«Վավերացնում եմ»
Հայաստանի Հանրապետության
Նախագահ Ռ. Քոչարյան
2 հունիսի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

12 մայիսի 2005 թվականի N 609-Ն

ՄԻՋՈՒԿԱՅԻՆ ՏԵՂԱԿԱՅԱՆՔՆԵՐԻ ՀՐԱՊԱՐԱԿԻ ԸՆՏՐՄԱՆ ԼԻՑԵՆԶԱՎՈՐՄԱՆ ԿԱՐԳԸ ԵՎ ԼԻՑԵՆԶԻԱՅԻ ՁԵՎԸ ՀԱՍՏԱՏԵԼՈՒ ՄԱՍԻՆ

«Լիցենզավորման մասին» Հայաստանի Հանրապետության օրենքի 10-րդ հոդվածի 3-րդ, 17-րդ հոդվածի 2-րդ մասերին և 43-րդ հոդվածի 2-րդ մասի 12-րդ բաժնի առաջին կետին համապատասխան` Հայաստանի Հանրապետության կառավարությունը որոշում է.

1. Հաստատել`

ա) միջուկային տեղակայանքների հրապարակի ընտրման լիցենզավորման կարգը` համաձայն N 1 հավելվածի.

բ) միջուկային տեղակայանքների հրապարակի ընտրման լիցենզիայի ձևը` համաձայն N 2 հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ա. Մարգարյան
2005 թ. մայիսի 25 Երևան

Հավելված N 1 ՀՀ կառավարության 2005 թվականի մայիսի 12-ի N 609-Ն որոշման

Կ Ա Ր Գ

ՄԻՋՈՒԿԱՅԻՆ ՏԵՂԱԿԱՅԱՆՔՆԵՐԻ ՀՐԱՊԱՐԱԿԻ ԸՆՏՐՄԱՆ ԼԻՑԵՆԶԱՎՈՐՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում են միջուկային տեղակայանքների հրապարակի ընտրման լիցենզավորմանը ներկայացվող պահանջները` «Լիցենզավորման մասին» և «Խաղաղ նպատակներով ատոմային էներգիայի անվտանգ օգտագործման մասին» Հայաստանի Հանրապետության օրենքների, ինչպես նաև Ատոմային էներգիայի միջազգային գործակալության անվտանգության ստանդարտների պահանջներին համապատասխան:

2. Միջուկային տեղակայանքների հրապարակի ընտրման լիցենզավորումն իրականացնում է ատոմային էներգիայի օգտագործման բնագավառի կարգավորող մարմինը (այսուհետ` կարգավորող մարմին)` «Լիցենզավորման մասին» Հայաստանի Հանրապետության օրենքով սահմանված բարդ ընթացակարգով տրվող լիցենզիայի պայմաններին համապատասխան:

3. Միջուկային տեղակայանքների հրապարակի ընտրման լիցենզիան տրվում է որոշակի ժամկետով` մինչև միջուկային տեղակայանքը շահագործումից հանելու լիցենզիա ստանալը:

II. ԼԻՑԵՆԶԻԱ ՍՏԱՆԱԼՈՒ ՀԱՄԱՐ ԱՆՀՐԱԺԵՇՏ ՓԱՍՏԱԹՂԹԵՐԸ ԵՎ ՊԱՐՏԱԴԻՐ ՊԱՀԱՆՋՆԵՐԸ

4. Միջուկային տեղակայանքների հրապարակի ընտրման լիցենզիա ստանալու նպատակով միջուկային տեղակայանքը շահագործող կազմակերպությունը կարգավորող մարմին է ներկայացնում հայտ` համաձայն ձևի, որում նշվում են իրավաբանական անձի անվանումը, կազմակերպական-իրավական ձևը, հարկ վճարողի հաշվառման համարի վերաբերյալ տեղեկատվություն, գտնվելու և գործունեության իրականացման վայրերը:

(4-րդ կետը լրաց. 16.11.06 N 1664-Ն)

5. Հայտին կից պետք է ներկայացվեն հետևյալ փաստաթղթերը`

ա) իրավաբանական անձի կանոնադրության և պետական գրանցման վկայականի պատճենները` բոլոր ներդիրներով.

բ) պետական տուրքի վճարման անդորրագիրը.

գ) տվյալ հրապարակի վրա կառուցվելիք միջուկային տեղակայանքի նախագծի ընդհանուր նկարագիրը.

դ) միջուկային տեղակայանքների հրապարակի վրա ազդող բնական երևույթների գնահատականը, որը ներառում է`

մետեորոլոգիական և հիդրոլոգիական մոդելների հիման վրա կատարված` հնարավոր տեղումների և այլ պատճառներով առաջացող ջրհեղեղների ուսումնասիրությունների արդյունքները,

երկրաշարժի հետևանքով ջրային միջավայրում առաջացող ալիքների ուսումնասիրությունների արդյունքները,

խզվածքների և տեկտոնիկ ակտիվ կառուցվածքների ու դրանց հնարավոր զարգացման գործընթացների հետազոտությունների արդյունքները,

լանջերի և զառիթափների հնարավոր սողքերի հետազոտությունների արդյունքները,

գրունտի նստվածքների, բարձրացումների և նոսրացումների հետազոտությունների արդյունքները,

տեղեկություններ տեղի ունեցած երկրաշարժերի մասին և սեյսմոլոգիական ու երկրաբանական հետազոտությունների արդյունքները,

տեղեկություններ տեղի ունեցած մրրկահողմերի մասին և դրանց առաջացման հավանականության ուսումնասիրությունների արդյունքները,

տեղեկություններ տեղի ունեցած այլ բնական երևույթների` ուժեղ քամիների, անձրևի, ձյան, կարկուտի տեսքով տեղումների, ավազահողմերի մասին:

Միջուկային տեղակայանքների հրապարակի վրա ազդող մարդկային գործունեությամբ առաջացող գործոնների գնահատականը, որը ներառում է`

ավիացիոն աղետների ռիսկի հավանականությունը և աղետների հետևանքների ուսումնասիրությունների արդյունքները,

քիմիական և տեխնածին պայթյունների առաջացման հավանականությունն ու պայթյունների հետևանքների ուսումնասիրությունների արդյունքները,

հիդրոկառույցների շարքից դուրս գալու պատճառով հեղեղումների և ալիքների առաջացման հավանականությունն ու դրանց հետևանքների ուսումնասիրությունների արդյունքները:

Միջուկային տեղակայանքների ազդեցությունը միջուկային տեղակայանքների հրապարակի և շրջակա միջավայրի վրա, որը ներառում է`

մետեորոլոգիական բնութագրերի հիման վրա կատարված` մթնոլորտում ռադիոակտիվ արտանետումների տարածման ուղղությունների հետազոտությունների արդյունքները,

միջուկային տեղակայանքների հրապարակի հիդրոլոգիական բնութագրերի հիման վրա կատարված` մակերեսային ջրերում ռադիոակտիվ նյութերի տարածման ուղղությունների հետազոտությունների արդյունքները,

միջուկային տեղակայանքների հրապարակի հիդրոերկրաբանական բնութագրերի հիման վրա կատարված` ստորգետնյա ջրերում ռադիոակտիվ նյութերի տարածման ուղղությունների հետազոտությունների արդյունքները,

տեղեկություններ բնակչության տեղաբաշխման և միջուկային տեղակայանքների  շահագործման ընթացքում սպասվելիք աճի մասին,

տեղեկություններ հողօգտագործման և ջրօգտագործման մասին` մշակվող, ոռոգվող հողատարածքների, ստացվող գյուղատնտեսական մթերքների, ձկնատեսակների մասին ու դրանց մեջ ռադիոակտիվ նյութերի հնարավոր ուղղակի և անուղղակի ներթափանցման ուղիների մասին,

միջուկային տեղակայանքների հրապարակի ֆոնային ռադիոակտիվության հետազոտությունների արդյունքները.

ե) միջուկային տեղակայանքների հրապարակի ընտրման որակի ապահովման ծրագիրը.

զ) միջուկային տեղակայանքների հրապարակի ընտրման վերաբերյալ տեղական ինքնակառավարման մարմինների և ազդակիր համայնքի բնակչության հետ հասարակական քննարկումների արդյունքները.

է) միջուկային տեղակայանքների շահագործման և շահագործումից հանման` շրջակա միջավայրի վրա ազդեցության փորձաքննական եզրակացությունները:

III. ԼԻՑԵՆԶԻԱ ՍՏԱՆԱԼՈՒ ՀԱՄԱՐ ՆԵՐԿԱՅԱՑՎԱԾ ՓԱՍՏԱԹՂԹԵՐԻ ՔՆՆԱՐԿՈՒՄԸ

6. Կարգավորող մարմինը միջուկային տեղակայանքների հրապարակի ընտրման լիցենզիա ստանալու համար նախատեսված բոլոր փաստաթղթերը քննարկում է փաստաթղթերի մուտքագրումից հետո` 30 օրվա ընթացքում:

7. Ներկայացված փաստաթղթերի քննարկման ընթացքում կարգավորող մարմինը կարող է պահանջել անվտանգության լրացուցիչ հիմնավորումներ, նախագծային փաստաթղթեր, գիտահետազոտական աշխատանքների արդյունքների մասին հաշվետվություններ և անվտանգության գնահատման համար անհրաժեշտ այլ փաստաթղթեր:

8. Կարգավորող մարմնի որոշմամբ միջուկային տեղակայանքների հրապարակի ընտրման լիցենզիա ստանալու մասին հայտի քննարկումներին կարող են մասնակցել Հայաստանի Հանրապետության և միջազգային կազմակերպությունների փորձագետներ:
 

IV. LԻՑԵՆԶԻԱ ՍՏԱՆԱԼՈՒ ՄԱՍԻՆ ՀԱՅՏԻ ՄԵՐԺՈՒՄԸ

9. Միջուկային տեղակայանքների հրապարակի ընտրման լիցենզիա ստանալու մասին հայտը մերժվում է`

ա) եթե միջուկային տեղակայանքների հրապարակի բնութագիրը չի համապատասխանում Հայաստանի Հանրապետության օրենսդրության պահանջներին.

բ) «Լիցենզավորման մասին» Հայաստանի Հանրապետության օրենքի 29-րդ հոդվածով նախատեսված հիմքերի առկայության դեպքերում:

10. Հայտի մերժման մասին կարգավորող մարմնի որոշումը հայտատուին է տրվում  3 օրվա ընթացքում:

11. Կարգավորող մարմնի որոշումները կարող են բողոքարկվել դատական կարգով:

12. Միջուկային տեղակայանքների հրապարակի ընտրման լիցենզիայի վերաձևակերպմանը կամ գործողության կասեցմանը կամ դադարեցմանը ներկայացվող պահանջները սահմանված են «Լիցենզավորման մասին» Հայաստանի Հանրապետության օրենքով և օրենքներով:

V. ԼԻՑԵՆԶԻԱՅԻ ՊԱՅՄԱՆՆԵՐԻ ԵՎ ՊԱՀԱՆՋՆԵՐԻ ԿԱՏԱՐՄԱՆ ՆԿԱՏՄԱՄԲ ՎԵՐԱՀՍԿՈՂՈՒԹՅՈՒՆԸ

13. Միջուկային տեղակայանքների հրապարակի ընտրման լիցենզիայի պայմանների և պահանջների կատարումն օրենքով սահմանված կարգով վերահսկվում է կարգավորող մարմնի կողմից:

14. Միջուկային տեղակայանքների հրապարակի ընտրման լիցենզիա ստացած իրավաբանական անձինք կարգավորող մարմին են ներկայացնում հաշվետվություն` օրենքով սահմանված կարգով:

Ձև

ԱՏՈՄԱՅԻՆ ԷՆԵՐԳԻԱՅԻ ՕԳՏԱԳՈՐԾՄԱՆ ԲՆԱԳԱՎԱՌԻ ԿԱՐԳԱՎՈՐՈՂ ՄԱՐՄԻՆ

Հայաստանի Հանրապետության կառավարությանն առընթեր միջուկային անվտանգության կարգավորման պետական կոմիտե

Հ Ա Յ Տ  N _ _ _ _

ՄԻՋՈՒԿԱՅԻՆ ՏԵՂԱԿԱՅԱՆՔՆԵՐԻ ՀՐԱՊԱՐԱԿԻ ԸՆՏՐՄԱՆ ԼԻՑԵՆԶԻԱ ՍՏԱՆԱԼՈՒ ՄԱՍԻՆ

1. Հայտատուն ___________________________________________________

(իրավաբանական անձի անվանումը, կազմակերպական-իրավական ձևը, հարկ վճարողի հաշվառման համարի վերաբերյալ տեղեկատվություն, գտնվելու և գործունեության իրականացման վայրերը)

____________________________________________________________

____________________________________________________________

2. Հայտին կից ներկայացվում են`
ա) լիցենզիա ստանալու համար պետական տուրքի վճարման անդորրագիրը.
բ)
գ)
դ)
ե)

Ներկայացված տեղեկությունների իսկությունը հաստատում եմ`

Կազմակերպության տնօրեն

______________ (ստորագրությունը)

______________ (անունը, ազգանունը)

___ ___________ 200  թ.

Կ. Տ.

(Ձևը լրաց. 16.11.06 N 1664-Ն, փոփ. 29.05.09 N 602-Ն)

Հավելված N 2 ՀՀ կառավարության 2005 թվականի մայիսի 12-ի N 609-Ն որոշման

Ձև

ԱՏՈՄԱՅԻՆ ԷՆԵՐԳԻԱՅԻ ՕԳՏԱԳՈՐԾՄԱՆ ԲՆԱԳԱՎԱՌԻ ԿԱՐԳԱՎՈՐՈՂ ՄԱՐՄԻՆ

Հայաստանի Հանրապետության կառավարությանն առընթեր միջուկային անվտանգության կարգավորման պետական կոմիտե

Լ Ի Ց Ե Ն Զ Ի Ա  N _ _ _ _

ՄԻՋՈՒԿԱՅԻՆ ՏԵՂԱԿԱՅԱՆՔՆԵՐԻ ՀՐԱՊԱՐԱԿԻ ԸՆՏՐՄԱՆ 

Տրված ___ ____________ 200  թ.

Իրավաբանական անձի անվանումը _________________________________________
և գտնվելու վայրը ___________________________________________________
_______________________________________________________________

Գործունեության իրականացման վայրը ______________________________________
_______________________________________________________________

Լիցենզիան տրվում է մինչև

Կոմիտեի նախագահ

________________ (ստորագրությունը)

___________________ (անունը, ազգանունը)

___ ___________ 200  թ.

Կ.Տ.

(Հավելված N2-ը փոփ. 25.10.07 N 1267-Ն, 29.05.09 N 602-Ն)