«Գրանցված է»
ՀՀ արդարադատության
նախարարության կողմից
12 մայիսի 2006 թ.
Պետական գրանցման թիվ 05006144

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

25 ապրիլի 2006 թ.

N 174-Ն

Ո Ր Ո Շ ՈՒ Մ

«ԱՐՏԵՄ ՄԻԿՈՅԱՆԻ ԾՆՆԴՅԱՆ 100-ԱՄՅԱԿ» ԱՐԾԱԹՅԱ ՀՈՒՇԱԴՐԱՄԸ ՇՐՋԱՆԱՌՈՒԹՅԱՆ ՄԵՋ ԴՆԵԼՈՒ ՄԱՍԻՆ

Հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության  օրենքի  20-րդ հոդվածի «է» կետը՝  Հայաստանի Հանրապետության կենտրոնական բանկի խորհուրդը որոշում է.

1. 2006 թվականի հուլիսի 1-ից շրջանառության մեջ դնել Հայաստանի Հանրապետության կենտրոնական բանկի խորհրդի 2004 թվականի մայիսի 19-ի թիվ 126-Ն որոշմամբ թողարկված 100 դրամ անվանական արժեքով «Արտեմ Միկոյանի ծննդյան 100-ամյակ» արծաթյա հուշադրամը: Հաստատել հուշադրամի նկարագրությունը՝ համաձայն հավելված 1-ի (կցվում է):

2. Սույն որոշումն ուժի մեջ է մտնում պաշտոնական  հրապարակման օրվան  հաջորդող  տասներորդ օրվանից:

ՀՀ կենտրոնական բանկի նախագահի տեղակալ	Ա. Ջավադյան
2006 թ. ապրիլի 28       Երևան

Հավելված 1 Հաստատված է ՀՀ կենտրոնական բանկի խորհրդի 2006 թվականի ապրիլի 25-ի թիվ 174-Ն որոշմամբ

ՆԿԱՐԱԳՐՈՒԹՅՈՒՆ

Արտեմ Միկոյանի ծննդյան 100-ամյակին նվիրված 100 դրամ անվանական արժեքով արծաթյա հուշադրամի

Հայաստանի Հանրապետության կենտրոնական բանկը թողարկել է արծաթյա  հուշադրամ՝ նվիրված Արտեմ Միկոյանի ծննդյան 100-ամյակին:

Հուշադրամի դիմերեսին պատկերված են Արտեմ Միկոյանի նախագծած ՄԻԳ-25, ՄԻԳ-19 և ՄԻԳ-3 ինքնաթիռները (վերից վար): Պատկերներից վերև նշված է թողարկման տարեթիվը՝ «2005», իսկ պատկերներից ներքև երկու տողով զետեղված է անվանական արժեքը՝ «100» և «ԴՐԱՄ»: Եզրաշուրթի մոտ շրջագծով մակագրված է՝ «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿ»:

Հուշադրամի դարձերեսին ինքնաթիռների գծանկարների ֆոնի վրա Արտեմ Միկոյանի դիմապատկերն է: Դիմապատկերի ներքևի ձախ մասում երկու տողով զետեղված են Արտեմ Միկոյանի ծննդյան և մահվան տարեթվերը՝ «1905» և «1970»: Աջ մասում  եզրաշուրթի շրջագծով հայերեն և անգլերեն մակագրված է «ԱՐՏԵՄ ՄԻԿՈՅԱՆ  ARTEM MIKOYAN»:

Հուշադրամը շրջանագծով երկու կողմից ունի ուռուցիկ եզրաշուրթ:

Թափանցիկ պատիճով հուշադրամը և իսկության հավաստագիրը տեղադրված են պլաստմասսայից  պատրաստված տուփում:

Հուշադրամի ուրվագծերը ձևավորել է նկարիչ Վարդան Վարդանյանը: Հուշադրամը հատվել է Չեխիայի դրամահատարանում: 

Հուշադրամի բնութագիրը.
Անվանական արժեքը՝	100 դրամ
Մետաղը և հարգը՝	արծաթ, 9250
Զանգվածը՝	31,1 գ
Տրամագիծը՝	40,0 մմ
Դրամաշուրթը՝	ատամնավոր
Որակը՝	պրուֆ
Տպաքանակը՝	500 հատ