մասին ծանուցում է համաձայնեցման մասին դիմումն ուղարկած լիազորված մարմնին։

7. Համաձայնեցման մասին դիմումը կարող է հետ կանչվել այն ուղարկած լիազորված մարմնի կողմից՝ մինչև Հանձնաժողովի կոլեգիայի կողմից որոշում ընդունելը։

Հոդված 6

Հատուկ սուբսիդիայի համաձայնեցման ընթացակարգի անցկացումը մերժելը

1. Պատասխանատու դեպարտամենտը մերժում է հատուկ սուբսիդիայի համաձայնեցման ընթացակարգի անցկացումը հետևյալ հիմքերից մեկի առկայության դեպքում՝

1) անդամ պետության կողմից` համաձայնեցման ընթացակարգի առարկա հանդիսացող հատուկ սուբսիդիայի տրամադրումը հանգեցրել է այլ անդամ պետության ազգային տնտեսության ճյուղին նյութական վնաս պատճառելուն կամ այլ անդամ պետության ազգային տնտեսության ճյուղին նյութական վնաս պատճառելու վտանգին, որն ապացուցվել է Արձանագրության V բաժնին կամ սույն համաձայնագրի IV բաժնին համապատասխան.

2) անդամ պետության կողմից` համաձայնեցման ընթացակարգի առարկա հանդիսացող հատուկ սուբսիդիայի տրամադրումը հանգեցրել է անդամ պետություններից որևէ մեկի շահերի կոպիտ ոտնահարման, որն ապացուցվել է Արձանագրության V բաժնին կամ սույն համաձայնագրի IV բաժնին համապատասխան.

3) հատուկ սուբսիդիան, որի համաձայնեցման համար դիմել է լիազորված մարմինը, Արձանագրության V բաժնով նախատեսված ուսումնասիրության առարկա է կամ սույն համաձայնագրի IV բաժնով նախատեսված քննության առարկա:

2. Պատասխանատու դեպարտամենտը Հանձնաժողովում համաձայնեցման մասին դիմումի գրանցման օրվանից 10 աշխատանքային օրվա ընթացքում համաձայնեցման մասին դիմումն ուղարկած լիազորված մարմնին և մյուս լիազորված մարմիններին տեղեկացնում է հատուկ սուբսիդիայի համաձայնեցման ընթացակարգի անցկացումը մերժելու մասին (նշելով մերժելու հիմքերը):

Հոդված 7

Վերլուծության անցկացումը

1. Հատուկ սուբսիդիայի համաձայնեցման ընթացակարգն սկսելու մասին որոշում ընդունելուց հետո պատասխանատու դեպարտամենտը վերլուծություն է անցկացնում:

Վերլուծության անցկացման ընթացքում պատասխանատու դեպարտամենտն ապահովում է խորհրդակցությունների անցկացումը՝ սույն համաձայնագրի 8-րդ հոդվածին համապատասխան:

2. Լիազորված մարմինները կարող են Հանձնաժողով ներկայացնել՝ Հանձնաժողովի կողմից վերլուծություն անցկացնելու և հատուկ սուբսիդիայի թույլատրելիության կամ անթույլատրելիության մասին որոշում ընդունելու համար անհրաժեշտ լրացուցիչ տեղեկատվություն՝ համաձայնեցման ընթացակարգի անցկացման ամբողջ ժամանակահատվածում, այդ թվում՝ պատասխանատու դեպարտամենտի հարցմամբ։

3. Պատասխանատու դեպարտամենտի կողմից վերլուծություն անցկացնելու և հատուկ սուբսիդիայի համաձայնեցման արդյունքներով եզրակացություն նախապատրաստելու ժամկետը կազմում է 30 աշխատանքային օր՝ հատուկ սուբսիդիայի համաձայնեցման ընթացակարգ սկսելու մասին ծանուցումը պատասխանատու դեպարտամենտի կողմից լիազորված մարմինների հասցեով ուղարկելու օրվանից սկսած:

4. Վերլուծության անցկացման արդյունքներով պատասխանատու դեպարտամենտը հատուկ սուբսիդիայի համաձայնեցման արդյունքներով եզրակացություն է նախապատրաստում (հատուկ սուբսիդիայի տրամադրումը նախատեսող նորմատիվ իրավական ակտի (նորմատիվ իրավական ակտի նախագծի) առնչությամբ համապատասխան ապացույցների և առաջարկությունների (անհրաժեշտության դեպքում) շարադրմամբ):

Հոդված 8

Խորհրդակցությունների անցկացումը

1. Հատուկ սուբսիդիայի համաձայնեցման շրջանակներում լիազորված մարմինն իրավունք ունի նախաձեռնելու խորհրդակցությունների անցկացում Հանձնաժողովի հարթակում ՝ համապատասխան առաջարկը Հանձնաժողով ուղարկելու միջոցով: Պատասխանատու դեպարտամենտն այդ մասին տեղեկացնում է մյուս անդամ պետությունների լիազորված մարմիններին և ապահովում է խորհրդակցությունների անցկացումը։

2. Խորհրդակցությունների ժամանակ դիմումատու պետության լիազորված մարմնի ներկայացուցչի բացակայության դեպքում խորհրդակցությունները չեն անցկացվում:

Խորհրդակցությունների ժամանակ այլ անդամ պետությունների լիազորված մարմինների՝ խորհրդակցությունների անցկացման օրվա, վայրի և ժամանակի մասին տեղեկացված ներկայացուցիչների բացակայությունը խորհրդակցությունների անցկացման համար խոչընդոտ չէ։

3. Լիազորված մարմինների ներկայացուցիչները խորհրդակցությունների անցկացման ընթացքում կարող են ներկայացնել քննարկվող հարցի վերաբերյալ համապատասխան լիազորված մարմինների դիրքորոշումը հաստատող լրացուցիչ տեղեկատվություն և պարզաբանումներ:

Լիազորված մարմնի դիրքորոշումը կցվում է խորհրդակցությունների արձանագրությանը (խորհրդակցությունների անցկացման օրվանից 5 աշխատանքային օրվա ընթացքում այն Հանձնաժողով ներկայացնելու դեպքում):

4. Խորհրդակցությունների արձանագրությունը ստորագրվում է պատասխանատու դեպարտամենտի ղեկավարի (ղեկավարի տեղակալի) կողմից և խորհրդակցությունների անցկացման օրվանից 7 աշխատանքային օրվա ընթացքում ուղարկվում լիազորված մարմիններ։

Հոդված 9

Հատուկ սուբսիդիայի թույլատրելիության կամ անթույլատրելիության մասին որոշում ընդունելը

1. Հատուկ սուբսիդիայի թույլատրելիության կամ անթույլատրելիության մասին որոշումն ընդունվում է Հանձնաժողովի կոլեգիայի կողմից՝ հատուկ սուբսիդիայի համաձայնեցման արդյունքներով եզրակացության հիման վրա:

2. Այն դեպքում, երբ հատուկ սուբսիդիան համապատասխանում է սույն համաձայնագրի 10-րդ հոդվածով նախատեսված չափանիշներին, Հանձնաժողովի կոլեգիան որոշում է ընդունում հատուկ սուբսիդիայի անթույլատրելիության մասին:

3. Այն դեպքում, երբ հատուկ սուբսիդիան չի համապատասխանում սույն համաձայնագրի 10-րդ հոդվածով նախատեսված չափանիշներին և համապատասխանում է սույն համաձայնագրի 11-րդ հոդվածով նախատեսված չափանիշներից մեկին կամ մի քանիսին, Հանձնաժողովի կոլեգիան որոշում է ընդունում հատուկ սուբսիդիայի թույլատրելիության մասին:

4. Այն դեպքում, երբ հատուկ սուբսիդիան չի համապատասխանում սույն համաձայնագրի 10-րդ հոդվածով նախատեսված չափանիշներին և չի համապատասխանում սույն համաձայնագրի 11-րդ հոդվածով նախատեսված չափանիշներից ոչ մեկին, Հանձնաժողովի կոլեգիայի՝ արդյունաբերության հարցերով համակարգող անդամն այդ մասին զեկուցում է Հանձնաժողովի կոլեգիայի նիստի ժամանակ, և այդպիսի սուբսիդիայի թույլատրելիության կամ անթույլատրելիության մասին որոշում չի ընդունվում։

Տվյալ դեպքում դիմումն ուղարկած լիազորված մարմնի գրավոր դիմումի առկայության դեպքում պատասխանատու դեպարտամենտն իրականացնում է վերլուծություն՝ այդպիսի հատուկ սուբսիդիայի տրամադրման հետևանքով ազգային տնտեսության ճյուղին նյութական վնաս հասցնելու վտանգի առկայության մասով։

Սույն կետի երկրորդ պարբերությամբ նախատեսված վերլուծության անցկացման կարգը սահմանվում է Հանձնաժողովի խորհրդի կողմից:

5. Սույն հոդվածի 4-րդ կետով նախատեսված վերլուծության արդյունքներով հատուկ սուբսիդիայի թույլատրելիության կամ անթույլատրելիության այլ չափանիշների սահմանման հարցը, որոնց համապատասխան Հանձնաժողովի կոլեգիան ընդունում է սույն հոդվածի 4-րդ կետում նշված հատուկ սուբսիդիայի թույլատրելիության կամ անթույլատրելիության մասին որոշումը, սահմանված կարգով ներկայացվում է Եվրասիական միջկառավարական խորհրդի նիստում քննարկման:

III. Հատուկ սուբսիդիայի թույլատրելիությունը կամ անթույլատրելիությունը

Հոդված 10

Հատուկ սուբսիդիայի անթույլատրելիության չափանիշները

1. Հատուկ սուբսիդիայի անթույլատրելիության չափանիշ է հատուկ սուբսիդիայի տրամադրում նախատեսող նորմատիվ իրավական ակտում (նորմատիվ իրավական ակտի նախագծում) Արձանագրության 9-րդ, 11-րդ և 14-րդ կետերով սահմանված արգելված սուբսիդիաների առկայության մասին վկայող դրույթների պարունակությունը:

2. Եվրասիական միջկառավարական խորհրդի կողմից կարող են սահմանվել հատուկ սուբսիդիաների անթույլատրելիության այլ չափանիշներ:

Հոդված 11

Հատուկ սուբսիդիայի թույլատրելիության չափանիշները

1. Հատուկ սուբսիդիան թույլատրելի է, եթե այն համապատասխանում է հետևյալ չափանիշներից մեկին կամ մի քանիսին՝

1) հատուկ սուբսիդիան սակավանշանակ է (մեկ ստացողի (ձեռնարկության) հաշվով 100 հազ. դոլարի չափով).

2) հատուկ սուբսիդիան ուղղված է համատեղ նախագծի իրագործմանը, այդ թվում՝ Եվրասիական միջկառավարական խորհրդի կողմից հաստատվող՝ Միության շրջանակներում արդյունաբերական համագործակցության հիմնական ուղղություններին համապատասխան: Այդպիսի համատեղ նախագծերը պետք է ուղղված լինեն այնպիսի արտադրանքի արտադրությանը, որը Միության մաքսային տարածքում չի արտադրվում կամ արտադրվում է ոչ բավարար քանակությամբ.

3) հատուկ սուբսիդիան ուղղված է գիտահետազոտական և փորձակոնստրուկտորական, այդ թվում՝ համատեղ աշխատանքների անցկացմանը՝ բարձր տեխնոլոգիական արտադրությունները խթանելու նպատակով.

4) հատուկ սուբսիդիան ուղղված է նորարարական գործունեությանը.

5) հատուկ սուբսիդիան ուղղված է Միության մաքսային տարածքում նույնանմանը չունեցող արդյունաբերական ապրանքի արտադրությանը.

6) հատուկ սուբսիդիան ուղղված է արդյունաբերական այն ապրանքի (որի ծածկագիրը սահմանված է ԵԱՏՄ ԱՏԳ ԱԱ-ի 10 նիշի մակարդակով) արտադրությանը, որը Միության մաքսային տարածքում արտադրվում է ոչ բավարար քանակությամբ.

7) հատուկ սուբսիդիան ուղղված է տարերային աղետների կամ որևէ այլ արտակարգ պատահարների հետևանքով պատճառված նյութական վնասի փոխհատուցմանն այն չափով, որն անհրաժեշտ է պատճառված վնասը փոխհատուցելու համար.

8) հատուկ սուբսիդիան ուղղված է ձեռնարկություններին օգնության ցուցաբերմանը՝ խորհրդատվական ծառայությունների, առևտրային տոնավաճառներում մասնակցության կազմակերպման հարցերով ծառայությունների, հիմնարար հետազոտությունների անցկացման (այդ թվում` մեծամասշտաբ), կիրառական արդյունաբերական մշակումների իրագործման (դրանց արժեքի մինչև 70 տոկոսը), արդյունաբերական սեփականության լիցենզիաներ և իրավունքներ ստանալու համար կատարված ծախսերի (այն չափով, որը հավասար է գիտահետազոտական աշխատանքների անցկացման ծախսերին, որոնց արդյունքը եղել է այդ իրավունքներն ստանալը) արժեքի մինչև կեսի չափով վճարման մասով։

Այդպիսի ձեռնարկությունների աշխատողների միջին ցուցակային թիվը սահմանվում է Հանձնաժողովի խորհրդի կողմից.

9) հատուկ սուբսիդիան ուղղված է ձեռնարկությունների աշխատակիցների մասնագիտական որակավորման մակարդակի բարձրացման հարցում օգնության ցուցաբերմանը: Այն ծրագրերի սուբսիդավորումը, որոնց նպատակը ձեռնարկությունների աշխատակիցների մասնագիտական պատրաստվածության ընդհանուր մակարդակը բարձրացնելն է, սահմանվում է դրանց արժեքի 50 տոկոսի սահմաններում այն ձեռնարկությունների համար, որոնց աշխատողների միջին ցուցակային թիվը նախորդ օրացուցային տարվա կտրվածքով գերազանցում է 250-ը, և 70 տոկոսի սահմաններում այն ձեռնարկությունների համար, որոնց աշխատողների միջին ցուցակային թիվը նախորդ օրացուցային տարվա կտրվածքով չի գերազանցում 250-ը.

10) հատուկ սուբսիդիան ուղղված է ոչ կայուն կամ ճգնաժամային ֆինանսական վիճակում գտնվող և վերակազմավորվող ձեռնարկություններին օգնության ցուցաբերմանը:

Թույլատրվում է սուբսիդավորել այն ձեռնարկությունները, որոնք ապացուցել են իրենց ոչ կայուն կամ ճգնաժամային ֆինանսական վիճակը։

Ոչ կայուն ֆինանսական վիճակը բնութագրվում է ֆինանսական կարգապահության խախտմամբ (աշխատանքի վարձատրության ուշացում, պահուստային ֆոնդից դրամական միջոցների օգտագործում և այլն), ձեռնարկության հաշվարկային հաշիվներին դրամական միջոցների մուտքի և վճարումների ընդհատումներով, հասույթի անկանոն մուտքով, շահույթի բացակայությամբ։

Ճգնաժամային ֆինանսական վիճակը բնութագրվում է սույն ենթակետի երրորդ պարբերության մեջ նշված ոչ կայուն վիճակի նշանների հետ մեկտեղ՝ կանոնավոր չկատարվող վճարումների (բանկերի ժամկետանց փոխատվությունների, մատակարարների նկատմամբ ապրանքանյութական արժեքների դիմաց ունեցած պարտքերի, բյուջեներ և արտաբյուջետային ֆոնդեր կատարվող վճարների գծով ապառքների) առկայությամբ։

Կազմակերպությունները կարող են ստանալ սուբսիդիաներ ֆինանսական կայունության վերականգնման և վերակազմավորման համար՝ դրանց պետական գրանցման օրվանից 3 տարին լրանալուց հետո:

Վերակազմավորման գործում ձեռնարկության սեփական ֆինանսական ներդրումը պետք է կազմի 25 տոկոսից ոչ պակաս, եթե Հանձնաժողովի խորհրդի որոշմամբ այլ բան նախատեսված չէ:

Այդպիսի սուբսիդիան կարող է համաձայնեցվել ձեռնարկությունը ճգնաժամային վիճակից կայուն վիճակի անցնելու համար անհրաժեշտ ժամկետով, սակայն 5 տարուց ոչ ավելի.

11) հատուկ սուբսիդիան տրամադրվում է Արձանագրության VII բաժնով նախատեսված նպատակներով և պայմաններով.

12) հատուկ սուբսիդիան ուղղված է ձևավորման նախնական փուլում գտնվող ձեռնարկություններին օգնության ցուցաբերմանը, եթե սուբսիդավորման մակարդակը չի գերազանցում կապիտալ ներդրումների ընդհանուր գումարի 30 տոկոսը.

13) հատուկ սուբսիդիան ուղղված է օգնության ցուցաբերմանը՝ գոյություն ունեցող արտադրական հզորությունները Միության ստանդարտներին հարմարեցնելու նպատակով՝

արտադրանքի փորձարկումների անցկացման համար կատարված ծախսերի փոխհատուցմանը՝ Միության տեխնիկական կանոնակարգերի պահանջներին դրա համապատասխանության գնահատումը կատարելու նպատակով.

փորձարկման լաբորատորիաների կառուցման և արդիականացման համար կատարված ծախսերի փոխհատուցմանը.

14) հատուկ սուբսիդիան ուղղված է օգնության ցուցաբերմանը՝ համապատասխան միջազգային ստանդարտների կամ դրանց հիման վրա ընդունված, համապատասխան միջազգային ստանդարտների հետ նույնական միջպետական ստանդարտների պահանջներին արդյունաբերական արտադրանքի համապատասխանությունն ապահովելու նպատակով.

15) հատուկ սուբսիդիան տրամադրվում է այն արդյունաբերական ապրանքի առնչությամբ, որը ճանաչվել է անդամ պետությունների կողմից համատեղ արտադրված՝ Հանձնաժողովի կողմից սահմանվող կարգին համապատասխան:

2. Սույն հոդվածի 1-ին կետի 1-4-րդ, 6-10-րդ, 12-րդ և 15-րդ ենթակետերում նշված չափանիշների կիրառման պայմանները սահմանվում են Հանձնաժողովի խորհրդի կողմից:

3. Եվրասիական միջկառավարական խորհրդի կողմից կարող են սահմանվել հատուկ սուբսիդիաների թույլատրելիության այլ չափանիշներ։

Հոդված 12

Տեղեկատվություն ստանալու կարգը

1. Հանձնաժողովը, Պայմանագրի 93-րդ հոդվածի 6-րդ կետին համապատասխան, իրականացնում է անդամ պետությունների օրենսդրության դիտանցումն ու համեմատական-իրավական վերլուծության անցկացումը՝ սուբսիդիաների տրամադրման առնչությամբ Պայմանագրի դրույթներին համապատասխանության մասով։

2. Սուբսիդիաների տրամադրման առնչությամբ Պայմանագրի դրույթներին համապատասխանության մասով անդամ պետությունների օրենսդրության դիտանցումն ու համեմատական-իրավական վերլուծության անցկացումն իրականացնելու նպատակով լիազորված մարմինները՝

ամեն տարի՝ հաշվետու տարվան հաջորդող տարվա հուլիսի 1-ից ոչ ուշ, Հանձնաժողով են ներկայացնում Հանձնաժողովի հետ համաձայնեցված, տրամադրված հատուկ սուբսիդիաների մասին ծանուցում.

եռամսյա պարբերականությամբ՝ հաշվետու եռամսյակին հաջորդող ամսվա 30-ից ոչ ուշ, Հանձնաժողով և մեկը մյուսին են ուղարկում հաշվետու եռամսյակում ընդունված այն նորմատիվ իրավական ակտերը, որոնցով նախատեսվում է հատուկ սուբսիդիաների տրամադրումը.

միջգերատեսչական համաձայնեցում իրականացնելուց հետո պարտադիր տեղեկացման կարգով Հանձնաժողով և մեկը մյուսին են ուղարկում այն նորմատիվ իրավական ակտերի նախագծերը, որոնցով նախատեսվում է հատուկ սուբսիդիաների տրամադրումը Միության շրջանակներում արդյունաբերական համագործակցության՝ Եվրասիական միջկառավարական խորհրդի կողմից հաստատվող հիմնական ուղղություններին համապատասխան զգայուն ապրանքների շարքին դասվող ապրանքներ արտադրողներին։

Հատուկ սուբսիդիաների տրամադրում նախատեսող և բաց աղբյուրներում հրապարակված նորմատիվ իրավական ակտերի առնչությամբ լիազորված մարմինները Հանձնաժողով են ուղարկում այդ ակտերի հրապարակման վավերապայմաններ և աղբյուրներ պարունակող տեղեկատվություն, իսկ չհրապարակված նորմատիվ իրավական ակտերի առնչությամբ՝ այդ ակտերի տեքստերը։

3. Հանձնաժողովը սահմանված կարգով անցկացնում է անդամ պետությունների՝ հատուկ սուբսիդիաների տրամադրում նախատեսող նորմատիվ իրավական ակտերի համեմատական-իրավական վերլուծություն՝ Պայմանագրի 93-րդ հոդվածին և Արձանագրությանը դրանց համապատասխանության մասով։

4. Անդամ պետության կողմից Հանձնաժողովի հետ համաձայնեցված հաշվետու ժամանակաշրջանում հատուկ սուբսիդիա չտրամադրելու փաստը բացահայտելու դեպքում պատասխանատու դեպարտամենտն այդ մասին ծանուցում է անդամ պետություններին։

5. Անդամ պետությունն իրավունք ունի դիմելու Հանձնաժողով՝ դիմող անդամ պետության՝ սուբսիդիաների տրամադրում նախատեսող նորմատիվ իրավական ակտերի կամ նորմատիվ իրավական ակտերի նախագծերի՝ Պայմանագրի 93-րդ հոդվածին և Արձանագրությանը դրանց համապատասխանության մասով համեմատական-իրավական վերլուծությունը Հանձնաժողովի կողմից սահմանվող կարգով անցկացնելու առաջարկով:

6. Սույն հոդվածի 2-րդ կետի երկրորդ պարբերությամբ նախատեսված ծանուցման մեջ նշվում են՝

1) Հանձնաժողովի կոլեգիայի՝ հատուկ սուբսիդիայի թույլատրելիության մասին որոշման վավերապայմանները.

2) այն չափանիշները, որոնց հիման վրա համաձայնեցվել է հատուկ սուբսիդիան.

3) այն նորմատիվ իրավական ակտի անվանումը, որին համապատասխան տրամադրվել է հատուկ սուբսիդիան.

4) այն ժամանակահատվածը, որի ընթացքում տրամադրվում են տեղեկությունները.

5) հատուկ սուբսիդիայի ձևի և դրա տրամադրման նպատակի նկարագրությունը.

6) հատուկ սուբսիդիա ստացողի և դրա տրամադրման եղանակի վերաբերյալ տեղեկություններ.

7) չափը և ժամկետը, որով տրամադրվում է հատուկ սուբսիդիան։

7. Հանձնաժողովի հետ համաձայնեցված հատուկ սուբսիդիաների տրամադրման մասին ծանուցման ձևը, ինչպես նաև դրա լրացման կարգը հաստատվում են Հանձնաժողովի խորհրդի կողմից։

IV. Քննությունների անցկացումը

Հոդված 13

Քննություն սկսելու հիմքերը

Անդամ պետությունը կարող է դիմել Հանձնաժողով քննություն սկսելու մասին դիմումով՝ հետևյալ հիմքերի առկայության դեպքում՝

այլ անդամ պետության կողմից հատուկ սուբսիդիայի տրամադրման հետևանքով ազգային տնտեսության ճյուղին նյութական վնաս հասցնելը.

այլ անդամ պետության կողմից հատուկ սուբսիդիայի տրամադրման հետևանքով ազգային տնտեսության ճյուղին նյութական վնաս հասցնելու վտանգը.

այլ անդամ պետության կողմից հատուկ սուբսիդիայի տրամադրման հետևանքով անդամ պետության շահերի կոպիտ ոտնահարումը։

Հոդված 14

Քննություն սկսելու մասին որոշում ընդունելը

1. Քննության անցկացումն իրականացվում է Հանձնաժողովի կողմից՝ անդամ պետության լիազորված մարմնի՝ գաղտնի կամ ոչ գաղտնի տարբերակներով (եթե դիմումը պարունակում է գաղտնի տեղեկատվություն) Հանձնաժողով ներկայացրած՝ քննություն սկսելու մասին դիմումի հիման վրա (այսուհետ՝ քննություն սկսելու մասին դիմում):

2. Քննություն սկսելու մասին դիմումի մեջ նշվում են՝

1) դիմումատու պետության լիազորված մարմնի անվանումը.

2) սուբսիդավորվող ապրանքի անվանումը և նկարագրությունը.

3) այն նորմատիվ իրավական ակտերի ցանկը, որոնց հիման վրա տրամադրվում է հատուկ սուբսիդիան.

4) հատուկ սուբսիդիայի բնույթի և չափի վերաբերյալ տեղեկություններ.

5) սուբսիդավորվող ապրանք արտադրողների վերաբերյալ տեղեկություններ.

6) նույնանման ապրանքի ազգային արտադրողների վերաբերյալ տեղեկություններ.

7) տեղեկություններ դիմումատու պետության տարածք սուբսիդավորվող ապրանքի ներմուծման ծավալի փոփոխության վերաբերյալ՝ դիմումը ներկայացնելու օրվան նախորդող 3 օրացուցային տարվա ընթացքում.

8) տեղեկություններ դիմումատու պետության տարածքից այլ անդամ պետությունների տարածքներ նույնանման ապրանքի արտահանման ծավալի փոփոխության վերաբերյալ՝ դիմումը ներկայացնելու օրվան նախորդող 3 օրացուցային տարվա ընթացքում.

9) տեղեկություններ դիմումատու պետության տարածքում նույնանման ապրանքի արտադրության առկայության և ծավալի վերաբերյալ (քանակական և արժեքային արտահայտությամբ)` դիմումը ներկայացնելու օրվան նախորդող 3 օրացուցային տարվա ընթացքում.

10) տեղեկություններ այլ անդամ պետությունների տարածքներում նույնանման ապրանքի արտադրության առկայության վերաբերյալ՝ դիմումը ներկայացնելու օրվան նախորդող 3 օրացուցային տարվա ընթացքում.

11) ապացույցներ այլ անդամ պետության կողմից հատուկ սուբսիդիա տրամադրելու հետևանքով անդամ պետության ազգային տնտեսության ճյուղին հասցված նյութական վնասի, ազգային տնտեսության ճյուղին նյութական վնաս հասցնելու վտանգի կամ անդամ պետության շահերի կոպիտ ոտնահարման առկայության մասին.

12) տեղեկություններ Միության մաքսային տարածք նույնանման ապրանքի ներմուծման ծավալի փոփոխության վերաբերյալ՝ դիմումը ներկայացնելու օրվան նախորդող 3 օրացուցային տարվա ընթացքում.

13) տեղեկություններ Միության մաքսային տարածքից նույնանման ապրանքի արտահանման ծավալի փոփոխության վերաբերյալ (քանակական և արժեքային արտահայտությամբ)՝ դիմումը ներկայացնելու օրվան նախորդող 3 օրացուցային տարվա ընթացքում.

14) այլ գործոններ, որոնք վերլուծվող ժամանակահատվածում կարող էին ազդեցություն ունենալ ազգային տնտեսության ճյուղի վրա.

15) դիմումատու պետության լիազորված մարմնի՝ քննություն սկսելու համար հիմք հանդիսացող եզրահանգումները։

3. Քննություն սկսելու մասին դիմումի մեջ ներկայացված տեղեկությունները պետք է ուղեկցվեն դրանց ստացման աղբյուրին հղումով։

4. Քննություն սկսելու մասին դիմումի ձևը, ինչպես նաև դրա լրացման կարգը հաստատվում են Հանձնաժողովի խորհրդի կողմից։

5. Քննություն սկսելու մասին դիմումի մեջ պարունակվող արժեքային ցուցանիշները նշելիս համադրելիության նպատակով կիրառվում է Հանձնաժողովի կողմից՝ անդամ պետությունների արտաքին և փոխադարձ առևտրի վիճակագրությունը վարելու համար սահմանված դրամական միավորը։

6. Քննություն սկսելու մասին դիմումը ներկայացնելու օր է համարվում այն Հանձնաժողովում գրանցելու օրը։

7. Քննություն սկսելու մասին դիմումը Հանձնաժողովում գրանցելու օրվանից 3 աշխատանքային օրվա ընթացքում պատասխանատու դեպարտամենտն այդպիսի դիմում ստանալու մասին գրավոր ծանուցում է այն անդամ պետության լիազորված մարմնին, որի տարածքում տրամադրվում է հատուկ սուբսիդիան։

8. Պատասխանատու դեպարտամենտն ուսումնասիրում է քննություն սկսելու մասին դիմումի մեջ պարունակվող ապացույցների ու տեղեկությունների բավարար լինելը։

Դիմումատու պետության լիազորված մարմնի կողմից սույն հոդվածի 2-րդ կետով նախատեսված տեղեկությունների ամբողջ ցանկը չներկայացվելու դեպքում պատասխանատու դեպարտամենտն իրավունք ունի պահանջելու բացակայող նյութերն ու տեղեկությունները քննություն սկսելու մասին դիմումը Հանձնաժողովում գրանցելու օրվանից 5 աշխատանքային օրվա ընթացքում։

Բացակայող նյութերն ու տեղեկությունները ներկայացնելու վերաբերյալ հարցումը համարվում է ստացված դիմումատու պետության լիազորված մարմնի կողմից՝ փոստային կապով հարցումն ուղարկելու օրվանից 7 օրացուցային օրը լրանալուց հետո։

Դիմումատու պետության լիազորված մարմինը նշված հարցումն ստանալու օրվանից 15 աշխատանքային օրը չգերազանցող ժամկետում ներկայացնում է բացակայող տեղեկությունները։

9. Սույն հոդվածի 2-րդ կետով նախատեսված տեղեկությունները չներկայացնելը կամ ոչ ամբողջ ծավալով ներկայացնելը քննություն սկսելու մասին դիմումը մերժելու հիմք է, ինչի մասին դիմումատու պետության լիազորված մարմինը և սուբսիդավորող անդամ պետության լիազորված մարմինը ծանուցվում են պատասխանատու դեպարտամենտի կողմից՝ այդպիսի որոշում ընդունելու օրվանից 5 աշխատանքային օրը չգերազանցող ժամկետում։

Քննություն սկսելու մասին դիմումը մերժելու մասին որոշումը պատասխանատու դեպարտամենտի կողմից ընդունվում է դիմումի գրանցման օրվանից 45 աշխատանքային օրը չգերազանցող ժամկետում։

10. Քննության անցկացումը մերժելու մասին որոշումն ընդունվում է այն դեպքում, երբ քննություն սկսելու մասին դիմումի ուսումնասիրման արդյունքում հայտնաբերվել է, որ սույն հոդվածի 2-րդ կետով նախատեսված տեղեկությունները չեն վկայում այլ անդամ պետության կողմից հատուկ սուբսիդիա տրամադրելու հետևանքով անդամ պետության ազգային տնտեսության ճյուղին հասցված նյութական վնասի, ազգային տնտեսության ճյուղին նյութական վնաս հասցնելու վտանգի կամ անդամ պետության շահերի կոպիտ ոտնահարման առկայության մասին։

Քննության անցկացումը մերժելու մասին որոշում ընդունելու դեպքում պատասխանատու դեպարտամենտը ոչ ուշ, քան այդպիսի որոշում ընդունելու օրվանից 5 աշխատանքային օրվա ընթացքում քննության անցկացումը մերժելու պատճառի մասին գրավոր ծանուցում է դիմումատու պետության լիազորված մարմնին և սուբսիդավորող անդամ պետության լիազորված մարմնին։

11. Քննություն սկսելու կամ դրա անցկացումը մերժելու վերաբերյալ որոշումը պատասխանատու դեպարտամենտի կողմից ընդունվում է Հանձնաժողովում քննությունն սկսելու մասին դիմումի գրանցման օրվանից 45 աշխատանքային օրը չգերազանցող ժամկետում։

Հոդված 15.

Քննության անցկացումը

1. Քննություն սկսելու մասին որոշում ընդունելու դեպքում Հանձնաժողովը, այդպիսի որոշում ընդունելու օրվանից 5 աշխատանքային օրվա ընթացքում, սույն համաձայնագրի 17-րդ հոդվածով նախատեսված ծանուցումն ուղարկում է լիազորված մարմինների հասցեով։

2. Պատասխանատու դեպարտամենտը, քննություն սկսելու մասին որոշում ընդունելու օրվանից 5 աշխատանքային օրվա ընթացքում, սուբսիդավորող անդամ պետության լիազորված մարմին է ուղարկում քննություն սկսելու վերաբերյալ դիմումի պատճենը կամ դրա ոչ գաղտնի տարբերակը (այն դեպքում, երբ դիմումը պարունակում է գաղտնի տեղեկատվություն)։

Շահագրգիռ անդամ պետության հարցմամբ պատասխանատու դեպարտամենտը նրան տրամադրում է քննություն սկսելու վերաբերյալ դիմումի պատճենը կամ դրա ոչ գաղտնի տարբերակը (այն դեպքում, երբ դիմումը պարունակում է գաղտնի տեղեկատվություն)։

3. Քննություն սկսելու վերաբերյալ դիմումը կարող է հետ կանչվել դիմումատու պետության կողմից` նախքան քննությունն սկսելը կամ դրա անցկացման ընթացքում։

Քննություն սկսելու վերաբերյալ դիմումը համարվում է չներկայացված, եթե այն հետ է կանչվում նախքան քննությունն սկսելը։

Այն դեպքում, երբ քննություն սկսելու վերաբերյալ դիմումը հետ է կանչվում քննության անցկացման ընթացքում, քննությունը դադարեցվում է այդ մասին Հանձնաժողովի կողմից ծանուցելով լիազորված մարմիններին դիմումատու պետության՝ քննություն սկսելու վերաբերյալ դիմումը հետ կանչելու մասին դիմումը Հանձնաժողովում գրանցելու օրվանից 5 աշխատանքային օրվա ընթացքում:

4. Քննության անցկացման ժամկետը քննություն սկսելու մասին որոշում ընդունելու օրվանից չպետք է գերազանցի 9 ամիսը։

5. Քննությունն ավարտելու արդյունքներով Հանձնաժողովը լիազորված մարմինների հասցեով ուղարկում է քննությունն ավարտելու մասին ծանուցում՝ կից ներկայացնելով սույն համաձայնագրի 21-րդ հոդվածով նախատեսված եզրակացությունը։

Ծանուցման օրը համարվում է քննությունն ավարտելու օրը։

Հոդված 16.

Խորհրդակցությունների անցկացումը քննության ընթացակարգի շրջանակներում

1. Նախքան քննություն սկսելու մասին որոշում ընդունելը, ինչպես նաև քննության ամբողջ ընթացքում Հանձնաժողովի կողմից, ինչպես իր նախաձեռնությամբ, այնպես էլ դիմումատու պետության լիազորված մարմնի կամ սուբսիդավորող անդամ պետության լիազորված մարմնի առաջարկով, Հանձնաժողովի հարթակում կարող են անցկացվել խորհրդակցություններ՝ փաստական հանգամանքները հստակեցնելու կամ փոխադարձ ընդունելի որոշման հասնելու նպատակներով։

2. Պատասխանատու դեպարտամենտը լիազորված մարմիններին տեղեկացնում է խորհրդակցությունների անցկացման մասին և ապահովում դրանց անցկացումը։

3. Խորհրդակցությունների ժամանակ դիմումատու պետության լիազորված մարմնի և (կամ) սուբսիդավորող անդամ պետության լիազորված մարմնի ներկայացուցչի բացակայության դեպքում խորհրդակցությունները չեն անցկացվում։

Խորհրդակցությունների ժամանակ մյուս անդամ պետությունների լիազորված մարմինների՝ խորհրդակցությունների անցկացման օրվա, վայրի և ժամանակի մասին տեղեկացված ներկայացուցիչների բացակայությունը խորհրդակցությունների անցկացման համար խոչընդոտ չէ։

4. Լիազորված մարմինների ներկայացուցիչները խորհրդակցությունների անցկացման ընթացքում կարող են ներկայացնել քննարկվող հարցի վերաբերյալ լիազորված մարմնի դիրքորոշումը հաստատող լրացուցիչ տեղեկատվություն և պարզաբանումներ։

Խորհրդակցությունների արդյունքներով՝ լիազորված մարմնի՝ Հանձնաժողով ներկայացված դիրքորոշումը խորհրդակցությունների անցկացումից հետո 5 աշխատանքային օրվա ընթացքում կցվում է խորհրդակցությունների արձանագրությանը։

5. Խորհրդակցությունների արձանագրությունը ստորագրվում է պատասխանատու դեպարտամենտի ղեկավարի (ղեկավարի տեղակալի) կողմից և ուղարկվում լիազորված մարմիններ՝ ոչ ուշ, քան խորհրդակցությունների անցկացման օրվանից՝ 7 աշխատանքային օրվա ընթացքում։

Հոդված 17.

Քննություն անցկացնելու մասին ծանուցումը

Քննություն անցկացնելու մասին ծանուցումը պետք է պարունակի`

դիմումատու պետության լիազորված մարմնի անվանումը,

ապրանքի անվանումը և նկարագրությունը (նշելով ԵԱՏՄ ԱՏԳ ԱԱ ծածկագիրը),

քննություն անցկացնելու հարցով Հանձնաժողով դիմելու հիմնավորումների հակիրճ շարադրանքը,

էլեկտրոնային այն հասցեն, որին մյուս անդամ պետությունների լիազորված մարմինները կարող են ուղարկել քննության վերաբերյալ իրենց մեկնաբանություններն ու տեղեկատվությունը։

Հոդված 18.

Քննության ընթացքում տեղեկատվություն հավաքելը

1. Քննություն սկսելու մասին որոշում ընդունելուց հետո պատասխանատու դեպարտամենտը սուբսիդավորող անդամ պետության լիազորված մարմին և դիմումատու պետության լիազորված մարմին է ուղարկում հարցերի ցանկ (այսուհետ սույն հոդվածում՝ հարցերի ցանկ)։

Հանձնաժողովի հարցման հիման վրա հարցերի ցանկը լիազորված մարմնի կողմից ուղարկվում է սուբսիդավորվող ապրանքը կամ նույնանման ապրանքն արտադրողներին (Հանձնաժողովի կողմից կազմված՝ արտադրողների ցուցակի համաձայն)։

Հարցերի ցանկը համարվում է լիազորված մարմնի կողմից ստացված` հարցերի ցանկը փոստային կապի միջոցով ուղարկելու օրվանից 7 օրացուցային օրը լրանալուց հետո:

2. Դիմումատու պետության և սուբսիդավորող անդամ պետության լիազորված մարմինները, որոնց ուղարկվել է հարցերի ցանկը, պատասխանները ներկայացնում են Հանձնաժողով՝ իրենց կողմից հարցերի ցանկն ստանալու օրվանից 45 օրացուցային օրը չգերազանցող ժամկետում։

Դիմումատու պետության և սուբսիդավորող անդամ պետության լիազորված մարմինները, որոնց ուղարկվել է հարցերի ցանկը, ապահովում են սուբսիդավորվող ապրանքը կամ նույնանման ապրանքն արտադրողների պատասխանները ներկայացնելը Հանձնաժողով՝ իրենց կողմից հարցերի ցանկն ստանալու օրվանից 60 օրացուցային օրը չգերազանցող ժամկետում։

Լիազորված մարմինների կողմից հարցերի ցանկի առանձին կետերի վերաբերյալ տեղեկատվություն ներկայացնելու անհնարինության դեպքում Հանձնաժողով է ուղարկվում համապատասխան հիմնավորում։

3. Հանձնաժողովը, հարցերի ցանկի առանձին կետերի վերաբերյալ պատասխաններ ստանալուց հետո, կարող է հարցում ուղարկել լիազորված մարմիններ՝ քննություն անցկացնելու համար անհրաժեշտ տեղեկատվությունը ճշտելու կամ լրացուցիչ տեղեկություններ ստանալու նպատակով։ Նշված տեղեկատվությունը, այդ թվում՝ սուբսիդավորվող ապրանքը կամ նույնանման ապրանքն արտադրողների կողմից ստացված տեղեկատվությունը դիմումատու պետության և սուբսիդավորող անդամ պետության լիազորված մարմինների կողմից տրամադրելու ժամկետը չի կարող գերազանցել իրենց կողմից Հանձնաժողովի հարցումն ստանալու օրվանից 15 օրացուցային օրը։

4. Տեղեկատվությունը Հանձնաժողով է ներկայացվում ռուսերենով։ Անդամ պետության պետական լեզվով կազմված փաստաթղթերն ուղեկցվում են ռուսերեն թարգմանությամբ։

5. Քննություն անցկացնելու ընթացքում Հանձնաժողովն իրավունք ունի քննություն անցկացնելու համար անհրաժեշտ տեղեկատվություն ներկայացնելու վերաբերյալ հարցում ուղարկելու դիմումատու պետության և սուբսիդավորող անդամ պետության պետական իշխանության մարմիններ։

Դիմումատու պետության և սուբսիդավորող անդամ պետության պետական իշխանության մարմինները քննության անցկացման համար անհրաժեշտ տեղեկատվությունը Հանձնաժողով են ուղարկում իրենց կողմից Հանձնաժողովի հարցումն ստանալու օրվանից 30 օրացուցային օրվա ընթացքում։

Հոդված 19.

Շահագրգիռ անդամ պետությունների մասնակցությունը քննությանը

1. Մյուս անդամ պետությունների լիազորված մարմիններն իրավունք ունեն քննություն սկսելու մասին որոշումն ընդունելու օրվանից 15 օրացուցային օրը չգերազանցող ժամկետում Հանձնաժողով ներկայացնելու քննությանը որպես շահագրգիռ կողմ (այսուհետ՝ շահագրգիռ կողմ) մասնակցելու մտադրության մասին դիմում։

Շահագրգիռ կողմը քննության հետ կապված մեկնաբանությունները և տեղեկատվությունը Հանձնաժողով է ներկայացնում Հանձնաժողովում քննությանը մասնակցելու մտադրության մասին դիմումը գրանցելու օրվանից 30 օրացուցային օրը չգերազանցող ժամկետում։

Գաղտնի տեղեկատվությունը Հանձնաժողով ներկայացնող շահագրգիռ կողմերը նաև ներկայացնում են այդպիսի տեղեկատվության ոչ գաղտնի տարբերակը։

Ոչ գաղտնի տարբերակը պետք է պարունակի գաղտնի տեղեկատվության էությունը հասկանալու համար անհրաժեշտ մանրամասն տեղեկություններ։

2. Պատասխանատու դեպարտամենտն իրավունք ունի շահագրգիռ կողմից պահանջելու քննությունն անցկացնելու համար անհրաժեշտ լրացուցիչ տեղեկատվություն։ Շահագրգիռ կողմի կողմից նշված տեղեկատվության տրամադրման ժամկետը չի կարող գերազանցել դրա կողմից Հանձնաժողովի համապատասխան հարցումն ստանալու օրվանից 15 օրացուցային օրը։

Հարցումը համարվում է շահագրգիռ կողմի կողմից ստացված` հարցումը փոստային կապի միջոցով ուղարկելու օրվանից 7 օրացուցային օրը լրանալուց հետո:

Նշված ժամկետը լրանալուց հետո շահագրգիռ կողմի կողմից ներկայացված լրացուցիչ տեղեկատվությունը կարող է հաշվի չառնվել պատասխանատու դեպարտամենտի կողմից։

Շահագրգիռ կողմի՝ հիմնավորած և գրավոր շարադրած խնդրանքի հիման վրա՝ պատասխանատու դեպարտամենտը կարող է լրացուցիչ տեղեկատվություն ներկայացնելու ժամկետը երկարաձգել 30 օրացուցային օրով։

3. Քննության ընթացքում Հանձնաժողովը շահագրգիռ կողմերին հնարավորություն է ընձեռում իրենց հարցմամբ ծանոթանալու քննության առարկայի հետ կապված տեղեկատվությանը (բացառությամբ գաղտնի տեղեկատվության)։

Հոդված 20.

Հատուկ սուբսիդիա տրամադրելու հետևանքով անդամ պետության ազգային տնտեսության ճյուղին հասցված նյութական վնասի կամ նյութական վնաս հասցնելու վտանգի կամ դրա շահերի կոպիտ ոտնահարման որոշումը

1. Սուբսիդավորվող ապրանքի ներմուծման հետևանքով ազգային տնտեսության ճյուղին հասցված նյութական վնասը որոշվում է` հիմք ընդունելով փաստացի սուբսիդավորվող ապրանքի ծավալի և դիմումատու պետության շուկայում նույնանման ապրանքի գնի ու ազգային տնտեսության ճյուղի վրա այդ ներմուծման ազդեցության վերլուծության արդյունքները։

2. Ազգային տնտեսության ճյուղին հասցված նյութական վնասը կամ ազգային տնտեսության ճյուղին նյութական վնաս հասցնելու վտանգի առկայությունը որոշելու նպատակով տեղեկությունների վերլուծության ժամանակահատվածը սահմանում է Հանձնաժողովը, և այն չի կարող լինել դիմումը ներկայացնելու օրվան նախորդող 3 տարուց պակաս։

3. Փաստացի սուբսիդավորվող ապրանքի ներմուծման ծավալը վերլուծելիս որոշվում է՝ արդյոք տեղի է ունեցել սուբսիդավորվող ապրանքի ներմուծման զգալի աճ (բացարձակ ցուցանիշներով կամ դիմումատու պետությունում նույնանման ապրանքի արտադրության կամ սպառման ծավալի հետ համեմատած)։

Դիմումատու պետության շուկայում նույնանման ապրանքի գների վրա սուբսիդավորվող ապրանքի ներմուծման ազդեցությունը վերլուծելիս որոշվում է՝

արդյոք սուբսիդավորվող ապրանքի գները զգալիորեն ցածր են եղել դիմումատու պետության շուկայում նույնանման ապրանքի գներից.

արդյոք սուբսիդավորվող ապրանքի ներմուծումը հանգեցրել է դիմումատու պետության շուկայում նույնանման ապրանքի գների զգալի իջեցման.

արդյոք սուբսիդավորվող ապրանքի ներմուծումը խոչընդոտել է դիմումատու պետության շուկայում նույնանման ապրանքի գների աճը, որը տեղի կունենար այդ ներմուծման բացակայության դեպքում։

Ազգային տնտեսության ճյուղի վրա սուբսիդավորվող ապրանքի ներմուծման ազդեցության վերլուծությունը ենթադրում է բոլոր այն տնտեսական գործոնների գնահատումը, որոնք առնչություն ունեն ազգային տնտեսության ճյուղի վիճակի հետ, այդ թվում հետևյալները՝

ապրանքի արտադրության, վաճառքի, ազգային շուկայում ապրանքի մասնաբաժնի, շահույթի, արտադրողականության, ներգրավված ներդրումներից կամ արտադրական հզորությունների օգտագործումից ստացված եկամտի՝ տեղի ունեցած կամ հետագայում հնարավոր կրճատումը.

դիմումատու պետության շուկայում նույնանման ապրանքի գների վրա ազդող գործոնները.

դրամական հոսքերի շարժի, ապրանքի պաշարների, զբաղվածության մակարդակի, աշխատավարձի, արտադրության աճի տեմպերի և ներդրումներ ներգրավելու հնարավորության վրա տեղի ունեցած կամ հետագայում հնարավոր բացասական ազդեցությունը։

4. Ազգային տնտեսության ճյուղի վրա սուբսիդավորվող ապրանքի ներմուծման ազդեցությունը գնահատվում է դիմումատու պետությունում նույնանման ապրանքի արտադրության մասով, եթե առկա տվյալները թույլ են տալիս առանձնացնել այդ անդամ պետությունում նույնանման ապրանքի արտադրությունն այնպիսի չափանիշների հիման վրա, ինչպիսիք են արտադրական գործընթացը, ապրանքի վաճառքը դրա արտադրողների կողմից և շահույթը։

Այն դեպքում, երբ առկա տվյալներով հնարավոր չէ առանձնացնել նույնանման ապրանքի արտադրությունը, ապա սուբսիդավորվող ապրանքի ներմուծման ազդեցությունն ազգային տնտեսության ճյուղի վրա գնահատվում է ապրանքների այն ամենանեղ խմբի արտադրության կամ անվանացանկի մասով, որոնք ներառում են նույնանման ապրանքը, և որոնց վերաբերյալ առկա են անհրաժեշտ տվյալներ։

5. Սուբսիդավորվող ապրանքի ներմուծման հետևանքով ազգային տնտեսության ճյուղին նյութական վնաս հասցնելու վտանգը որոշելիս Հանձնաժողովը հաշվի է առնում առկա բոլոր գործոնները, այդ թվում՝ հետևյալ գործոնները՝

սուբսիդիայի (սուբսիդիաների) բնույթը, չափը և առևտրի վրա դրա (դրանց) հնարավոր ազդեցությունը.

սուբսիդավորվող ապրանքի ներմուծման աճի տեմպերը, որոնք վկայում են այդ ներմուծման ծավալի հետագա ավելացման իրական հնարավորության մասին.

սուբսիդավորող անդամ պետությունում սուբսիդավորվող ապրանք արտադրողների համար մյուս անդամ պետությունների տարածքում սուբսիդավորվող ապրանքի ներմուծման ծավալներն ավելացնելու բավարար հնարավորությունների առկայությունը կամ այդ ներմուծման ծավալներն ավելացնելու վտանգը.

սուբսիդավորվող ապրանքի գների մակարդակը, եթե գների այդ մակարդակը կարող է հանգեցնել դիմումատու պետության շուկայում նույնանման ապրանքի գնի իջեցմանը կամ զսպմանը և սուբսիդավորվող ապրանքի պահանջարկի հետագա աճին.

արտադրողի մոտ սուբսիդավորվող ապրանքի պաշարները։

Ընդ որում, նշված գործոնները չեն կարող որոշիչ նշանակություն ունենալ սուբսիդավորվող ապրանքի ներմուծման հետևանքով ազգային տնտեսության ճյուղին նյութական վնաս հասցնելու վտանգը հաստատելու համար։

6. Ազգային տնտեսության ճյուղին նյութական վնաս հասցնելու վտանգի առկայության մասին որոշում ընդունվում է այն դեպքում, երբ սույն հոդվածի 1-5-րդ կետերում նշված գործոնների վերլուծության արդյունքների հիման վրա անցկացվող քննության ընթացքում Հանձնաժողովը հանգում է այն եզրակացության, որ դիմումատու պետության տարածք սուբսիդավորվող ապրանքի ներմուծումը շարունակելը և այդ ներմուծման հետևանքով ազգային տնտեսության ճյուղին վնաս հասցնելն անխուսափելի են։

7. Սուբսիդավորող անդամ պետության կամ մեկ այլ անդամ պետության շուկայից նույնանման ապրանքը դուրս մղելու, կամ սուբսիդավորող անդամ պետության տարածք նույնանման ապրանքի ներմուծման աճը զսպելու, կամ այլ անդամ պետության տարածք նույնանման ապրանքի արտահանման աճը զսպելու փաստը սահմանվում է այն դեպքում, երբ ապացուցված է, որ սուբսիդավորող անդամ պետության շուկայում կամ մեկ այլ անդամ պետության շուկայում նույնանման ապրանքի մասնաբաժինը սուբսիդավորվող ապրանքի նկատմամբ անբարենպաստ փոփոխության է ենթարկվել։ Նշված փաստը սահմանվում է այնպիսի ժամանակահատվածում, որը բավարար է համապատասխան ապրանքի շուկայի զարգացումների հստակ միտումներն ապացուցելու համար, որը սովորական պայմաններում պետք է լինի առնվազն 1 տարի։

8. Սուբսիդավորող անդամ պետության շուկայում կամ մեկ այլ անդամ պետության շուկայում նույնանման ապրանքի մասնաբաժնի անբարենպաստ փոփոխությունը ներառում է հետևյալ իրավիճակներից մեկը՝

1) սուբսիդավորվող ապրանքի շուկայական մասնաբաժինը մեծանում է.

2) սուբսիդավորվող ապրանքի շուկայական մասնաբաժինը մնում է անփոփոխ այնպիսի հանգամանքներում, որոնց դեպքում հատուկ սուբսիդիայի բացակայության պարագայում այն պետք է նվազեր.

3) սուբսիդավորվող ապրանքի շուկայական մասնաբաժինը փոքրանում է, սակայն ավելի դանդաղ տեմպերով, քան դա տեղի կունենար հատուկ սուբսիդիայի բացակայության պարագայում։

9. Գների նվազեցումը սահմանվում է համապատասխան շուկայում սուբսիդավորվող ապրանքի գներն այն ապրանքի գների հետ համադրելու միջոցով, որի արտադրության, տրանսպորտային փոխադրման կամ ցանկացած անդամ պետության տարածք արտահանման ժամանակ չի կիրառվել հատուկ սուբսիդիա։ Գների համադրումը կատարվում է առևտրի միևնույն մակարդակի վրա և համեմատելի ժամանակահատվածներում։ Գների համադրման ընթացքում հաշվի է առնվում համադրելիության վրա ազդող ցանկացած գործոն։ Այն դեպքում, երբ գների նշված համադրումը հնարավոր չէ կատարել, գների նվազեցման առկայությունը կարող է սահմանվել արտահանման միջին գների հիման վրա:

10. Անդամ պետության շահերի կոպիտ ոտնահարման փաստը չի կարող հաստատվել համապատասխան ժամանակահատվածի ընթացքում հետևյալ հանգամանքներից որևէ մեկի առկայության դեպքում՝

1) շահերի կոպիտ ոտնահարման փաստը պարզող անդամ պետության տարածքից ապրանքն արտահանելու արգելքի կամ սահմանափակումների առկայությունը կամ ապրանքն այդպիսի պետության տարածքից մեկ այլ անդամ պետության շուկա ներմուծելու արգելքի կամ սահմանափակումների առկայությունը.

2) ոչ առևտրային պատճառներով շահերի կոպիտ ոտնահարման փաստը պարզող անդամ պետության տարածքից ապրանքի ներմուծումը մեկ այլ անդամ պետությունից ներմուծմամբ վերաուղղորդելու վերաբերյալ որոշում՝ ընդունված այն անդամ պետության լիազորված մարմնի կողմից, որը ներմուծում է նույնանման ապրանք և ունի այդ ապրանքի գծով առևտրի մենաշնորհ կամ իրականացնում է այդ ապրանքի պետական առևտուր.

3) տարերային աղետները, գործադուլները, տրանսպորտի խափանումները կամ այլ ֆորս մաժորային իրավիճակներ, որոնք խիստ բացասական ազդեցություն են ունենում շահերի կոպիտ ոտնահարման փաստի առկայությունը պարզող անդամ պետության տարածքից արտահանելու համար նախատեսված ապրանքի արտադրության, որակի, քանակի կամ գնի վրա.

4) շահերի կոպիտ ոտնահարման փաստի առկայությունը պարզող անդամ պետության տարածքից արտահանումը սահմանափակող պայմանավորվածությունների առկայությունը.

5) շահերի կոպիտ ոտնահարման փաստի առկայությունը պարզող անդամ պետության տարածքից արդյունաբերական ապրանքն արտահանելու հնարավորությունը կամավոր նվազեցնելը (ներառյալ այն իրավիճակը, երբ այդ անդամ պետության տնտեսավարող սուբյեկտները նույնանման ապրանքի արտահանումը միակողմանիորեն ուղղել են դեպի նոր շուկաներ).

6) այն անդամ պետությունում ընդունված չափանիշներին և (կամ) վարչական մյուս պահանջներին անհամապատասխանությունը, որի տարածք ներմուծվում է ապրանքը։

11. Սուբսիդավորվող ապրանքի ներմուծման և ազգային տնտեսության ճյուղին հասցված նյութական վնասի միջև պատճառահետևանքային կապի առկայության մասին եզրահանգումը պետք է հիմնված լինի քննության հետ կապված և Հանձնաժողովի տրամադրության տակ գտնվող բոլոր ապացույցների ու տեղեկությունների վերլուծության վրա։

12. Պատասխանատու դեպարտամենտը քննություն իրականացնելու ընթացքում, սուբսիդավորվող ապրանքի ներմուծումից բացի, վերլուծում է նաև այլ հայտնի գործոններ, որոնց հետևանքով միևնույն ժամանակահատվածում ազգային տնտեսության ճյուղին նյութական վնաս է հասցվում։

Հոդված 21.

Քննության արդյունքների հիման վրա որոշում կայացնելը

1. Պատասխանատու դեպարտամենտը քննության արդյունքների հիման վրա նախապատրաստում է հետևյալ եզրակացություններից մեկը՝

եզրակացություն՝ այլ անդամ պետության կողմից հատուկ սուբսիդիա տրամադրելու հետևանքով դիմումատու պետության ազգային տնտեսության ճյուղին հասցված նյութական վնասի, ազգային տնտեսության ճյուղին նյութական վնաս հասցնելու վտանգի կամ դրա շահերի կոպիտ ոտնահարման առկայության մասին.

եզրակացություն՝ այլ անդամ պետության կողմից հատուկ սուբսիդիա տրամադրելու հետևանքով դիմումատու պետության ազգային տնտեսության ճյուղին հասցված նյութական վնասի, ազգային տնտեսության ճյուղին նյութական վնաս հասցնելու վտանգի կամ դրա շահերի կոպիտ ոտնահարման բացակայության մասին։

2. Սույն հոդվածի 1-ին կետում նշված եզրակացությունը ստորագրվում է պատասխանատու դեպարտամենտի ղեկավարի (ղեկավարի տեղակալի) կողմից, հաստատվում է Հանձնաժողովի կոլեգիայի՝ արդյունաբերության հարցերով իրավասու անդամի կողմից և ներառվում է Հանձնաժողովի կոլեգիայի նիստում ուսումնասիրման համար նախապատրաստված փաստաթղթերի և նյութերի փաթեթում։

3. Սույն հոդվածի 1-ին կետի երկրորդ պարբերության մեջ նշված եզրակացության հիման վրա անցկացվող քննության արդյունքներով Հանձնաժողովի կոլեգիան կարող է որոշում կայացնել այն հատուկ սուբսիդիայի վերացման կամ սահմանված ժամկետում դրա տրամադրման և (կամ) օգտագործման պայմանների, կարգի փոփոխության մասին, որը հանգեցնում է դիմումատու պետության ազգային տնտեսության ճյուղին նյութական վնաս հասցնելուն, ազգային տնտեսության ճյուղին նյութական վնաս հասցնելու վտանգին կամ դրա շահերի կոպիտ ոտնահարմանը։

Այն դեպքում, երբ անդամ պետությունը նշում է, որ քննության ընթացքում իր կողմից ուղարկվող տեղեկատվությունը սահմանափակ տարածման տեղեկատվություն է, Հանձնաժողովի՝ այդ տեղեկատվության օգտագործմամբ անցկացվող քննության արդյունքներով որոշումները (որոշումների նախագծերը) հրապարակվում են՝ հաշվի առնելով Պայմանագրի 111-րդ հոդվածը։

4. Այն դեպքում, երբ սույն համաձայնագրի 15-րդ հոդվածին համապատասխան անցկացվող քննության արդյունքներով Հանձնաժողովը հաստատում է ազգային տնտեսության ճյուղին հասցված նյութական վնասի, ազգային տնտեսությանը նյութական վնաս հասցնելու վտանգի առկայությունը կամ այլ անդամ պետության կողմից հատուկ սուբսիդիայի տրամադրման հետևանքով դիմումատու պետության շահերի կոպիտ ոտնահարումը , այդ անդամ պետության լիազորված մարմինը իրավունք ունի դիմում ուղարկելու սուբսիդավորող անդամ պետության լիազորված մարմին՝ համաձայնեցված հատուկ սուբսիդիաներից բացի այլ փոխհատուցման միջոց կիրառելու մասին:

Համաձայնեցված հատուկ սուբսիդիաների առնչությամբ Հանձնաժողովի կոլեգիայի կողմից սույն հոդվածի 3-րդ կետով նախատեսված որոշումը կայացնելու դեպքում սուբսիդավորող անդամ պետության լիազորված մարմինն այդ որոշումն ընդունելու օրվանից դադարեցնում է նշված սուբսիդիաների տրամադրումը։

Փոխհատուցման միջոցի սահմանումն իրականացվում է Արձանագրությանը համապատասխան։

5. Հանձնաժողովի կոլեգիայի՝ սույն հոդվածի 3-րդ կետով նախատեսված որոշումը չի ընդունվում, եթե քննության ավարտից հետո և որոշումն ընդունելուց առաջ քննությանը մասնակցող անդամ պետությունները ձեռք են բերում պայմանավորվածություն՝ հաշվի առնելով Արձանագրության 6-րդ կետի հինգերորդ պարբերության դրույթները։

6. Եթե անդամ պետությունը, որի առնչությամբ ընդունվել է Հանձնաժողովի կոլեգիայի՝ սույն հոդվածի 3-րդ կետում նշված որոշումը, չի կատարում այն, ապա մյուս անդամ պետություններն իրավունք ունեն դիմելու Միության դատարան։

Հոդված 22.

Գաղտնի տեղեկատվություն

Այն տեղեկատվության առնչությամբ, որն անդամ պետությունը սույն համաձայնագրի իրականացման շրջանակներում ներկայացրել է Հանձնաժողով և որը, անդամ պետության օրենսդրությանը համապատասխան, համարվում է գաղտնի (այդ թվում՝ առևտրային, հարկային և այլ գաղտնի տեղեկատվությունը), Հանձնաժողովի կողմից սահմանված կարգով ապահովվում է պաշտպանության պատշաճ մակարդակ։

V. Եզրափակիչ դրույթներ

Հոդված 23.

Լիազորված մարմինների մասին տեղեկատվությունը

Սույն համաձայնագիրն ուժի մեջ մտնելու օրվանից 3 ամսվա ընթացքում անդամ պետությունները Հանձնաժողովին տեղեկացնում են լիազորված մարմինների մասին։

Անդամ պետություններն ապահովում են լիազորված մարմինների վերաբերյալ Հանձնաժողով ուղարկվող տեղեկատվության թարմացումը։

Հոդված 24.

Վեճերի կարգավորումը

Սույն համաձայնագրի մեկնաբանման և (կամ) կիրառման հետ կապված վեճերը կարգավորվում են Պայմանագրով սահմանված կարգով։

Հոդված 25.

Փոփոխություններ կատարելը

Անդամ պետությունների փոխադարձ համաձայնությամբ սույն համաձայնագրում կարող են կատարվել փոփոխություններ, որոնք ձևակերպվում են առանձին արձանագրություններով և սույն համաձայնագրի անբաժանելի մասն են կազմում։

Հոդված 26.

Համաձայնագիրն ուժի մեջ մտնելը

Սույն համաձայնագիրն ուժի մեջ է մտնում սույն համաձայնագիրն ուժի մեջ մտնելու համար անհրաժեշտ ներպետական ընթացակարգերը անդամ պետությունների կողմից կատարվելու մասին վերջին գրավոր ծանուցումն ավանդապահի կողմից դիվանագիտական ուղիներով ստանալու օրվանից։

Սույն համաձայնագիրը Միության շրջանակներում կնքված միջազգային պայմանագիր է և Միության իրավունքի մաս է կազմում։

Կատարված է Կազան քաղաքում, 2017 թվականի մայիսի 26-ին, մեկ բնօրինակից՝ ռուսերենով:

Սույն համաձայնագրի բնօրինակը պահվում է Եվրասիական տնտեսական հանձնաժողովում, որը, որպես սույն համաձայնագրի ավանդապահ, յուրաքանչյուր անդամ պետության կտրամադրի դրա հաստատված պատճենը։

Հայաստանի Հանրապետության կողմից՝

Բելառուսի Հանրապետության կողմից՝

Ղազախստանի Հանրապետության կողմից՝

Ղրղզստանի Հանրապետության կողմից՝

Ռուսաստանի Դաշնության կողմից՝