«ԳՐԱՆՑՎԱԾ Է»

ՀՀ ԱՐԴԱՐԱԴԱՏՈՒԹՅԱՆ

ՆԱԽԱՐԱՐՈՒԹՅԱՆ ԿՈՂՄԻՑ

27 հունիսի 2005 Թ.

ՊԵՏԱԿԱՆ ԳՐԱՆՑՄԱՆ ԹԻՎ 05005229

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

24 մայիսի 2005 թ.

N 239-Ն

Ո Ր Ո Շ ՈՒ Մ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ՎՃԱՐԱՅԻՆ ԳՈՐԾԻՔՆԵՐԻ ՍՊԱՍԱՐԿՄԱՆ ԵՎ (ԿԱՄ) ԻՐԱՑՄԱՆ (ՏԱՐԱԾՄԱՆ) ՏԵՂԵԿԱՑՄԱՆ ՎԵՐԱԲԵՐՅԱԼ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Վճարահաշվարկային համակարգերի և վճարահաշվարկային կազմակերպությունների մասին» Հայաստանի Հանրապետության օրենքի 18-րդ հոդվածի 2-րդ մասը և ղեկավարվելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «ե» կետով` Հայաստանի Հանրապետության կենտրոնական բանկի խորհուրդը որոշում է.

Հաստատել «Վճարային գործիքների սպասարկման և (կամ) իրացման (տարածման) տեղեկացման վերաբերյալ» կարգը` համաձայն հավելված 1-ի (կցվում է):

ՀՀ կենտրոնական բանկի նախագահ	Տ. Սարգսյան
2005 թ. մայիսի 27 Երևան

ՀԱՎԵԼՎԱԾ 1 ՀՀ կենտրոնական բանկի խորհրդի 2005 թ. մայիսի 24-ի թիվ 239-Ն որոշման

Կ Ա Ր Գ

ՎՃԱՐԱՅԻՆ ԳՈՐԾԻՔՆԵՐԻ ՍՊԱՍԱՐԿՄԱՆ ԵՎ (ԿԱՄ) ԻՐԱՑՄԱՆ (ՏԱՐԱԾՄԱՆ) ՏԵՂԵԿԱՑՄԱՆ ՎԵՐԱԲԵՐՅԱԼ

Գ Լ ՈՒ Խ  1

ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգը սահմանում է կազմակերպությունների, անհատ ձեռնարկատերերի (այսուհետ` վճարային գործիք տարածող և (կամ) սպասարկող անձ) կողմից Հայաստանի Հանրապետության տարածքում չեկերի, վճարային քարտերի, էլեկտրոնային փողերի (այսուհետ` վճարային գործիք) սպասարկման (բացառությամբ երրորդ անձանց օգտին վճարումների ընդունման և կատարման հետ կապված) և (կամ) իրացման (տարածման) ծառայությունների մատուցման վերաբերյալ Հայաստանի Հանրապետության կենտրոնական բանկին (այսուհետ` Կենտրոնական բանկ) տեղեկացնելու ձևը և պայմանները:

2. Սույն կարգում օգտագործվող հասկացությունները կիրառվում են «Վճարահաշվարկային համակարգերի և վճարահաշվարկային կազմակերպությունների մասին» Հայաստանի Հանրապետության օրենքով սահմանված իմաստով:

3. Սույն կարգը չի տարածվում Հայաստանի Հանրապետության տարածքում գործող բանկերի, օտարերկրյա բանկերի մասնաճյուղերի, դրանց տարածքային ստորաբաժանումների, Հայաստանի Հանրապետության միջազգային պայմանագրերով, ինչպես նաև այլ օրենքներով և դրանց հիման վրա ընդունված իրավական ակտերով վճարային գործիքների տարածման և (կամ) սպասարկման ծառայություններ մատուցելու իրավասություն ունեցող անձանց վրա:

4. Սույն կարգը չի տարածվում նաև այն կազմակերպությունների, անհատ ձեռնարկատերերի վրա, որոնք ունեն վճարային գործիքների տարածման և (կամ) սպասարկման վերաբերյալ համապատասխան պայմանագիր սույն գլխի 3-րդ կետով սահմանված անձանց հետ:

Գ Լ ՈՒ Խ  2

ՎՃԱՐԱՅԻՆ ԳՈՐԾԻՔՆԵՐ ՍՊԱՍԱՐԿՈՂ ԵՎ (ԿԱՄ) ԻՐԱՑՆՈՂ ԱՆՁԱՆՑ ԿՈՂՄԻՑ ԿԵՆՏՐՈՆԱԿԱՆ ԲԱՆԿԻՆ ՏԵՂԵԿԱՑՄԱՆ ՎԵՐԱԲԵՐՅԱԼ ՆԵՐԿԱՅԱՑՎՈՂ ՊԱՀԱՆՋՆԵՐԸ

5. Վճարային գործիք տարածող և (կամ) սպասարկող անձը, որը Հայաստանի Հանրապետության տարածքում իրականացնում է այլ ֆինանսական կազմակերպության կողմից թողարկված վճարային գործիքի սպասարկումը և (կամ) իրացումը (տարածումը) Կենտրոնական բանկին տեղեկացնելու նպատակով ներկայացնում է հետևյալ փաստաթղթերը`

5.1 վճարային գործիք տարածող և (կամ) սպասարկող անձի վերաբերյալ տեղեկատվություն,

5.2 տարածվող և (կամ) սպասարկվող վճարային գործիքի վերաբերյալ տեղեկատվություն,

5.3 վճարային գործիքի թողարկման, սպասարկման, ինչպես նաև նրանով առաջացած դրամական պահանջների կատարման վերաբերյալ տեղեկատվություն,

5.4 թողարկողի և վճարային գործիք տարածող և (կամ) սպասարկող անձի միջև կնքած պայմանագրի պատճենը:

6. Վճարային գործիք տարածող և (կամ) սպասարկող անձի վերաբերյալ տեղեկատվությունը պետք է ներառի`

6.1 վճարային գործիք տարածող և (կամ) սպասարկող անձի լրիվ անվանումը (իրավաբանական անձի պարագայում` նաև կազմակերպական-իրավական ձևը), գտնվելու վայրը, իրականացվող գործունեությունը, ղեկավարի անվանումը, հաղորդակցման միջոցները (հեռախոս, էլեկտրոնային հասցե, ֆաքս և այլ),

6.2 պետական գրանցման (հաշվառման) վկայականի պատճենը:

7. Տարածվող և (կամ) սպասարկվող վճարային գործիքի վերաբերյալ տեղեկատվությունը պետք է ներառի`

7.1 տարածման և (կամ) սպասարկման համար նախատեսված վճարային գործիքի անվանումը, իրականացվող գործունեության տեսակը (սպասարկում և (կամ) իրացում),

7.2 տեղեկանք վճարային գործիք թողարկող կազմակերպության վերաբերյալ, ներառված թողարկողի լրիվ անվանումը (նաև կազմակերպական-իրավական ձևը), գտնվելու վայրը, ղեկավարի անվանումը, հաղորդակցման միջոցները (հեռախոս, էլեկտրոնային հասցե, ֆաքս և այլ),

7.3 վճարային գործիք թողարկողի համապատասխան թույլտվության կամ վճարային գործիք թողարկողի երկրի օրենսդրությամբ սահմանված թողարկման իրավասությունը հավաստող փաստաթղթի պատճենը,

7.4 իրացման և (կամ) սպասարկման ենթակա վճարային գործիքի օրինակելի ձևերը կամ նրանց պատճենը կամ վճարային գործիքը նկարագրող տեղեկատվություն:

8. Վճարային գործիքի թողարկման, սպասարկման, ինչպես նաև նրանով առաջացած դրամական պահանջների կատարման վերաբերյալ տեղեկատվությունը պետք է ներառի`

8.1 վճարային գործիքի թողարկման, սպասարկման և տարածման հաշվարկների իրականացման կանոնները,

8.2 տեղեկանք վճարային գործիքով հաշվարկների իրականացման ժամանակ կիրառվող անվտանգության համակարգի և տեղեկատվության ապահովման վերաբերյալ:

9. Սույն կարգում նշված փաստաթղթերը պետք է ներկայացվեն թղթային եղանակով` լինեն համարակալված, դրոշմակնքված, վճարային գործիք տարածող և (կամ) սպասարկող անձի ղեկավարի կողմից ստորագրված, բացառությամբ 8-րդ կետում նշված փաստաթղթերի, որոնք կարող են ներկայացվել էլեկտրոնային կրիչով` կցելով էլեկտրոնային կրիչով ներկայացվող փաստաթղթերի ցանկը:

10. Վճարային գործիք տարածող և (կամ) սպասարկող անձը, սույն կարգով սահմանված տեղեկատվությունում տեղի ունեցած փոփոխությունների և (կամ) լրացումների վերաբերյալ պետք է փոփոխությունը և (կամ) լրացումը կատարելուց հետո առնվազն մեկ ամսվա ընթացքում գրավոր տեղեկացնի Կենտրոնական բանկին: