1. Սույն կարգով կանոնակարգվում է համայնքների բյուջեներից վերադարձելիության, արժեքավորման և ժամկետայնության սկզբունքով` առանց վճարովիության սկզբունքի այլ համայնքների բյուջեներին, Երևան քաղաքի բյուջեին և պարտադիր սոցիալական ապահովագրության բյուջեին առանձին ծրագրերի կամ ծախսերի ֆինանսավորման նպատակով փոխատվությունների (այսուհետ` փոխատվություններ) տրամադրման գործընթացը: Սույն կարգի իմաստով փոխառուներ են համարվում փոխատվություն ստանալու նպատակով փոխատվություն տրամադրելու մասին հայտ ներկայացրած համայնքները, Երևանի խորհուրդը և «Պարտադիր սոցիալական ապահովագրության հիմնադրամ» պետական հիմնարկը:

2. Համայնքի բյուջեից փոխատվությունները տրամադրվում են համայնքի բյուջեի ընթացիկ մուտքերի հաշվին:

3. Փոխատվությունը սույն կարգի 1-ին կետով սահմանված փոխառուներին տրամադրվում է օրենքով կամ կանոնադրութամբ նրանց վերապահված լիազորությունների իրականացման հետ կապված ծախսերի ֆինանսավորման նպատակով` միջոցների ժամանակավոր անբավարարության դեպքում:

Փոխառության չափը չի կարող գերազանցել փոխառուի` տվյալ տարվա բյուջեով նախատեսված ծախսերի 30 տոկոսը:

4. Համայնքը փոխատվություն տրամադրում է համայնքի ավագանու որոշմամբ` համայնքի բյուջեում ծրագրավորված ծախսերի նկատմամբ փաստացի եկամուտների գերազանցման շնորհիվ գոյացած ժամանակավոր ազատ միջոցների չափով` չգերազանցելով սույն կարգով սահմանված առավելագույն չափը:

5. Փոխատվությունը տրամադրվում է 6 ամսվանից ոչ ավելի տևողությամբ և փոխառուների կողմից ենթակա է վերադարձման` նույն բյուջետային տարում:

6. «Պարտադիր սոցիալական ապահովագրության հիմնադրամ» պետական հիմնարկը մինչև նախորդ փոխատվությունների գծով պարտավորությունների մարումը, Հայաստանի Հանրապետության ֆինանսների և էկոնոմիկայի նախարարության համաձայնությամբ, կարող է ստանալ նոր փոխատվություններ:

II. ՓՈԽԱՏՎՈՒԹՅՈՒՆ ՍՏԱՆԱԼՈՒ ՆՊԱՏԱԿՈՎ ՓՈԽԱՏՎՈՒԹՅՈՒՆ ՏՐԱՄԱԴՐԵԼՈՒ ՄԱՍԻՆ

7. Փոխառուն փոխատվություն ստանալու նպատակով գրավոր դիմում է համապատասխան համայնքի ղեկավարին:

Դիմումին կցվում է հայտ, որը ներառում է`

ա) «Պարտադիր սոցիալական ապահովագրության հիմնադրամ» պետական հիմնարկը փոխառու հանդիսանալու դեպքում` փոխատվության միջոցների չափը` ըստ առանձին ծրագրերի, ծախսերի և օգտագործման ուղղությունների,

համայնքը փոխառու հանդիսանալու դեպքում` փոխատվություն ստանալու նպատակով փոխատվություն տրամադրելու մասին հայտ ներկայացնելու վերաբերյալ փոխառու համայնքի ավագանու որոշումը, որում պետք է նշված լինի փոխատվության միջոցների չափը` ըստ առանձին ծրագրերի, ծախսերի և օգտագործման ուղղությունների,

Երևանի խորհուրդը փոխառու հանդիսանալու դեպքում` փոխատվություն ստանալու նպատակով փոխատվություն տրամադրելու մասին հայտ ներկայացնելու վերաբերյալ փոխառու Երևանի խորհրդի որոշումը, որում պետք է նշված լինի փոխատվության միջոցների չափը` ըստ առանձին ծրագրերի, ծախսերի և օգտագործման ուղղությունների.

բ) փոխառուին սպասարկող Հայաստանի Հանրապետության ֆինանսների և էկոնոմիկայի նախարարության համապատասխան գանձապետական ստորաբաժանման (այսուհետ` գանձապետական ստորաբաժանում) կազմած տեղեկանքը տվյալ բյուջետային տարվա անցած ժամանակաշրջանի համար փոխառուի` բյուջեով նախատեսված և դրա դիմաց փաստացի մուտքագրված եկամուտների, նշված բյուջեով նախատեսված ու դրա դիմաց փաստացի կատարված ծախսերի, փոխառուի կողմից նախորդ և ընթացիկ բյուջետային տարիների ընթացքում ստացված փոխառությունների ու դրանց մարման, ինչպես նաև տեղեկանքի տրամադրման օրվա դրությամբ փոխառուի բյուջեում միջոցների մնացորդի մասին:

Գանձապետական ստորաբաժանման կազմած տեղեկանքը փոխառուին է տրամադրվում նշված տեղեկանքն ստանալու մասին վերջինիս դիմումն ստանալու օրվանից սկսած 3 աշխատանքային օրվա ընթացքում.

գ) փոխատուի և փոխառուի միջև կնքվելիք փոխատվության պայմանագրի նախագիծը:

8. Փոխատվություն տրամադրելու մասին հայտ ստացած համայնքի (այսուհետ` փոխատու) ղեկավարը 2-օրյա ժամկետում դիմում է իրեն սպասարկող գանձապետական ստորաբաժանում` տվյալ բյուջետային տարվա անցած ժամանակաշրջանի համար փոխատուի բյուջեով նախատեսված և դրա դիմաց փաստացի մուտքագրված եկամուտների, նշված բյուջեով նախատեսված ու դրա դիմաց կատարված փաստացի և դրամարկղային ծախսերի, փոխատուի կողմից նախկինում ստացված փոխառությունների ու դրանց մարման, ինչպես նաև համայնքի բյուջեում ծրագրավորված ծախսերի նկատմամբ փաստացի եկամուտների գերազանցման շնորհիվ ժամանակավոր ազատ միջոցների չափի մասին տեղեկանք ստանալու համար:

Գանձապետական ստորաբաժանման կազմած տեղեկանքը փոխատուին է տրամադրվում նշված տեղեկանքն ստանալու մասին վերջինիս դիմումն ստանալու օրվանից սկսած 3 աշխատանքային օրվա ընթացքում:

9. Փոխատու համայնքի ղեկավարը սույն կարգի 8-րդ կետով նախատեսված տեղեկանքն ստանալուց հետո 10-օրյա ժամկետում քննարկում և համայնքի ավագանու հաստատմանն է ներկայացնում համապատասխան փոխառուին փոխատվություն տրամադրելու մասին համայնքի ավագանու որոշման նախագիծը` դրան կցելով սույն կարգի 7-րդ և 8-րդ կետերով նախատեսված փաստաթղթերը:

10. Համայնքի ավագանու կողմից հայտը մերժվելու դեպքում` ներկայացված հայտը փոխատու համայնքի ղեկավարը համապատասխան գրությամբ վերադարձնում է փոխառուին` 2 աշխատանքային օրվա ընթացքում:

11. Համայնքի ավագանու կողմից փոխատվություն տրամադրելու մասին դրական որոշում ընդունվելու դեպքում` փոխատու համայնքի ղեկավարը փոխատվություն տրամադրելու հարցի կապակցությամբ Հայաստանի Հանրապետության տարածքային կառավարման նախարարության համաձայնությունն ստանալու նպատակով 2 աշխատանքային օրվա ընթացքում համապատասխան գրությամբ դիմում է վերջինիս:

Փոխատու համայնքի ղեկավարի գրությանը կից ներկայացվում են փոխառուի հայտը, փոխատվություն տրամադրելու մասին համայնքի ավագանու որոշումը, ինչպես նաև սույն կարգի 8-րդ կետով նախատեսված տեղեկանքը:

12. Հայաստանի Հանրապետության տարածքային կառավարման նախարարությունը 10-օրյա ժամկետում քննարկում է ներկայացված փաստաթղթերը և հայտը հիմնավոր ճանաչելու դեպքում տալիս է փոխատվության տրամադրմանն իր համաձայնությունը, իսկ ոչ հիմնավոր ճանաչելու դեպքում` մերժում է հայտը` նշելով հայտի մերժման պատճառները:

Հայտի մերժման հիմքերն են`

ա) ներկայացված փաստաթղթերի անհամապատասխանությունը սույն կարգով սահմանված պահանջներին,

բ) փաստաթղթերում ներկայացված տվյալների անհամապատասխանությունը փոխատուի կամ փոխառուի` տվյալ տարվա համար հաստատված բյուջեի ցուցանիշներին,

գ) փոխառուին տվյալ տարում 2 անգամ փոխատվություն տրամադրելը, եթե փոխառուի մոտ առկա են նախկինում ստացված փոխատվության գծով պարտքեր և (կամ) տույժեր։

Սույն կետի «գ» ենթակետով նախատեսվածը մերժման հիմք չէ, եթե որպես փոխառու հանդես է գալիս «Պարտադիր սոցիալական ապահովագրության հիմնադրամ» պետական հիմնարկը, և նրա հայտում առկա է սույն կարգի 6-րդ կետով նախատեսված` Հայաստանի Հանրապետության ֆինանսների և էկոնոմիկայի նախարարության համաձայնությունը հաստատող փաստաթուղթը։

III. ՓՈԽԱՏՎՈՒԹՅԱՆ ՊԱՅՄԱՆԱԳՐԻ ԿՆՔՈՒՄԸ

13. Սույն կարգի 12-րդ կետով նախատեսված` փոխատվություն տրամադրելու մասին համաձայնությունն ստանալուց հետո փոխատուն և փոխառուն կնքում են փոխատվության պայմանագիր:

14. Փոխատվության տրամադրման օր է համարվում փոխառուի գանձապետական հաշվին փոխատվության միջոցների մուտքագրման օրը:

15. Փոխատվության պայմանագրում պետք է նախատեսվի, որ փոխատվության միջոցների ոչ նպատակային օգտագործման դեպքում փոխատվության գումարը ենթակա է վաղաժամկետ վերադարձման:

16. Փոխառուն կարող է փոխատվության պայմանագրով սահմանված ժամկետից շուտ վերադարձնել փոխատվության ամբողջ գումարը կամ դրա մի մասը:

17. Փոխատուն կարող է փոխատվության պայմանագրով նախատեսել փոխատվության վերադարձելիությունն ապահովող` Հայաստանի Հանրապետության օրենսդրությամբ թույլատրված միջոցներ:

18. Փոխատվության գումարի մարումը պայմանագրով նախատեսված ժամկետից ուշացնելու դեպքում կարող են գանձվել տույժեր` Հայաստանի Հանրապետության օրենքով սահմանված ձևերով և կարգով:

19. Փոխատվության տրամադրման, վերադարձման, ինչպես նաև դրանց մասին հաշվետվություններ կազմելու և համապատասխան մարմիններ ներկայացնելու հետ կապված հարաբերությունները կարգավորվում են բյուջեների կատարման մասին Հայաստանի Հանրապետության օրենսդրությամբ սահմանված կարգով: