ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

12 փետրվարի 2009 թվականի N 125-Ն

ԱՌԵՎՏՐԻ ԻՐԱԿԱՆԱՑՄԱՆ ՎԱՅՐԵՐԻ ՏԵՂԵԿԱՏՎԱԿԱՆ ՏՎՅԱԼՆԵՐԻ ՇՏԵՄԱՐԱՆԻՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՐԿԱՅԻՆ ՄԱՐՄՆԻ ՀԱՍԱՆԵԼԻՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն «Առևտրի և ծառայությունների մասին» Հայաստանի Հանրապետության օրենքի 5-րդ հոդվածի 10-րդ կետի` Հայաստանի Հանրապետության կառավարությունը որոշում է.

1. Հաստատել առևտրի իրականացման վայրերի տեղեկատվական տվյալների շտեմարանին Հայաստանի Հանրապետության հարկային մարմնի հասանելիության կարգը` համաձայն հավելվածի:

2. Սույն որոշումն ուժի մեջ է մտնում 2009 թվականի մարտի 1-ից:

Հայաստանի Հանրապետության վարչապետ	Տ. Սարգսյան
2009 թ. փետրվարի 16 Երևան

Հավելված ՀՀ կառավարության 2009 թվականի փետրվարի 12-ի N 125-Ն որոշման

Կ Ա Ր Գ

ԱՌԵՎՏՐԻ ԻՐԱԿԱՆԱՑՄԱՆ ՎԱՅՐԵՐԻ ՏԵՂԵԿԱՏՎԱԿԱՆ ՏՎՅԱԼՆԵՐԻ ՇՏԵՄԱՐԱՆԻՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՐԿԱՅԻՆ ՄԱՐՄՆԻ ՀԱՍԱՆԵԼԻՈՒԹՅԱՆ

1. Սույն կարգով կարգավորվում են առևտրի իրականացման վայրերի տեղեկատվական տվյալների շտեմարանին Հայաստանի Հանրապետության հարկային մարմնի հասանելիության կանոնները:

2. Առևտրի իրականացման վայրի կազմակերպիչը պարտավոր է ապահովել հարկային մարմնի հասանելիությունը տեղեկատվական տվյալների շտեմարանին:

3. Առևտրի իրականացման վայրերում տեղադրված ցանցային հսկիչ-դրամարկղային մեքենաներից GPRS հանգույցի կամ այլ սարքի միջոցով ֆիսկալային տվյալներն ուղարկվում են գլխավոր սերվեր` օգտագործելով HTTPS, FTP պրոտոկոլներով:

Այն առևտրի իրականացման վայրերում, որտեղ հսկիչ-դրամարկղային մեքենաները միանում են լոկալ համակարգչային ցանցով (մալուխային կապի միջոցով) և միացված են առևտրի իրականացման վայրում տեղադրված համակարգչին, յուրաքանչյուր աշխատանքային օրվա վերջում ֆիսկալային տվյալներն ուղարկվում են այդ համակարգիչ, որն իր հերթին նշված տվյալներն ուղարկում է գլխավոր սերվեր: Նշված տվյալների տեղափոխումը պետք է իրականացվի ավտոմատացված եղանակով (համապատասխան ծրագրի միջոցով):

Առևտրի իրականացման վայրում տեղադրված համակարգչից ֆիսկալային տվյալները տեղափոխվում են գլխավոր սերվեր` ինտերնետ կապի միջոցով:

4. Հսկիչ-դրամարկղային մեքենաներից դեպի գլխավոր սերվեր ուղարկվող ֆիսկալային տվյալներն են`

1) ԷՀԺ (էլեկտրոնային հսկիչ ժապավեն)` կարճ հաշվետվություն բոլոր գործարքների վերաբերյալ մեկ կամ ավելի հերթափոխի կամ 24 ժամվա ընթացքում.

2) հերթափոխային հաշվետվություն` ընդհանուր հաշվետվություն հերթափոխի (հերթափոխների) կամ 24 ժամվա ընթացքում:

5. Սույն կարգի 4-րդ կետում նշված տվյալները յուրաքանչյուր աշխատանքային օրվա ավարտից հետո, բայց ոչ ուշ, քան հաջորդ աշխատանքային օրվա սկիզբն ուղարկվում են գլխավոր սերվեր:

6. Գլխավոր սերվերն իրենից ներկայացնում է`

1) ինֆորմացիայի կոլեկտոր, որը նախատեսված է հսկիչ-դրամարկղային մեքենաներից տվյալների հավաքագրման համար.

2) տվյալների շտեմարան, որը նախատեսված է ստացված տվյալների պահպանման համար.

3) տվյալների մշակման և հաշվետվությունների կազմման հանգույց, որը նախատեսված է ստացված տվյալների հիման վրա հաշվետվություններ կազմելու համար:

7. Գլխավոր սերվեր մուտք եղած տեղեկատվությունը ծրագրային փաթեթի միջոցով ենթարկվում է մշակման և այդ մշակման արդյունքում ստեղծվում են հաշվետվություններ` նախօրոք հաստատված ձևերին համապատասխան: Նշված հաշվետվությունների ձևերը, ինչպես նաև տվյալների շտեմարանից օգտվելու կարգը սահմանվում են Հայաստանի Հանրապետության կառավարությանն առընթեր պետական եկամուտների կոմիտեի նախագահի հրամանով:

Հայաստանի Հանրապետության կառավարության աշխատակազմի ղեկավար

Դ. Սարգսյան