ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

8 հուլիսի 2003 թվականի N 309-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՆՀԱՏԱԿԱՆ ԾԱԾԿԱԳՐԵՐԻ ՀԱՄԱԿԱՐԳԻ ՆԵՐԴՐՄԱՆ ՄԻՋԳԵՐԱՏԵՍՉԱԿԱՆ ԱՇԽԱՏԱՆՔԱՅԻՆ ԽՈՒՄԲ ՍՏԵՂԾԵԼՈՒ ՄԱՍԻՆ

Հայաստանի Հանրապետությունում անհատական ծածկագրերի համակարգի ներդրման աշխատանքները համակարգելու և դրանց արդյունավետությունը բարձրացնելու նպատակով՝

1. Ստեղծել Հայաստանի Հանրապետությունում անհատական ծածկագրերի համակարգի ներդրման միջգերատեսչական աշխատանքային խումբ:

2. Հաստատել՝

ա) Հայաստանի Հանրապետությունում անհատական ծածկագրերի համակարգի ներդրման միջգերատեսչական աշխատանքային խմբի կանոնադրությունը՝ համաձայն N 1 հավելվածի.

բ) Հայաստանի Հանրապետությունում անհատական ծածկագրերի համակարգի ներդրման միջգերատեսչական աշխատանքային խմբի անհատական կազմը՝ համաձայն N 2 հավելվածի:

3. Հայաստանի Հանրապետության սոցիալական ապահովության նախարարին՝ ապահովել Հայաստանի Հանրապետությունում անհատական ծածկագրերի համակարգի ներդրման միջգերատեսչական աշխատանքային խմբի գործունեության հետ կապված կազմակերպական աշխատանքների կատարումը:

Հայաստանի Հանրապետության վարչապետ	Ա. Մարգարյան
2003 թ. հուլիսի 8 Երևան

Հավելված N 1 ՀՀ վարչապետի 2003 թ. հուլիսի 8-ի N 309-Ն որոշման

Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՆՀԱՏԱԿԱՆ ԾԱԾԿԱԳՐԵՐԻ ՀԱՄԱԿԱՐԳԻ ՆԵՐԴՐՄԱՆ ՄԻՋԳԵՐԱՏԵՍՉԱԿԱՆ ԱՇԽԱՏԱՆՔԱՅԻՆ ԽՄԲԻ

I. ԸՆԴՀԱՆՈՒՐ ԴՐՈՒՅԹՆԵՐ

1. Հայաստանի Հանրապետությունում անհատական ծածկագրերի համակարգի ներդրման միջգերատեսչական աշխատանքային խումբը (այսուհետ՝ խումբ) հասարակական հիմունքներով գործող մարմին է:

2. Խումբն իր գործունեության ընթացքում ղեկավարվում է Հայաստանի Հանրապետության Սահմանադրությամբ, Հայաստանի Հանրապետության օրենսդրությամբ, ինչպես նաև սույն կանոնադրությամբ:

II. ԽՄԲԻ ԳՈՐԾՈՒՆԵՈՒԹՅԱՆ ՆՊԱՏԱԿՆ ՈՒ ԳՈՐԾԱՌՈՒՅԹՆԵՐԸ

3. Խմբի գործունեության նպատակն է Հայաստանի Հանրապետությունում անհատական ծածկագրերի համակարգի (այսուհետ՝ համակարգ) ներդրման աշխատանքների համակարգումը և այդ համակարգի ներդրման ընթացքում պետական ու տեղական ինքնակառավարման մարմինների համագործակցության ապահովումը:

4. Խումբն իրականացնում է հետևյալ գործառույթները՝

ա) համակարգի ներդրմանն առնչվող նորմատիվ իրավական ակտերի նախագծերի քննարկում և դրանց մասին՝ սահմանված կարգով կարծիք հայտնելը.

բ) համակարգի ներդրման գործընթացում առաջացած խնդիրների վերլուծություն և դրանց լուծման վերաբերյալ Հայաստանի Հանրապետության սոցիալական ապահովության նախարարին (այսուհետ՝ նախարար) առաջարկություններ ներկայացնելը.

գ) համակարգի գործունեության ընթացքում հայտնաբերված թերությունների վերացման համար համապատասխան միջոցառումների մշակում և դրանք սահմանված կարգով նախարարին ներկայացնելը.

դ) համակարգի ներդրման միջոցառումների ժամանակացույցների և աշխատանքային պլանների վերաբերյալ կարծիք հայտնելը.

ե) Հայաստանի Հանրապետության կառավարություն ներկայացվող՝ համակարգի ներդրման ընթացքի ու արդյունքների մասին հաշվետվությունների վերաբերյալ կարծիք հայտնելը.

զ) համակարգի ներդրման ընթացքի ու դրա գործունեության լուսաբանման նպատակով մամուլի և զանգվածային լրատվության մյուս միջոցների հետ համագործակցությունը։

III. ԽՄԲԻ ԿԱԶՄԱՎՈՐՈՒՄԸ ԵՎ ԳՈՐԾՈՒՆԵՈՒԹՅԱՆ ԿԱԶՄԱԿԵՐՊՈՒՄԸ

5. Խմբի կանոնադրությունն ու անհատական կազմը հաստատում և փոփոխում է Հայաստանի Հանրապետության վարչապետը:

6. Խումբը կազմված է խմբի ղեկավարից և անդամներից:

7. Խումբն իր աշխատանքները կազմակերպում է նիստերի միջոցով, որոնք գումարվում են յուրաքանչյուր երկու ամիսը մեկ անգամ: Անհրաժեշտության դեպքում կարող են հրավիրվել արտահերթ նիստեր՝ սույն կանոնադրությամբ սահմանված կարգով:

Խմբի նիստերն արձանագրվում են:

8. Խումբն իր արտահերթ նիստերը գումարում է համակարգի ներդրման ընթացքում առաջացած հարցերի ու խնդիրների լուծման համար՝ խմբի ղեկավարի նախաձեռնությամբ կամ խմբի անդամների առնվազն 1/3-ի առաջարկությամբ:

9. Խմբի նիստն իրավազոր է, եթե դրան մասնակցում է խմբի անդամների կեսից ավելին:

10. Խմբի նիստը վարում է խմբի ղեկավարը, իսկ ղեկավարի բացակայության դեպքում՝ նրա հանձնարարությամբ՝ խմբի անդամներից մեկը:

Խմբի որոշումներն ընդունվում են ձայների պարզ մեծամասնությամբ: Ձայների հավասարության դեպքում խմբի ղեկավարի ձայնը վճռորոշ է:

11. Խմբի նիստի օրակարգի նախագիծը հաստատում է խմբի ղեկավարը: Խմբի յուրաքանչյուր անդամ իրավունք ունի հարց ներկայացնելու՝ օրակարգում ընդգրկելու համար: Առաջարկությունը խմբի ղեկավարին գրավոր ներկայացվում է հերթական նիստից առնվազն 5 օր առաջ՝ նշելով նաև հարցի պատրաստման պատասխանատուներին:

Օրակարգը կազմվում և համապատասխան փաստաթղթերի հետ միասին տրամադրվում է խմբի անդամներին՝ խմբի գումարվող նիստից 3 օր առաջ:

12. Օրակարգի որևէ հարցի քննարկման ընթացքում լրացուցիչ նյութեր կամ տեղեկատվություն պահանջվելու դեպքում հարցի քննարկումը տեղափոխվում է խմբի հաջորդ նիստ:

13. Խմբի նիստերը տեղի են ունենում Հայաստանի Հանրապետության սոցիալական ապահովության նախարարությունում, եթե խմբի ղեկավարը նիստի կայացման տեղի վերաբերյալ այլ որոշում չի ընդունում:

14. Յուրաքանչյուր նիստ սկսվում է նիստի օրակարգի հաստատմամբ և նախորդ նիստում ընդունված որոշումների կատարման ընթացքի մասին զեկուցմամբ:

15. Խմբի որոշումներն ստորագրում են խմբի ղեկավարը և քարտուղարը:

16. Առանձին դեպքերում խմբի նիստերին կարող են հրավիրվել օրակարգի հարցերին առնչություն ունեցող կազմակերպությունների կամ գերատեսչությունների ներկայացուցիչներ:

17. Խմբի աշխատանքային գործունեության կազմակերպչական-տեխնիկական ապահովումը, այդ թվում` օրակարգի նախագծի տրամադրումը, խմբի նիստի օրակարգում ներառված` քննարկման ենթակա հարցերին վերաբերող անհրաժեշտ փաստա-թղթերի նախապատրաստումն իրականացնում է Հայաստանի Հանրապետության սոցիալական ապահովության նախարարության սոցիալական ապահովագրության և կենսաթոշակային ապահովության վարչությունը:

IV. ԽՄԲԻ ՂԵԿԱՎԱՐԸ

18. Խմբի ղեկավարը՝

ա) կազմակերպում և ղեկավարում է խմբի աշխատանքները,

բ) պատասխանատու է խմբի աշխատանքների արդյունավետ իրականացումը կազմակերպելու համար:

V. ԽՄԲԻ ԱՆԴԱՄՆԵՐԸ

19. Խմբի անդամը՝

ա) մասնակցում է խմբի նիստերին, հանդես է գալիս որպես իրեն ներկայացրած կազմակերպության ներկայացուցիչ.

բ) խմբի ընդունած որոշումների մասին տեղեկացնում է իր վերադասին, նախապատրաստում ու ներկայացնում է առաջարկություններ իր ներկայացրած կազմակերպության կողմից համապատասխան քայլեր ձեռնարկելու և դրանք իրականացնելու վերաբերյալ.

գ) իր կազմակերպությունում պատասխանատու է համակարգի ներդրման հետ կապված աշխատանքների համար և խմբին պարբերաբար ներկայացնում է տեղեկատվություն կատարված աշխատանքների մասին:

20. Խմբի անդամ` մարզպետարանի ներկայացուցիչը՝

ա) կազմակերպում և իրականացնում է մարզի տարածքում գործող՝ համակարգի ներդրման գործընթացին մասնակից սոցիալական ծառայությունների տարածքային գործակալությունների, ինչպես նաև այլ պետական և տեղական ինքնակառավարման մարմինների համագործակցությունը.

բ) վերլուծում է մարզի տարածքում համակարգի ներդրման ընթացքում առաջացած խնդիրները, միջոցներ է ձեռնարկում դրանց լուծման համար, անհրաժեշտության դեպքում առաջարկություններ է ներկայացնում խմբին.

գ) միջոցներ է ձեռնարկում մարզի տարածքում գործող սոցիալական ծառայությունների տարածքային գործակալությունների կողմից՝ համակարգի ներդրմանն առնչվող իրավական ակտերի պատշաճ կիրառումն ապահովելու համար:

21. Խմբի այն անդամը, որը համաձայն չէ խմբի ընդունած որոշման հետ, ներկայացնում է իր գրավոր հատուկ կարծիքը, որի մասին նաև գրավոր զեկուցում է իր վերադասին:

Անհամաձայնության մասին գրավոր հատուկ կարծիքը կցվում է որոշմանը և գրառվում խմբի նիստի արձանագրության մեջ:

22. Խմբի անդամների թեկնածություններն առաջադրում է համապատասխան նախարարը կամ գերատեսչության ղեկավարը:

23. Խմբի անդամը հիմնական աշխատանքից ազատվելու պահից դադարում է խմբի անդամ լինելուց:

24. Խմբի անդամի պարտականությունները կարող են դադարեցվել համապատասխան նախարարի կամ գերատեսչության ղեկավարի առաջարկությամբ` Հայաստանի Հանրապետության վարչապետի որոշմամբ:

VI. ԽՄԲԻ ՔԱՐՏՈՒՂԱՐԸ

25. Խմբի քարտուղարին նշանակում է խմբի ղեկավարը` խմբի անդամներից:

26. Խմբի քարտուղարը՝

ա) արձանագրում է խմբի նիստը և դրա հիման վրա կազմում որոշման նախագիծը,

բ) նախապատրաստում է նիստի օրակարգին վերաբերող համապատասխան նյութերը և կազմակերպում դրանց տրամադրումը խմբի անդամներին,

գ) հետևում է խմբի որոշումների կատարմանը և խմբի նիստում զեկուցում դրանց կատարման ընթացքի մասին,

դ) վարում է խմբի աշխատանքների հետ կապված գործավարությունը,

ե) գրանցում է խմբի անդամների ներկայացրած գրավոր հատուկ կարծիքները,

զ) կազմակերպում է խմբի որոշումների համարակալումը և որոշումների պատճենները տրամադրում խմբի անդամներին,

է) խմբի որոշումները և նիստի արձանագրություններն ուղարկում է համապատասխան նախարարություններ ու գերատեսչություններ:

VII. ԽՄԲԻ ԿԱՆՈՆԱԴՐՈՒԹՅԱՆ ՄԵՋ ՓՈՓՈԽՈՒԹՅՈՒՆՆԵՐԻ ԵՎ ԼՐԱՑՈՒՄՆԵՐԻ ԿԱՏԱՐՈՒՄԸ

27. Խմբի կանոնադրության մեջ փոփոխությունների կամ լրացումների կատարման վերաբերյալ առաջարկությունները խմբի որոշմամբ ներկայացվում են նախարարին` անհրաժեշտության դեպքում՝ համապատասխան հիմնավորումներով, Հայաստանի Հանրապետության վարչապետին ներկայացնելու համար:

VIII. ԽՄԲԻ ԳՈՐԾՈՒՆԵՈՒԹՅԱՆ ԴԱԴԱՐԵՑՈՒՄԸ

28. Խմբի գործունեությունը դադարեցվում է Հայաստանի Հանրապետության վարչապետի որոշմամբ:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Հավելված N 2 ՀՀ վարչապետի 2003 թ. հուլիսի 8-ի N 309-Ն որոշման

Ա Ն Հ Ա Տ Ա Կ Ա Ն  Կ Ա Զ Մ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՆՀԱՏԱԿԱՆ ԾԱԾԿԱԳՐԵՐԻ ՀԱՄԱԿԱՐԳԻ ՆԵՐԴՐՄԱՆ ՄԻՋԳԵՐԱՏԵՍՉԱԿԱՆ ԱՇԽԱՏԱՆՔԱՅԻՆ ԽՄԲԻ

Ա. Պետրոսյան	- ՀՀ սոցիալական ապահովության նախարարի տեղակալ (խմբի ղեկավար)
Գ. Գևորգյան	- ՀՀ վիճակագրության պետական խորհրդի անդամ
Շ. Հարությունյան	- ՀՀ սոցիալական ապահովության նախարարության «Հայաստանի Հանրապետության զբաղվածության ծառայություն» գործակալության պետ
Տ. Հարությունյան	- ՀՀ կառավարության աշխատակազմի սոցիալական հարցերի վարչության գլխավոր մասնագետ
Ա. Ասատրյան	- ՀՀ սոցիալական ապահովության նախարարության սոցիալական ապահովագրության և կենսաթոշակային ապահովության վարչության պետ
Հ. Մատինյան	- ՀՀ սոցիալական ապահովագրության պետական հիմնադրամի նախագահի խորհրդական
Ն. Մուրադխանյան	- ՀՀ կառավարությանն առընթեր ՀՀ ոստիկանության անձնագրային և վիզաների վարչության պետի տեղակալ
Ս. Պատուրյան	- ՀՀ կառավարությանն առընթեր հարկային պետական ծառայության եկամուտների հաշվառման, պլանավորման և վերլուծության վարչության տվյալների մշակման և ամփոփման բաժնի պետ
Ռ. Զաքարյան	- Երևանի քաղաքապետարանի աշխատակազմի սոցիալական ապահովության վարչության պետ
Ա. Սարատիկյան	- «Նեմրութ» տեղեկատվավերլուծական կենտրոն» ՓԲԸ-ի տնօրեն
Գ. Ավետիսյան	- ՀՀ Արարատի մարզպետարանի առողջապահության և սոցիալական պաշտպանության վարչության պետ
Խ. Գևորգյան	- ՀՀ Վայոց ձորի մարզպետարանի առողջապահության և սոցիալական պաշտպանության վարչության պետ
Ռ. Դիլբարյան	- ՀՀ Լոռու մարզպետարանի առողջապահության և սոցիալական պաշտպանության վարչության պետ
Կ. Դովլաթբեկյան	- ՀՀ Տավուշի մարզպետարանի առողջապահության և սոցիալական պաշտպանության վարչության պետ
Ռ. Խաչատրյան	- ՀՀ Շիրակի մարզպետարանի առողջապահության և սոցիալական պաշտպանության վարչության պետ
Ա. Ծատրյան	- ՀՀ Սյունիքի մարզպետարանի առողջապահության և սոցիալական պաշտպանության վարչության պետ
Ա. Մելքոնյան	- ՀՀ Գեղարքունիքի մարզպետարանի առողջապահության և սոցիալական պաշտպանության վարչության պետ
Լ. Մուրադյան	- ՀՀ Արմավիրի մարզպետարանի առողջապահության և սոցիալական պաշտպանության վարչության պետ
Ս. Մուրադյան	- ՀՀ Կոտայքի մարզպետարանի առողջապահության և սոցիալական պաշտպանության վարչության պետ
Ա. Վերանյան	- ՀՀ Արագածոտնի մարզպետարանի առողջապահության և սոցիալական պաշտպանության վարչության պետ

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան