Ա Ր Ձ Ա Ն Ա Գ Ր ՈՒ Թ Յ ՈՒ Ն

«ԵՎՐԱՍԻԱԿԱՆ ՏՆՏԵՍԱԿԱՆ ՄԻՈՒԹՅԱՆ ՄԱՍԻՆ» 2014 ԹՎԱԿԱՆԻ ՄԱՅԻՍԻ 29-Ի ՊԱՅՄԱՆԱԳՐՈՒՄ ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԿԱԴՐԱՅԻՆ ԿԱԶՄԻ ՁԵՎԱՎՈՐՄԱՆ ՄԵԽԱՆԻԶՄԸ ՀՍՏԱԿԵՑՆԵԼՈՒ ՄԱՍՈՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Եվրասիական տնտեսական միության անդամ պետությունները, այսուհետ՝ անդամ պետություններ,

առաջնորդվելով «Եվրասիական տնտեսական միության մասին» 2014 թվականի մայիսի 29-ի պայմանագրի 115-րդ հոդվածով,

համաձայնեցին հետևյալի մասին՝

Հոդված 1

«Եվրասիական տնտեսական միության մասին» 2014 թվականի մայիսի 29-ի պայմանագրում կատարել հետևյալ փոփոխությունները՝

1) «Եվրասիական տնտեսական հանձնաժողովի մասին» հիմնադրույթում (նշված պայմանագրի թիվ 1 հավելված)՝

54-րդ կետում՝

չորրորդ պարբերությունում «4 տարի ժամկետով» բառերը հանել.

չորրորդ պարբերությունից հետո լրացնել հետևյալ բովանդակությամբ պարբերություններ՝

«Հանձնաժողովի դեպարտամենտների տնօրենների և նրանց տեղակալների հետ աշխատանքային պայմանագրեր (կոնտրակտներ) կնքվում են սույն հիմնադրույթի 33-րդ կետին համապատասխան ձևավորված՝ Հանձնաժողովի կոլեգիայի աշխատանքի ժամկետը չգերազանցող ժամկետով։

Հանձնաժողովի կոլեգիայի նախագահը իրավունք ունի մեկ անգամ երկարաձգելու Հանձնաժողովի դեպարտամենտների տնօրենների և նրանց տեղակալների աշխատանքային պայմանագրերը (կոնտրակտները) մինչև 3 ամիս ժամկետով։

Հանձնաժողովի դեպարտամենտի տնօրենի կամ Հանձնաժողովի դեպարտամենտի տնօրենի տեղակալի աշխատանքային պայմանագրի (կոնտրակտի) վաղաժամկետ դադարեցման (լուծման) դեպքում Հանձնաժողովի դեպարտամենտի տնօրենի կամ Հանձնաժողովի դեպարտամենտի տնօրենի տեղակալի թափուր պաշտոնում նշանակվող անձի հետ աշխատանքային պայմանագիրը (կոնտրակտը) կնքվում է մինչև սույն Հիմնադրույթի 33-րդ կետին համապատասխան ձևավորված՝ Հանձնաժողովի կոլեգիայի աշխատանքի ժամկետի ավարտը մնացած ժամկետով։».

ութերորդ պարբերությունը լրացնել «և հաշվի առնելով անդամ պետությունում անցկացված որակավորման ընտրության արդյունքները, եթե այդպիսի ընտրության անհրաժեշտությունը նախատեսված է անդամ պետության օրենսդրությամբ» բառերով.

իններորդ պարբերությունը լրացնել «, 5 տարի ժամկետով։ Հանձնաժողովի աշխատակցի հետ աշխատանքային պայմանագիրը (կոնտրակտը) նույն ժամկետով կարող է երկարաձգվել Հանձնաժողովի կոլեգիայի նախագահի կողմից՝ Հանձնաժողովի համապատասխան կառուցվածքային ստորաբաժանման գործունեությունը համակարգող՝ Հանձնաժողովի կոլեգիայի անդամի ներկայացմամբ, այդ թվում՝ հաշվի առնելով անցկացված ատեստավորման արդյունքները» բառերով։

2) «Եվրասիական տնտեսական միությունում սոցիալական երաշխիքների, արտոնությունների և անձեռնմխելիությունների մասին» հիմնադրույթում (սույն պայմանագրի թիվ 32 հավելված)՝

43-րդ կետում «սույն Հիմնադրույթի» բառերը փոխարինել «Պայմանագրի» բառով.

53-րդ կետի առաջին պարբերության մեջ «զբաղեցրել են» բառերից առաջ լրացնել «ցանկացած ժամանակահատվածում» բառերով։

Հոդված 2

Սույն արձանագրությանը համապատասխան «Եվրասիական տնտեսական միության մասին» 2014 թվականի մայիսի 29-ի պայմանագրում կատարվող փոփոխությունների կապակցությամբ սահմանել, որ՝

Եվրասիական տնտեսական հանձնաժողովի (այսուհետ՝ Հանձնաժողով) դեպարտամենտների տնօրենները և տնօրենների տեղակալները, որոնց հետ աշխատանքային պայմանագրերը (կոնտրակտները) կնքվել են մինչև սույն արձանագրությունն ուժի մեջ մտնելը, շարունակում են կատարել իրենց վրա դրված պարտականությունները՝ մինչև իրենց աշխատանքային պայմանագրերով (կոնտրակտներով) նախատեսված ժամկետները լրանալը.

ժամկետային աշխատանքային պայմանագրի (կոնտրակտի) պայմաններով Հանձնաժողովի աշխատակիցների՝ աշխատանքի անցնելու հետ կապված միջոցառումներն իրականացվում են սույն արձանագրությունն ուժի մեջ մտնելու օրվանից 6 ամսվա ընթացքում՝ Հանձնաժողովի կոլեգիայի նախագահի կողմից հաստատվող կարգով։ Ընդ որում, հղիության և ծննդաբերության կամ մինչև 3 տարեկան դառնալը երեխայի խնամքի արձակուրդում գտնվող Հանձնաժողովի աշխատակիցների, ինչպես նաև ժամանակավոր անաշխատունակության ժամանակահատվածում Հանձնաժողովի աշխատակիցների ժամկետային աշխատանքային պայմանագրի (կոնտրակտի) պայմաններով աշխատանքի անցնելու հետ կապված միջոցառումներն իրականացվում են նշված արձակուրդները (ժամանակահատվածը) ավարտվելուց հետո.

Հանձնաժողովի աշխատակիցների աշխատանքային պայմանագրերի (կոնտրակտների) ժամկետի փոփոխության կապակցությամբ՝ մինչև սույն արձանագրությունն ուժի մեջ մտնելու օրը, աշխատանքային պայմանագրեր (կոնտրակտներ) կնքած Հանձնաժողովի աշխատակիցների ժամկետային աշխատանքային պայմանագրի (կոնտրակտի) պայմաններով աշխատանքի անցնելն իրականացվում է առանց մրցույթի անցկացման։

Հոդված 3

Սույն արձանագրությունն ուժի մեջ է մտնում այն ուժի մեջ մտնելու համար անհրաժեշտ ներպետական ընթացակարգերն անդամ պետությունների կողմից կատարվելու մասին վերջին գրավոր ծանուցումն ավանդապահի կողմից դիվանագիտական ուղիներով ստանալու օրվանից։

Կատարված է Մոսկվա քաղաքում, 2021 թվականի օգոստոսի 5-ին, մեկ բնօրինակից՝ ռուսերենով:

Սույն արձանագրության բնօրինակը պահվում է Եվրասիական տնտեսական հանձնաժողովում, որը, որպես սույն արձանագրության ավանդապահ, յուրաքանչյուր անդամ պետություն կուղարկի դրա հաստատված պատճենը։

Պաշտոնական հրապարակման օրը՝ 10 հունվարի 2024 թվական: