ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

7 հունիսի 1995 թվականի N 321

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՀԱՐԿ ՎՃԱՐՈՂՆԵՐԻ ՀԱՇՎԱՌՄԱՆ ՀԱՄԱՐՆԵՐԻ ՀԱՄԱԿԱՐԳԻ ՍԱՀՄԱՆՄԱՆ ՄԱՍԻՆ

Հայաստանի Հանրապետության տարածքում հարկ վճարողների ստույգ հաշվառման, տարբերակման, պետական մարմինների, ինչպես նաև դրանց և հարկ վճարողների միջև տեղեկատվական հոսքերի կանոնակարգման նպատակով Հայաստանի Հանրապետության կառավարությունը որոշում է`

1. Հայաստանի Հանրապետության տարածքում սահմանել հարկ վճարողների հաշվառման համարների (ՀՎՀՀ) համակարգ:

2. Սահմանել, որ հարկ վճարողների հաշվառման համարը միակն է և ենթակա չէ որևէ ընթացիկ փոփոխման: Հարկ վճարողների հաշվառման համարը կազմված է ութանիշ թվից: Հարկ վճարողների հաշվառման համարների մասնատումն ըստ Հայաստանի Հանրապետության վարչատարածքային միավորների, տրամադրումը կատարում, ինչպես նաև տրամադրված համարների ընթացիկ ստուգման և մարման կարգը սահմանում է Հայաստանի Հանրապետության հարկային պետական տեսչությունը:

3. Հարկ վճարողների հաշվառման համարները պարտադիր կարգով ստանում են`

ա) Հայաստանի Հանրապետության տարածքում պետական գրանցում ունեցող և Հայաստանի Հանրապետության հարկային պետական տեսչության մարմիններում հաշվառման ենթակա բոլոր ձեռնարկությունները` անկախ սեփականության ձևից և կազմակերպական-իրավական տեսակից, ըստ գտնվելու վայրի, ինչպես նաև անհատ ձեռներեցները` ըստ բնակության վայրի.

բ) Հայաստանի Հանրապետության հարկային պետական տեսչության մարմիններում հաշվառման ենթակա Հայաստանի Հանրապետության քաղաքացիները, օտարերկրյա քաղաքացիները և քաղաքացիություն չունեցող անձինք` ըստ Հայաստանի Հանրապետության տարածքում բնակության վայրի.

գ) պետական իրավասու մարմինների կողմից գրանցված կազմակերպություններն ու հիմնարկները` ըստ գտնվելու վայրի:

Մինչև 1997 թվականի հուլիսի 1-ը հարկ վճարող ձեռնարկությունների, հիմնարկների, կազմակերպությունների և անհատ ձեռներեցների կնիքների և դրոշմակնիքների վրա պարտադիր նշվում են հարկ վճարողների հաշվառման համարները: 1997 թվականի հուլիսի 1-ից առանց հարկ վճարողների հաշվառման համարի նշման կնիքները և դրոշմակնիքները համարվում են անվավեր:

(3-րդ կետը լրաց. 16.08.96 N 252, փոփ. 18.04.97 N 88)

4. Հայաստանի Հանրապետության հարկային պետական տեսչությանը`

ա) մինչև 1995 թվականի հունիսի 10-ը մշակել հարկ վճարողների հաշվառման համարների միասնական համակարգ.

բ) սույն որոշման կիրարկման պահից կատարել հարկ վճարողների հաշվառման համարների տրամադրում Հայաստանի Հանրապետության ձեռնարկությունների պետական ռեգիստրում գրանցված ձեռնարկություններին և անհատ ձեռներեցներին.

գ) սույն որոշման կիրարկման պահից կատարել հարկ վճարողների հաշվառման համարների տրամադրում պետական իրավասու մարմինների կողմից գրանցված կազմակերպություններին և հիմնարկներին.

դ) 1995 թվականի հոկտեմբերի 1-ից կատարել հարկ վճարողների հաշվառման համարների տրամադրում հարկ վճարող ֆիզիկական անձանց.

ե) 1995 թվականի օգոստոսի 1-ից Հայաստանի Հանրապետության մաքսային վարչությանը և Հայաստանի Հանրապետության վիճակագրության, պետական ռեգիստրի և վերլուծության պետական վարչությանը նրանց իրավասության շրջանակներում տրամադրել հարկ վճարողների հաշվառման համարների համակարգի ամփոփ տվյալներ:

5. Հայաստանի Հանրապետության մաքսային վարչությանը` սահմանել շրջանառության մեջ գտնվող մաքսային փաստաթղթերում հարկ վճարողների հաշվառման համարների նշման կարգ:

6. Հայաստանի Հանրապետության վիճակագրության, պետական ռեգիստրի և վերլուծության պետական վարչությանը`

ա) Հայաստանի Հանրապետության հարկային պետական տեսչությանը տրամադրել ձեռնարկությունների պետական ռեգիստրում 1995 թվականի մայիսի 1-ի դրությամբ գրանցված բոլոր ձեռնարկությունների (անվանումը, պետական գրանցման համարը և ամսաթիվը, գտնվելու վայրը (հասցեն)) և անհատ ձեռներեցների (ազգանունը, անունը, հայրանունը, պետական գրանցման համարը և ամսաթիվը, բնակության վայրը, (հասցեն)) վերաբերյալ տվյալներ` ըստ Հայաստանի Հանրապետության վարչատարածքային միավորների.

բ) Հայաստանի Հանրապետության վարչատարածքային պետական տեսչությանը պարբերաբար (ամսական մեկ անգամ) տրամադրել 1995 թվականի հուլիսի 1-ից հետո լուծարված ձեռնարկությունների (ՀՎՀՀ, անվանումը, պետական գրանցման համարը և ամսաթիվը, գտնվելու վայրը (հասցեն)) և գործունեությունը դադարեցրած անհատ ձեռներեցների (ՀՎՀՀ, ազգանունը, անունը, հայրանունը, պետական գրանցման համարը և ամսաթիվը, բնակության վայրը (հասցեն)) վերաբերյալ տվյալներ` ըստ վարչատարածքային միավորների:

7. Հայաստանի Հանրապետության արդարադատության նախարարությանը` Հայաստանի Հանրապետության հարկային պետական տեսչությանը տրամադրել 1995 թվականի մայիսի 1-ի դրությամբ գրանցված հասարակական (այդ թվում` բարեգործական հասարակական-քաղաքական կազմակերպությունների, մամուլի և զանգվածային լրատվության այլ միջոցների, սպառողական ընկերությունների և դրանց միավորումների վերաբերյալ տվյալներ (անվանումը, գրանցման համարը և ամսաթիվը, գտնվելու վայրը (հասցեն))` ըստ Հայաստանի Հանրապետության վարչատարածքային միավորների:

8. Սույն որոշման 6-րդ և 7-րդ կետերում չնշված և պետական գրանցման իրավասություն ունեցող Հայաստանի Հանրապետության նախարարություններին, պետական վարչություններին, գերատեսչություններին, գործադիր իշխանության տեղական մարմիններին` Հայաստանի Հանրապետության հարկային պետական տեսչությանը տրամադրել 1995 թվականի մայիսի 1-ի դրությամբ իրենց կողմից գրանցված (հաշվառված) կազմակերպությունների և հիմնարկների (այդ թվում` բյուջետային) վերաբերյալ տվյալներ (անվանումը, գրանցման համարը և ամսաթիվը, գտնվելու վայրը (հասցեն))` ըստ Հայաստանի Հանրապետության վարչատարածքային միավորների:

9. Հայաստանի Հանրապետության տարածքում հարկ վճարողների հաշվառման համարների տրամադրման և հարկ վճարողների հաշվառման համակարգի կիրարկման վերահսկողությունը դնել Հայաստանի Հանրապետության հարկային պետական տեսչության վրա: Սույն որոշման կիրարկման հրահանգները հաստատում է Հայաստանի Հանրապետության հարկային պետական տեսչությունը:

10. Սույն որոշման 4-րդ կետի «բ» և «զ» ենթակետերում նշված հարկ վճարողների համար` 1995 թվականի օգոստոսի 1-ից, իսկ 4-րդ կետի «դ» ենթակետում նշված հարկ վճարողների համար` 1996 թվականի հունվարի 1-ից, առանց հարկ վճարողների հաշվառման համարի ստացման կամ փաստաթղթերում նշման կատարվող բոլոր տեսակի գործառնությունները ըստ սահմանված կարգի չեն իրականացվում համապատասխան իրավասու մարմինների կողմից` մինչև հարկ վճարողների հաշվառման համարի ստանալը կամ փաստաթղթերում նշելը:

11. Հարկ վճարողների հաշվառման համարների համակարգի պահանջների չկատարման կամ ոչ պատշաճ ձևով կատարման դեպքում պետական մարմինների պաշտոնատար անձինք կրում են պատասխանատվություն` Հայաստանի Հանրապետության օրենսդրությամբ սահմանված կարգով:

12. Առաջարկել Հայաստանի Հանրապետության կենտրոնակա բանկին`

ա) մինչև 1995 թվականի հուլիսի 1-ը սահմանել բանկային փաստաթղթերում հարկ վճարողների հաշվառման համարների պարտադիր նշման կարգ.

բ) Հայաստանի Հանրապետության հարկային պետական տեսչությանը տրամադրել 1995 թվականի մայիսի 1-ի դրությամբ Հայաստանի Հանրապետության կենտրոնական բանկի կողմից գրանցված բանկերի ու ֆինանսավարկային կազմակերպությունների վերաբերյալ տվյալներ (անվանումը, գրանցման համարը և ամսաթիվը, գտնվելու վայրը (հասցեն)).

գ) հարկ վճարողների հաշվառման համարների համակարգի պահանջների չկատարման դեպքում կամ ոչ պատշաճ ձևով կատարման դեպքում բանկերի և ֆինանսավարկային կազմակերպությունների պաշտոնատար անձանց ենթարկել պատասխանատվության` Հայաստանի Հանրապետության օրենսդրությամբ սահմանված կարգով.

դ) բանկերի և ֆինանսավարկային կազմակերպությունների կողմից սպասարկվող ձեռնարկություններից, կազմակերպություններից և հիմնարկներից (բացառությամբ ֆիզիկական անձանց) պահանջել ստանալ հարկ վճարողների հաշվառման համարներ, իսկ 1995 թվականի օգոստոսի 1-ից հետո սահմանված կարգով դադարեցնել առանց հարկ վճարողների հաշվառման համարների ստացման կամ փաստաթղթերում նշման իրականացվող գործառնությունները:

13. Հայաստանի Հանրապետության հարկային պետական տեսչությանն ու Հայաստանի Հանրապետության վիճակագրության, պետական ռեգիստրի և վերլուծության պետական վարչությանը` 1996 թվականի հունվարին անդրադառնալ ՀՎՀՀ-ի և պետական ռեգիստրի կողմից օգտագործվող ծածկագրերի միասնականացման նպատակահարմարությունը և առաջարկություններ ներկայացնել Հայաստանի Հանրապետության կառավարություն:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ս. ՄԱՆԱՍԱՐՅԱՆ