ԱՐՁԱՆԱԳՐՈՒԹՅՈՒՆ

Հայաստանի Հանրապետության Կառավարությանն առընթեր պետական եկամուտների կոմիտեն և Իրանի Իսլամական Հանրապետության մաքսային վարչությունը (այսուհետ` Կողմեր),

հաշվի առնելով, որ Կողմերը իրենց երկրների տնտեսական շահերը պաշտպանելու նպատակով պատրաստակամ են ընդլայնելու մաքսային վարչությունների միջև փոխադարձ վարչական աջակցությունը,

գիտակցելով Կողմերի պետությունների սահմանները հատելու ժամանակ տրանսպորտային միջոցների և ապրանքների արդյունավետ վերահսկողության կարևորությունը,

ձգտելով Հայաստանի Հանրապետության և Իրանի Իսլամական Հանրապետության միջև ամրապնդել առևտրային հարաբերությունները,

հաշվի առնելով, որ Կողմերը պատրաստակամ են արագացնելու երկու երկրների միջև տեղափոխվող տրանսպորտային միջոցների և ապրանքների մաքսային ձևակերպումները,

ղեկավարվելով Միավորված ազգերի կազմակերպության, Համաշխարհային մաքսային կազմակերպության՝ տեղեկատվության փոխանակման վերաբերյալ նորմերով, չափորոշիչներով և առաջարկություններով և հաշվի առնելով Երևանում 2016 թվականի դեկտեմբերի 21-ին ստորագրված և 2017 թ. նոյեմբերի 14-ին ուժի մեջ մտած՝ Հայաստանի Հանրապետության Կառավարության և Իրանի Իսլամական Հանրապետության Կառավարության միջև Մեղրի-Նուրդուզ սահմանային դարպասի համատեղ օգտագործման մասին համաձայնագրի (այսուհետ՝ Համաձայնագիր) դրույթները, համաձայնեցին հետևյալի մասին.

Հոդված 1

Ընդհանուր դրույթներ

1. Կողմերը պատասխանատու են տրանսպորտային միջոցների և ապրանքների, բացառությամբ անհատ ձեռնարկատեր չհանդիսացող ֆիզիկական անձանց կողմից տեղափոխվող ապրանքների, մաքսային հայտարարագրման ընթացքում ուղղակիորեն ստացված նախնական էլեկտրոնային տվյալների մշտական փոխանակման համար՝ Կողմերից մեկի պետության տարածքից տրանսպորտային միջոցները և ապրանքները դուրս բերելիս մինչև դրանց` մյուս Կողմի պետության տարածք մուտք գործելը:

2. Նախնական էլեկտրոնային տվյալները Կողմերը կօգտագործեն առևտրի անվտանգության պահպանման և օրինական առևտրի դյուրացման համար:

3. Փոխանցվող նախնական էլեկտրոնային տվյալների նվազագույն ծավալը, որոնցով Կողմերը պայմանավորվել են փոխանակվել սույն Արձանագրության շրջանակներում, սահմանված է սույն Արձանագրության Հավելվածում:

Հոդված 2

Արդիականացված ընթացակարգերի

իրականացման հանձնառություն

Հետևողական մաքսային վերահսկողություն ապահովելու ընթացքում Կողմերն իրականացնում են նախնական էլեկտրոնային տվյալների մշտական փոխանակում` արդյունավետորեն օգտագործելով ռիսկերի վերլուծության և ռիսկերի կառավարման մեթոդները՝ Կողմերի սահմանները հատող տրանսպորտային միջոցների և ապրանքների մաքսային ընթացակարգերի անխափան իրականացման նպատակով:

Հոդված 3

Տվյալների պաշտպանություն

1. Սույն Արձանագրության շրջանակներում փոխանցվող նախնական էլեկտրոնային տվյալները պետք է լինեն սահմանափակ հասանելիության: Սույն Արձանագրության շրջանակներում փոխանցվող նախնական էլեկտրոնային տվյալներն ստացող Կողմը ստացված տվյալները չպետք է հայտնի կամ փոխանցի որևէ երրորդ կողմի՝ առանց այդ տվյալները տրամադրող Կողմի գրավոր համաձայնության:

2. Սույն Արձանագրության կիրառման ընթացքում ստացված տվյալները կարող են օգտագործվել բացառապես Համաձայնագրով և սույն Արձանագրությամբ սահմանված նպատակներով, ներառյալ դատական, վարչական վարույթներում կամ հետախուզական գործունեության մեջ օգտագործումը, և չեն կարող փոխանցվել երրորդ կողմերի՝ առանց այդ տվյալները տրամադրած Կողմի գրավոր համաձայնության:

3. Սույն արձանագրության շրջանակներում փոխանցվող նախնական էլեկտրոնային տվյալները պետք է համապատասխանեն յուրաքանչյուր Կողմի պետության՝ անձնական տվյալների պաշտպանությանը վերաբերող ներպետական օրենսդրության պահանջներին:

Հոդված 4

Տեխնիկական իրագործման գործընթաց

1. Կողմերն իրենց աշխատակազմերում ստեղծում են հատուկ ինստիտուցիոնալ ստորաբաժանումներ, որոնք պատասխանատու կլինեն.

- նախնական էլեկտրոնային տվյալների փոխանակման նպատակով տեխնիկական պահանջների մշակման և իրականացման, փոխանակման մեթոդների սահմանման համար,

- նախնական էլեկտրոնային տվյալների նվազագույն ծավալի լրամշակման համար,

- տրանսպորտային միջոցների և ապրանքների վերաբերյալ նախնական էլեկտրոնային տվյալների փոխանակման և մյուս Կողմից ստացված տվյալներն իրավասու ինստիտուցիոնալ ստորաբաժանումներին փոխանցելու համար:

2. Սույն հոդվածի 1-ին կետում նշված գործառույթների իրականացման նպատակով՝ ստեղծված ինստիտուցիոնալ ստորաբաժանումների միջև կստորագրվի «Նախնական էլեկտրոնային տվյալների փոխանակման համակարգի» վերաբերյալ տեխնիկական պահանջների փաստաթուղթ:

3. Մինչ «Նախնական էլեկտրոնային տվյալների փոխանակման համակարգի» ներդրումն անցկացվելու է տվյալների փոխանակման փորձարկման փուլ: Փորձարկման փուլի ավարտից հետո Կողմերի միջև ստորագրվելու է փորձարկման փուլի ավարտը հաստատող փաստաթուղթ` դրանով իսկ հաստատելով «Նախնական էլեկտրոնային տվյալների փոխանակման համակարգի» ամբողջական կիրառումը:

Հոդված 5

 Վեճերի լուծումը

1. Սույն Արձանագրության իրականացման ընթացքում Կողմերի միջև առաջացող վեճերը կլուծվեն բանակցությունների միջոցով, որոնք կընթանան Համաձայնագրի 9-րդ հոդվածի համաձայն ստեղծված Համատեղ կոմիտեի շրջանակներում:

2. Սույն Արձանագրության կիրառման հետ կապված՝ անհապաղ լուծում պահանջող տեխնիկական բնույթի հարցերը քննարկելու նպատակով Համատեղ կոմիտեն կարող է ստեղծել «Նախնական էլեկտրոնային տվյալների փոխանակման համակարգի» ենթակոմիտե (այսուհետ՝ Ենթակոմիտե), որը բաղկացած կլինի Կողմերի համապատասխան ինստիտուցիոնալ ստորաբաժանումների՝ հավասար քանակով ներկայացուցիչներից: Անհրաժեշտության դեպքում, Կողմերից որևէ մեկի պահանջով, պահանջն ստանալու օրվանից երկու օրվա ընթացքում կկազմակերպվի Ենթակոմիտեի նիստ:

3. Ենթակոմիտեի զեկույցները ներկայացվում են Համատեղ կոմիտեին:

Հոդված 6

Փոփոխություններ

Սույն Արձանագրությունը կարող է փոփոխվել Կողմերի փոխադարձ համաձայնությամբ՝ առանձին արձանագրությունների միջոցով, որոնք ուժի մեջ կմտնեն սույն Արձանագրության 7-րդ հոդվածի 1-ին կետում սահմանված ընթացակարգով և կկազմեն սույն Արձանագրության անբաժանելի մասը:

Հոդված 7

Ուժի մեջ մտնելը և դադարեցումը

1. Սույն Արձանագրությունն ուժի մեջ կմտնի ուժի մեջ մտնելու համար անհրաժեշտ՝ Կողմերի ներպետական ընթացակարգերի կատարման մասին Կողմերի վերջին գրավոր ծանուցումը դիվանագիտական ուղիներով ստանալու օրվանից:

2. Սույն հոդվածի 1-ին կետում նշված՝ անհրաժեշտ ներպետական ընթացակարգերն ավարտելուց հետո Հայաստանի Հանրապետության կողմից կարող են իրականացվել նախապատրաստական և փորձարկման աշխատանքներ:

3. Սույն Արձանագրությունն ստորագրվում է անորոշ ժամկետով:

4. Յուրաքանչյուր Կողմ կարող է դադարեցնել սույն Արձանագրության գործողությունը` իր այդ մտադրության մասին դիվանագիտական ուղիներով գրավոր ծանուցելով մյուս Կողմին: Այդ դեպքում սույն Արձանագրության գործողությունը դադարեցվում է այդպիսի ծանուցում ստանալու օրվանից երեք (3) ամիս հետո:

Սույն Արձանագրությունը կատարված է Երևան քաղաքում 2018 թվականի փետրվարի 27-ին, համապատասխանաբար՝ 1396 թվականի էսֆանդի 8-ին, երկու բնօրինակով, յուրաքանչյուրը՝ հայերեն, պարսկերեն և անգլերեն, ընդ որում՝ բոլոր տեքստերը հավասարազոր են: Սույն Արձանագրության դրույթների մեկնաբանման ժամանակ առաջացած ցանկացած տարաձայնության դեպքում կգերակայի անգլերեն տեքստը:

Արձանագրությունն ուժի մեջ է մտել 2019թ. մայիսի 14-ին

Հավելված

փոխանակման ենթակա` ՓՈԽԱՆՑՎԱԾ նախնական էլեկտրոնային տվյալների նվազագույն ծավալ

*Ապրանք ուղարկողի վերաբերյալ տվյալներ չեն փոխանցվում, երբ ապրանք ուղարկողը Հայաստանի Հանրապետության քաղաքացի է, և նախնական էլեկտրոնային տվյալներ փոխանցող Կողմ է Հայաստանի Հանրապետության Կառավարությանն առընթեր պետական եկամուտների կոմիտեն

**Ապրանք ստացողի վերաբերյալ տվյալներ չեն փոխանցվում, երբ ապրանք ստացողը Հայաստանի Հանրապետության քաղաքացի է, և նախնական էլեկտրոնային տվյալներ փոխանցող Կողմ է Հայաստանի Հանրապետության Կառավարությանն առընթեր պետական եկամուտների կոմիտեն

Ծանոթություն: Կողմերը տեխնիկական նկատառումներով անհրաժեշտության դեպքում կարող են ավելացնել տվյալների այլ տարրեր (օրինակ՝ այլ IRUTIR-EPD տվյալների տարրեր, նոր տրանսպորտային միջոցների նույնականացման տվյալ, եթե ապրանքները վերաբեռնվել են մի տրանսպորտային միջոցից մյուսը):

Հետևյալ տարրերը վերաբերում են այն բեռնատար շարժիչային տրանսպորտային միջոցներին, որոնք սահմանը հատելիս հայտարարագրվել են որպես դատարկ.