ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

29 դեկտեմբերի 2005 թվականի N 2334-Ն

«ՏԵԽՆԻԿԱԿԱՆ ԱՆՎՏԱՆԳՈՒԹՅԱՆ ԱԶԳԱՅԻՆ ԿԵՆՏՐՈՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆ ՍՏԵՂԾԵԼՈՒ ԵՎ ՆՐԱ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Պետական ոչ առևտրային կազմակերպությունների մասին» Հայաստանի Հանրապետության օրենքի 9-րդ և «Տեխնիկական անվտանգության ապահովման պետական կարգավորման մասին» Հայաստանի Հանրապետության օրենքի 4-րդ և 22-րդ հոդվածները` Հայաստանի Հանրապետության կառավարությունը որոշում է.

1. Հիմնադրման միջոցով ստեղծել «Տեխնիկական անվտանգության ազգային կենտրոն» պետական ոչ առևտրային կազմակերպություն:

2. Հաստատել «Տեխնիկական անվտանգության ազգային կենտրոն» պետական ոչ առևտրային կազմակերպության կանոնադրությունը` համաձայն հավելվածի:

3. «Տեխնիկական անվտանգության ազգային կենտրոն» պետական ոչ առևտրային կազմակերպության կառավարման, ինչպես նաև «Պետական ոչ առևտրային կազմակերպությունների մասին» Հայաստանի Հանրապետության օրենքի 13-րդ հոդվածի 2-րդ մասի «գ», «ե» և «է» կետերով նախատեսված լիազորությունները վերապահել Հայաստանի Հանրապետության արտակարգ իրավիճակների նախարարությանը:

(3-րդ կետը փոփ. 15.05.08 N 532-Ն)

4. Սահմանել, որ`

ա) «Տեխնիկական անվտանգության ազգային կենտրոն» պետական ոչ առևտրային կազմակերպության գործունեության առարկան և նպատակը «Տեխնիկական անվտանգության ապահովման պետական կարգավորման մասին» Հայաստանի Հանրապետության օրենքով սահմանված համապատասխան գործառույթների իրականացումն է` ուղղված տեխնածին վթարների կանխարգելմանը, դրանց հետևանքների վերացմանը, նման վթարների հետևանքով հասարակությանը և տնտեսությանը հասցվող վնասների ռիսկի նվազեցմանը, ինչպես նաև բնակչության և շրջակա միջավայրի պաշտպանությանը.

բ) «Տեխնիկական անվտանգության ազգային կենտրոն» պետական ոչ առևտրային կազմակերպությանը սեփականության իրավունքով հանձնվում է 6.150.600 դրամ ընդհանուր արժողությամբ ցանկացած գույք` բացառությամբ շենքերի, շինությունների, պետական սեփականություն հանդիսացող հողերի և պատմամշակութային նշանակության գույքի:

5. Երևանի Ջրաշատի փողոցի N 1 շենքի 5-րդ և 6-րդ հարկերը (800 քառ. մետր ընդհանուր մակերեսով), Գյումրի քաղաքի Աբովյան 196 հասցեում գտնվող շենքի 200 քառ. մետր և Կապան քաղաքի Մ. Ստեփանյան 14 հասցեում գտնվող շենքի 200 քառ. մետր տարածքները, ինչպես նաև նվազագույն աշխատավարձի 10000-ապատիկից ավելի արժողությամբ այլ գույքը հանձնել «Տեխնիկական անվտանգության ազգային կենտրոն» պետական ոչ առևտրային կազմակերպությանը` անհատույց օգտագործման իրավունքով` դրանց նպատակային նշանակությանը համապատասխան օգտագործելու պայմանով:

5.1. Հայաստանի Հանրապետության կառավարությանն առընթեր պետական գույքի կառավարման վարչության պետին`

ա) մինչև 2007 թվականի օգոստոսի 1-ը ապահովել Երևանի Ջրաշատի փողոցի N 1 շենքի 5-րդ և 6-րդ հարկերի, Գյումրի քաղաքի Աբովյան 296 հասցեում գտնվող շենքի 200 քառ. մետր և Կապան քաղաքի Մ. Ստեփանյան 14 հասցեում գտնվող շենքի 200 քառ. մետր տարածքների նկատմամբ Հայաստանի Հանրապետության սեփականության իրավունքի պետական գրանցումը,

բ) մինչև 2007 թվականի սեպտեմբերի 1-ը «Տեխնիկական անվտանգության ազգային կենտրոն» պետական ոչ առևտրային կազմակերպության հետ կնքել նշված անշարժ գույքի անհատույց օգտագործման պայմանագիրն ու սահմանված կարգով ապահովել գույքային իրավունքների պետական գրանցումը:

(5.1 կետը լրաց. 03.05.07 N 522-Ն, փոփ. 12.02.09 N 178-Ն)

6. Թույլատրել «Տեխնիկական անվտանգության ազգային կենտրոն» պետական ոչ առևտրային կազմակերպությանն իրականացնել ձեռնարկատիրական գործունեության հետևյալ տեսակները`

ա) տեխնիկական անվտանգության ոլորտում գիտատեխնիկական, փորձարարական, խորհրդատվական ծառայությունների մատուցում, դիագնոստիկա, փորձարկում, զննում.

բ) տեխնիկական անվտանգության հետ կապված բնագավառներում ուսումնական դասընթացների իրականացում:

7. «Տեխնիկական անվտանգության ազգային կենտրոն» պետական ոչ առևտրային կազմակերպությունը լիցենզավորման ենթակա գործունեության տեսակներով կարող է զբաղվել միայն համապատասխան լիցենզիայի հիման վրա:

8. Հայաստանի Հանրապետության առևտրի և տնտեսական զարգացման նախարարին` սույն որոշումն օրենքով սահմանված կարգով ուժի մեջ մտնելուց հետո եռամսյա ժամկետում ապահովել`

ա) «Տեխնիկական անվտանգության ազգային կենտրոն» պետական ոչ առևտրային կազմակերպությանը սեփականության իրավունքով հանձնվող ու անհատույց օգտագործման իրավունքով ամրացվող գույքի կազմի հաստատումը.

բ) «Տեխնիկական անվտանգության ազգային կենտրոն» պետական ոչ առևտրային կազմակերպության` օրենքով սահմանված կարգով պետական գրանցումը:

9. «Տեխնիկական անվտանգության ազգային կենտրոն» պետական ոչ առևտրային կազմակերպության ֆինանսավորումն իրականացնել «Հայաստանի Հանրապետության 2006 թվականի պետական բյուջեի մասին» Հայաստանի Հանրապետության օրենքով Հայաստանի Հանրապետության արտակարգ իրավիճակների նախարարության համար նախատեսված միջոցների հաշվին:

(9-րդ կետը փոփ. 15.05.08 N 532-Ն)

10. Հայաստանի Հանրապետության ֆինանսների և էկոնոմիկայի նախարարին` Հայաստանի Հանրապետության առևտրի և տնտեսական զարգացման նախարարի հետ համատեղ` մեկամսյա ժամկետում Հայաստանի Հանրապետության կառավարություն ներկայացնել առաջարկություն Հայաստանի Հանրապետության 2006 թվականի պետական բյուջեում համապատասխան վերաբաշխում կատարելու վերաբերյալ:

11. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ա. Մարգարյան
2006 թ. հունվարի 30 Երևան

Հավելված ՀՀ կառավարության 2005 թվականի դեկտեմբերի 29-ի N 2334-Ն որոշման

Կ Ա Ն Ո Ն Ա Դ Ր ՈՒ Թ Յ ՈՒ Ն

«ՏԵԽՆԻԿԱԿԱՆ ԱՆՎՏԱՆԳՈՒԹՅԱՆ ԱԶԳԱՅԻՆ ԿԵՆՏՐՈՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. «Տեխնիկական անվտանգության ազգային կենտրոն» պետական ոչ առևտրային կազմակերպության (այսուհետ` կենտրոն) գործունեությունը նպատակաուղղված է արտադրական վտանգավոր օբյեկտում «Տեխնիկական անվտանգության ապահովման պետական կարգավորման մասին» Հայաստանի Հանրապետության օրենքով (այսուհետ` օրենք) սահմանված տեխնիկական անվտանգության փորձաքննության իրականացմանը, արտադրական վտանգավոր օբյեկտների ռեեստրում գրանցմանը և ռեեստրի վարմանը, տեխնիկական անվտանգության պահանջներ սահմանող տեխնիկական կանոնակարգերի, տեխնիկական անվտանգության բնագավառում նոր գիտական ուղղությունների և գիտափորձերի մշակմանը:

2. Կենտրոնի հիմնադիրը Հայաստանի Հանրապետությունն է` ի դեմս Հայաստանի Հանրապետության կառավարության:

Կենտրոնի հիմնադիր փաստաթուղթը սույն կանոնադրությունն է:

3. Կենտրոնը շահույթ ստանալու նպատակ չհետապնդող պետական ոչ առևտրային` իրավաբանական անձի կարգավիճակ ունեցող կազմակերպություն է, որը Հայաստանի Հանրապետության օրենսդրությամբ սահմանված հիմքերով ձեռք է բերում և իրականացնում սույն կանոնադրությամբ ամրագրված` իր խնդիրների իրականացման համար անհրաժեշտ իրավունքներ ու պարտականություններ:

4. Կենտրոնն ունի ինքնուրույն հաշվեկշիռ, եկամուտների և ծախսերի նախահաշիվ, բանկային հաշիվ, Հայաստանի Հանրապետության զինանշանի պատկերով և իր անվամբ կլոր կնիք, դրոշմակնիք, ձևաթղթեր, խորհրդանիշ և այլ անհատականացման միջոցներ:

5. Կենտրոնը որպես սեփականություն ունի առանձնացված գույք և իր պարտավորությունների համար պատասխանատու է այդ գույքով: Կենտրոնը կարող է իր անունից ձեռք բերել ու իրականացնել գույքային և անձնական ոչ գույքային իրավունքներ, կրել պարտավորություններ, դատարանում հանդես գալ որպես հայցվոր կամ պատասխանող:

6. Կենտրոնը կարող է ունենալ տարածքային մասնաճյուղեր, գիտափորձարարական, ուսումնական հիմնարկներ:

7. Կենտրոնի անվանումն է`

հայերեն լրիվ` «Տեխնիկական անվտանգության ազգային կենտրոն» պետական ոչ առևտրային կազմակերպություն,

հայերեն կրճատ` «Տեխանվտանգության ազգային կենտրոն» ՊՈԱԿ,

ռուսերեն լրիվ` « Национальный центр теxнической безопасности: государственная некомерческая организация,  ,

ռուսերեն կրճատ` «Национальный центр теxбезопасности ГНО,

անգլերեն լրիվ` «National Center of Technical Security» State Non Commercial Organization,

անգլերեն կրճատ` «NCTS» SNPO։

8. Կենտրոնի գտնվելու վայրն է` Հայաստանի Հանրապետություն, քաղ. Երևան, Ջրաշատի 1:

II. ԿԵՆՏՐՈՆԻ ԳՈՐԾՈՒՆԵՈՒԹՅԱՆ ԱՌԱՐԿԱՆ ԵՎ ՆՊԱՏԱԿՆԵՐԸ

9. Կենտրոնի գործունեության հիմնական նպատակը Հայաստանի Հանրապետության տարածքում շահագործվող (շահագործման նպատակով նախապատրաստվող, կոնսերվացվող, ապամոնտաժվող) արտադրական վտանգավոր օբյեկտներում տեխնիկական անվտանգության ապահովման գործառություններ կազմակերպելն ու իրականացնելն է` բացառությամբ միջուկային և էներգատեղակայանքների, ռադիոակտիվ նյութերի վերամշակման, ավիացիայի, ավտոմոբիլային և երկաթուղային տրանսպորտի, ինչպես նաև ռազմական նշանակության օբյեկտների:

10. Կենտրոնի լիազորություններն են`

ա) տեխնիկական անվտանգության պահանջներ սահմանող տեխնիկական կանոնակարգերի մշակումը,

բ) արտադրական վտանգավոր օբյեկտների վտանգավորության դասակարգման գիտականորեն հիմնավորված չափորոշիչների մշակումը,

գ) ուսումնամեթոդական ծրագրերի մշակումը, ոլորտի մասնագետների, փորձագետների, տնտեսության մեջ աշխատող ինժեներատեխնիկական և մասնագետ կադրերի ուսուցման և որակավորման գծով աշխատանքների կազմակերպումը,

դ) միջպետական ծրագրերի և տեխնիկական նախագծերի մշակմանը, իրագործմանը գիտահետազոտական աշխատանքների համատեղ անցկացմանը մասնակցությունը,

ե) տեխնիկական անվտանգության բնագավառում նոր գիտական ուղղությունների, գիտափորձերի մշակումը,

զ) արտադրական վտանգավոր օբյեկտ շահագործող անձի հետ կնքված պայմանագրի համաձայն օրենքով սահմանված տեխնիկական անվտանգության փորձաքննության իրականացումը և համապատասխան փորձագիտական եզրակացության տրամադրումը,

է) արտադրական վտանգավոր օբյեկտների ռեեստրի վարումը,

ը) արտադրական վտանգավոր օբյեկտի ռիսկի վերլուծումը և գնահատումը` ըստ վտանգավորության աստիճանի դասակարգելու նպատակով,

թ) արտադրական վտանգավոր օբյեկտներում տեխնիկական անվտանգության վիճակի փաստաթղթային դիտարկումը, վերլուծումը, դրա հիման վրա ամփոփ տեղեկատվության կազմումը և տրամադրումը լիազոր մարմնին` տեխնիկական անվտանգության նկատմամբ պետական հսկողություն իրականացնելու նպատակով,

ժ) արտադրական վտանգավոր օբյեկտում տեղի ունեցած` տեխնածին վթարների, մահացու կամ ծանր ելքով արտադրական դժբախտ դեպքերի տեխնիկական քննության և հաշվառման իրականացումը,

ժա) արտադրական վտանգավոր օբյեկտի շահագործման արգելմանը, արտադրական վտանգավոր օբյեկտում տեղակայված առանձին տեխնիկական միջոցի կամ տեխնոլոգիական սարքավորման շահագործման արգելմանն ուղղված կարգադրագրի արձակման, ինչպես նաև կարգադրագրով նախատեսված պատասխանատվության միջոցների վերացման համար հիմք հանդիսացող փաստաթղթերը լիազոր մարմին ներկայացնելը,

ժբ) Հայաստանի Հանրապետության պետական կառավարման և տեղական ինքնակառավարման մարմիններին, կազմակերպություններին, քաղաքացիներին տեխնիկական անվտանգությանն առնչվող հարցերով տեղեկատվությամբ ապահովումը, այդ թվում` նաև զանգվածային լրատվության միջոցներով,

ժգ) հավատարմագրված անձանց հաշվառումը,

ժդ) օրենքի 14-րդ հոդվածով սահմանված տեղեկատվության ստացումը:

11. Կենտրոնն իր գործառույթներն իրականացնում է`

1) արտադրություններում կամ առանձին տեղամասերում, արտադրամասերում, արտադրական հրապարակներում, պահեստարաններում, տեղակայանքներում (բացառությամբ միջուկային և էներգատեղակայանքների), տեխնոլոգիական սարքավորումներում կամ ցանկացած այլ օբյեկտում, որտեղ`

ա) Հայաստանի Հանրապետության կառավարության կողմից հաստատված սահմանաքանակները գերազանցող չափերով արտադրվում, վերամշակվում, պահվում, փոխադրվում, օգտագործվում կամ ստացվում են հետևյալ հատկանիշներով բնութագրվող վնասակար նյութերը`

դյուրավառ նյութեր` նյութեր, որոնք գազային վիճակում, նորմալ ճնշման պայմաններում օդի հետ խառնվելու դեպքում դառնում են բոցավառ, և որոնց եռման ջերմաստիճանը նորմալ ճնշման դեպքում հավասար է 20⁰C կամ դրանից ցածր է,

օքսիդացող նյութեր` նյութեր, որոնք օժանդակում են այրմանը, հարուցում են կրակի առաջացում կամ նպաստում են այլ նյութերի բոցավառմանն օքսիդավերականգնման էկզոթերմիկ ռեակցիաների հետևանքով,

այրվող նյութեր` հեղուկներ, գազեր, փոշիներ, որոնք ունեն ինքնաբռնկվելու հատկություններ, ինչպես նաև կարող են բռնկվել կրակի աղբյուրից,

պայթուցիկ նյութեր` նյութեր, որոնք որոշակի արտաքին ազդեցություններից ընդունակ են շատ արագ ենթարկվել ինքնատարածվող քիմիական վերափոխման` անջատելով ջերմություն և առաջացնելով գազեր,

թունավոր նյութեր` նյութեր, որոնք ազդելով կենդանի օրգանիզմների վրա կարող են դառնալ հիվանդության կամ մահվան պատճառ,

շրջակա բնական միջավայրի համար վտանգ ներկայացնող նյութեր` նյութեր, որոնք ջրային միջավայրում ձեռք են բերում սուր թունավոր հատկություններ,

մետաղների հալույթներ կամ այդ հալույթներից ձուլվածքներ.

բ) կիրառվում են 0,07 և ավելի մեգապասկալ ճնշման տակ աշխատող սարքավորումները, ջրի` մինչև 115⁰C (60կՎտ և ավելի հզորության) և 115⁰C-ից բարձր ջերմաստիճանի տակ աշխատող ջերմային կայանքներ.

գ) իրականացվում են լեռնահանքային, հորապայթեցման աշխատանքներ կամ աշխատանքներ օգտակար հանածոների հանքահարստացման ուղղությամբ.

դ) իրականացվում են թունելաշինական աշխատանքներ կամ ցանկացած այլ աշխատանք ստորերկրյա պայմաններում.

2) հիդրոտեխնիկական կառույցներում, որոնք օգտագործվում են ջրերը պատնեշելու, ամբարելու և տեղափոխելու նպատակով.

3) շարժասանդուղքներում, ճոպանուղիներում, կարուսելներում, ֆունիկուլյորներում, ամբարձիչ սարքավորումներում և մեխանիզմներում.

4) վերելակներում, եթե դրանք տեղադրված են հանրային նշանակության կառույցներում, այդ թվում` արտադրական շինություններում, բազմաբնակարանային շենքերում, ընդհանուր օգտագործման համար նախատեսված այլ վայրերում.

5) նավթամթերքների, հեղուկ գազի, բնական (սեղմված) գազի, հաստատուն և շարժական լցավորման կայաններում, գազագլանաանոթային սարքավորումներում, տեխնոլոգիական նպատակներով գազ օգտագործող օբյեկտներում, գազապահեստարաններում.

6) ջրային լողամիջոցներում:

12. Կենտրոնն իրականացնում է ձեռնարկատիրական հետևյալ գործառությունները`

ա) տեխնիկական անվտանգության ոլորտում գիտատեխնիկական, փորձարարական, խորհրդատվական ծառայությունների մատուցում, դիագնոստիկա, փորձարկում, զննում,

բ) տեխնիկական անվտանգության հետ կապված բնագավառներում ուսումնական դասընթացների իրականացում:

13. Կենտրոնը լիցենզավորման ենթակա գործունեության տեսակներով կարող է զբաղվել միայն համապատասխան լիցենզիայի հիման վրա:

14. Կենտրոնի ձեռնարկատիրական գործունեության ընթացքում առաջացած շահույթն օգտագործվում է սույն կանոնադրությամբ նախատեսված նպատակների իրականացման համար:

III. ԿԵՆՏՐՈՆԻ ԿԱՌԱՎԱՐՈՒՄԸ

15. Կենտրոնի կառավարումը Հայաստանի Հանրապետության օրենսդրությանը և սույն կանոնադրությանը համապատասխան իրականացնում են հիմնադիրը` Հայաստանի Հանրապետության կառավարությունը, նրա կողմից լիազորված պետական մարմինը` Հայաստանի Հանրապետության արտակարգ իրավիճակների նախարարությունը, կոլեգիալ կառավարման մարմինը` խորհուրդը, գործադիր մարմինը` տնօրենը:

(15-րդ կետը փոփ. 15.05.08 N 532-Ն, լրաց. 26.08.10 N 1101-Ն)

Հիմնադրի լիազորությունները

16. Հիմնադրի բացառիկ լիազորություններն են`

ա) պետական կազմակերպության հիմնադրումը.

բ) պետական կազմակերպության գործունեության առարկայի և նպատակների, այդ թվում` նրա կողմից իրականացվող ձեռնարկատիրական գործունեության տեսակների սահմանումը.

գ) պետական կազմակերպության կանոնադրության հաստատումը և դրանում փոփոխությունների կատարումը.

դ) պետական կազմակերպության վերակազմակերպումը և լուծարումը.

ե) օրենքով և սույն կանոնադրությամբ նախատեսված այլ հարցերի լուծում:

Լիազորված պետական մարմնի լիազորությունները

17. Լիազորված պետական մարմնի լիազորություններն են`

ա) կենտրոնին սեփականության իրավունքով հանձնվող և (կամ) ամրացվող` պետությանը պատկանող գույքի կազմի հաստատումը.

բ) կենտրոնի կառավարման համակարգի սահմանումը.

գ) կենտրոնի լուծարման հանձնաժողովի նշանակումը և լուծարման հաշվեկշռի հաստատումը.

դ) կենտրոնի տնoրենին պաշտոնի նշանակելը և ազատելը.

ե) կենտրոնի հաստիքացուցակի, պահպանման տարեկան ծախսերի նախահաշվի հաստատումը, տնoրենի վարձատրության, ինչպես նաև կենտրոնի շահույթի հաշվին աշխատողների լրացուցիչ վարձատրության (հավելավճար, պարգևատրում և այլն) չափերը և պայմանները որոշելը.

զ) կենտրոնի գործունեության նկատմամբ վերահսկողության իրականացումը.

է) կենտրոնի կոլեգիալ կառավարման մարմնի` խորհրդի և կենտրոնի տնoրենի՝ Հայաստանի Հանրապետության oրենսդրության պահանջներին հակասող որոշումները, հրամանները, հրահանգները կարգադրություններն ու ցուցումները կասեցնելը կամ ուժը կորցրած ճանաչելը.

ը) կենտրոնին ամրացված պետական սեփականության oգտագործման և պահպանության նկատմամբ վերահսկողության իրականացումը.

թ) կենտրոնի սեփականության պահպանության նկատմամբ վերահսկողության իրականացումը.

ժ) կենտրոնի գույքի oտարման կամ վարձակալության հանձնման համար համաձայնություն տալը.

ժա) «Պետական ոչ առևտրային կազմակերպությունների մասին» և «Տեխնիկական անվտանգության պետական կարգավորման մասին» Հայաստանի Հանրապետության oրենքներով, հիմնադրի որոշումներով ու սույն կանոնադրությամբ նախատեսված այլ գործառույթների իրականացումը:

(17-րդ կետը խմբ. 26.08.10 N 1101-Ն)

17.1. Կենտրոնի կոլեգիալ կառավարման մարմինը` խորհուրդը (այսուհետ` խորհուրդ) իր գործունեության ընթացքում իրականացնում է «Պետական ոչ առևտրային կազմակերպությունների մասին» Հայաստանի Հանրապետության օրենքի 19-րդ հոդվածով և սույն կանոնադրությամբ նախատեսված լիազորությունները:

(17.1 կետը լրաց. 26.08.10 N 1101-Ն)

17.2. Խորհուրդը բաղկացած է հինգ անդամից, որոնցից`

ա) մեկը կենտրոնի կոլեկտիվի անդամ է, որին ընտրում է կոլեկտիվի ընդհանուր ժողովը.

բ) երեքը լիազորված պետական մարմնի համակարգի ծառայողներ են.

գ) մեկը գիտական հաստատությունների ներկայացուցիչ է, որին, համաձայնությամբ, նշանակում է լիազոր մարմինը:

(17.2 կետը լրաց. 26.08.10 N 1101-Ն)

17.3. Խորհրդի կազմը հաստատում է լիազորված պետական մարմինը` երեք տարի ժամկետով:

(17.3 կետը լրաց. 26.08.10 N 1101-Ն)

17.4. Խորհրդի նախագահն ընտրվում է խորհրդի անդամներից:

(17.4 կետը լրաց. 26.08.10 N 1101-Ն)

17.5. Խորհրդի իրավասություններն են`

ա) լիազորված մարմին կենտրոնի գործունեության հիմնական ուղղությունների վերաբերյալ առաջարկություններ ներկայացնելը.

բ) լիազորված մարմին տնoրենի նշանակման, նրա հետ կնքվող աշխատանքային պայմանագրի հաստատման, նրա լիազորությունների վաղաժամկետ դադարեցման, վարձատրության կարգի և պայմանների վերաբերյալ առաջարկություններ ներկայացնելը.

գ) կենտրոնի տնoրենի նկատմամբ ընթացիկ վերահսկողության իրականացումը.

դ) կենտրոնի շահույթի տնօրինման ուղղությունների սահմանումը.

ե) կենտրոնի գործունեությունը կանոնակարգող ներքին փաստաթղթերի հաստատումը.

զ) խորհրդի նախագահի ընտրությունը, իր աշխատակարգի հաստատումը.

է) լիազորված մարմին կենտրոնի տարեկան ծախսերի նախահաշվի նախագծի վերաբերյալ առաջարկություններ ներկայացնելը.

ը) տնoրենի հաշվետվությունների քննարկումն ու հաստատումը.

թ) կենտրոնի տարեկան հաշվետվությունները և տարեկան հաշվեկշիռը հաստատելը.

ժ) կենտրոնի կառուցվածքին, ինչպես նաև կենտրոնի ստորաբաժանումների կանոնադրություններին համաձայնություն տալը:

(17.5 կետը լրաց. 26.08.10 N 1101-Ն)

17.6. Խորհրդի անդամի լիազորությունները կարող են դադարեցվել`

ա) իր դիմումի համաձայն.

բ) ըստ պաշտոնի առաջադրվելու դեպքում` պաշտոնից ազատվելու հետևանքով.

գ) օրենքով սահմանված այլ դեպքերում:

(17.6 կետը լրաց. 26.08.10 N 1101-Ն)

17.7. Խորհրդի կազմում թափուր տեղեր առաջանալու դեպքում այն համալրվում է՝ պահպանելով սույն կանոնադրության 17.2-րդ կետով սահմանված համամասնությունները:

(17.7 կետը լրաց. 26.08.10 N 1101-Ն)

17.8. Խորհրդի գործունեությունը դադարում է հիմնադրի որոշմամբ:

(17.8 կետը լրաց. 26.08.10 N 1101-Ն)

17.9. Խորհրդի նիստերը գումարվում են տարեկան առնվազն չորս անգամ: Դրանք համարվում են իրավազոր` խորհրդի 3 անդամի մասնակցության դեպքում: Խորհրդի որոշումներն ընդունվում են խորհրդի անդամների ընդհանուր թվի ձայների պարզ մեծամասնությամբ, եթե խորհուրդը դրա մասին այլ որոշում չի ընդունում: Արտահերթ նիստերը հրավիրվում են խորհրդի 2 անդամի առաջարկությամբ:

(17.9 կետը լրաց. 26.08.10 N 1101-Ն)

17.10. Խորհուրդը հաստատում է իր աշխատակարգը: Խորհրդի հերթական նիստերը վարելու և նիստերի միջև ընկած ժամանակահատվածում խորհրդի նիստերից բխող հանձնարարականների կատարմանը հետևում է խորհրդի նախագահը:

(17.10 կետը լրաց. 26.08.10 N 1101-Ն)

IV. ԿԵՆՏՐՈՆԻ ԳՈՐԾԱԴԻՐ ՄԱՐՄԻՆԸ

18. Կենտրոնի տնօրենին Հայաստանի Հանրապետության օրենսդրությամբ սահմանված կարգով պաշտոնի նշանակում և պաշտոնից ազատում է լիազորված պետական մարմինը:

19. Կենտրոնի տնօրենն օրենքով, հիմնադրի ու լիազորված պետական մարմնի որոշումներով և սույն կանոնադրությամբ իրեն վերապահված լիազորությունների սահմաններում ղեկավարում է կենտրոնի գործունեությունը և կրում պատասխանատվություն օրենքների, այլ իրավական ակտերի, հիմնադրի ու լիազորված պետական մարմնի որոշումների, սույն կանոնադրության և կնքված պայմանագրերի պահանջները չկատարելու կամ ոչ պատշաճ կատարելու համար:

20. Կենտրոնի տնօրենի հետ օրենքով սահմանված կարգով կնքվում է պայմանագիր, որը հիմնադրի անունից ստորագրում է լիազորված պետական մարմնի ղեկավարը:

21. Կենտրոնի տնօրենը չի կարող զբաղեցնել այլ պաշտոն կամ կատարել վճարովի այլ աշխատանք, բացի գիտական, մանկավարժական և ստեղծագործական աշխատանքից:

22. Կենտրոնի տնօրենը լրիվ գույքային պատասխանատվություն է կրում իր մեղքով կենտրոնին և (կամ) պետությանը պատճառված վնասի համար: Կենտրոնի գործադիր մարմնի պաշտոնում նշանակված անձի լիազորությունների դադարեցումը հիմք չէ պատճառած վնասը հատուցելու պարտականությունները չկատարելու համար:

23. Կենտրոնի տնօրենի պաշտոնում նշանակված անձի բացակայության դեպքում նրան նշանակած մարմնի գրավոր որոշման համաձայն այդ լիազորություններն իրականացնում է այլ անձ:

Կենտրոնի տնօրենի լիազորությունները

24. Կենտրոնի տնօրենը`

ա) առանց լիազորագրի հանդես է գալիս կենտրոնի անունից, ներկայացնում է նրա շահերը և կնքում գործարքներ.

բ) Հայաստանի Հանրապետության օրենսդրությամբ, հիմնադրի լիազորված պետական մարմնի ու կենտրոնի կոլեգիալ կառավարման մարմնի որոշումներով և սույն կանոնադրությամբ սահմանված կարգով տնօրինում է կենտրոնի գույքը, այդ թվում՝ ֆինանսական միջոցները.

գ) տալիս է կենտրոնի անունից հանդես գալու լիազորագրեր, այդ թվում՝ վերալիազորման իրավունքով լիազորագրեր.

դ) աշխատանքի է նշանակում և աշխատանքից ազատում կենտրոնի աշխատողներին, նրանց նկատմամբ կիրառում խրախուսման միջոցներ և նշանակում կարգապահական տույժեր.

ե) բանկերում բացում է հաշվարկային հաշիվներ.

զ) կատարում է աշխատանքի բաշխում իր տեղակալների միջև.

է) նախքան հաստատելը` խորհրդի համաձայնեցմանն է ներկայացնում կենտրոնի կառուցվածքը.

է.1) սահմանում է կենտրոնի կառուցվածքային ստորաբաժանումների կանոնադրությունները` համաձայնեցնելով խորհրդի հետ.

ը) հաստատում է կենտրոնի հիմնարկների, մասնաճյուղերի և ներկայացուցչությունների կանոնադրությունները` համաձայնեցնելով խորհրդի հետ.

թ) նշանակում է կենտրոնի հիմնարկների, ներկայացուցչությունների և մասնաճյուղերի ղեկավարներին` համաձայնեցնելով խորհրդի հետ, նրանց տալիս է համապատասխան լիազորագրեր.

ժ) օրենքով և սույն կանոնադրությամբ սահմանված իր լիազորությունների սահմաններում արձակում է հրամաններ, հրահանգներ, տալիս կատարման համար պարտադիր ցուցումներ և վերահսկում դրանց կատարումը.

ժա) իրականացնում է Հայաստանի Հանրապետության օրենսդրությանը չհակասող և կենտրոնի կառավարման այլ մարմիններին չվերապահված այլ լիազորություններ:

(24-րդ կետը փոփ., խմբ., լրաց. 26.08.10 N 1101-Ն)

V. ԿԵՆՏՐՈՆԻ ԳՈՒՅՔԸ ԵՎ ՖԻՆԱՆՍԱՏՆՏԵՍԱԿԱՆ ԳՈՐԾՈՒՆԵՈՒԹՅՈՒՆԸ

25. Կենտրոնի սեփականությունը ձևավորվում է դրա հիմնադրման ժամանակ հիմնադրի կողմից կենտրոնին սեփականության իրավունքով հանձնվող գույքից, որը հետագայում կարող է համալրվել կենտրոնի գործունեության ընթացքում ձեռք բերված գույքով, ինչպես նաև հիմնադրի կողմից սեփականության իրավունքով կենտրոնին հանձնվող գույքով:

26. Կենտրոնն իրավունք ունի, օրենքին, հիմնադրի որոշումներին և իր կանոնադրությանը համապատասխան, իր հայեցողությամբ տնօրինելու և օգտագործելու սեփականության իրավունքով իրեն պատկանող գույքը:

27. Հիմնադիրը սեփականության իրավունքով կենտրոնին պատկանող գույքի նկատմամբ չունի իրավունքներ` բացառությամբ կենտրոնի լուծարումից հետո մնացած գույքի:

28. Կենտրոնի սեփականության պահպանման հոգսը կրում է կենտրոնը:

29. Կենտրոնի սեփականության վրա կարող է տարածվել բռնագանձում` միայն դատական կարգով:

30. Կենտրոնի սեփականության ձևավորման աղբյուրներն են`

ա) կենտրոնին սեփականության իրավունքով հանձնված գույքը,

բ) Հայաստանի Հանրապետության ու օտարերկրյա պետությունների իրավաբանական և ֆիզիկական անձանց կատարած ներդրումները, այդ թվում` բարեգործական, հովանավորչական ու նպատակային,

գ) ձեռնարկատիրական գործունեությունից ստացվող եկամուտները:

31. Հիմնադրի կողմից կենտրոնին անժամկետ և անհատույց օգտագործման իրավունքով կարող է ամրացվել ցանկացած գույք:

32. Հիմնադիրն իրավունք ունի հետ վերցնելու իր կողմից կենտրոնին ամրացված գույքը:

33. Կենտրոնն իրավունք չունի իրեն ամրացված գույքը կամ դրա նկատմամբ իր իրավունքներն օտարելու, գրավ դնելու, անհատույց օգտագործման հանձնելու: Կենտրոնն իրավունք ունի պետության անունից` օրենքով սահմանված կարգով վարձակալության հանձնելու իրեն ամրացված գույքը:

Ամրացված տարածքների վարձակալության արդյունքում ստացված վարձավճարները սահմանված կարգով ուղղվում են Հայաստանի Հանրապետության պետական բյուջե: Ամրացված գույքի՝ այլ օգտագործման արդյունքում ստացված եկամուտները կենտրոնի սեփականությունն են: Ամրացված գույքի` օգտագործման ընթացքում առաջացած անբաժանելի բարելավումները հիմնադրի սեփականությունն են:

34. Կենտրոնի ֆինանսական միջոցները ձևավորվում են`

ա) Հայաստանի Հանրապետության պետական բյուջեից Հայաստանի Հանրապետության օրենսդրությամբ սահմանված կարգով հատկացվող միջոցներից,

բ) Հայաստանի Հանրապետության օրենսդրությամբ սահմանված կարգով պայմանագրային հիմունքներով արտադրական վտանգավոր օբյեկտներում կենտրոնի կողմից իրականացված տեխնիկական փորձագիտական գործառությունների և այլ վճարովի ծառայությունների մատուցման դիմաց ստացված միջոցներից,

գ) ձեռնարկատիրական գործունեությունից գոյացած միջոցներից,

դ) դրամաշնորհներից,

ե) Հայաստանի Հանրապետության օրենսդրությանը չհակասող այլ միջոցներից:

34.1. Կենտրոնի ձեռնարկատիրական գործունեության ընթացքում առաջացած շահույթն օգտագործվում է հետևյալ ուղղություններով`

ա) կենտրոնի գործունեությունն ապահովող գույքի, սարքավորումների և նյութերի ձեռքբերում.

բ) աշխատողների կենսաապահովման մակարդակի բարձրացում` պարգևատրումների, հավելավճարների և նյութական օգնությունների միջոցով.

գ) տեխնածին վթարների ռիսկերի նվազեցում.

դ) կենտրոնի տեխնիկական հագեցվածության բարելավում, այդ թվում` հիմնական միջոցների ձեռքբերում.

ե) հիմնադրի և խորհրդի կողմից ու օրենքով սահմանված այլ ուղղություններով:

(34.1 կետը լրաց. 26.08.10 N 1101-Ն)

VI. ԿԵՆՏՐՈՆԻ ՎԵՐԱԿԱԶՄԱԿԵՐՊՈՒՄԸ ԵՎ ԼՈՒԾԱՐՈՒՄԸ

35. Կենտրոնը կարող է վերակազմակերպվել (միաձուլում, միացում, բաժանում, առանձնացում, վերակազմավորում) հիմնադրի որոշմամբ` Հայաստանի Հանրապետության քաղաքացիական օրենսգրքով սահմանված կարգով:

36. Կենտրոնը դատական կարգով կարող է վերակազմակերպվել և լուծարվել` միայն օրենքով սահմանված դեպքերում և կարգով:

37. Կենտրոնի լուծարմամբ նրա գործունեությունը դադարում է՝ առանց իրավունքները և պարտականություններն իրավահաջորդության կարգով այլ անձանց անցնելու:

38. Կենտրոնը կարող է լուծարվել հիմնադրի որոշմամբ` Հայաստանի Հանրապետության քաղաքացիական օրենսգրքով սահմանված կարգով:

Կենտրոնը կարող է լուծարվել նաև սնանկության հետևանքով:

39. Կենտրոնի լուծարման դեպքում նրա պարտատերերի պահանջների բավարարումից հետո մնացած գույքն ուղղվում է Հայաստանի Հանրապետության պետական բյուջե:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան