«Վավերացնում եմ»
Հայաստանի Հանրապետության
Նախագահ Ռ. Քոչարյան
15 փետրվարի 2007 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

11 հունվարի 2007 թվականի N 126-Ն

ԱՆԱՍՆԱԲՈՒԺԱՍԱՆԻՏԱՐԱԿԱՆ ՓՈՐՁԱՔՆՆՈՒԹՅԱՆ ԻՐԱԿԱՆԱՑՄԱՆ ԼԻՑԵՆԶԱՎՈՐՄԱՆ ԿԱՐԳԸ ԵՎ ԼԻՑԵՆԶԻԱՅԻ ՁԵՎԸ ՀԱՍՏԱՏԵԼՈՒ ՄԱՍԻՆ

«Լիցենզավորման մասին» Հայաստանի Հանրապետության օրենքի 10-րդ հոդվածի 3-րդ, 17-րդ հոդվածի 2-րդ և 43-րդ հոդվածի 2-րդ մասերին համապատասխան` Հայաստանի Հանրապետության կառավարությունը որոշում է.

1. Հաստատել՝

ա) անասնաբուժասանիտարական փորձաքննության իրականացման լիցենզավորման կարգը՝ համաձայն N 1 հավելվածի.

բ) անասնաբուժասանիտարական փորձաքննության իրականացման լիցենզիայի ձևը` համաձայն N 2 հավելվածի:

2. Հայաստանի Հանրապետության գյուղատնտեսության նախարարին` սույն որոշումն ուժի մեջ մտնելուց հետո 10-օրյա ժամկետում հաստատել անասնաբուժասանիտարական փորձաքննության իրականացման լիցենզիա ստացած իրավաբանական և ֆիզիկական անձանց, անհատ ձեռնարկատերերի կողմից լիցենզավորող մարմին ներկայացվող հաշվետվության ձևը:

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ա. Մարգարյան
2007 թ. փետրվարի 8 Երևան

Հավելված N 1 ՀՀ կառավարության 2007 թվականի հունվարի 11-ի N 126-Ն որոշման

Կ Ա Ր Գ

ԱՆԱՍՆԱԲՈՒԺԱՍԱՆԻՏԱՐԱԿԱՆ ՓՈՐՁԱՔՆՆՈՒԹՅԱՆ ԻՐԱԿԱՆԱՑՄԱՆ ԼԻՑԵՆԶԱՎՈՐՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում են անասնաբուժասանիտարական փորձաքննության (այսուհետ` փորձաքննություն) իրականացման լիցենզավորման հետ կապված հարաբերությունները:

2. Փորձաքննության իրականացումը լիցենզավորվում է Հայաստանի Հանրապետության գյուղատնտեսության նախարարության կողմից (այսուհետ` լիցենզավորող մարմին)` «Լիցենզավորման մասին» Հայաստանի Հանրապետության օրենքին և սույն կարգին համապատասխան:

3. Փորձաքննության իրականացման լիցենզիան (այսուհետ` լիցենզիա) տրվում է բարդ ընթացակարգով, անժամկետ:

4. Սույն կարգի համաձայն տրված լիցենզիան գործում է միայն լիցենզիայում նշված վայրում:

5. Լիցենզիա տալու համար գանձվում է պետական տուրք` «Պետական տուրքի մասին» Հայաստանի Հանրապետության օրենքով սահմանված կարգով և չափով:

II. ՓՈՐՁԱՔՆՆՈՒԹՅԱՆ ԻՐԱԿԱՆԱՑՄԱՆ ԼԻՑԵՆԶԱՎՈՐՄԱՆ ՊԱՀԱՆՋՆԵՐԸ ԵՎ ՊԱՅՄԱՆՆԵՐԸ

6. Փորձաքննության իրականացման լիցենզավորման պահանջներն ու պայմաններն են`

ա) Հայաստանի Հանրապետության կառավարության 2004 թվականի մարտի 31-ի «Մսի և կենդանիների սպանդից գոյացած մյուս մթերքների անասնաբուժասանիտարական փորձաքննության իրականացման կարգը սահմանելու մասին» N 426-Ն, 2005 թվականի դեկտեմբերի 29-ի «Կաթի անասնաբուժասանիտարական փորձաքննության կարգը հաստատելու մասին» N 2305-Ն, 2005 թվականի դեկտեմբերի 29-ի «Ձկան և ջրային կենդանիների անասնաբուժասանիտարական փորձաքննության կարգը հաստատելու մասին» N 2319-Ն, 2006 թվականի հոկտեմբերի 5-ի «Մեղրի անասնաբուժասանիտարական փորձաքննության կարգը սահմանելու մասին» N 1416-Ն որոշումներով սահմանված կարգերին համապատասխան փորձաքննության իրականացումը, որը կարող են կատարել համապատասխան լիցենզիա ունեցող ֆիզիկական և իրավաբանական անձինք, անհատ ձեռնարկատերերը,

բ) փորձաքննության իրականացման համար անհրաժեշտ անասնաբուժական միջոցների առկայությունը, որոնց ցանկը հաստատում է լիցենզավորող մարմինը,

գ) հայտատուի կողմից ներկայացված մասնագիտական որակավորումը` բարձրագույն անասնաբուժական կամ անասնաբուժասանիտարական փորձաքննության մասնագիտական կրթություն և մասնագիտական որակավորման վկայական կամ առնվազն 3 տարվա անասնաբուժասանիտարական փորձաքննության մասնագիտական անընդմեջ աշխատանքային փորձ,

դ) իրավաբանական անձի համար` սույն կարգին համապատասխան անասնաբուժական կամ անասնաբուժասանիտարական փորձաքննության մասնագիտական որակավորում ունեցող առնվազն մեկ աշխատողի առկայությունը:

(6-րդ կետը խմբ. 23.10.08 N 1303-Ն)

III. ԼԻՑԵՆԶԻԱ ՍՏԱՆԱԼՈՒ ՀԱՄԱՐ ԱՆՀՐԱԺԵՇՏ ՓԱՍՏԱԹՂԹԵՐԸ

7. Լիցենզիա ստանալու համար ֆիզիկական անձը (անհատ ձեռնարկատերը) և իրավաբանական անձը լիցենզավորող մարմին են ներկայացնում հետևյալ փաստաթղթերը`

ա) հայտ՝ համաձայն ձևի, նշելով`

իրավաբանական անձի դեպքում՝ անվանումը և կազմակերպական-իրավական ձևը, գտնվելու և գործունեության իրականացման վայրերը, հեռախոսահամարները, լիցենզավորման ենթակա գործունեության տեսակը, որը հայտատուն մտադիր է իրականացնել,

ֆիզիկական անձի (անհատ ձեռնարկատիրոջ) դեպքում՝ անունը, հայրանունը, ազգանունը, բնակության և գործունեության իրականացման վայրերը, հեռախոսահամարները, լիցենզավորման ենթակա գործունեության տեսակը, որը հայտատուն մտադիր է իրականացնել,

բ) անհատ ձեռնարկատերը՝ անհատ ձեռնարկատիրոջ պետական գրանցման վկայականի պատճենը, իրավաբանական անձը՝ կանոնադրության և պետական գրանցման վկայականի պատճենը,

գ) ֆիզիկական անձը` անձնագրի պատճենը, սոցիալական քարտի պատճենը, իսկ իրավաբանական անձը և անհատ ձեռնարկատերը` հարկ վճարողի հաշվառման համարի (ՀՎՀՀ) պատճենը,

դ) լիցենզավորման ենթակա գործունեությամբ զբաղվելու վայրի սեփականության կամ այլ իրավունքով օգտագործման իրավունքի պետական գրանցման վկայականի պատճենը,

ե) անհատ ձեռնարկատիրոջ, եթե անձամբ չի իրականացնելու փորձաքննությունը, և իրավաբանական անձի դեպքում` փորձաքննություն իրականացնող անձանց հետ կնքված քաղաքացիաիրավական կամ աշխատանքային պայմանագրերի պատճենները,

զ) «Պետական տուրքի մասին» Հայաստանի Հանրապետության օրենքին համապատասխան` պետական տուրքի վճարման անդորրագիրը,

է) բարձրագույն անասնաբուժական կրթության կամ անասնաբուժասանիտարական փորձաքննության որակավորման մասին դիպլոմի պատճենը և առնվազն 3 տարվա մասնագիտական ստաժը հավաստող փաստաթուղթը,

ը) մասնագիտական որակավորման վկայականի պատճենը,

թ) անասնաբուժասանիտարական փորձաքննության իրականացման համար անհրաժեշտ անասնաբուժական միջոցների ցանկը:

(7-րդ կետը լրաց. 23.10.08 N 1303-Ն)

IV. ԼԻՑԵՆԶԻԱ ՏԱԼՈՒ ԸՆԹԱՑԱԿԱՐԳԸ

8. Լիցենզիա տալու կամ լիցենզիայի գործողությունը կասեցնելու կամ դադարեցնելու վերաբերյալ եզրակացություն տալու նպատակով լիազոր մարմինն ստեղծում է լիցենզավորող հանձնաժողով (այսուհետ` լիցենզավորող հանձնաժողով), որի կանոնադրությունը և անհատական կազմը հաստատում է լիցենզավորող մարմինը:

9. Լիցենզավորող հանձնաժողովը լիցենզիա ստանալու մասին հայտը քննարկում է «Լիցենզավորման մասին» Հայաստանի Հանրապետության օրենքով սահմանված կարգով:

10. Լիցենզիա ստանալու մասին հայտը մերժվում է «Լիցենզավորման մասին» Հայաստանի Հանրապետության օրենքի 29-րդ հոդվածով նախատեսված հիմքերի առկայության դեպքում և օրենքով սահմանված կարգով:

11. Լիցենզավորող մարմնի որոշումները կարող են բողոքարկվել դատական կամ վերադասության կարգով:

V. ԼԻՑԵՆԶԻԱՅԻ ՎԵՐԱՁԵՎԱԿԵՐՊՈՒՄԸ, ԳՈՐԾՈՂՈՒԹՅԱՆ ԿԱՍԵՑՈՒՄԸ ԵՎ ԴԱԴԱՐԵՑՈՒՄԸ

12. Լիցենզիան վերաձևակերպվում է, և դրա գործողությունը կասեցվում ու դադարեցվում է «Լիցենզավորման մասին» Հայաստանի Հանրապետության օրենքով նախատեսված հիմքերով և կարգով:

VI. ՄԱՍՆԱԳԻՏԱԿԱՆ ՈՐԱԿԱՎՈՐՄԱՆ ՍՏՈՒԳՄԱՆ ԿԱՐԳԸ

13. Մասնագիտական որակավորման վկայականն ստանալու համար անձը լիազոր մարմին է ներկայացնում դիմում` կցելով`

1) անձնագրի պատճենը,

2) դիպլոմի պատճենը` անասնաբուժական կամ անասնաբուժասանիտարական փորձաքննության մասնագիտական կրթության առկայությունը հավաստիանալու համար:

(13-րդ կետը լրաց. 23.10.08 N 1303-Ն)

14. Դիմումը և կից փաստաթղթերը ներկայացնելուց հետո եռօրյա ժամկետում լիազոր մարմինը դիմորդին տրամադրում է հարցաշարերը։ Որակավորման ստուգումը կայանում է դիմումը ներկայացնելուց 30-օրյա ժամկետում, որից առնվազն 7 օր առաջ լիազոր մարմինը տեղեկացնում է դիմորդին մասնագիտական որակավորման ստուգման անցկացման օրվա, ժամի և տեղի մասին:

(14-րդ կետը լրաց. 23.10.08 N 1303-Ն)

15. Անասնաբուժասանիտարական փորձաքննություն իրականացնող անձանց (այսուհետ` որակավորվող անձինք) մասնագիտական որակավորման ստուգումը կազմակերպում է լիազոր մարմնի կողմից ստեղծված որակավորման ստուգման հանձնաժողովը (այսուհետ` որակավորող հանձնաժողով):

(15-րդ կետը լրաց. 23.10.08 N 1303-Ն)

16. Մասնագիտական որակավորման ստուգման հարցաշարերում ներառվող հարցերի ցանկը` ընդհանուր հարցաշարը, հաստատում է լիազոր մարմինը: Մասնագիտական որակավորման ստուգման հարցաշարը և (կամ) փոփոխությունները ենթակա են պարտադիր հրապարակման` ստուգման օրվանից ոչ ուշ, քան 6 ամիս առաջ:

(16-րդ կետը լրաց. 23.10.08 N 1303-Ն)

17. Քննական հարցաշարը կազմվում է քննության օրը` համակարգչային ծրագրի միջոցով, պատահական ընտրության սկզբունքով, որակավորվող անձի և հանձնաժողովի անդամների ներկայությամբ:

(17-րդ կետը լրաց. 23.10.08 N 1303-Ն)

18. Անասնաբուժասանիտարական փորձաքննության մասնագիտական որակավորման ստուգման հարցաշարը ներառում է 10 հարց` ըստ հետևյալ ոլորտների և հարցերի բաշխվածության`

1) լիցենզավորման մասին Հայաստանի Հանրապետության օրենսդրություն` 1 հարց,

2) անասնաբուժության մասին Հայաստանի Հանրապետության օրենսդրություն` 1 հարց,

3) անասնաբուժասանիտարական փորձաքննության ոլորտի վերաբերյալ` 8 հարց:

(18-րդ կետը լրաց. 23.10.08 N 1303-Ն)

19. Մասնագիտական որակավորման ստուգումն անցկացվում է գրավոր, հայերենով, որի համար հատկացվում է 1 ժամ և արգելվում է օգտվել փաստաթղթերից ու տեխնիկական միջոցներից:

(19-րդ կետը լրաց. 23.10.08 N 1303-Ն)

20. Որակավորվող անձը համարվում է անասնաբուժասանիտարական փորձաքննության մասնագիտական որակավորման ստուգումն անցած, եթե ճիշտ է պատասխանել սույն կարգի 18-րդ կետով նախատեսված ոլորտներին վերաբերող հարցերից առնվազն 8-ին:

(20-րդ կետը լրաց. 23.10.08 N 1303-Ն)

21. Որակավորվող անձը պատշաճ ձևով տեղեկացվում է մասնագիտական որակավորման ստուգման արդյունքների մասին նույն օրը` անմիջապես:

(21-րդ կետը լրաց. 23.10.08 N 1303-Ն)

22. Որակավորման ստուգման արդյունքները կարող են բողոքարկվել վերադասության կամ դատական կարգով:

(22-րդ կետը լրաց. 23.10.08 N 1303-Ն)

23. Մասնագիտական որակավորման ստուգում անցած անձին եռօրյա ժամկետում տրվում է մասնագիտական որակավորման վկայական, որի ձևը հաստատում է լիազոր մարմինը:

(23-րդ կետը լրաց. 23.10.08 N 1303-Ն)

(Գլուխը լրաց. 23.10.08 N 1303-Ն)

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Ձև

ՀՀ գյուղատնտեսության նախարարության
լիցենզավորող հանձնաժողովի նախագահ

______________________ - ին

(անունը, ազգանունը)

Հ Ա Յ Տ

ԼԻՑԵՆԶԻԱ ՍՏԱՆԱԼՈՒ ՄԱՍԻՆ

Հայտատուի անունը, ազգանունը (անվանումը) և կազմակերպական-իրավական ձևը
_____________________________________________________
Բնակության վայրը (գտնվելու վայրը), հեռախոսահամարները _______________
_____________________________________________________
Գործունեության իրականացման վայրը _____________________________
Լիցենզավորման ենթակա գործունեության տեսակը, որին հավակնում է հայտատուն
_____________________________________________________
Կից ներկայացնում եմ հետևյալ փաստաթղթերը`
ա) անձնագրի պատճենը,
բ) պետական գրանցման վկայականի պատճենը,
գ) կանոնադրության պատճենը,
դ) հարկ վճարողի հաշվառման համարի (ՀՎՀՀ) պատճենը,
ե) սոցիալական քարտի պատճենը,
զ) պետական տուրքի վճարման անդորրագիրը,
է) համապատասխան գործունեություն իրականացնելու համար տարածքի նկատմամբ
սեփականության կամ այլ իրավունքով օգտագործման իրավունքի պետական գրանցման վկայականի պատճենը,
ը) փորձաքննություն իրականացնող անձանց բարձրագույն անասնաբուժական
կրթության կամ անասնաբուժասանիտարական փորձաքննության որակավորման
մասին դիպլոմի (վկայականի) պատճենը ____________________________

(ում կողմից է տրված, երբ, համարը)

թ) աշխատանքային գրքույկը ___________________________________

(անունը, հայրանունը, ազգանունը, համարը)

ժ) փորձաքննություն իրականացնող անձանց հետ կնքված աշխատանքային պայմանագրերի պատճենները,

ժա) անասնաբուժասանիտարական փորձաքննության իրականացման համար անհրաժեշտ անասնաբուժական միջոցների ցանկը,

ժբ) մասնագիտական որակավորման վկայականի պատճենը 

Ներկայացված տեղեկությունների իսկությունը հաստատում եմ`
_____________________________________________________

(ստորագրությունը, անունը, ազգանունը)

_____ __________________ 200 թ.

(Ձևը լրաց. 23.10.08 N 1303-Ն)

Հավելված N 2 ՀՀ կառավարության 2007 թվականի հունվարի 11-ի N 126-Ն որոշման

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐՈՒԹՅՈՒՆ

ԱՆԱՍՆԱԲՈՒԺԱՍԱՆԻՏԱՐԱԿԱՆ ՓՈՐՁԱՔՆՆՈՒԹՅԱՆ

Տրված է _____ _________________ 200 թ.

քաղ. Երևան

    
Լիցենզավորման ենթակա գործունեության տեսակը ______________________
______________________________________________________

Լիցենզավորված անձը	_______________________________________
	(իրավաբանական անձի լրիվ անվանումը)
	_______________________________________
	(ֆիզիկական անձի անունը, ազգանունը)
	_______________________________________
	(իրավաբանական անձի լրիվ անվանումը)
	_______________________________________
	(ֆիզիկական անձի անունը, ազգանունը)

    
Գործունեության իրականացման վայրը ______________________________
_______________________________________________________

Լիցենզիայի գործողության ժամկետը`

անժամկետ:

	Հայաստանի Հանրապետության գյուղատնտեսության նախարար	_____________	__________________
		(ստորագրությունը)	(անունը, ազգանունը)

Կ. Տ.

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան