«Վավերացնում եմ»
Հայաստանի Հանրապետության
Նախագահ Ռ. Քոչարյան
 23 սեպտեմբերի 2006 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

7 սեպտեմբերի 2006 թվականի N 1286-Ն

ՊԵՏԱԿԱՆ ՏՈՀՄԱՅԻՆ ԳՐՔԵՐԻ, ԻՆՉՊԵՍ ՆԱԵՎ ՏՈՀՄԱՅԻՆ ԿԵՆԴԱՆԻՆԵՐԻ ՆԱԽԻՐՆԵՐԻ, ՀՈՏԵՐԻ ՈՒ ԵՐԱՄԱԿՆԵՐԻ ԿԱԴԱՍՏՐԻ ՎԱՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

«Տոհմային անասնաբուծության մասին» Հայաստանի Հանրապետության օրենքի  4-րդ հոդվածի «ե» կետին համապատասխան` Հայաստանի Հանրապետության կառավարությունը որոշում է.

1. Հաստատել պետական տոհմային գրքերի, ինչպես նաև տոհմային կենդանիների նախիրների, հոտերի ու երամակների կադաստրի վարման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ա. Մարգարյան
2006 թ. սեպտեմբերի 16 Երևան

Հավելված ՀՀ կառավարության 2006 թվականի սեպտեմբերի 7-ի N 1286-Ն որոշման

Կ Ա Ր Գ

ՊԵՏԱԿԱՆ ՏՈՀՄԱՅԻՆ ԳՐՔԵՐԻ, ԻՆՉՊԵՍ ՆԱԵՎ ՏՈՀՄԱՅԻՆ ԿԵՆԴԱՆԻՆԵՐԻ ՆԱԽԻՐՆԵՐԻ, ՀՈՏԵՐԻ ՈՒ ԵՐԱՄԱԿՆԵՐԻ ԿԱԴԱՍՏՐԻ ՎԱՐՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է Հայաստանի Հանրապետությունում բուծվող գյուղատնտեսական կենդանիների պետական տոհմային գրքերի (այսուհետ` տոհմային գրքեր) և տոհմային կենդանիների նախիրների, հոտերի ու երամակների կադաստրի (այսուհետ՝ տոհմային կենդանիների կադաստր) վարման գործընթացը` «Տոհմային անասնաբուծության մասին» Հայաստանի Հանրապետության օրենքի դրույթներին համապատասխան:

2. Սույն կարգի նպատակն է`

ա) տոհմային գրքերի և տոհմային կենդանիների կադաստրի վարման գործընթացի կազմակերպումն ու իրականացումը.

բ) Հայաստանի Հանրապետությունում բուծվող` տարբեր տեսակի և ցեղերի պատկանող բարձրարժեք տոհմային կենդանիների մասին տվյալների հավաքագրումը.

գ) Հայաստանի Հանրապետությունում բուծվող գյուղատնտեսական կենդանիների ցեղերի գենոֆոնդի պահպանմանն ու տոհմամթերատու հատկությունների կատարելագործմանը նպաստելը.

դ) տոհմային կենդանիների ռեսուրսների արդյունավետ օգտագործման վերաբերյալ առաջարկությունների և ծրագրերի մշակումն ու իրականացումը:

II. ՏՈՀՄԱՅԻՆ ԳՐՔԵՐԻ ՎԱՐՄԱՆ ԿԱՐԳԸ

3. Տոհմային գրքերը վարում է Հայաստանի Հանրապետության կառավարության կողմից լիազորված պետական կառավարման մարմինը (այսուհետ` լիազորված մարմին):

4. Տոհմային գրքերը վարվում են ըստ Հայաստանի Հանրապետությունում բուծվող գյուղատնտեսական կենդանիների ցեղերի:

5. Տոհմային գրքերում գրանցվում են միայն տոհմային գործունեությամբ զբաղվող տնտեսությունների կենդանիները:

(5-րդ կետը փոփ. 06.07.07 N 778-Ն)

6. Տարբեր տեսակների և ցեղերի պատկանող կենդանիներին տոհմային գրքերում գրանցելու պահանջները սահմանում է լիազորված մարմինը:

7. Տոհմային գրքերում գրանցվում են Հայաստանի Հանրապետության կառավարության 2006 թվականի հունվարի 12-ի N 15-Ն որոշմամբ հաստատված տոհմային կենդանիների բոնիտավորման, ինչպես նաև նրանց ըստ սերնդի որակի գնահատման պայմանների հաստատման կարգի համաձայն անցկացված բոնիտավորման և լիազորված մարմնի կողմից հաստատված անասնաբուծական և տոհմային հաշվառման գրանցամատյաններում ու գյուղատնտեսական կենդանիների տոհմային քարտերում գրանցված տվյալները:

8. Տոհմային գործունեությամբ զբաղվող անձինք բոնիտավորման արդյունքները լիազորված մարմին ներկայացնելու հետ միաժամանակ տոհմային գրքերում գրանցելու համար ներկայացնում են նաև լիազորված մարմնի կողմից սահմանված պահանջներին համապատասխանող կենդանիների տոհմային քարտերի ստորագրված և կնքված կրկնօրինակները:

(8-րդ կետը փոփ. 06.07.07 N 778-Ն)

9. Լիազորված մարմինն ուսումնասիրում է տոհմային քարտերում գրանցված տվյալները, դրանց համապատասխանությունը սահմանված պահանջներին (անհրաժեշտության դեպքում ստուգում է տնտեսություններում ներկայացված տվյալների հավաստիությունը) և 15-օրյա ժամկետում ընդունում է որոշում` կենդանիներին տոհմային գրքերում գրանցելու  կամ գրանցումը մերժելու մասին:

10. Տոհմային գրքերում կենդանիների գրանցման մասին որոշման ընդունումից հետո 5-օրյա ժամկետում` լիազորված մարմինը դրա մասին տեղեկացնում է ֆիզիկական և իրավաբանական անձանց:

11. Տոհմային գրքում կենդանու գրանցման տարեթիվը, լիազորված մարմնի կողմից կենդանու տոհմային գրքում գրանցման մասին որոշման համարը, տարեթիվը և տոհմային գրքով տրված համարը Հայաստանի Հանրապետության կառավարության 2006 թվականի հունվարի 12-ի N 15-Ն որոշմամբ հաստատված տոհմային կենդանիների բոնիտավորման, ինչպես նաև նրանց ըստ սերնդի որակի գնահատման պայմանների հաստատման կարգին համապատասխան լրացվում են լիազորված մարմնի կողմից հաստատված գյուղատնտեսական կենդանիների տոհմային քարտերում:

12. Տոհմային գրքերում գրանցվող  արուներն ու էգերը և մաքրացեղ ու խառնացեղ կենդանիները համարակալվում են առանձին:

13. Լիազորված մարմինը վարում է տոհմային գրքերում գրանցված կենդանիների քարտադարան, որում յուրաքանչյուր տարի լրացվում են տվյալներ գրանցված կենդանիների տեղաշարժի, վերարտադրության նպատակով օգտագործման և մթերատվության մասին:

14. Անասնատերը տոհմային գրքերում գրանցված կենդանիների անկման կամ օտարման մասին տեղեկացնում է լիազորված մարմնին: Լիազորված մարմինը կենդանիների անհատական քարտերում կատարում է համապատասխան նշումներ:

15. Տոհմային գրքերը հրատարակում է լիազորված մարմինը:

16. Տոհմային գրքերի պահպանման ժամկետ չի սահմանվում:

III. ՏՈՀՄԱՅԻՆ ԿԵՆԴԱՆԻՆԵՐԻ ԿԱԴԱՍՏՐԻ ՎԱՐՄԱՆ ԿԱՐԳԸ

17. Տոհմային կենդանիների կադաստրը (հաշվառում և հաշվառման գրանցամատյանների վարում) վարում է լիազորված մարմինը:

18. Տոհմային կենդանիները հաշվառվում ու գրանցվում են լիազորված մարմնի կողմից սահմանված ձևերի հաշվառման գրանցամատյաններում, որոնք համարակալում, կարում և կնքում է լիազորված մարմինը:

19. Հայաստանի Հանրապետությունում բուծվող գյուղատնտեսական կենդանիների յուրաքանչյուր տեսակի համար վարվում է առանձին հաշվառման գրանցամատյան:

20. Հաշվառման գրանցամատյաններում գրանցվում են միայն տոհմային գործունեությամբ զբաղվող ֆիզիկական և իրավաբանական անձանց նախիրները, հոտերը և երամակները:

(20-րդ կետը փոփ. 06.07.07 N 778-Ն)

21. Տոհմային կենդանիները համարակալվում, հաշվառվում և գրանցվում են Հայաստանի Հանրապետության կառավարության 2004 թվականի հունվարի 29-ի N 59-Ն որոշմամբ հաստատված Հայաստանի Հանրապետությունում գյուղատնտեսական կենդանիների համարակալման, հաշվառման և գրանցման կարգի պահանջներին համապատասխան:

22. Տոհմային կենդանիների հաշվառված և գրանցված նախիրներ, հոտեր ու երամակներ ունեցող ֆիզիկական և իրավաբանական անձինք յուրաքանչյուր տարի լիազորված մարմին են ներկայացնում տեղեկատվություն դրանց օտարման կամ լուծարման և կենդանիների գլխաքանակի, մթերատվության ու վաճառքի մասին:

23. Լիազորված մարմինը տոհմային կենդանիների նախիրների, հոտերի և երամակների օտարման կամ լուծարման և կենդանիների գլխաքանակի, մթերատվության ու վաճառքի մասին ֆիզիկական և իրավաբանական անձանցից ստացված տեղեկատվության հիման վրա համապատասխան նշումներ է կատարում հաշվառման գրանցամատյանում:

(հավելվածը փոփ. 06.07.07 N 778-Ն)

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան