ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ԵՐԵՎԱՆ ՔԱՂԱՔ

ՆՈՐ ՆՈՐՔ ՀԱՄԱՅՆՔԻ ԱՎԱԳԱՆԻ

N 13/3

11.09.2001 թ.

Ո Ր Ո Շ ՈՒ Մ

ՆՈՐ ՆՈՐՔ ՀԱՄԱՅՆՔԻ ՍԵՓԱԿԱՆՈՒԹՅՈՒՆԸ ՀԱՆԴԻՍԱՑՈՂ ԲՆԱԿԵԼԻ ՖՈՆԴՈՒՄ ԳՏՆՎՈՂ ԱՐՎԵՍՏԱՆՈՑՆԵՐԸ (ՈՉ ԲՆԱԿԵԼԻ ՏԱՐԱԾՔՆԵՐԸ) ԴՐԱՆՑ ՎԱՐՁԱԿԱԼՆԵՐԻՆ ՆՎԻՐԱԲԵՐՈՒԹՅԱՄԲ ՕՏԱՐԵԼՈՒ ԿԱՐԳԻՆ ՀԱՄԱՁԱՅՆՈՒԹՅՈՒՆ ՏԱԼՈՒ ՄԱՍԻՆ

Ղեկավարվելով «Տեղական ինքնակառավարման մասին» Հայաստանի Հանրապետության օրենքով (հոդվածներ 12, 39, 56) և Հայաստանի Հանրապետության քաղաքացիական օրենսգրքով (4-րդից 7-րդ բաժիններ) նախատեսված կանոններով, հաշվի առնելով Հայաստանի Հանրապետության կառավարության 13.03.1997 թ. «Երևան քաղաքի թաղային համայնքների սեփականությունը հանդիսացող գույքի ցանկը սահմանելու մասին» հ. 42 որոշման մեջ ՀՀ կառավարության 20.06.2001 թվականի հ. 550 որոշմամբ կատարված փոփոխությունները, ինչպես նաև նպատակ ունենալով համայնքային սեփականության արվեստանոցների մասնավորեցման բնագավառում իրականացնել «Արվեստանոցների մասնավորեցման (սեփականաշնորհման) մասին» ՀՀ օրենքով նախատեսված պետական արվեստանոցների անհատույց մասնավորեցման համապետական քաղաքականությունը

Համայնքի ավագանին որոշում է.

1. Տալ համաձայնություն «Նոր Նորք համայնքի սեփականությունը հանդիսացող բնակելի ֆոնդում գտնվող արվեստանոցները (ոչ բնակելի տարածքները) դրանց վարձակալներին նվիրաբերությամբ օտարման» կարգին` համաձայն հավելվածի (կցվում է):

2. Լիազորել թաղապետին համայնքի անունից իրականացնել նվիրաբերությամբ օտարվող արվեստանոցների նկատմամբ սեփականության իրավունքի փոխանցման օրենսդրությամբ նախատեսված գործառնությունները` իրավունք վերապահելով նրան վերալիազորելու այդ իրավասությունները ՀՀ քաղաքացիական օրենսգրքի 129 հոդվածով նախատեսված անձանց:

3. Սույն որոշման հրապարակման պահից ուժը կորցրած ճանաչել համայնքի ավագանու 02.05.2001 թ. հ. 5/7 որոշման 2 և 3 կետերն արվեստանոցների մասով:

4. Սահմանել, որ սույն որոշման հրապարակման պահից արվեստագետներին որպես արվեստանոց տարածքների հատկացումը կատարվում է թաղապետի ներկայացմամբ` համայնքի ավագանու կայացրած որոշման հիման վրա:

5. Սույն որոշումը ուժի մեջ է մտնում 2001թ. սեպտեմբերի 11-ից և գործում է մինչև համայնքի տեղական ինքնակառավարման ներկա գումարման մարմինների լիազորությունների ավարտը:

Մ. Մինասյան

Հավելված Նոր Նորք համայնքի ավագանու 11.09.2001 թ. 13/3 որոշման

Կ Ա Ր Գ

ՆՈՐ ՆՈՐՔ ՀԱՄԱՅՆՔԻ ՍԵՓԱԿԱՆՈՒԹՅՈՒՆԸ ՀԱՆԴԻՍԱՑՈՂ ԲՆԱԿԵԼԻ ՖՈՆԴՈՒՄ ԳՏՆՎՈՂ ԱՐՎԵՍՏԱՆՈՑՆԵՐԸ (ՈՉ ԲՆԱԿԵԼԻ ՏԱՐԱԾՔՆԵՐԸ) ԴՐԱՆՑ ՎԱՐՁԱԿԱԼՆԵՐԻՆ ՆՎԻՐԱԲԵՐՈՒԹՅԱՄԲ ՕՏԱՐՄԱՆ

1. Սույն կարգը մշակված է ՀՀ քաղաքացիական օրենսգրքի, «Տեղական ինքնակառավարման մասին» ՀՀ օրենքի և ՀՀ կառավարության 13.03.1997թ. «Երևան քաղաքի թաղային համայնքների սեփականությունը հանդիսացող գույքի ցանկը սահմանելու մասին» հ. 42 որոշման (հաշվի առած ՀՀ կառավարության 20.06.2001թ. հ. 550 որոշմամբ կատարված փոփոխությունները) դրույթներին համապատասխան, նպատակ ունի համայնքային արվեստանոցների մասնավորեցման բնագավառում իրականացնել «Արվեստանոցների մասնավորեցման (սեփականաշնորհման) մասին» ՀՀ օրենքով նախատեսված պետական արվեստանոցների անհատույց մասնավորեցման համապետական քաղաքականությունը և կարգավորում է համայնքային սեփականություն հանդիսացող բնակարանային ֆոնդում գտնվող` նկարիչներին, քանդակագործներին, ճարտարապետներին և այլ ստեղծագործողներին (այսուհետ` արվեստագետներ) վարձակալությամբ տրված տարածքների (այսուհետ` արվեստանոցներ) նվիրաբերությամբ օտարման հետ կապված հարաբերությունները:

2. Նվիրաբերության օբյեկտ են հանդիսանում սույն կարգի 1 կետում նշված այն արվեստանոցները, որոնք վարձակալության են տրվել համայնքի ինքնակառավարման մարմինների որոշումներով` մինչև 2001թ. հունիսի 1-ը:

3. Նվիրաբերության սուբյեկտ են համարվում այն արվեստագետները, որոնք Հայաստանի Հանրապետության քաղաքացի են և մշտապես բնակվում են հանրապետությունում:

4. Համայնքային արվեստանոցի օտարումը կատարվում է տվյալ արվեստանոցի վարձակալի կամ նրա լիազոր ներկայացուցչի կողմից թաղապետին ուղղված դիմումի հիման վրա:

5. Համայնքային արվեստանոցը օտարվում է որպես նվիրաբերություն, համայնքի ավագանու համաձայնությամբ` այդ մասին որոշումը ուժի մեջ մտնելու օրվանից հետո մեկամսյա ժամկետում: Ավագանին իրավասու է համաձայնություն տալ ինչպես յուրաքանչյուր արվեստանոցի օտարման համար առանձին-առանձին, այնպես էլ օտարման ենթակա բոլոր արվեստանոցների կամ դրանց մի մասի համար միասին:

6. Համայնքային արվեստանոցի օտարումը ձևակերպվում է թաղապետի որոշմամբ և կողմերի միջև կնքվող` արվեստանոցի նվիրաբերման պայմանագրով:

7. Արվեստանոցի նվիրաբերությամբ օտարման համար կնքված պայմանագիրը վավերացնում է նոտարը` ՀՀ քաղաքացիական օրենսգրքով սահմանված կարգով:

8. Նվիրաբերված արվեստանոցի նկատմամբ սեփականության իրավունքը ենթակա է պետական գրանցման` օրենքով նախատեսված կարգով:

9. Սույն կարգով նախատեսված արվեստանոցների օտարման հետ կապված ծախսերը (նվիրաբերման պայմանագրի նոտարական կարգով վավերացման պետական տուրք, սեփականության իրավունքների պետական գրանցման և արվեստանոցների հաշվառման վճարներ) կրում են նվիրաբերության սուբյեկտ հանդիսացող քաղաքացիները:

10. Տեղական ինքնակառավարման մարմինները իրավասու են առանձին դեպքերում արտոնություն սահմանել սույն կարգի 9 կետով նշված վճարների գծով` նվիրաբերության սուբյեկտ հանդիսացող քաղաքացիների փոխարեն համայնքի բյուջեից վճարելով սահմանված արտոնության գումարը:

11. Սույն կարգը չի տարածվում մինչև այն ուժի մեջ մտնելու օրը Նոր նորք համայնքի ավագանու 02.05.2001թ. հ. 5/7 որոշման հիման վրա օտարման գործընթացում գտնվող արվեստանոցների նկատմամբ:

12. Համայնքային արվեստանոցների նվիրաբերությամբ օտարման մերժելը կամ սույն կարգով սահմանված ժամկետում այն չիրականացնելը կարող է բողոքարկվել դատարան:

Թաղապետարանի ծրագրերի և համայնքային սեփականության բաժնի պետ

Յու. Հայրապետյան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆՈՐ ՆՈՐՔԻ ԹԱՂԱՊԵՏ

N 27/01-478

«4» սեպտեմբերի 2001 թ.

ՆՈՐ ՆՈՐՔ ՀԱՄԱՅՆՔԻ ԱՎԱԳԱՆՈՒՆ

Հարգարժան ավագանի

Տեղեկացնում եմ Ձեզ, որ ՀՀ կառավարությունն 20.06.2001թ. հ. 550 որոշմամբ փոփոխություն է մտցրել իր 13.03.1997թ. «Երևան քաղաքի թաղային համայնքների սեփականությունը հանդիսացող գույքի ցանկը սահմանելու մասին» հ. 42 որոշման մեջ, որով Երևան քաղաքի համապատասխան թաղային համայնքներին լիիրավ սեփականության իրավունքով հանձնված է համարվել Երևանի քաղաքային ենթակայության բնակարանային տնտեսության ձեռնարկությունների հաշվեկշիռներում հաշվեգրված բնակարանային ֆոնդի բնակելի շենքերի բացվածքները և ընդհանուր օգտագործման տարածք չհանդիսացող, իրավաբանական կամ ֆիզիկական անձանց սեփականության իրավունքով չպատկանող ոչ բնակելի տարածքները` բացառությամբ պետական հիմնարկների կամ կազմակերպությունների կողմից զբաղեցրած տարածքների, Երևանի քաղաքապետի (նախկին Երքաղգործկոմի) կողմից վարձակալության տրված արվեստանոցների և «Պետական գույքի մասնավորեցման (սեփականաշնորհման) մասին» ՀՀ օրենքի 3-րդ հոդվածի 2-րդ կետի «ը» ենթակետով նախատեսված մասնավորեցման ենթակա ոչ բնակելի տարածքների:

Մեր համայնքի սեփականություն հանդիսացող վերը թվարկված տարածքների շարքում կան այնպիսիները, որոնք վարձակալության են տրվել որպես արվեստանոց մեր որոշումներով և «Արվեստանոցների մասնավորեցման (սեփականաշնորհման) մասին» ՀՀ օրենքով (03.07.2000թ. ՀՕ-70) նախատեսված կարգը դրանց վրա չի տարածվում:

Ինչպես գիտեք մինչև ՀՀ կառավարության 20.06.2001թ. հ. 550 որոշման ընդունումը, որով նաև փաստացի կիրարկման մեջ է դրվել «Արվեստանոցների մասնավորեցման (սեփականաշնորհման) մասին» ՀՀ օրենքը, մենք Ձեր հետ միասին ղեկավարվելով «Տեղական ինքնակառավարման մասին» ՀՀ օրենքով և ՀՀ քաղաքացիական օրենսգրքով նախատեսված կանոններով, սահմանել ենք ուղղակի վաճառքի մեթոդով, արտոնյալ պայմաններով արվեստանոցները դրանց վարձակալներին օտարելու կարգ, համաձայն որի ներկայացված դիմումները համապատասխան ընթացք են ստացել:

Ներկայումս, երբ պետությունը հիշյալ որոշումներով որդեգրել է պետական արվեստանոցները անհատույց մասնավորեցնելու քաղաքականություն, մենք ևս անհրաժեշտ ենք համարում վերանայել այդ բնագավառի մեր նորմատիվային ակտերը՝ դրանք համապատասխանեցնելով համապետական քաղաքականությանը:

Առդիր ներկայացնելով «Նոր Նորք համայնքի սեփականությունը հանդիսացող բնակելի ֆոնդում գտնվող արվեստանոցները (ոչ բնակելի տարածքները) դրանց վարձակալներին նվիրաբերությամբ օտարման» կարգի և վերջինիս վերաբերյալ որոշման նախագծերը, միջնորդում եմ Ձեզ քննարկել բարձրացված հարցը և կայացնել համապատասխան որոշում:

Մ. Մինասյան