«Գրանցված է»

ՀՀ արդարադատության

նախարարության կողմից

30 սեպտեմբերի 2008 թ.

Պետական գրանցման թիվ 60008292

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎ

10 սեպտեմբերի 2008 թ. ք. Երևան

N 486-Ն

Ո Ր Ո Շ ՈՒ Մ

ՌԱԴԻՈՀԱՃԱԽԱԿԱՆՈՒԹՅՈՒՆՆԵՐԻ ՕԳՏԱԳՈՐԾՄԱՆ ԹՈՒՅԼՏՎՈՒԹՅՈՒՆ ՏՐԱՄԱԴՐԵԼՈՒ ՀԱՄԱՐ ՄՐՑՈՒՅԹԻ ԿԱԶՄԱԿԵՐՊՄԱՆ ԿԱՆՈՆՆԵՐԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Էլեկտրոնային հաղորդակցության մասին» Հայաստանի Հանրապետության օրենքի 1-ին հոդվածի 1-ին մասի 8-րդ կետը, 5-րդ հոդվածի 1-ին մասի 1-ին կետի դ) ենթակետը, 2-րդ կետի բ) ենթակետը, 6-րդ հոդվածի 1-ին մասը, 2-րդ մասի 1-ին կետը և 10-րդ հոդվածի 7-րդ մասը` Հայաստանի Հանրապետության հանրային ծառայությունները կարգավորող հանձնաժողովը որոշում է.

1. Հաստատել ռադիոհաճախականությունների օգտագործման թույլտվություն տրամադրելու համար մրցույթի կազմակերպման կանոնները (հավելված):

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՀՀ հանրային ծառայությունները կարգավորող հանձնաժողովի նախագահ`

Ռ. Նազարյան

Հավելված

Հաստատված է ՀՀ հանրային ծառայությունները կարգավորող հանձնաժողովի 2008 թ. սեպտեմբերի 10-ի N 486-Ն որոշմամբ

Կ Ա Ն Ո Ն Ն Ե Ր

ՌԱԴԻՈՀԱՃԱԽԱԿԱՆՈՒԹՅՈՒՆՆԵՐԻ ՕԳՏԱԳՈՐԾՄԱՆ ԹՈՒՅԼՏՎՈՒԹՅՈՒՆ ՏՐԱՄԱԴՐԵԼՈՒ ՀԱՄԱՐ ՄՐՑՈՒՅԹԻ ԿԱԶՄԱԿԵՐՊՄԱՆ

Գ Լ ՈՒ Խ  1

ԸՆԴՀԱՆՈՒՐ ԴՐՈՒՅԹՆԵՐ

Սույն կանոնները սահմանում են Հայաստանի Հանրապետության հանրային ծառայությունները կարգավորող հանձնաժողովի (այսուհետ` ՀԾԿՀ) կողմից ռադիոհաճախականությունների օգտագործման թույլտվության (այսուհետ` թույլտվություն) տրամադրման համար մրցույթի (այսուհետ` մրցույթ) կազմակերպման և անցկացման ընթացակարգը:

1. Յուրաքանչյուր մրցույթի կազմակերպման վերաբերյալ ՀԾԿՀ-ն ընդունում է որոշում: Յուրաքանչյուր մրցույթի կազմակերպման և անցկացման առանձնահատկությունները սահմանում է ՀԾԿՀ-ն:

2. Մրցույթը կազմակերպվում և անցկացվում է մրցութային հանձնաժողովի (այսուհետ` հանձնաժողով) կողմից, որի կազմը և աշխատակարգը հաստատում է ՀԾԿՀ-ն:

3. Հանձնաժողովի կազմում ընդգրկվում են ՀԾԿՀ-ի ներկայացուցիչները: Հանձնաժողովի կազմում կարող են ընդգրկվել`

1) իրավասու մարմնի ներկայացուցիչներ,

2) անկախ փորձագետներ:

4. Մրցույթին կարող է մասնակցել ցանկացած իրավաբանական կամ ֆիզիկական անձ:

Գ Լ ՈՒ Խ  2

ՄՐՑՈՒՅԹԻ ԱՆՑԿԱՑՄԱՆ ԸՆԹԱՑԱԿԱՐԳԸ

5. Մրցույթին մասնակցելու հետաքրքրություն ունեցող անձինք սույն կանոնների 1-ին կետով նախատեսված որոշումն ուժի մեջ մտնելու պահից 10 օրվա ընթացքում գրանցվում են հանձնաժողովում` ներկայացնելով մրցույթին մասնակցելու հետաքրքրության վերաբերյալ հայտ:

6. Սույն կանոնների 5-րդ կետով սահմանված ժամկետի ավարտից հետո 15 օրվա ընթացքում հետաքրքրված անձինք հանձնաժողով են ներկայացնում ՀԾԿՀ-ի կողմից սահմանված նախաորակավորման չափանիշներին համապատասխանելու վերաբերյալ հայտարարություններ և հիմնավորված գրավոր ապացույցներ:

7. Սույն կանոնների 6-րդ կետով սահմանված ժամկետի ավարտից հետո 15 օրվա ընթացքում հանձնաժողովը հրապարակում է նախաորակավորված անձանց ցանկը: Ընտրությունը կատարվում է հանձնաժողովի հայեցողությամբ:

8. Հանձնաժողովի կողմից նախաորակավորված անձանց անուն-ազգանունների (անվանումների) հրապարակումից հետո 10 օրվա ընթացքում վերջիններս ձեռք են բերում մրցութային փաթեթը, որում ներառված փաստաթղթերի ցանկը սահմանում է ՀԾԿՀ-ն:

9. Նախաորակավորված անձանց անուն-ազգանունների (անվանումների) հրապարակումից հետո 40 օրվա ընթացքում հետաքրքրված կողմերը կարող են իրականացնել իրավիճակի գնահատում (due diligence): ՀԾԿՀ-ի աշխատակազմը մասնակիցներին ցուցաբերում է համապատասխան աջակցություն:

10. Նախաորակավորված անձանց անուն-ազգանունների (անվանումների) հրապարակումից հետո 40 օրվա ընթացքում վերջիններս ներկայացնում են 1 թերթից կազմված հայտ-առաջարկ, որում նշվում է միայն մասնակցի անուն-ազգանունը (անվանումը) և մրցույթում առաջարկվող գումարը: Այն հանձնաժողովին է հանձնվում մասնակցի անուն-ազգանունը (անվանումը) կրող ծրարով:

11. Սույն կանոնների 10-րդ կետում նշված գումարի նվազագույն չափը և արժույթը սահմանում է ՀԾԿՀ-ն:

12. Հանձնաժողովը ամփոփում է մրցույթի արդյունքները և ներկայացնում ՀԾԿՀ` սույն կանոնների 10-րդ կետով նախատեսված ժամկետը լրանալու պահից 3 օրվա ընթացքում:

13. Սույն կանոնների 12-րդ կետում նշված արդյունքները ՀԾԿՀ ներկայացնելուց հետո 7 օրվա ընթացքում ՀԾԿՀ-ն հրապարակում է նախնական տվյալներ ամենաբարձր հայտ-առաջարկ ներկայացրած որակավորված դիմողի մասին, որը նախնական տվյալների համաձայն շահել է թույլտվությունը, և ընդունում է հաղթողի ընտրության մասին նախնական որոշում:

14. Հայտատուներն իրավունք ունեն ներկա գտնվելու ՀԾԿՀ-ի կողմից մրցույթում հաղթող ճանաչելու վերաբերյալ նախնական որոշման հրապարակմանը: ՀԾԿՀ-ն, իր հայեցողությամբ, իրավասու է հրավիրել նաև այլ անձանց:

15. Այլ հայտատուներն իրավունք ունեն բողոքարկել մրցույթում հաղթող ճանաչելու վերաբերյալ ՀԾԿՀ-ի նախնական որոշումը` այդ որոշումն ընդունելու պահից 4 շաբաթվա ընթացքում:

16. Բողոքարկման բացակայության կամ հաղթողի ընտրության վերաբերյալ ՀԾԿՀ-ի նախնական որոշումը բողոքարկման արդյունքում չվերանայվելու դեպքում ՀԾԿՀ-ն սույն կանոնների 13-րդ կետում նշված որոշման հրապարակումից հետո վեց շաբաթվա ընթացքում տրամադրում է վերջնական թույլտվություն:

17. Վերջնական թույլտվությունը տրամադրելուց հետո մեկ բանկային օրվա ընթացքում մրցույթում հաղթող ճանաչված անձը հայտ-առաջարկով ներկայացրած գումարը փոխանցում է ՀԾԿՀ-ի կողմից նշված բանկային հաշվեհամարին:

18. Մրցույթում հաղթող ճանաչված անձի կողմից հայտ-առաջարկում նշված գումարը չվճարելու դեպքում ՀԾԿՀ-ն հաղթող է ճանաչում հաջորդ ամենաբարձր հայտ-առաջարկը ներկայացրած նախավորակավորված անձին՝ համաձայն սույն կանոններով սահմանված պայմանների: