«Վավերացնում եմ»
Հայաստանի Հանրապետության
Նախագահ Ռ. Քոչարյան
8 օգոստոսի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

14 հուլիսի 2005 թվականի N 1072-Ա

«ԵՐԵՎԱՆԻ Վ. ԲՐՅՈՒՍՈՎԻ ԱՆՎԱՆ ԼԵԶՎԱԲԱՆԱԿԱՆ ՀԱՄԱԼՍԱՐԱՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆՆ ԱՄՐԱՑՎԱԾ ԳՈՒՅՔԸ ՓՈԽԱՆԱԿԵԼՈՒ ՄԱՍԻՆ

Ղեկավարվելով «Պետական ոչ առևտրային կազմակերպությունների մասին» Հայաստանի Հանրապետության օրենքի 5-րդ հոդվածի 2-րդ ու 4-րդ մասերով և Հայաստանի Հանրապետության հողային օրենսգրքի 76-րդ հոդվածի 5-րդ մասով` Հայաստանի Հանրապետության կառավարությունը որոշում է.

1. Հայաստանի Հանրապետության կրթության և գիտության նախարարության «Երևանի Վ. Բրյուսովի անվան լեզվաբանական համալսարան» պետական ոչ առևտրային կազմակերպությանն անհատույց օգտագործման իրավունքով ամրացված` Երևան քաղաքի Եզնիկ Կողբացու փողոցի N 42 հասցեում գտնվող մարզադահլիճի մասնաշենքը` 417.21 քառ. մետր ընդհանուր մակերեսով, հետ վերցնել և փոխանակման միջոցով օտարել, իսկ շենքի զբաղեցրած ու դրա սպասարկման համար անհրաժեշտ հողամասը` 516,61 քառ. մետր մակերեսով, առանց մրցույթի, վարձակալությամբ, գնման նախապատվության իրավունքով տրամադրել «Սլավ-Ֆուտ» փակ բաժնետիրական ընկերությանը` դրա դիմաց` Երևան քաղաքի Թումանյան փողոցի N 42 հասցեում գտնվող «Երևանի Վ. Բրյուսովի անվան լեզվաբանական համալսարան» պետական ոչ առևտրային կազմակերպությանը հատկացված հողատարածքում իր միջոցների հաշվին 396 քառ. մետր մակերեսով նոր մարզադահլիճ կառուցելու և այն, որպես պետական սեփականություն, «Երևանի Վ. Բրյուսովի անվան լեզվաբանական համալսարան» պետական ոչ առևտրային կազմակերպությանն անհատույց, անժամկետ ամրացնելու պայմանով:

2. Սահմանել, որ սույն որոշման 1-ին կետում նշված գույքը փոխանակվելու է Երևան քաղաքի Թումանյան փողոցի N 42 հասցեում նոր մարզադահլիճի կառուցումից հետո:

3. Հայաստանի Հանրապետության կառավարությանն առընթեր պետական գույքի կառավարման վարչության պետին`

ա) մեկամսյա ժամկետում ապահովել «Սլավ-Ֆուտ» փակ բաժնետիրական ընկերության հետ փոխանակման միջոցով գույքի օտարման պայմանագրի կնքումը.

բ) «Սլավ-Ֆուտ» փակ բաժնետիրական ընկերության հետ կնքել շենքի կառուցման և տարածքի բարեկարգման մասին պայմանագիր` համաձայն Հայաստանի Հանրապետության կրթության և գիտության նախարարության կողմից հաստատված նախագծանախահաշվային փաստաթղթերի:

4. Երևանի քաղաքապետին` մեկամսյա ժամկետում «Սլավ-Ֆուտ» փակ բաժնետիրական ընկերության հետ համատեղ` սահմանված կարգով ապահովել Երևան քաղաքի Եզնիկ Կողբացու փողոցի N 42 հասցեում գտնվող մարզադահլիճի տակ գտնվող և դրա սպասարկման համար անհրաժեշտ հողամասի վարձակալության (գնման նախապատվության իրավունքով) տրամադրմանը վերաբերող փաստաթղթերի ձևակերպումը:

Հայաստանի Հանրապետության վարչապետ	Ա. Մարգարյան
2005 թ. հուլիսի 28 Երևան