«Գրանցված է»
ՀՀ արդարադատության
նախարարության կողմից
26 դեկտեմբերի 2002 թ.
Պետական գրանցման թիվ 050020398

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

Ո Ր Ո Շ ՈՒ Մ

«ՎԱՐԿԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻ ԳՈՐԾՈՒՆԵՈՒԹՅԱՆ ՕՐԻՆԱԿԵԼԻ ԿԱՆՈՆԱԿԱՐԳԸ» ՀԱՍՏԱՏԵԼՈՒ ՄԱՍԻՆ

Հիմք ընդունելով «Վարկային կազմակերպությունների մասին» Հայաստանի Հանրապետության օրենքի 5-րդ հոդվածի 1-ին մասի «զ» կետը, «Իրավական ակտերի մասին» Հայաստանի Հանրապետության օրենքի 16-րդ հոդվածը, ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «ե» և «լ» կետերով` Հայաստանի Հանրապետության կենտրոնական բանկի խորհուրդը որոշում Է.

1. Հաստատել «Վարկային կազմակերպությունների գործունեության օրինակելի կանոնակարգը»` համաձայն հավելված 1-ի (կցվում է):

2. Սահմանել, որ սույն որոշմամբ հաստատված «Վարկային կազմակերպությունների գործունեության օրինակելի կանոնակարգը» ենթակա է կիրառման վարկային կազմակերպությունների բոլոր տիպերի (խմբերի) կողմից:

3. Հանձնարարել Հայաստանի Հանրապետության կենտրոնական բանկի բանկային վերահսկողության վարչությանը` վարկային կազմակերպությունների վերահսկողության ընթացքում հետևել վարկային կազմակերպության գործունեության կանոնակարգում սահմանված և փաստացի գործունեության փոխհամապատասխանությանը:

4. Հանձնարարել Հայաստանի Հանրապետության կենտրոնական բանկի նախագահի, նախագահի տեղակալի, խորհրդի աշխատակազմին` սույն որոշման ընդունման պահից եռամսյա ժամկետում կազմակերպել սույն որոշմամբ հաստատված օրինակելի կանոնակարգի անգլերեն և ռուսերեն պաշտոնական թարգմանությունն ու հրատարակումը:

Հայաստանի Հանրապետության կենտրոնական բանկի նախագահ	Տ. Սարգսյան
2002 թ. նոյեմբերի 25 Երևան

Հավելված 1 Հաստատված է ՀՀ կենտրոնական բանկի խորհրդի 2002 թվականի նոյեմբերի 18-ի թիվ 364-Ն որոշմամբ

ՎԱՐԿԱՅԻՆ ԿԱԶՄԱԿԵՐՊՈՒԹՅՈՒՆՆԵՐԻ ԳՈՐԾՈՒՆԵՈՒԹՅԱՆ ՕՐԻՆԱԿԵԼԻ ԿԱՆՈՆԱԿԱՐԳ

Գ Լ ՈՒ Խ  I

ԸՆԴՀԱՆՈՒՐ ԴՐՈՒՅԹՆԵՐ

1. Վարկային կազմակերպության գործունեության կանոնակարգը հաստատվում է համաձայն «Վարկային կազմակերպությունների մասին» Հայաստանի Հանրապետության օրենքի 5-րդ հոդվածի 1-ին մասի «զ» կետի և սահմանում է վարկային կազմակերպության գործունեության տեսակը, ոլորտը, սկզբունքները, գործունեության կարգը, միջոցների ներգրավման և տեղաբաշխման մեթոդները, ընթացակարգերը, վարկային կազմակերպության կառավարման համակարգը, կառուցվածքը, կադրային քաղաքականությունը, վարկային կազմակերպության ներքին հսկողության և անվտանգության համակարգերը:

2. Վարկային կազմակերպության գործունեության կանոնակարգը հաստատում է վարկային կազմակերպության կառավարման բարձրագույն մարմինը:

Գ Լ ՈՒ Խ  II

ՎԱՐԿԱՅԻՆ ԿԱԶՄԱԿԵՐՊՈՒԹՅԱՆ ԳՈՐԾՈՒՆԵՈՒԹՅԱՆ ՏԵՍԱԿԸ ԵՎ ՈԼՈՐՏԸ

3. Սույն գլխում սահմանվում է`

3.1. վարկային կազմակերպության գործունեության տեսակը` համաձայն «Վարկային կազմակերպությունների մասին» Հայաստանի Հանրապետության օրենքի 3-րդ հոդվածի 6-րդ մասում սահմանված վարկային կազմակերպությունների տիպերի (խմբերի),

3.2. վարկային կազմակերպության կողմից իրականացվող ֆինանսական գործառնությունների և մատուցվող ծառայությունների տեսակները` համաձայն «Վարկային կազմակերպությունների մասին» Հայաստանի Հանրապետության օրենքի 8-րդ հոդվածի 1-ին մասի,

3.3. վարկային կազմակերպության գործունեության ոլորտը` ըստ տնտեսության հատվածների (գյուղատնտեսություն, առևտուր, արտադրություն և այլն), տարածաշրջանների (ֆինանսական գործառնությունների իրականացման տեղանքը` ըստ մարզերի, համայնքների, երկրների) և հաճախորդների հիմնական խմբերի:

Գ Լ ՈՒ Խ  III

ՎԱՐԿԱՅԻՆ ԿԱԶՄԱԿԵՐՊՈՒԹՅԱՆ ԳՈՐԾՈՒՆԵՈՒԹՅԱՆ ՍԿԶԲՈՒՆՔՆԵՐԸ

4. Սույն գլխում սահմանվում են վարկային կազմակերպության գործունեության սկզբունքները` ըստ վարկային կազմակերպության կողմից ֆինանսական գործառնությունների իրականացման քաղաքականության:

Գ Լ ՈՒ Խ  IV

ՎԱՐԿԱՅԻՆ ԿԱԶՄԱԿԵՐՊՈՒԹՅԱՆ ԳՈՐԾՈՒՆԵՈՒԹՅԱՆ ԿԱՐԳԸ

5. Սույն գլխում սահմանվում են`

5.1. վարկային կազմակերպության կողմից իրականացվող ֆինանսական գործառնությունների համար սահմանված սահմանափակումներն ու առաջնահերթությունները:

5.2. վարկային կազմակերպության կառավարման համակարգը (կառուցվածքային և տարածքային ստորաբաժանումների, քաղաքականությունը մշակող, իրականացնող և վերահսկող ստորաբաժանումների կամ աշխատակիցների, ինչպես նաև առկայության դեպքում` վարկային կազմակերպությունում մշտական գործող հանձնաժողովների իրավասություններն ու պարտականությունները:

Գ Լ ՈՒ Խ  V

ՎԱՐԿԱՅԻՆ ԿԱԶՄԱԿԵՐՊՈՒԹՅԱՆ ԿՈՂՄԻՑ ՄԻՋՈՑՆԵՐԻ ՆԵՐԳՐԱՎՄԱՆ ԵՎ ՏԵՂԱԲԱՇԽՄԱՆ ՄԵԹՈԴՆԵՐՆ ՈՒ ԸՆԹԱՑԱԿԱՐԳԵՐԸ

6. Սույն գլխում սահմանվում են վարկային կազմակերպության կողմից միջոցների ներգրավման և տեղաբաշխման մեթոդներն ու ընթացակարգերը, որոնք պետք է ներառեն պարտապանի (փոխառուի, վարկառուի, լիզինգառուի, ֆակտորինգի պայմանագրով հաճախորդի) վարկարժանության գնահատման, պարտքի տրամադրման, սպասարկման, մոնիտորինգի, վերահսկման և մարման կարգն ու պայմանները:

7. Սույն գլխում սահմանվում են նաև վարկային կազմակերպության կողմից իրականացվող ֆինանսական գործառնությունների համար անհրաժեշտ հայտերի, պայմանագրերի և գործունեության ընթացքում պարբերաբար օգտագործվող այլ փաստաթղթերի օրինակելի ձևեր:

Գ Լ ՈՒ Խ  VI

ՎԱՐԿԱՅԻՆ ԿԱԶՄԱԿԵՐՊՈՒԹՅԱՆ ԿԱՌՈՒՑՎԱԾՔՆ ՈՒ ԿԱԴՐԱՅԻՆ ՔԱՂԱՔԱԿԱՆՈՒԹՅՈՒՆԸ

8. Սույն գլխում սահմանվում է վարկային կազմակերպության`

8.1. կառուցվածքը (կառուցվածքային և տարածքային ստորաբաժանումների, ինչպես նաև առկայության դեպքում` վարկային կազմակերպությունում մշտական գործող հանձնաժողովների անվանումները),

8.2. կադրային քաղաքականությունը, որը ներառում է աշխատակիցների աշխատանքի ընդունման, վերապատրաստման, խրախուսման, վարձատրության, աշխատանքից ազատման և կադրային քաղաքականության հետ կապված այլ հարցեր:

Գ Լ ՈՒ Խ  VII

ՎԱՐԿԱՅԻՆ ԿԱԶՄԱԿԵՐՊՈՒԹՅԱՆ ՆԵՐՔԻՆ ՀՍԿՈՂՈՒԹՅԱՆ ՀԱՄԱԿԱՐԳԸ

9. Սույն գլխում սահմանվում են վարկային կազմակերպության ներքին հսկողության իրականացման ընթացակարգերն և ժամկետները:

Գ Լ ՈՒ Խ  VIII

ՎԱՐԿԱՅԻՆ ԿԱԶՄԱԿԵՐՊՈՒԹՅԱՆ ԱՆՎՏԱՆԳՈՒԹՅԱՆ ՀԱՄԱԿԱՐԳԸ

10. Սույն գլխում սահմանվում են վարկային կազմակերպության գործունեության անվտանգության ապահովման համար վարկային կազմակերպության կողմից իրականացվող պարտադիր միջոցառումները: