Հ Ա Մ Ա Ձ Ա Յ Ն Ա Գ Ի Ր

ԵՎՐԱՍԻԱԿԱՆ ՏՆՏԵՍԱԿԱՆ ԸՆԿԵՐԱԿՑՈՒԹՅԱՆ ՀԱԿԱՃԳՆԱԺԱՄԱՅԻՆ ՀԻՄՆԱԴՐԱՄԻ ՄԻՋՈՑՆԵՐԻ ԿԱՌԱՎԱՐՄԱՆ ՄԱՍԻՆ

Մի կողմից` Բելառուսի Հանրապետությունը, Ղազախստանի Հանրապետությունը, Ղրղզստանի Հանրապետությունը, Ռուսաստանի Դաշնությունը, Տաջիկստանի Հանրապետությունը և Հայաստանի Հանրապետությունը, որոնք Եվրասիական տնտեսական համագործակցության հակաճգնաժամային հիմնադրամի (այսուհետ` Հիմնադրամ) հիմնադիր պետություններն են` Եվրասիական տնտեսական համագործակցության հակաճգնաժամային հիմնադրամի ստեղծման մասին 2009 թ. հունիսի 9-ի պայմանագրի (այսուհետ` Հիմնադրամի ստեղծման մասին պայմանագիր) հիման վրա, և

մյուս կողմից` Եվրասիական զարգացման բանկը, որը Բանկի մասնակից պետությունների շուկայական տնտեսության կայացմանը և զարգացմանը, նրանց տնտեսական աճին և նրանց միջև առևտրատնտեսական կապերի ընդլայնմանն աջակցելու նպատակով Եվրասիական զարգացման բանկի հիմնադրման մասին 2006 թ. հունվարի 12-ի համաձայնագրին համապատասխան ստեղծված միջազգային կազմակերպություն է (այսուհետ` Բանկ),

այսուհետ` Կողմերը,

հաշվի առնելով, որ.

Հիմնադրամի ստեղծման մասին պայմանագրով նախատեսված է, որ Հիմնադրամի միջոցների կառավարումն իրականացվում է Հիմնադրամի խորհրդի կողմից Հիմնադրամի միջոցների կառավարչի հետ համատեղ, Հիմնադրամի ստեղծման մասին պայմանագրի անբաժանելի մասը հանդիսացող Հիմնադրամի մասին կանոնադրությամբ (այսուհետ` Հիմնադրամի մասին կանոնադրություն) նախատեսված կարգով, և որ Բանկի և Հիմնադրամի հիմնադիր պետությունների միջև կնքված` Հիմնադրամի միջոցների կառավարման մասին համաձայնագրի հիման վրա Հիմնադրամի միջոցների կառավարչի գործառույթների կատարումը դրվում է Բանկի վրա,

Բանկի կանոնադրության 9-րդ հոդվածի 4-րդ կետին համապատասխան` Բանկն իրավունք ունի Բանկի խորհրդի որոշմամբ ստանձնելու Բանկի մասնակիցների, մասնակիցների խմբի կամ այլ կազմակերպությունների կողմից ձևավորված հատուկ ֆոնդերի կառավարման պարտավորությունները` Բանկի նպատակներին և գործառույթներին համապատասխանող խնդիրները լուծելու համար,

Բանկի խորհրդի կողմից որոշում է ընդունվել Հիմնադրամի միջոցների կառավարման պարտավորությունները ստանձնելու մասին (Բանկի խորհրդի նիստի` 2009թ. հունիսի 9-ի թիվ 22 արձանագրություն),

համաձայնեցին ներքոհիշյալի մասին.

Հոդված 1

Համաձայնագրի առարկան

1. Սույն Համաձայնագրով Կողմերը սահմանում են Հիմնադրամի միջոցների համատեղ կառավարման կարգը:

2. Հիմնադրամի հիմնադիր պետությունները, ինչպես նաև Հիմնադրամի մասին կանոնադրության համապատասխան սույն Համաձայնագրին միացած և Հիմնադրամի մասնակիցներ դարձած պետությունները և միջազգային կազմակերպությունները (այսուհետ` Հիմնադրամի մասնակիցներ) իրականացնում են Հիմնադրամի միջոցների կառավարումը Հիմնադրամի խորհրդի միջոցով, որի իրավասությունները սահմանված են Հիմնադրամի մասին կանոնադրությամբ:

Սույն Համաձայնագրով սահմանված կարգով և պայմաններով Բանկը ստանձնում է Հիմնադրամի միջոցների կառավարչի գործառույթների կատարումը, որոնք ընդգրկվում են Հիմնադրամի միջոցների տնօրինման և վարչական կառավարման մեջ:

3. Սույն Համաձայնագրով նախատեսված գործառույթների իրականացման և այդ նպատակով գործարքների կնքման ժամանակ Բանկը նշում է, որ գործում է որպես Հիմնադրամի միջոցների կառավարիչ:

Գրավոր ձևակերպում չպահանջող գործողությունների կատարման ժամանակ Բանկը մյուս կողմին տեղեկացնում է, որ դրանք այդ ձևով են կատարվել, իսկ գրավոր փաստաթղթերում իր անվանումից հետո նշում է. «ԵվրԱսՏՀ-ի հակաճգնաժամային հիմնադրամի միջոցների կառավարիչ»:

4. Հիմնադրամի միջոցների կառավարչի գործառույթների կատարման ժամանակ Բանկը գործում է Հիմնադրամի մասին կանոնադրության 2-րդ հոդվածում թվարկված Հիմնադրամի փաստաթղթերին համապատասխան (այսուհետ` Հիմնադրամի փաստաթղթեր)` առաջնորդվելով բացառապես Հիմնադրամի մասնակիցների շահերով և Հիմնադրամի ստեղծման նպատակներով, և գործադրում է բոլոր հնարավոր ջանքերը Հիմնադրամի միջոցների արդյունավետ կառավարումն ապահովելու համար:

5. Հիմնադրամի մասնակիցներ հանդիսացող պետությունները սույնով Հիմնադրամի միջոցների և Հիմնադրամի գործառնությունների նկատմամբ տարածում են Բանկի անձեռնմխելիությունները, առավելությունները և արտոնությունները, որոնք նախատեսված են նրա հիմնադիր փաստաթղթերով, և երաշխավորում են դրանց գործողությունը իրենց իրավազորության շրջանակներում:

Հոդված 2

Հիմնադրամի միջոցների տնօրինումը

1. Բանկին իրավունք է ընձեռվում տնօրինելու Հիմնադրամի բոլոր միջոցները, ներառյալ Հիմնադրամի մասնակիցների կողմից իրենց կենտրոնական (ազգային) բանկերի հաշիվներին փոխանցված դրամական միջոցները` որպես Հիմնադրամին կատարվող դրամական վճարումներ:

Հիմնադրամի մասնակիցների կողմից իրենց կենտրոնական (ազգային) բանկերի հաշիվներին որպես Հիմնադրամին կատարվող դրամական վճարումներ փոխանցված դրամական միջոցների տնօրինման Բանկի իրավունքը նախատեսվում է Հիմնադրամի մասնակիցների կողմից կենտրոնական (ազգային) բանկերի հետ կնքվող բանկային հաշվի համապատասխան պայմանագրերում:

2. Հիմնադրամի միջոցները պատկանում են Հիմնադրամի մասնակիցներին: Հիմնադրամի միջոցների տնօրինման իրավունքը Բանկին ընձեռելուց չի հետևում, որ դրանց նկատմամբ սեփականության իրավունքը փոխանցվում է Բանկին:

3. Հիմնադրամի միջոցների տնօրինման շրջանակներում Բանկը Հիմնադրամի մասնակիցների անունից և նրանց հանձնարարությամբ իրականացնում է հետևյալ իրավաբանական գործողությունները.

ա) ԱՄՆ դոլարով և եվրոյով հաշիվներ է բացում և վարում` բանկերում Հիմնադրամի խորհրդի կողմից հաստատված Հիմնադրամի միջոցներով գործառնություններ իրականացնելու համար (այսուհետ` Հիմնադրամի հաշիվներ), գործառնություններ է իրականացնում նշված հաշիվներով, ինչպես նաև սույն Համաձայնագրի 1-ին հոդվածում հիշատակված կենտրոնական (ազգային) բանկերում Հիմնադրամի մասնակիցների հաշիվներով` Հիմնադրամի փաստաթղթերին և սույն Համաձայնագրի պայմաններին համապատասխան:

բ) Հիմնադրամի հաշիվներին է հաշվեգրում Հիմնադրամ մտնող բոլոր դրամական միջոցները, ներառյալ`

- վճարումները` բացառությամբ իրենց կենտրոնական (ազգային) բանկերի հաշիվներին Հիմնադրամի մասնակիցների կողմից փոխանցված` Հիմնադրամին կատարվող դրամական վճարումների,

- Հիմնադրամի ժամանակավորապես չօգտագործվող միջոցների տեղաբաշխումից (ներդրումից) ստացված մուտքերը,

- վերադարձելիության հիմունքով Հիմնադրամի միջոցների տրամադրումից ստացված մուտքերը, ներառյալ Հիմնադրամի միջոցների տրամադրման մասին համաձայնագրերով կատարվող բոլոր վճարները,

- Հիմնադրամին կատարվող նվիրաբերությունները,

- Հիմնադրամին ուղղված այլ մուտքերը:

Ոչ ԱՄՆ դոլարով կամ եվրոյով Հիմնադրամին կատարված բոլոր վճարումները Բանկը փոխարկում է ԱՄՆ դոլարի կամ եվրոյի սույն Համաձայնագրի 3-րդ հոդվածի 4-րդ կետին համապատասխան կերպով որոշվող փոխարժեքով:

գ) Հիմնադրամի խորհրդի որոշման հիման վրա Հիմնադրամի մասնակիցների կողմից հանձնված պարտամուրհակները ներկայացնում է վճարման:

դ) Հիմնադրամի խորհրդի որոշման հիման վրա ընդունում է Հիմնադրամին ուղղված նվիրաբերություններ:

ե) Հիմնադրամի խորհրդի որոշման հիման վրա Հիմնադրամի միջոցներից ֆինանսավորում տրամադրելու վերաբերյալ համաձայնագրեր է կնքում Հիմնադրամի միջոցներն ստացողների հետ (այսուհետ` Հիմնադրամի միջոցների տրամադրման մասին համաձայնագրեր), ապահովում է կնքվող համաձայնագրերի համապատասխանությունը Հիմնադրամի խորհրդի որոշումներով և Հիմնադրամի մասին կանոնադրությամբ նախատեսված պահանջներին:

զ) Հիմնադրամի միջոցների տրամադրման մասին համաձայնագրերով իրականացնում է Հիմնադրամի միջոցների տրամադրումը` այդ Համաձայնագրերի պայմաններին համապատասխան:

է) Ներկայացնում և պաշտպանում է Հիմնադրամի մասնակիցների շահերը` կապված Հիմնադրամի միջոցների տրամադրման մասին համաձայնագրերի, Հիմնադրամի միջոցների օգտագործմամբ կատարվող այլ գործարքների և Հիմնադրամի շրջանակներում իրականացվող գործունեությանն առնչվող այլ հարցերի հետ:

ը) Հիմնադրամի խորհրդի կողմից հաստատվող կարգին համապատասխան` ավանդներում ներդնում և/կամ տեղաբաշխում է Հիմնադրամի այն միջոցները, որոնք մոտ ժամանակում ֆինանսավորման տրամադրման նպատակով օգտագործելու համար չեն պահանջվում:

թ) Հիմնադրամի մասնակիցների կազմից Հիմնադրամի մասնակցի դուրս գալու դեպքում նրա հետ համաձայնագիր է կնքում Հիմնադրամի խորհրդի որոշման հիման վրա Հիմնադրամի միջոցներում Հիմնադրամի այդ մասնակցի մասնաբաժինը վճարելու ժամկետի և կարգի վերաբերյալ, իրականացնում է վճարումները` ըստ այդ համաձայնագրերի:

ժ) Հիմնադրամի գործառնությունների դադարեցման դեպքում Հիմնադրամի յուրաքանչյուր մասնակցին փոխանցում է Հիմնադրամի միջոցներում նրա մասնաբաժինը` Հիմնադրամի խորհրդի կողմից սահմանվող կարգով և պայմաններով:

ժա) սույն Համաձայնագրի 9-րդ հոդվածի 7-րդ կետով նախատեսված դեպքում Հիմնադրամի միջոցները և Հիմնադրամի միջոցների տնօրինման գործունեության արդյունքում ձևավորված ակտիվները փոխանցում է Հիմնադրամի խորհրդի կողմից նշանակված անձին (անձանց) Հիմնադրամի խորհրդի կողմից սահմանված կարգով:

ժբ) Իրականացնում է այլ անհրաժեշտ փաստական և իրավաբանական գործողություններ, որոնք կարող են պետք լինել Հիմնադրամի միջոցների արդյունավետ տնօրինման համար, բացառությամբ այն գործողությունների, որոնք վերաբերում են Հիմնադրամի խորհրդի, Հիմնադրամի փորձագիտական խորհրդի և Հիմնադրամի խորհրդի քարտուղարության իրավասությանը և վերապահված չեն Հիմնադրամի միջոցների կառավարչին:

4. Բանկն իրականացնում է Հիմնադրամի միջոցների հաշվին ապրանքների, աշխատանքների և ծառայությունների գնումների կառավարումը Բանկի գնումների սեփական կանոնների և ընթացակարգերի համաձայն և Միջպետական ներդրումային նախագծերը ֆինանսավորելու համար Հիմնադրամի միջոցների տրամադրման մասին համաձայնագրերում նախատեսում է Հիմնադրամի միջոցներն ստացողների կողմից գնումների նշված ընթացակարգերին հետևելու պարտավորությունները:

5. Արտակարգ իրավիճակում Բանկը Հիմնադրամի խորհրդի որոշմամբ կասեցնում է Հիմնադրամի միջոցների տրամադրման մասին նոր համաձայնագրերի կնքումը և Հիմնադրամի միջոցներով այլ գործարքների կատարումը մինչև Հիմնադրամի խորհրդի կողմից ստեղծված իրավիճակի քննարկումը և անհրաժեշտ միջոցների ձեռնարկումը:

Հոդված 3

Հիմնադրամի միջոցների հաշվառումը

1. Բանկի տնօրինմանը հանձնված Հիմնադրամի միջոցները Բանկը գրանցում է առանձին հաշվեկշռում և դրանով վարում է ինքնուրույն, առանձին հաշվառում:

2. Բանկը Հիմնադրամի միջոցներն առանձնացնում է Բանկի ունեցվածքից (ակտիվներ, կապիտալ և սովորական ռեսուրսներ) և Բանկի հիմնադիր փաստաթղթերին համապատասխան ստեղծված այլ հատուկ ֆոնդերի ռեսուրսներից:

3. Բանկը Հիմնադրամի միջոցների հաշվառումն իրականացնում է հաշվապահական (ֆինանսական) հաշվառման վարման և հաշվապահական (ֆինանսական) հաշվետվության կազմման այն նույն սկզբունքներով, որոնք նա կիրառում է սեփական հաշվեմատյանների և հաշիվների նկատմամբ:

Նշված սկզբունքները նախատեսում են հաշվառման փաստաթղթային հիմնավորման կատարում, հաշվապահական հաշիվների վարում և ֆինանսական հաշվետվության կազմում` Ֆինանսական հաշվետվության միջազգային չափանիշներին համապատասխան, որոնք հետևողականորեն կիրառվում են և պատշաճ կերպով արտացոլում են Հիմնադրամի շրջանակներում իրականացվող գործունեության հետ կապված ռեսուրսները, ծախսերը և գործողությունները:

4. Բոլոր դեպքերում, երբ անհրաժեշտություն է առաջանում որոշելու մի արժույթի փոխարժեքը մեկ այլ արժույթի նկատմամբ, Բանկի կողմից արժույթի փոխարժեքի որոշումը կատարվում է այն նույն սկզբունքների կիրառմամբ, որոնք Բանկի կողմից օգտագործվում են իր գանձապահական գործառնություններն իրականացնելու համար:

Հոդված 4

Հիմնադրամի միջոցների վարչական կառավարումը

1. Հիմնադրամի միջոցների վարչական կառավարումն իրականացնելու շրջանակներում Բանկը կատարում է հետևյալ գործառույթները.

ա) պատրաստում և Հիմնադրամի փորձագիտական խորհրդի քննարկմանն է ներկայացնում բանկերին վերաբերող հիմնավորված առաջարկություններ Հիմնադրամի հաշիվների բացման համար,

բ) կատարում է Հիմնադրամի մասնակիցների ցուցակագրումը և Հիմնադրամի խորհրդում Հիմնադրամի մասնակիցների ձայների քանակի հաշվառումը,

գ) պատրաստում և Հիմնադրամի փորձագիտական խորհրդի քննարկմանն է ներկայացնում Հիմնադրամի միջոցների հաշվին ֆինանսավորվող գործունեության տարեկան ծրագրերի նախագծերը և Հիմնադրամի միջոցների կառավարչի` Հիմնադրամի միջոցների կառավարման հետ կապված վարչական ծախսերի նախահաշիվները, ինչպես նաև դրանց կատարման մասին հաշվետվությունները,

դ) ամեն տարի պատրաստում և Հիմնադրամի փորձագիտական խորհրդի քննարկմանն ու հաստատմանն է ներկայացնում Հիմնադրամի գործառնությունների վերաբերյալ տարեկան ֆինանսական հաշվետվությունը,

ե) Հիմնադրամի խորհրդին տեղեկացնում է Հիմնադրամի հիմնադիր պետությունների և Հիմնադրամի մասնակիցների` Հիմնադրամին կատարվող վճարումների հետ կապված պարտավորությունների կատարման մասին,

զ) պատրաստում և Հիմնադրամի փորձագիտական խորհրդի քննարկմանն է ներկայացնում Հիմնադրամի միջոցներից կայունացման վարկերի և անկախ փոխառությունների տրամադրման կարգի, միջպետական ներդրումային նախագծերի ֆինանսավորման համար Հիմնադրամի միջոցների տրամադրման կարգի, Հիմնադրամի ժամանակավորապես չօգտագործվող միջոցների տեղաբաշխման (ներդրման) կարգի (Ներդրումային հայտարարագիր) նախագծերը,

է) իրականացնում է Հիմնադրամի ռեսուրսների ներուժի գնահատումը և, ըստ անհրաժեշտության, վճարումները կատարելու համար Հիմնադրամի խորհրդի առաջ բարձրացնում է պարտամուրհակների վճարման պահանջ ներկայացնելու հարցը,

ը) քննարկում է Հիմնադրամի միջոցներից ֆինանսավորում տրամադրելու մասին հայտերը, կատարում է նշված հայտերի գնահատումը` որոշելու համար դրանց համապատասխանությունը Հիմնադրամի շրջանակներում իրականացվող գործունեության նպատակներին, ֆինանսավորման տրամադրման ուղղություններին, Հիմնադրամի միջոցների տրամադրման կարգին և պայմաններին, որոնք սահմանված են Հիմնադրամի օտեղծման մասին պայմանագրով, Հիմնադրամի մասին կանոնադրությամբ և Հիմնադրամի խորհրդի որոշումներով, ֆինանսավորման առաջնայնությանը և արդյունավետությանը, առաջարկությունների պատրաստվածության աստիճանին և այլ հարցերին, պատրաստում է համապատասխան եզրակացություններ և ներկայացնում է դրանք Հիմնադրամի փորձագիտական խորհրդին` դրանք քննարկելու և Հիմնադրամի խորհրդին ուղղված հանձնարարականներ նախապատրաստելու համար,

թ) մշակում է Հիմնադրամի միջոցների տրամադրման մասին համաձայնագրերի նախագծերը, ապահովում է այդ Համաձայնագրերի պայմանների համապատասխանությունը Հիմնադրամի մասին կանոնադրությամբ սահմանված պահանջներին և ֆինանսավորում տրամադրելու մասին Հիմնադրամի խորհրդի որոշումներին, անհրաժեշտության դեպքում մշակում է նշված Համաձայնագրերում փոփոխություններ կատարելու նախագծեր,

ժ) կատարում է Հիմնադրամի միջոցների տրամադրման մասին համաձայնագրերով Հիմնադրամի միջոցներն ստացողների պարտքի հաշվառում, ստացողներին տեղեկացնում է պարտքի չափի և վճարման ենթակա գումարների մասին, իրականացնում է պարտքի սպասարկման և մարման պարտավորությունների կատարման մոնիտորինգ, անհրաժեշտության դեպքում միջոցներ է ձեռնարկում ժամկետանց պարտքը և նշված համաձայնագրերով վճարման ենթակա այլ գումարները բռնագանձելու ուղղությամբ,

ժա) ապահովում է Հիմնադրամի միջոցների տրամադրման մասին համաձայնագրերի հետ կապված պարտավորությունների կատարման մշտական մոնիտորինգ, ներառյալ նախագծերի, այլ գործառնությունների իրականացման մոնիտորինգը, Հիմնադրամի միջոցների տրամադրման պայմանների կատարման մոնիտորինգը, ապահովում է այդ տեղեկատվության մշտական հասանելիությունը Հիմնադրամի մասնակիցների համար, Հիմնադրամի միջոցների տրամադրման մասին համաձայնագրերին ուղեկցող այլ անհրաժեշտ վարչական նյութեր է տրամադրում,

ժբ) կազմակերպում է Հիմնադրամի միջոցների հաշվին իրականացվող նախագծերի և գործառնությունների արդյունավետության գնահատում և այդ գնահատման արդյունքները ներկայացնում է Հիմնադրամի փորձագիտական խորհրդին,

ժգ) Հիմնադրամի խորհրդին ուղղված անհրաժեշտ հանձնարարականներ ընդունելու համար Հիմնադրամի փորձագիտական խորհրդին ներկայացնում է տեղեկատվություն Հիմնադրամի միջոցներն ստացողների կողմից Հիմնադրամի միջոցների տրամադրման մասին համաձայնագրերի պայմանների խախտումների մասին, որոնք այդ համաձայնագրերի պայմաններին համապատասխան կարող են հանգեցնել ֆինանսավորման կասեցման և դադարեցման,

ժդ) անհրաժեշտության դեպքում մշակում և Հիմնադրամի փորձագիտական խորհրդի քննարկմանն է ներկայացնում Հիմնադրամի միջոցներում Հիմնադրամի մասնակիցների մասնաբաժինների որոշման կարգը, ինչպես նաև մասնաբաժինների վճարման կարգի և պայմանների մասին համաձայնագրերի նախագծերը,

ժե) անհրաժեշտության դեպքում մշակում և Հիմնադրամի փորձագիտական խորհրդի քննարկմանն է ներկայացնում Հիմնադրամի գործառնությունների դադարեցման ընթացակարգերը,

ժզ) անհրաժեշտության դեպքում պատրաստում և Հիմնադրամի փորձագիտական խորհրդի քննարկմանն է ներկայացնում Հիմնադրամի ստեղծման մասին պայմանագրում, Հիմնադրամի մասին կանոնադրությունում, սույն Համաձայնագրում և Հիմնադրամի այլ փաստաթղթերում փոփոխությունների նախագծերը,

ժէ) փոխգործակցում է Հիմնադրամի մասնակիցների, Հիմնադրամի խորհրդում Հիմնադրամի մասնակիցների ներկայացուցիչների, Հիմնադրամի փորձագիտական խորհրդի անդամների, Հիմնադրամի միջոցներն ստացողների հետ, ներառյալ Հիմնադրամի միջոցներն ստացող պետությունների կառավարությունները, տեղական իշխանության մարմինները և ստացող պետությունների տեղական ինքնավարության մարմինները, ինչպես նաև այլ պետական և մասնավոր կազմակերպությունները, և այդ փոխգործակցության մասին զեկուցում է Հիմնադրամի փորձագիտական խորհրդին,

ժը) իր հրապարակումներում (տարեկան հաշվետվություն, տեղեկատվական տեղեկագրեր և այլն) բավարար տեղեկատվություն է ներկայացնում Հիմնադրամի և Հիմնադրամի մասնակիցների մասին, ինչպես նաև ստացող պետությունների և զանգվածային լրատվամիջոցների հետ փոխգործակցության ընթացքի մասին,

ժթ) համագործակցում է Հիմնադրամի փորձագիտական խորհրդի հետ, այդ թվում` նրա փորձաքննությանն է ներկայացնում Բանկի կողմից Հիմնադրամի խորհրդի քննարկմանը ներկայացվող բոլոր հարցերը, փաստաթղթերը և նյութերը, ըստ Հիմնադրամի փորձագիտական խորհրդի դիտողությունների` իրականացնում է դրանց լրամշակումը, Հիմնադրամի փորձագիտական խորհրդի հայցով ներկայացնում է անհրաժեշտ լրացուցիչ տեղեկատվություն և պարզաբանումներ նշված հարցերի, փաստաթղթերի և նյութերի վերաբերյալ,

ի) կատարում է այլ գործառույթներ, որոնք կարող են պահանջվել Հիմնադրամի միջոցների արդյունավետ վարչական կառավարման համար:

2. Բանկն իրավունք ունի ընդունելու Հիմնադրամի փաստաթղթերին համապատասխանող այնպիսի ներքին նորմատիվ փաստաթղթեր, կանոններ և ընթացակարգեր, որոնք կհամարի անհրաժեշտ և նպատակահարմար Հիմնադրամի միջոցների արդյունավետ վարչական կառավարման և տնօրինման համար:

3. Բանկի ներկայացուցիչները ներկա են լինում Հիմնադրամի խորհրդի նիստերին:

4. Անհրաժեշտության դեպքում Բանկը` որպես Հիմնադրամի միջոցների կառավարիչ, Հիմնադրամի կանոնադրությամբ նախատեսված կարգով Հիմնադրամի խորհրդի արտահերթ նիստեր անցկացնելու և Հիմնադրամի խորհրդի նիստերի օրակարգում լրացուցիչ հարցեր ներառելու վերաբերյալ առաջարկություններ է ուղարկում Հիմնադրամի խորհրդի նախագահին:

5. Բանկը Հիմնադրամի միջոցների կառավարչի գործառույթներն իրականացնելու համար ներգրավում է իր անձնակազմը, երրորդ անձանց` փորձագետների (խորհրդատուների), որոնք ունեն անհրաժեշտ հմտություններ և գիտելիքներ, և այլ անհրաժեշտ ռեսուրսներ:

Հոդված 5

Հիմնադրամի միջոցների Կառավարչի` Հիմնադրամի միջոցների տնօրինման գործունեության աուդիտը

1. Բանկի կողմից Հիմնադրամի միջոցների կառավարչի գործունեությունն իրականացնելու ուղղությամբ նրա հաշվառման վարումը ստուգելու և տարեկան ֆինանսական հաշվետվության հավաստիությունը հաստատելու համար Բանկն ապահովում է անկախ արտաքին աուդիտի ամենամյա անցկացումը մինչև հաշվետու տարվան հաջորդող տարվա առաջին եռամսյակի ավարտը:

Արտաքին աուդիտի անցկացման ծախսերը ամեն տարի նախատեսվում են Հիմնադրամի միջոցների կառավարչի վարչական ծախսերի նախահաշվում և վճարվում են Հիմնադրամի միջոցներից:

2. Արտաքին աուդիտն անցկացվում է նույն կարգով, որը կիրառվում է Բանկի տարեկան ֆինանսական հաշվետվության նկատմամբ: Աուդիտորական ստուգման ծախսերը վճարվում են Հիմնադրամի միջոցներից և նախատեսվում են Հիմնադրամի միջոցների կառավարչի վարչական ծախսերի նախահաշվում, որը հիշատակվում է սույն Համաձայնագրի 6-րդ հոդվածի 1-ին կետում: Աուդիտի անցկացման համար Բանկը, ներքին ընթացակարգերին համապատասխան, ինքնուրույն ընտրում է աուդիտորական ընկերությունը:

3. Ներքին աուդիտն իրականացվում է Բանկի ներքին աուդիտի ծառայության կողմից` ներքին ընթացակարգերին համապատասխան:

4. Բանկը Հիմնադրամի մասնակիցներին ուղարկում է Հիմնադրամի միջոցների կառավարման գործունեության մասին տարեկան հաշվետվությունը և աուդիտորական եզրակացությունը դրանք ստանալուց հետո 5 (հինգ) աշխատանքային օրվա ընթացքում: Հաշվետվությունը և եզրակացությունները քննարկվում են Հիմնադրամի փորձագիտական խորհրդի և Հիմնադրամի խորհրդի կողմից:

5. Բանկը հրապարակում է Հիմնադրամի միջոցների կառավարման գործունեության մասին տարեկան հաշվետվությունը և ցանկացած այլ հաշվետվություն, որի հրապարակումը նպատակահարմար է համարում Հիմնադրամի նպատակներին հասնելու և Հիմնադրամի միջոցների կառավարչի իր գործառույթները կատարելու համար` ելնելով թափանցիկության սկզբունքներից:

Հոդված 6

Հիմնադրամի միջոցների կառավարչի հաշվետվությունը և ծախսերի վճարումը

1. Հիմնադրամի միջոցների կառավարչի գործառույթները կատարելու հետ կապված ընթացիկ ծախսերը Բանկին փոխհատուցվում են Հիմնադրամի միջոցներից` Հիմնադրամի միջոցների կառավարչի` Հիմնադրամի միջոցների կառավարման հետ կապված վարչական ծախսերի նախահաշվին համապատասխան, որը հաստատվում է Հիմնադրամի խորհրդի կողմից:

Նշված ծախսերի վճարումից բացի` Հիմնադրամի խորհուրդը կարող է, ըստ Հիմնադրամի ֆինանսական տարվա ավարտման արդյունքների, պարգևատրում նշանակել Բանկին` որպես Հիմնադրամի միջոցների կառավարչի գործունեության ծրագրված արդյունքներին հասնելու խրախուսում:

2. Բանկն իրականացնում է փաստաթղթային հիմնավորում, որն ամբողջությամբ արտացոլում է նրա` որպես Հիմնադրամի միջոցների կառավարչի գործունեությունը, և Հիմնադրամի խորհրդին ներկայացնում է անհրաժեշտ հաշվետվություն` իր` որպես Հիմնադրամի միջոցների կառավարչի գործունեության մասին:

3. Բանկը պահում է առաջնային հաշվառման բոլոր փաստաթղթերը, որոնք հաստատում են սույն հոդվածի 1-ին կետում հիշատակված ծախսերը և Հիմնադրամի միջոցների օգտագործման հետ կապված մյուս գործառնությունները (ներառյալ պայմանագրերը, ակտերը, հաշիվները, հաշիվ-ապրանքագրերը, մակագրությունները, անդորրագրերը և այլ փաստաթղթերը), Հիմնադրամի գործառնությունների ողջ ժամանակաշրջանի ընթացքում և դրա ավարտից ու Հիմնադրամի միջոցների ծախսման վերջին գործողությունը կատարելու ժամանակահատվածի վերաբերյալ աուդիտորական եզրակացությունը Հիմնադրամի խորհրդի ստանալուց հետո 5 տարվա ընթացքում:

Հոդված 7

Հակաիրավական գործողություններին հակազդելը

1. Բանկը, միջազգային իրավունքի և Հիմնադրամի մասնակից պետությունների ազգային օրենսդրություններին համապատասխան, պատշաճ միջոցներ է ձեռնարկում Հիմնադրամի միջոցների օգտագործման հետ առնչություն ունեցող հակաիրավական գործողությունների մասին նախազգուշացնելու և դրանք կանխելու համար: Բանկը նշված պահանջին առնչվող հղումները ներառում է Հիմնադրամի միջոցների տրամադրման մասին համաձայնագրերում: Ընդ որում` Հիմնադրամի միջոցներն ստացողները պարտավորություն են ստանձնում համապատասխան դրույթները ներառել ապրանքներ, աշխատանքեր և ծառայություններ մատակարարողների հետ Հիմնադրամի միջոցների հաշվին կնքվող բոլոր պայմանագրերում:

2. Հակաիրավական գործողությունների բոլոր դեպքերի մասին Բանկը տեղեկացնում է Հիմնադրամի փորձագիտական խորհրդին և Հիմնադրամի խորհրդին:

Հոդված 8

Կողմերի պատասխանատվությունը

1. Կողմերը փոխադարձ պատասխանատվություն են կրում սույն Համաձայնագրին համապատասխան իրենց պարտավորությունները պատշաճ կերպով կատարելու համար:

Կողմերը ազատվում են նշված պատասխանատվությունից այն դեպքում, եթե համապատասխան պարտավորությունների չկատարումը կամ ոչ պատշաճ կատարումը պայմանավորված է եղել անհաղթահարելի ուժի հանգամանքներով կամ մյուս Կողմի գործողություններով: Պարտավորությունների կատարման ժամկետն այս դեպքում հետաձգվում է այն ժամանակահատվածին համապատասխան ժամանակով, որի ընթացքում գործել են այդ հանգամանքները:

2. Եթե առաջ են գալիս այնպիսի հանգամանքներ, որոնք կարող են հանգեցնել Բանկի կողմից սույն Համաձայնագրով իր պարտավորությունների չկատարման, Բանկը տասնօրյա ժամկետում տեղեկացնում է Հիմնադրամի փորձագիտական խորհրդին և Հիմնադրամի խորհրդին այդ հանգամանքների և Բանկի կողմից ձեռնարկվող միջոցների մասին, որոնք ուղղված են դրանց վերացմանը և սույն Համաձայնագրով նախատեսված պարտավորությունների կատարմանը:

3. Բանկն իր ունեցվածքով պատասխանատու չէ Հիմնադրամի գործառնությունների իրականացման շրջանակներում Հիմնադրամի մասնակիցների անունից իր ստանձնած պարտավորությունների համար` բացառությամբ այն դեպքերի, երբ այդ պարտավորությունների ստանձնման դեպքում Բանկը խախտել է Հիմնադրամի փաստաթղթերի դրույթները:

Հոդված 9

Եզրափակիչ դրույթներ

1. Սույն Համաձայնագիրն ուժի մեջ է մտնում ուժի մեջ մտնելու համար անհրաժեշտ ներքին ընթացակարգերի կատարման մասին հիմնադիր պետությունների և Բանկի վերջին գրավոր ծանուցումն Ավանդապահի, որը ԵվրԱսՏՀ-ի ինտեգրացիոն կոմիտեն է, ստանալու օրվանից, բայց ոչ շուտ, քան մինչև Հիմնադրամի ստեղծման մասին պայմանագրի ուժի մեջ մտնելը:

Սույն Համաձայնագրի գործողությունը դադարեցվում է Հիմնադրամի ստեղծման մասին պայմանագրի գործողության դադարեցման հետ միաժամանակ, եթե ավելի վաղ դրա գործողությունը չդադարեցվի` սույն հոդվածի 7-րդ կետով նախատեսված կարգին համապատասխան:

2. Սույն Համաձայնագրում փոփոխությունները կատարվում են Կողմերի համաձայնեցմամբ և ձևակերպվում են առանձին արձանագրություններով:

3. Սույն Համաձայնագրին կարող են միանալ այլ պետություններ և հիմնադիր պետությունների ու Հիմնադրամի մասնակիցների կողմից միջազգային կազմակերպություններ` Հիմնադրամի ստեղծման մասին պայմանագրին նրանց` նշված պայմանագրով նախատեսված կարգով միանալու պայմանով:

Բանկի կողմից որևէ միացում սույն Համաձայնագրին չի թույլատրվում:

Սույն Համաձայնագիրն իրեն միացող պետությունների և միջազգային կազմակերպությունների համար ուժի մեջ է մտնում Հիմնադրամի ստեղծման մասին պայմանագրին և սույն Համաձայնագրին միանալու մասին փաստաթղթերն Ավանդապահի ստանալու օրվանից:

4. Սույն Համաձայնագրի վերաբերյալ վերապահումներ չեն թույլատրվում:

5. Սույն Համաձայնագրի կատարման կապակցությամբ Կողմերի միջև ծագող վեճերը հնարավորության սահմաններում լուծվում են Կողմերի կողմից` բանակցությունների և խորհրդակցությունների միջոցով:

Այն դեպքում, երբ այդ վեճերը չեն լուծվել բանակցությունների և խորհրդակցությունների միջոցով, դրանք վեճի ցանկացած կողմի կողմից փոխանցվում են երեք միջնորդ դատավորներից բաղկացած միջնորդական դատարանի քննարկմանը. այդ դատավորներից մեկը նշանակվում է Հիմնադրամի խորհրդի կողմից, մյուսը` Բանկի, երրորդը` նշանակված միջնորդ դատավորների համաձայնեցմամբ, կամ եթե միջնորդ դատավորներն իրենց նշանակումից հետո` 6 (վեց) ամսվա ընթացքում ընդհանուր համաձայնության չգան, ՄԱԿ-ի միջազգային դատարանի նախագահի կողմից: Երրորդ միջնորդ դատավորի ընտրության ժամանակ ընտրված միջնորդ դատավորներն առաջնորդվում են այն կանոնով, որ նա չպետք է լինի Բանկի ներկայացուցիչ կամ այն պետությունների քաղաքացի և այն միջազգային կազմակերպությունների ներկայացուցիչ, որոնք սույն Համաձայնագրի մասնակից են:

Միջնորդ դատավորները վեճի լուծման ժամանակ առաջնորդվում են ՅՈՒՆԻՍՏՐԱԼ-ի իրավարարական կանոնակարգով` հաշվի առնելով վեճի հանրային-իրավական բնույթը: Իրավարարական դատաքննության լեզուն ռուսերենն է:

Միջնորդ դատավորները որոշումն ընդունում են ձայների մեծամասնությամբ, և նրանց ընդունած որոշումը վեճի կողմերի համար վերջնական և պարտադիր է:

6. Հիմնադրամի ցանկացած մասնակից իրավունք ունի դուրս գալու սույն Համաձայնագրից միաժամանակ Հիմնադրամի մասնակիցների կազմից դուրս գալու պայմանով` Հիմնադրամի կանոնադրությամբ նախատեսված կարգին համապատասխան: Հիմնադրամի այդ մասնակցի նկատմամբ Հիմնադրամի մասնակիցների կազմից դուրս գալու ընթացակարգի ավարտվելու հետ ինքնաբերաբար դադարեցվում է նրա մասնակցությունը սույն Համաձայնագրին:

7. Կողմերից յուրաքանչյուրն իրավունք ունի լուծարելու սույն Համաձայնագիրը մյուս Կողմին սույն Համաձայնագրի գործողությունը դադարեցնելու մասին գրավոր ծանուցում ուղարկելու պայմանով: Այդ դեպքում սույն Համաձայնագրի գործողությունը դադարեցվում է Հիմնադրամի միջոցները և ակտիվները 2-րդ հոդվածի 3-րդ կետով նախատեսված կարգով Բանկի փոխանցելուց և Բանկի` Հիմնադրամի միջոցների կառավարչի գործառույթների կատարման հետ կապված և մինչև փոխանցման ընթացակարգի ավարտը կրած ծախսերը փոխհատուցելուց հետո:

Հիմնադրամի հիմնադիրներից, ինչպես նաև սույն Համաձայնագրին միացած պետություններից և միջազգային կազմակերպություններից բաղկացած Կողմի անունից ծանուցումները Հիմնադրամի խորհրդի նախագահն ուղարկում է Բանկին:

Բանկի անունից ծանուցումները նրա լիազորված անձն ուղարկում է Հիմնադրամի խորհրդի նախագահին Հիմնադրամի խորհրդի քարտուղարությանն ուղղված պատճենի հետ:

Սույն Համաձայնագիրը կատարված է 2009 թ. հունիսի 9-ին ք. Մոսկվայում, մեկ ռուսերեն բնօրինակով, որի վավերացված պատճեններն Ավանդապահն ուղարկում է սույն Համաձայնագիրն ստորագրած պետություններից յուրաքանչյուրին և Բանկին:

Սույն Համաձայնագիրն ստորագրվել է Բելառուսի Հանրապետության, Ղազախստանի Հանրապետության, Ղրղզստանի Հանրապետության, Ռուսաստանի Դաշնության, Տաջիկստանի Հանրապետության, Հայաստանի Հանրապետության և Եվրասիական զարգացման բանկի կողմից:

Համաձայնագիրն ուժի մեջ է մտել 2011թ. հունվարի 24-ին