Ա Ր Ձ Ա Ն Ա Գ Ր ՈՒ Թ Յ ՈՒ Ն

Միջպետական գիտատեխնիկական խորհրդի մասին Կանոնադրությունը հաստատելու վերաբերյալ

Սույն Արձանագրության մասնակից պետությունների Կառավարությունները,

ղեկավարվելով 1992 թվականի մարտի 13-ի` Անկախ Պետությունների Համագործակցության պետությունների շրջանակներում գիտատեխնիկական համագործակցության մասին Համաձայնագրով,

համաձայնեցին ներքոհիշյալի մասին.

Հաստատել Միջպետական գիտատեխնիկական խորհրդի մասին Կանոնադրությունը (կցվում է):

Կատարված է Տաշքենդ քաղաքում 1992 թվականի մայիսի 15-ին, մեկ բնօրինակով, ռուսերեն: Բնօրինակը պահվում է Բելառուսի Հանրապետության կառավարության արխիվներում, որը սույն Համաձայնագիրը ստորագրած պետություններին կուղարկի Համաձայնագրի հաստատված պատճենները:

Կ Ա Ն Ո Ն Ա Դ Ր ՈՒ Թ Յ ՈՒ Ն

Միջպետական գիտատեխնիկական խորհրդի մասին

1. Ը ն դ հ ա ն ու ր  դ ր ու յ թ ն ե ր

Միջպետական գիտատեխնիկական համագործակցության մասին Համաձայնագրի (այսուհետ` Համաձայնագիր) շրջանակներում պետությունների փոխգործակցության համակարգման համար ստեղծվում է Միջպետական գիտատեխնիկական խորհուրդ (այսուհետ` ՄԳԽ), կազմված Համաձայնագիրը ստորագրած մասնակից պետությունների լիազոր ներկայացուցիչներից` մեկական յուրաքանչյուր պետությունից:

Համաձայնագիրը ստորագրած յուրաքանչյուր մասնակից պետություն ՄԳԽ-ում ունի մեկ ձայն:

ՄԳԽ-ի և նրա աշխատանքային մարմինների պաշտոնական լեզուն ռուսերենն է:

ՄԳԽ-ի աշխատանքային մարմինների տեղակայման վայրն է Կիև քաղաքը:

2. Մ Գ Խ - ի  գ ո ր ծ ա ռ ու յ թ ն ե ր ը

ՄԳԽ-ն կատարում է հետևյալ գործառույթները.

միջպետական գիտատեխնիկական համագործակցության ուղղություններով առաջարկությունների համաձայնեցումը,

համատեղ գիտատեխնիկական գործունեության ձևերի ընտրությունը,

Համագործակցության մասնակից պետությունների հաստատմանը ներկայացված, իսկ լիազորությունների առկայության դեպքում` Համաձայնագրով նախատեսված փաստաթղթերի հաստատում,

ՄԳԽ աշխատանքային մարմինների ձևավորման մասին որոշումների ընդունում, աշխատանքի կանոնակարգի և դրանց պահպանման հետ կապված ծախսերի նախահաշվի մասին որոշումների ընդունումը:

ՄԳԽ-ն իրականացնում է նաև այլ գործառույթներ, որոնք սահմանվում են Համաձայնագրով կամ Անկախ Պետությունների Համագործակցության մասնակից պետությունների Կառավարությունների հետ համաձայնեցված լրացուցիչ լիազորություններով:

3. Մ Գ Խ - ու մ  պ ե տ ու թ յ ա ն  ն ե ր կ ա յ ա ց ու ց ի չ ը

ՄԳԽ-ի անդամը ներկայացնող պետության կողմից օժտվում է ՄԳԽ-ի կողմից իր վրա դրված գործառույթների կատարման համար անհրաժեշտ լիազորություններով:

ՄԳԽ-ի անդամը իրավունք ունի.

նախաձեռնել ՄԳԽ-ում միջպետական գիտատեխնիկական համագործակցության տարբեր հարցերի քննարկում,

տեղեկացնել ՄԳԽ-ին միջպետական գիտատեխնիկական համագործակցության կոնկրետ հարցերով իր պետության դիրքորոշման մասին,

բանակցություններ անցկացնել ՄԳԽ-ի մյուս անդամների հետ միջպետական գիտատեխնիկական համագործակցության կոնկրետ ձևերում իր պետության մասնակցության հարցերի վերաբերյալ,

հարցմամբ քարտուղարությունից տեղեկություն ստանալ ՄԳԽ-ի աշխատանքային մարմինների ընթացիկ գործունեության մասին, ինչպես նաև տեղեկություն համագործակցության կոնկրետ ուղղությունների վերաբերյալ:

4. Մ Գ Խ - ի  ա շ խ ա տ ա ն ք ի  կ ա զ մ ա կ ե ր պ ու մ ը

ՄԳԽ-ն իր նիստերը անց է կացնում առնվազն կես տարին մեկ անգամ:

Նիստի աշխատանքին մասնակցում են ՄԳԽ-ի անդամները` պետությունների ներկայացուցիչները: ՄԳԽ-ի նիստերում պետությունների պատվիրակությունների կազմի մեջ կարող են մտնել խորհրդատուների և փորձագետների անհրաժեշտ քանակ:

ՄԳԽ-ի նիստերում նախագահողի գործառույթները հաջորդաբար իրականացնում է ՄԳԽ յուրաքանաչյուր անդամ:

ՄԳԽ-ի նիստի օրակարգը հաստատվում է ՄԳԽ անդամների ընդհանուր թվի ձայների մեծամասնությամբ:

Ընթացակարգային հարցերով որոշումն ընդունվում է ձայների որակական մեծամասնությամբ:

Կոնկրետ միջպետական ծրագրերի և համագործակցության ձևերի վերաբերյալ որոշումները ընդունվում են միաձայնությամբ, միայն ՄԳԽ-ի անդամների` այդտեղ մասնակցող պետությունների ներկայացուցիչների կողմից:

Ցանկացած մասնակից պետության շահերը շոշափող որոշումները չեն կարող ընդունվել նրան ներկայացնող ՄԳԽ-ի անդամի բացակայությամբ:

Նիստերի միջև ընկած ժամանակահատվածներում ՄԳԽ անդամները իրենց պետություններում կազմակերպում են ՄԳԽ-ի ընդունած որոշումների իրականացմանն ուղղված աշխատանքներ, շփումներ են պահպանում քարտուղարության և իրար հետ:

5. Մ Գ Խ - ի  ք ա ր տ ու ղ ա ր ու թ յ ու ն ը

ՄԳԽ-ի նիստերի միջև ընկած ժամանակահատվածում Համաձայնագրի շրջանակներում գործունեության համակարգումը կազմակերպում է ՄԳԽ-ի քարտուղարությունը, որը բաղկացած է մասնակից պետությունների մշտական ներկայացուցիչներից (մեկական յուրաքանչյուր պետությունից):

ՄԳԽ-ի քարտուղարությունը`

ապահովում է ՄԳԽ-ի նիստերի նախապատրաստումը,

ՄԳԽ-ն ներկայացնում է Համաձայնագրով նախատեսված համաձայնագրերի, նորմատիվ փաստաթղթերի նախագծերը,

գիտատեխնիկական քաղաքականության ձևավորման և իրականացման համար պատասխանատու պետությունների կառավարման մարմինների միջև կազմակերպում է խորհրդակցություններ և տեղեկության փոխանակում,

պատրաստում է ամենամյա զեկույց միջպետական գիտատեխնիկական համագործակցության մասին, ինչպես նաև այլ նյութեր, որոնց ցանկը սահմանում է ՄԳԽ-ն,

ՄԳԽ-ի հանձնարարությամբ իրականացնում է Համաձայնագրի շրջանակներում միջպետական գիտատեխնիկական համագործակցության հարցերով առաջարկությունների նախապատրաստում:

Քարտուղարության Կանոնադրությունը հաստատում է ՄԳԽ-ն:

Քարտուղարության բյուջեն կազմվում է իր գործունեության ֆինանսավորման համար անհրաժեշտ պետությունների տարեկան մուտքագրումներից` համաձայն ՄԳԽ-ի կոմից հաստատած ծախսերի նախահաշվի:

*Արձանագրությունը Հայաստանի Հանրապետության համար ուժի մեջ է մտել 1992 թվականի մայիսի 15-ից: