ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

25 դեկտեմբերի 2008 թվականի N 1555-Ն

ԳԻՏԱԿԱՆ ԿԵՆՏՐՈՆՆԵՐԻ ՁԵՎԱՎՈՐՄԱՆ ՍԿԶԲՈՒՆՔՆԵՐԸ, ՉԱՓԱՆԻՇՆԵՐԸ ԵՎ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2008 թվականի հուլիսի 24-ի N 870-Ն որոշման N 1 հավելվածի 32-րդ կետը` Հայաստանի Հանրապետության կառավարությունը որոշում է.

1. Հաստատել`

1) գիտական կենտրոնների ձևավորման սկզբունքները և չափանիշները` համաձայն N 1 հավելվածի.

2) գիտական կենտրոնների ձևավորման կարգը` համաձայն N 2 հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Տ. Սարգսյան
2008 թ. դեկտեմբերի 29 Երևան

Հավելված N 1 ՀՀ կառավարության 2008 թվականի դեկտեմբերի 25-ի N 1555-Ն որոշման

Ս Կ Զ Բ ՈՒ Ն Ք Ն Ե Ր  Ե Վ  Չ Ա Փ Ա Ն Ի Շ Ն Ե Ր

ԳԻՏԱԿԱՆ ԿԵՆՏՐՈՆՆԵՐԻ ՁԵՎԱՎՈՐՄԱՆ

1. Գիտական կենտրոնների ձևավորման սույն սկզբունքները և չափանիշները մշակվել են` հիմք ընդունելով Հայաստանի Հանրապետության գիտության ոլորտի բարեփոխումների հայեցակարգային դրույթները:

2. Գիտական կենտրոնների ստեղծման նպատակն է գիտական կազմակերպությունների կողմից իրականացվող հիմնարար, կիրառական հետազոտությունների ու մշակումների արդյունավետության բարձրացումը, գիտության, կրթության և արտադրության ինտեգրումը:

3. Գիտական կենտրոնների ձևավորման սկզբունքներն են`

1) գիտական կազմակերպությունների գիտական հետաքրքրությունների ընդհանրությունը.

2) գիտական ներուժի, նյութատեխնիկական բազայի և տարածքների համատեղ օգտագործումը.

3) գիտական ներուժի և վարչասպասարկող անձնակազմի օպտիմալացումը.

4) գիտական ներուժի արդյունավետ, նպատակային վերարտադրությունը.

5) կառավարման համակարգում ժամանակակից մենեջմենթի ներդրումը.

6) ֆինանսական միջոցների օգտագործման արդյունավետության բարձրացումը:

4. Գիտական կենտրոնների ձևավորման չափանիշներն են`

1) համապատասխան նյութատեխնիկական բազայի և տարածքների,

2) բարձր որակավորում ունեցող գիտական աշխատողների և մասնագետների` համալիր ուսումնասիրություն կատարելու կարողության,

3) միջազգային համագործակցության փորձի,

4) մտավոր սեփականության օբյեկտների,

5) գիտական արդյունքների ներդրման փորձի առկայությունը:

5. Նշված չափանիշները կողմնորոշիչ են գիտական կենտրոնների ձևավորման գործընթացում:

6. Գիտական կենտրոն կարող են ձևավորել Հայաստանի Հանրապետության մեկ կամ մի քանի գիտական կազմակերպություններ, բարձրագույն ուսումնական հաստատություններ, գիտաարտադրական միավորումներ և գիտական, գիտատեխնիկական, գիտակրթական գործունեություն իրականացնող այլ կազմակերպություններ:

Հայաստանի Հանրապետության կառավարության աշխատակազմի ղեկավար

Դ. Սարգսյան

Հավելված N 2 ՀՀ կառավարության 2008 թվականի դեկտեմբերի 25-ի N 1555-Ն որոշման

Կ Ա Ր Գ

ԳԻՏԱԿԱՆ ԿԵՆՏՐՈՆՆԵՐԻ ՁԵՎԱՎՈՐՄԱՆ

1. Սույն կարգով սահմանվում է Հայաստանի Հանրապետությունում գիտական կենտրոններ ձևավորելու կարգը:

2. Գիտական կենտրոններ ձևավորելու գործընթացը համակարգելու նպատակով Հայաստանի Հանրապետության կրթության և գիտության նախարարության գիտության պետական կոմիտեն (այսուհետ` կոմիտե) ստեղծում է գիտության պետական կոմիտեի նախագահի նախագահությամբ և Հայաստանի Հանրապետության համապատասխան նախարարությունների ու Հայաստանի Հանրապետության գիտությունների ազգային ակադեմիայի ներկայացուցիչներից կազմված հանձնաժողով (այսուհետ` հանձնաժողով):

3. Կոմիտեն հրապարակում է գիտական կենտրոնի ձևավորման հայտի ձևը (այսուհետ` հայտ):

4. Հայտը կոմիտե է ներկայացվում Հայաստանի Հանրապետության նախարարությունների, գերատեսչությունների, Հայաստանի Հանրապետության գիտությունների ազգային ակադեմիայի, ինչպես նաև բուհերի, գիտաարտադրական միավորումների և գիտական, գիտատեխնիկական, գիտակրթական գործունեություն իրականացնող այլ կազմակերպությունների կողմից:

5. Հիմք ընդունելով գիտական կենտրոնի ձևավորման սկզբունքները և չափանիշները` հանձնաժողովը յուրաքանչյուր եռամսյակը մեկ անգամ քննարկում է հայտը և տալիս գիտական կենտրոն ձևավորելու նպատակահարմարության վերաբերյալ եզրակացություն:

6. Հանձնաժողովի դրական եզրակացության հիման վրա կոմիտեն գիտական կենտրոն ձևավորելու վերաբերյալ Հայաստանի Հանրապետության կառավարության որոշման նախագիծը սահմանված կարգով ներկայացնում է Հայաստանի Հանրապետության կառավարություն:

7. Հայաստանի Հանրապետության պետական բյուջեից գիտական կենտրոնի ֆինանսավորումը կատարվում է Հայաստանի Հանրապետության օրենսդրությամբ սահմանված կարգով` Հայաստանի Հանրապետության տվյալ տարվա պետական բյուջեով գիտության ծախսերի համար նախատեսված ընդհանուր հատկացումների սահմաններում:

Հայաստանի Հանրապետության կառավարության աշխատակազմի ղեկավար

Դ. Սարգսյան