Ո Ր Ո Շ ՈՒ Մ

7 օգոստոսի 2008 թվականի N 957-Ն

ԳՅՈՒՄՐՈՒ ՏԵԽՆՈՊԱՐԿԻ ԳՈՐԾՈՒՆԵՈՒԹՅԱՆ ԻՐԱԿԱՆԱՑՄԱՆԸ ՊԵՏԱԿԱՆ ԱՋԱԿՑՈՒԹՅԱՆ 2008 ԹՎԱԿԱՆԻ ԾՐԱԳԻՐԸ ՀԱՍՏԱՏԵԼՈՒ ՄԱՍԻՆ

Համաձայն Հայաստանի Հանրապետության կառավարության 2007 թվականի դեկտեմբերի 20-ի «Հայաստանի Հանրապետության 2008 թվականի պետական բյուջեի կատարումն ապահովող միջոցառումների մասին» N 1540-Ն որոշման` Հայաստանի Հանրապետության կառավարությունը որոշում է.

1. Հաստատել`

1) Գյումրու տեխնոպարկի գործունեության իրականացմանը պետական աջակցության 2008 թվականի ծրագիրը` համաձայն N 1 հավելվածի.

2) Գյումրու տեխնոպարկի գործունեության իրականացմանը պետական աջակցության 2008 թվականի ծրագրի միջոցառումների ցանկը` համաձայն N 2 հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Տ. Սարգսյան
2008 թ. օգոստոսի 29 Երևան

Հավելված N 1 ՀՀ կառավարության 2008 թվականի օգոստոսի 7-ի N 957-Ն որոշման

2 0 0 8  Թ Վ Ա Կ Ա Ն Ի  Ծ Ր Ա Գ Ի Ր

ԳՅՈՒՄՐՈՒ ՏԵԽՆՈՊԱՐԿԻ ԳՈՐԾՈՒՆԵՈՒԹՅԱՆ ԻՐԱԿԱՆԱՑՄԱՆԸ ՊԵՏԱԿԱՆ ԱՋԱԿՑՈՒԹՅԱՆ

Ն Ա Խ Ա Բ Ա Ն

Գյումրու տեխնոպարկի գործունեության իրականացմանը պետական աջակցության ծրագրի ընդհանուր նկարագիրը

Սույն ծրագիրը մշակվել է` հիմք ընդունելով Հայաստանի Հանրապետության կառավարության ծրագրով որդեգրված քաղաքականությունը և սահմանված ռազմավարական գերակայությունները, և ուղղված է պետական կառավարման բնագավառում պետական մարմինների գործունեության արդյունավետության, նպատակաուղղվածության և հասցեականության մակարդակի բարձրացման, նրանց կողմից հանրությանը մատուցվող ծառայությունները բնակչության համար ավելի մատչելի դարձնելու նպատակով իրականացվող բարեփոխումների ապահովմանը:

Գյումրու տեխնոպարկի (այսուհետ` տեխնոպարկ) ստեղծմամբ հնարավորություն կընձեռվի արտադրական գործընթացներում ընդգրկելու Գյումրի քաղաքի և, ընդհանրապես, Հայաստանի Հանրապետության Շիրակի մարզի բարձր որակավորում ունեցող մասնագետներին` փոքր և միջին ձեռնարկատիրության (այսուհետ` ՓՄՁ) սուբյեկտների ստեղծման միջոցով, նախանշելով դրանց գերակայությունները և զարգացնելով մրցունակ ուղղությունները: Տեխնոպարկի ստեղծման հիմնական խնդիրներից է ՓՄՁ-ի զարգացմանը բազմակողմանի աջակցությունը, որի լուծման համար հատուկ ուշադրության է արժանի տեխնոպարկի կազմակերպական կառուցվածքում բիզնես-ինկուբատորի ներառումը: Ինչպես ցույց է տալիս մի շարք զարգացած երկրների բազմամյա փորձը, բիզնես-ինկուբատորները խիստ արդյունավետ դեր են խաղում ՓՄՁ-ի զարգացման գործում: Քաղաքների և տարածաշրջանների համար տեխնոպարկերը տնտեսական զարգացման խթանման անհրաժեշտ և կարևոր գործիքներ են: Տեղական ինքնակառավարման և պետական կառավարման մարմիններն ակտիվ մասնակցություն են ունենում տեխնոպարկերի ստեղծման ու գործունեության հարցերում, որն ստեղծում է տարածքի տնտեսության կառուցվածքի բարելավման նախադրյալներ:

Նկատի ունենալով Գյումրի քաղաքի տնտեսության զարգացման դրական միտումները` սույն ծրագրով նպատակ է հետապնդվում նախադրյալներ ստեղծելու Գյումրի քաղաքի, իսկ հետագայում նաև Հայաստանի Հանրապետության Շիրակի մարզի տնտեսական վերելքին օժանդակող ենթակառույցների ստեղծման համար: Ըստ էության, տեխնոպարկի ստեղծմամբ պետության կողմից փորձ է արվում հնարավորինս վերագործարկել մինչև աղետը եղած զարգացած գիտական, տեխնոլոգիական և արտադրական ենթակառուցվածքները, ինչը միաժամանակ կհանգեցնի մարզում լրացուցիչ աշխատատեղերի ստեղծմանը և մրցունակ արտադրանքի դուրսբերմանը` ներքին ու արտահանմանը` արտաքին շուկաներ:

Բարեփոխվող երկրներում և, հատկապես, դրանց մարզերում բացակայում են բարձր մակարդակի ենթակառուցվածքները, ամենից առաջ` հեռահաղորդակցման ոլորտում: Հաճախ, նույնիսկ լավ հեռահաղորդակցման համակարգի և տեղեկատվական միջավայրի առկայությամբ, բացակայում է այդ ենթակառուցվածքի ամենօրյա գործնական կիրառման մշակույթը: Տեխնոպարկն այդ առումով պետք է հագեցված լինի կապի և հաղորդակցման լավ միջոցներով (ինտերնետային ելքեր, տեղեկատու-որոնման համակարգեր, տեղեկատվական բազաներ, գործնական ուսուցման համապատասխան համակարգեր, զարգացած բիզնես-կոնտակտներ, այդ թվում` օտարերկրյա կոնտակտներ), որոնց միջոցով կարելի է գտնել գործընկերներ կամ ներդրողներ:

Միաժամանակ, տեխնոպարկերի ստեղծման և արդյունավետ գործունեության կարևոր պայման են տեղական ինքնակառավարման մարմինների շահագրգռվածությունը և ակտիվ մասնակցությունը ՓՄՁ-ի (ինչպես ինովացիոն, այնպես էլ ոչ տեխնոլոգիական) սուբյեկտների հիմնադրման ու հետագա զարգացման փուլերում, ինչն էլ կհանդիսանա նոր աշխատատեղերի ստեղծման և մի շարք սոցիալ-տնտեսական խնդիրների լուծման կարևոր ուղղություն:

Տեխնոպարկի հաջողության ապահովման համար անհրաժեշտ է, որ այն համապատասխանի իր աշխարհագրական դիրքի և կազմակերպությունների տեղաբաշխվածության նվազագույն պահանջներին: ՓՄՁ-ի սուբյեկտների համար շատ կարևոր է դրանց տեղակայումը հեշտ վերակառուցելի շինություններում, նաև` միօրինակ հարմարանքների, սարքերի ու սարքավորումների հավաքածուի առկայությունը, ոչ ձևական շփումը և տեխնոպարկի կողմից կազմակերպությունների վարկանիշն ապահովելու հնարավորությունները:

Տեխնոպարկերի ստեղծման, գործունեության կազմակերպման և հետագա զարգացման միջազգային փորձի ուսումնասիրությունը, ինչպես նաև Գյումրի քաղաքի արդյունաբերական ու գիտաարտադրական վիճակի համեմատական վերլուծությունները թույլ են տալիս կատարել հետևյալ եզրակացությունները և առաջարկությունները`

անառարկելի է տեղական ինքնակառավարման և պետական կառավարման մարմինների ակտիվ մասնակցությունը տեխնոպարկի ստեղծման, գործունեության ծավալման և հետագա զարգացման հարցերում,

տեխնոպարկի ստեղծումը կհանդիսանա Գյումրու և Հայաստանի Հանրապետության Շիրակի մարզի մի շարք սոցիալ-տնտեսական խնդիրների լուծման կարևոր ուղղություն,

տեխնոպարկը Գյումրի քաղաքի համար իրավամբ կհանդիսանա որպես տնտեսական զարգացման անհրաժեշտ և կարևոր գործիք,

տեխնոպարկի կազմակերպական կառուցվածքում բիզնես-ինկուբատորի ներառմամբ` տեխնոպարկն իր վրա կվերցնի ՓՄՁ-ի սուբյեկտների աջակցման գործառույթները, կխթանի մրցունակ արտադրանքի դուրսբերումը` ներքին ու արտահանումը` արտաքին շուկաներ,

տեխնոպարկը կստանձնի շուկայի զարգացման կատալիզատորի դերը,

տեխնոպարկը, օժանդակելով նոր տեխնիկայի և տեխնոլոգիաների արագացված ներդրման կազմակերպմանը, հնարավոր կդարձնի ազգային շուկայական հարաբերությունները զարգացման որոշակի մակարդակի հասցնելը, առկա գիտաարտադրական ներուժի արդյունավետ իրացումը և, ամենակարևորը, այս պայմաններում նոր աշխատատեղերի ստեղծմամբ` արժանապատիվ սերնդափոխության ապահովումը:

I. ԾՐԱԳՐԻ ՄՇԱԿՄԱՆ ՀԻՄՔԵՐԸ

1. Տեխնոպարկի գործունեության իրականացմանը պետական աջակցության 2008 թվականի ծրագրի (այսուհետ` ծրագիր) մշակման և իրականացման հիմքը «Հայաստանի Հանրապետության 2008 թվականի պետական բյուջեի մասին» Հայաստանի Հանրապետության օրենքն է:

2. Ծրագրի մշակման համար հիմք են հանդիսացել նաև`

1) Հայաստանի Հանրապետության կառավարության ծրագիրը.

2) «Ինովացիոն գործունեությանը պետական աջակցության մասին» Հայաստանի Հանրապետության օրենքը.

3) Հայաստանի Հանրապետության կառավարության 2005 թվականի սեպտեմբերի 28-ի «Հայաստանի Հանրապետությունում ինովացիոն համակարգի ձևավորման 2005-2010 թվականների ծրագրի մասին» N 1729-Ն որոշումը.

4) Հայաստանի Հանրապետության Նախագահի 2007 թվականի հուլիսի 3-ի N ՆԿ-113-Ա կարգադրությունը ՏՏ-ի ոլորտի զարգացման հայեցակարգը և դրա իրականացման ժամանակացույցը մշակելու նպատակով աշխատանքային խումբ ստեղծելու մասին.

5) Հայաստանի Հանրապետության կառավարության 2000 թվականի դեկտեմբերի 28-ի «Ինֆորմացիոն տեխնոլոգիաների արդյունաբերությունը Հայաստանի Հանրապետության տնտեսության զարգացման գերակա ճյուղերից մեկը ճանաչելու մասին» արձանագրային որոշումը:

3. Առաջարկվող ծրագիրը համահունչ է նաև Հայաստանի Հանրապետության կառավարության 2004 թվականի հունվարի 22-ի N 100-Ն որոշմամբ հաստատված` Աղքատության հաղթահարման ռազմավարական ծրագրի միջոցառումներին: Մասնավորապես, դա վերաբերում է 1.1-ին կետով սահմանված կայուն տնտեսական աճի ապահովման գերակայությանը, որտեղ սահմանված են հետևյալ միջոցառումները`

1) ազգային նորամուծական համակարգի ձևավորում.

2) գիտության և ինովացիոն գործունեության ֆինանսավորման վենչուրային համակարգերի ձևավորման խթանման համար համապատասխան օրենսդրական դաշտի ստեղծում.

3) գործարարության զարգացումը և ներդրումները խոչընդոտող ընթացակարգերի և այլ գործոնների վերլուծության հիման վրա գործողությունների ծրագրի մշակում և ներկայացում.

4) ՓՄՁ-ին պետական աջակցության ընդլայնում՝ ուղղված, առաջին հերթին, տարածաշրջաններում տնտեսական ակտիվության բարձրացմանը, ինչպես նաև արտահանման խրախուսմանը.

5) ՓՄՁ-ին աջակցության համակարգի ձևավորում, ՓՄՁ-ի սուբյեկտների ֆինանսական հնարավորությունների ընդլայնում և երկրում գործարար ակտիվության բարձրացում:

4. Նշված միջոցառումները, ինչպես բոլոր գործողությունները, ունեն արդյունքներ: Դրանք են`

1) նոր տեխնոլոգիաների ստեղծման խրախուսում և դրանց ներդրում.

2) գործարարության վարկավորման նոր մեխանիզմների առավել ընդգրկուն կիրառում.

3) առկա խնդիրների բացահայտում և լուծման համար պայմանների ստեղծում.

4) Հայաստանի Հանրապետությունում, մասնավորապես, տարածաշրջաններում (մարզերում, համայնքներում) բնակչության զբաղվածության և բարեկեցության բարելավում.

5) ՓՄՁ-ի սուբյեկտներին աջակցության շարունակականության ապահովում, նոր աշխատատեղերի ստեղծում, համախառն ներքին արդյունքում (այսուհետ` ՀՆԱ) ՓՄՁ-ի սուբյեկտների մասնաբաժնի ավելացում:

II. ԾՐԱԳՐԻ ՆՊԱՏԱԿՆԵՐԸ ԵՎ ԱԿՆԿԱԼՎՈՂ ԱՐԴՅՈՒՆՔՆԵՐԸ

1. Տեխնոպարկի հիմնական նպատակներից է աջակցելը տեղեկատվական տեխնոլոգիաների (այսուհետ` ՏՏ) ոլորտի ընկերությունների ստեղծմանը և զարգացմանը Գյումրիում: Հաշվի առնելով Գյումրիում ՏՏ-ի ոլորտում ձեռներեցության ներկա անբավարար մակարդակը` տեխնոպարկը սերտորեն կաշխատի ՏՏ-ի ոլորտի արտասահմանյան կազմակերպությունների մասնաճյուղերի և տեղական մասնավոր ընկերությունների հետ` սկսնակ կազմակերպություններ ու գիտահետազոտական լաբորատորիաներ հիմնելու նպատակով: Այս կազմակերպությունները և գիտահետազոտական լաբորատորիաները որպես խթանիչներ կհանդիսանան Գյումրիում ՏՏ-ի ձեռներեցությունը զարգացնելու, ՏՏ-ի մասնագիտությունների նկատմամբ ուսանողների հետաքրքրությունը մեծացնելու, բարձր վարձատրվող նոր աշխատատեղեր ստեղծելու և Երևանի ռեսուրսներից ՏՏ-ի ընկերությունների կախվածությունը նվազեցնելու համար: Նախատեսվում է, որ այնպիսի ընկերություններ, ինչպիսիք են «Մայքրոսոֆթը», «Սան Մայքրոսիսթեմսը», «Նեյշնլ Ինսթրումենթսը» և այլն, կհամագործակցեն տեխնոպարկի հետ և կհիմնեն ուսումնական ու գիտահետազոտական լաբորատորիաներ Գյումրիում: Լաբորատորիաները կանցկացնեն ուսումնական դասընթացներ, կիրականացնեն գիտահետազոտական ծրագրեր` ստեղծելով անհրաժեշտ միջավայր ապագա սկսնակ կազմակերպությունների համար, որոնք հիմնված կլինեն այդ լաբորատորիաների փորձի և վերապատրաստում անցած կադրերի վրա: Այս ծրագրերի իրականացմանը սատարելու համար Հայաստանի Հանրապետության կառավարությունը, մասնավորապես, կաջակցի ուսումնական և գիտահետազոտական լաբորատորիաների ստեղծմանը, ինչպես նաև լաբորատորիաներին կտրամադրի հետազոտական դրամաշնորհներ` կադրերի վերապատրաստման, արտադրանքի մշակման և նոր գիտելիքների ձեռքբերման նպատակով:

2. Ծրագրի իրականացման նպատակը տեխնոպարկի միջոցով ինովացիոն համակարգի ձևավորումն է: Միաժամանակ, տեխնոպարկի գործունեության իրականացմանը պետական աջակցության ծրագիրն ունի հետևյալ ենթանպատակները`

1) արտադրական և գիտական սուբյեկտների մտավոր, տեղեկատվական, նյութատեխնիկական ու ֆինանսական ռեսուրսների ինտեգրում և ակտիվացում` մարզի ու հանրապետության գիտաարտադրական ներուժի զարգացման համար.

2) մարզում ՓՄՁ-ի սուբյեկտների ստեղծման ու զարգացման պայմանների և բարենպաստ միջավայրի ձևավորում.

3) մասնակցություն շուկայական տնտեսական այնպիսի մեխանիզմների ձևավորմանը, որոնք կխթանեն մրցունակ ապրանքների արտադրությունը.

4) առաջադեմ տեխնոլոգիաների ձեռքբերմանն աջակցելու նպատակով ներդրումային միջոցների ներգրավում (այդ թվում` օտարերկրյա).

5) գիտատար արտադրանք նախաձեռնողներին և արտադրողներին` հասցեական աջակցության տրամադրում.

6) գիտատեխնիկական, մտավոր և կադրային ներուժի պահպանման ու զարգացման պայմանների ձևավորում, երիտասարդ կադրերի պատրաստում.

7) օրինակելի նախատիպ հանդիսանալը հանրապետության այլ տարածքներում և մարզերում տեխնոլոգիական ուղղվածություն ունեցող տեխնոպարկերի և ինկուբատորների ստեղծման համար:

3. Ծրագրի իրականացման արդյունքում նախատեսվում են`

1) մարզում նոր աշխատատեղերի ստեղծում,

2) բնակչության արտահոսքի կրճատում ու ներհոսքի խթանում` ինչպես երկրից դուրս, այնպես էլ` մարզից մայրաքաղաք.

3) Հայաստանի Հանրապետությունում կայուն տնտեսական զարգացմանը, տարածքային համաչափ զարգացմանը, աղքատության հաղթահարմանը նպաստելը:

III. ԾՐԱԳՐԻ ԻՐԱԿԱՆԱՑՄԱՆ ՍԿԶԲՈՒՆՔՆԵՐԸ

Ծրագիրն իրականացվում է պետական և մասնավոր հատվածների սերտ համագործակցությամբ` որպես պետական աջակցություն տեխնոպարկում ներգրավված և դրա գործունեության արդյունքում ձևավորվելիք կազմակերպություններին:

IV. ԾՐԱԳՐԱՅԻՆ ՄԻՋՈՑԱՌՈՒՄՆԵՐԻ ՀԱՄԱԿԱՐԳԸ

1. Տեխնոպարկի գործունեության իրականացման համար նախատեսվում է իրականացնել մի շարք միջոցառումներ, մասնավորապես`

1) ծրագրի ընդհանուր կառավարման համար կձևավորվի թիմ, որի կազմում կներգրավվեն մասնագետներ` ինչպես պետական հատվածից և այլ գործընկեր կազմակերպություններից, այնպես էլ` վճարովի խորհրդատուներ: Թիմը կվերահսկի տեխնոպարկի գործունեությունը` նախապատրաստական շրջանից մինչև մեկնարկային փուլը` տրամադրելով անհրաժեշտ աջակցություն և խորհրդատվություն` կապված տեխնոպարկի ենթակառուցվածքի ձևավորման ու գործարկման հետ.

2) կմշակվի բիզնես-պլան, որը կներառի տեխնոպարկի վերաբերյալ գործառնական և ֆինանսական բոլոր մանրամասները: Բիզնես-պլանի մշակման համար պատասխանատու թիմը կանցկացնի հնարավոր միջազգային գործընկեր ընկերությունների, տեղական կազմակերպությունների, բուհերի, ուսանողների, կապի ենթակառուցվածքի և այլ ոլորտների հետազոտություն, որը կօգնի ձևավորել տեխնոպարկի կողմից մատուցվելիք նպատակային ծառայությունների և արտադրանքի ցանկը.

3) ծրագիրը կառավարող թիմը պետք է գտնի վստահելի գործընկերներ, որոնք կցուցաբերեն զգալի աջակցություն` ոչ միայն ֆինանսական առումով, այլև խորհրդատվության, կապերի հաստատման, մասնագիտական օգնության տեսանկյունից:

Կիրականացվի տեխնոպարկի արդյունավետ գործունեության համար տարածքների և ներգրավված կառույցների (կրթական և այլ) ընտրություն, ինչպես նաև տեխնոպարկի կազմում ընդգրկված կառույցների միջև անհրաժեշտ հեռահաղորդակցության ցանցի և տեխնոպարկի վեբ կայքի նախագծում.

4) տեխնոպարկի գործունեության իրականացման համար սույն ծրագրի շրջանակներում նախատեսվում է համաֆինանսավորում ծրագրի հետևյալ բաղադրիչներին`

ա. նախապատրաստական փուլի կառավարում

Այս միջոցառման շրջանակներում կվարձակալվեն խորհրդատուներ` ծրագրի ընդհանուր կառավարման նպատակով ձևավորվելիք թիմում ընդգրկման նպատակով,

բ. ուսումնական և գիտահետազոտական լաբորատորիաների հիմնում` տեղական և միջազգային ճանաչում ունեցող ընկերությունների հետ համատեղ

Ծրագիրը կհամագործակցի իր գործընկերների հետ` գիտահետազոտական և ուսումնական լաբորատորիաների ստեղծման գործում: Նպատակը մի շարք գործընկերների հետ, օրինակ, «Մայքրոսոֆթ», «Նեյշնլ Ինսթրումենթս», «Սան Մայքրոսիսթեմս», «Սինոփսիս» և այլն, համատեղ լաբորատորիաներ հիմնելն է: Լաբորատորիաները կստեղծվեն Գյումրիում, մասնավորապես, պետական ճարտարագիտական համալսարանի մասնաճյուղի հենքի վրա: Այս միջոցառման իրականացման նպատակով պետությունը կհամաֆինանսավորի` մինչև 50 տոկոսի չափով,

գ. դրամաշնորհներ` գիտահետազոտական ծրագրերի համար

Գիտահետազոտական աշխատանքների և սկսնակ կազմակերպությունների զարգացումը խթանելու նպատակով ծրագիրը կտրամադրի հատուկ գիտահետազոտական դրամաշնորհներ, որոնք մրցութային կարգով կհատկացվեն Գյումրիում գործող գիտահետազոտական լաբորատորիաներին և սկսնակ կազմակերպություններին:

V. ԾՐԱԳՐԻ ՖԻՆԱՆՍԱԿԱՆ ԱՊԱՀՈՎՈՒՄԸ

1. Հայաստանի Հանրապետության 2008 թվականի պետական բյուջեով, որպես ծրագրի իրականացմանը պետական աջակցության կողմնորոշիչ, սահմանվել է չափաքանակ` 80,000.0 հազ. դրամ:

2. Ծրագրում ներառված միջոցառումները կհամաֆինանսավորվեն նաև Հայաստանի Հանրապետության օրենսդրությամբ չարգելված այլ միջոցների հաշվին:

Հայաստանի Հանրապետության կառավարության աշխատակազմի ղեկավար

Դ. Սարգսյան

Հավելված N 2 ՀՀ կառավարության 2008 թվականի օգոստոսի 7-ի N 957-Ն որոշման

Ց Ա Ն Կ

ԳՅՈՒՄՐՈՒ ՏԵԽՆՈՊԱՐԿԻ ԳՈՐԾՈՒՆԵՈՒԹՅԱՆ ԻՐԱԿԱՆԱՑՄԱՆԸ ՊԵՏԱԿԱՆ ԱՋԱԿՑՈՒԹՅԱՆ 2008 ԹՎԱԿԱՆԻ ԾՐԱԳՐԻ ԻՐԱԿԱՆԱՑՄԱՆ ՄԻՋՈՑԱՌՈՒՄՆԵՐԻ

(հազ. դրամ)

NN ը/կ	Ծրագրով նախատեսված միջոցառումների անվանումները, հիմնական ցուցանիշները			2008 թվականի ֆինանսավորման սահմանագումարը
	միջոցառման անվանումը	միջոցառման նկարագիրը	միջոցառման վերջնական արդյունքը	առաջին եռամսյակ	առաջին կիսամյակ	ինն ամիս	տարի
1.	Նախապատրաստական փուլի կառավարում	ծրագրի կառավարման թիմում ներգրավվող խորհրդատուների վարձակալության համաֆինանսավորում	տեխնոպարկի գործունեության բիզնես-պլան	0	3000	6000	9000
2.	Ուսումնական և գիտահետազո- տական լաբորատորիաների հիմնում` տեղական և միջազգային ճանաչում ունեցող ընկերությունների հետ համատեղ	մի շարք գործընկերների հետ, օրինակ, «Մայքրոսոֆթ», «Նեյշնլ Ինսթրումենթս», «Սան Մայքրոսիսթեմս», «Սինոփսիս» և այլն, համատեղ լաբորատորիաների հիմնման համաֆինանսավորում	ուսումնական և գիտահետազոտական լաբորատորիաներ (մինչև 3)	12000	30000	30000	30000
3.	Դրամաշնորհներ` գիտահետազոտական ծրագրերի համար	գիտահետազոտական աշխատանքների և սկսնակ կազմակերպությունների զարգացումը խթանելու նպատակով տրամադրվող հատուկ գիտահետազոտական դրամաշնորհների համաֆինանսավորում	գիտահետազոտական ծրագրեր (մինչև 10)	0	3000	24000	41000
	Ընդամենը			12000	36000	60000	80000

Հայաստանի Հանրապետության կառավարության աշխատակազմի ղեկավար

Դ. Սարգսյան